Habakòka 3
3
Vavak’i Habakòka
1Izao no vavaka miendrika fitarainana nataon’i Habakòka mpaminany.
2TOMPO ô, efa reko izay nambaranao#3.2 izay nambaranao: dkt hafa ny lazanao.
ka dia raiki-tahotra aho.
TOMPO ô, enga anie ny asanao
mba ho velombelona hatrany
amin’izao andronay izao;
eny, amin’izao andronay izao
no ataovy fantatry ny olona izany.
Fa na dia tezitra aza Ianao,
asehoy anay ihany ny indrafonao.
3Tonga avy any Temàna Andriamanitra;
Ilay Andriamanitra masina no tamy
avy any an-tendrombohitra Paràna#3.3 Temàna: faritanin’ny fanjakan’i Edôma, ao atsimo atsinanan’i Joda. –Ny tendrombohitra Paràna dia ao amin’ny taniefitra izay ao atsimon’i Palestinina (jereo Deot 33.2)..
Manarona ny lanitra ny voninahiny
ary maneran-tany ny fiderana Azy.
4Famirapiratana toy ny fahazavana
no teo ambanin’Andriamanitra;
misy tanà-masoandro avy eo amin’ny tanany,
dia ny tanany izay iafenan’ny heriny.
5Areti-mandringana no alefany mialoha Azy,
ary tazomahery no mipoitra manaraka ny diany.
6Mihorohoro ny tany, rehefa mijadona Izy.
Vao jereny ny firenena, dia mangovitra.
Torotoro ireo tendrombohitra mandrakizay,
mietry ireo havoana fahagola,
dia ireo havoana fandalovany taloha.
7Hitako ny fahorian’ireo vahoakan’i Kosàna
sy ny horohoron’ireo mponin’i Midiàna#3.7 Ny hoe Kosàna dia mety hoenti-milaza ireo olona mpifindrafindra fonenana tao amin’ny taniefitr’i Sinay, dia tahaka ny Midianita izany..
8Moa ny ony va, TOMPO ô,
no irehetan’ny fahatezeranao
sa ny ranomasina no isafoahanao,
no dia ny rahona no toa kalesy tarihin-tsoavaly
itaingenanao mba hahazoam-pandresena?
9Nalanao sarona hohenjanina ny tsipîkanao;
ka dia ireo fianianana izay notononinao
no toy ny zana-tsipîka alefanao.
Tonga mitresatresaka ny tany
nikorianan’ny ranon-driaka.
10Nahita Anao ny tendrombohitra ka tora-kovitra;
mandrotsaka orambe ny rahona,
mirohondrohona ny ranomasimbe
ka manainga onja hatreny amin’ny lanitra.
11Noho ny zana-tsipîkanao mamiratra mitsoriaka,
noho ny lefonao manjelanjelatra mahajemby,
dia tsy nahahetsika ny masoandro sy ny volana.
12Mitety ny tany amim-pahatezerana Ianao,
ary manosihosy ny firenena amim-pahavinirana.
13Niainga hamonjy ny olonao Ianao,
eny, hamonjy ilay vahoaka voahosotrao.
Aonganao ny filohan’ny andian’olon-dratsy;
hatratỳ am-potony ka hatrany an-tampony
no amotehanao izany andian’olon-dratsy izany.
14Ny zana-tsipîkany ihany no anagorobahanao
ny lohan’ireo mpitari-tafika fahavalo.
Mibosesika toy ny tadio mahery izy,
ka faly hampihahaka anay toy ny ampombo
sady handevona mangingina izay resiny.
15Ny nanokafanao lalana
dia teo anivon’ny ranomasina;
ny soavalim-pahavalo kosa tafahitsoka
tao amin’ny fisamboaravoaran’ny onja mahery.
16Reko avokoa izany ka dia mangotika aho.
Mipararetry ny tahotra koa ny molotro.
Mihaosa ny tenako ka mangozohozo famindra.
Eny, am-pahanginana no tsy maintsy iandrasako
ny androm-pahoriana hamelezan’Andriamanitra
ity vahoaka izay mamoritra anay ity.
17Fa na dia tsy mamontsina aza ny aviavy
ary tsy manome voa ny voaloboka,
na dia tsy mahavanona aza ny ôliva
ary tsy mahavokatra hanina ny saha,
na dia voapaoka aza ny ondry ao am-pahitra
ary tsy misy omby intsony ao am-bala,
18dia mbola ho faly sy ravo ihany aho
satria ny TOMPO Andriamanitra no Mpamonjy ahy.
19Ny TOMPO Andriamanitra no heriko;
mampalady ahy toy ny dieravavy Izy
ka mampiriaria ahy eny an-kavoana.
Tao amin’ny tahirin-kiran’ny filohan’antoko-mpihira: hohiraina miaraka amin’ny valiha#3.19 Teny fahita eo am-piandohan’ny Salamo sasany (jereo Sal 4; 6; 54; 67; 76)..
Voafantina amin'izao fotoana izao:
Habakòka 3: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.