Isaià 18
18
Fampitandremana ny iraka etiôpianina
1Lozanao, ry tany misy ireo lakana manana elatra
izay manara-morona ny onin’i Etiôpia#18.1 lakana manana elatra: izany hoe lakana nanana lay anankiroa mivelatra. –Ny amin’i Etiôpia, dia jereo Tsef 2.12.!
2Irahinao ny masoivoho izay mandeha lakan-jozoro
eny ambonin’ny ranon’i Neily.
–Miverena ianareo, ry iraka faingam-pandeha,
any amin’ireo olona ranjanana sy malandilandy,
any amin’ilay firenena atahorana
hatreto ka hatrany am-paran’ny tany,
any amin’ilay firenena matanjaka
izay manosihosy ny fahavalony.
Miverena any amin’ny taninareo
izay vakivakîn’ny ony maro.
3Ianareo rehetra mponina amin’izao tontolo izao
ka mipetraka eto ambonin’ny tany,
mijere rehefa atsangana eny an-tendrombohitra
ny faneva famantarana,
mihainoa raha vao maneno ny anjomara.
4Fa izao no nolazain’ny TOMPO tamiko:
«Avy etỳ amin’ny fonenako ambony etỳ
no andinihako izay miseho,
ka tsy mihontsona mihitsy Aho
toy ny hafanana migaingaina apariakan’ny masoandro
sy toy ny raho-manify#18.4 raho-manify: rahona madinika mitsitokotoko sady toa tsy mihetsika eny ana habakabaka, araka ny hoe manao torim-boanjo ny lanitra rehefa fararano. amin’ny fotoam-pijinjana.»
5Fa alohan’ny fotoam-pijinjana,
rehefa tapitra namelana avokoa ny voaloboka
ary rehefa tonga voany mihamasaka ny voniny,
dia horantsanana amin’ny hety ny rantsany,
ary hotapahina ny sakeliny sy ny raviny.
6Izany rehetra izany dia hilaozana
ho an’ny vorona mpihaza eny an-tendrombohitra
sy ny bibidia eny ambonin’ny tany#18.6 Ny fanetezam-boaloboka faharoa ka amelàna ny rantsana aman-draviny tapaka ho maina am-pitoerana no anoharan’ny mpaminany etoana ny fatin’ny miaramila etiôpianina avela ho an’ny vorona mpihaza sy ho an’ny bibidia eo amin’ny toeram-piadiana.;
ao no handany fahavaratra ny vorona mpihaza
ary handany ririnina ny bibidia rehetra.
7Amin’izany fotoana izany
dia hanolotra fanomezana
ho an’ny TOMPOn’izao rehetra izao
ireo olona ranjanana sy malandilandy,
dia ilay firenena atahorana
hatreto ka hatrany am-paran’ny tany,
ilay firenena matanjaka
izay manosihosy ny fahavalony
sady vakivakîn’ny ony maro ny taniny.
Any an-tendrombohitra Tsiôna
izay hitoeran’ny TOMPOn’izao rehetra izao
no hanolorany izany fanomezana izany.
Voafantina amin'izao fotoana izao:
Isaià 18: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.