Hôsea 13
13
Ny fahafatesan’ny vahoaka nikomy tamin’Andriamanitra
1Rehefa niteny i Efraîma,
dia nampatahotra ny besinimaro izy
ka nahery tao Israely.
Fa ny nanompoany an’i Bahala
no nahameloka sy nahafaty azy.
2Ankehitriny mikiribiby manota izy,
ka mandrendrika volafotsy
hanaovana sarivongan-tsampy
araka ny hakingany mamorona azy.
Asan’ny mpahay taozavatra avokoa ireny
kanefa dia lazainy hoe:
«Anolory sorona izy#13.2 anolory sorona izy: araka ny dkt tranainy anankiroa; –mitsaoka ombilahikely mampahatsiahy ny zanak’omby volamena (jereo 8.5 sy nta).!»
Olombelona no mitsaoka ombilahikely!
3Ho toy ny rahona vao maraina izy
ary ho toy ny ranon’ando
ka ho levona vetivety;
eny, ho toy ny akofa paohin-drivotra
hiala amin’ny famoloana izy
ary ho toy ny setroka
mivoaka amin’ny varavarankely.
4Fa Izaho no TOMPO Andriamanitrao,
hatry ny fony ianao tany Ejipta;
ary ianao dia tsy mahafantatra
andriamani-kafa ankoatrako
sy mpamonjy afa-tsy Izaho.
5Izaho no mpiandry anao#13.5 no mpiandry anao: araka ireo dkt tranainy grika; ny hebreo: mahalala anao.;
fony ianao tany an-taniefitra
tany amin’ny tany karankaina.
6Nony mby teo amin’ny ahi-maitso ianao
dia afa nivoky tokoa.
Eny, voky ianao, ka niavonavom-po#13.6 And 5-6: jereo Deot 8.11-18.;
izany no nanadinoanao Ahy.
7Koa tonga toy ny liona Aho
aminareo Israelita,
ary koa tahaka ny pantèra
mamitsaka amoron-dalana.
8Toy ny famelin’ny orsa very zanaka
no amelezako anareo,
ka rotehiko ny tratranareo.
Toy ny fandrapaky ny liom-bavy
no andrapahako anareo;
ny bibidia no hamiravira ny fatinareo.
9Ny maharingana anao, ry Israely,
dia noho ianao manohitra Ahy
Izay hany mahavonjy anao.
10Aiza àry izao ny mpanjakanao
izay tokony hamonjy anao?
Amin’ny tanànanao rehetra,
aiza koa ireo mpitondra anao?
Fa ianao ihany no nanao hoe:
«Omeo mpanjaka sy filoha aho#13.10 omeo mpanjaka aho: 1 Sam 8.5-6.».
11Koa tamim-pahatezerana
no nanomezako mpanjaka anao,
ary tamim-pahavinirana
no nanesorako ireny indray#13.11 Jereo 1 Sam 10.17-24; 15.26; jereo koa Hôs 10.15; 1 Mp 16.12; 18-19; 22.37-38; 2 Mp 9.24-26..
12Voatana an-tsoratra
ny helok’i Efraîma,
tsara tahiry ny fahotany.
13Tahaka ny an’ny vehivavy hiteraka
no fanaintainana mahazo azy.
Kanefa dia zaza adaladala:
tsy mety mivoaka avy ao an-kibo izy,
na dia efa tonga aza ny fotoany.
14Izaho TOMPO ve hanavotra ireo olona ireo
tsy ho voagejan’ny fahafatesana,
ka hanafaka azy amin’ny toeran’ny maty?
Rafahafatesana ô,
aiza ny aretina fandringananao?
Ry toeran’ny maty ô,
aiza ny loza fandripahanao#13.14 Lazain’ny apôstôly Paoly malalaka ireo teny ireo ao amin’ny 1Kôr 15.55 ary raisiny ho toy ny fihaikana ny fahafatesana.?
Tsy hana-maso miantra Aho.
15Fa na dia miroborobo aza i Efraîma
eo anivon’ireo mpiray firenena aminy,
dia hiakatra avy any an-taniefitra
ny rivotra avy atsinanana;
ka ny TOMPO no handefa izany.
Dia ho ritra ny loharanony
ary ho tànkina ny fantsakàny.
Hobaboina ny tahiriny,
dia ny fanaka sarobidy rehetra.
Voafantina amin'izao fotoana izao:
Hôsea 13: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.