Genesỳ 31
31
1Kanefa ren’i Jakôba fa ny zanakalahin’i Labàna efa nilaza hoe: «Lasan’i Jakôba avokoa ny fananan-draintsika, ary avy tamin’izany fananan-draintsika izany no nananany izao harena rehetra izao.» 2Hitan’i Jakôba nisoritra teny amin’ny tarehin’i Labàna fa tsy toy ny teo aloha intsony ny fiarahany aminy. 3Koa hoy ny TOMPO tamin’i Jakôba:
–Miverena any amin’ny tanin’ny razanao sy any amin’ny fianakavianao, fa homba anao Aho!
4Ary i Jakôba nampiantso an’i Rahely sy i Leà ho any aminy tany an-tsaha izay nisy ny andian’ondry aman’osiny, 5ka nilaza tamin’izy mirahavavy hoe:
–Hitako nisoritra teny amin’ny endriky ny rainareo fa tsy tahaka ny teo aloha intsony ny fifandraisany amiko, kanefa ilay Andriamanitry ny raiko efa nanambina ahy. 6Fantatrareo fa tamin’ny heriko rehetra no nanompoako an-drainareo, 7kanefa namitaka ahy izy fa efa nanova ny karamako impolo. Saingy tsy navelan’Andriamanitra hanisy ratsy ahy izy. 8Raha nilaza izy hoe: «Ny biby maramara rehetra no ho karamanao,» dia niteraka maramara avokoa ny ondry aman’osy vavy rehetra. Ary raha hoy indray izy hoe: «Ny sadìka no karamanao,» dia niteraka sadìka avokoa ny ondry aman’osy vavy rehetra. 9Andriamanitra mihitsy no nanaisotra ny fananan-drainareo mba homeny ahy. 10Tamin’ny fotoana nikambanan’ny biby dia hitako tamin’ny nofy fa ny lahy sadìka sy maramara ary sada no nikambana tamin’ny vavy. 11Ka nantsoin’ny anjelin’Andriamanitra tamin’ny nofy aho nataony hoe: «Ry Jakôba ô!», dia namaly aho hoe: «Inty aho.» 12Ka hoy izy tamiko: «Jereo fa ny lahy rehetra izay mikambana amin’ny ondrivavy na osivavy, dia sadìka sy maramara ary sada avokoa, satria efa hitako izay rehetra nataon’i Labàna taminao. 13Izaho no Andriamanitra Izay niseho taminao tao Betela, ka nanosoranao tsangambato sy nivoadianao#31.13 nivoadianao...: jereo Gen 28.18-22.. Miaingà ankehitriny, ilaozy ity tany ity ka miverena any amin’ny tany misy ny fianakavianao.»
14Dia namaly an’i Jakôba i Leà sy i Rahely ka nanao hoe:
–Inona intsony moa no anjaranay sy lovanay ato an-tranon’i dada? 15Moa tsy efa noheveriny ho toy ny vahiny ve izahay ka namidiny? Ary tsy efa nohaniny koa ve ny volanay? 16Noho izany, ny harena efa nesorin’Andriamanitra tamin’ny rainay dia ho anay sy ny zanakay. Koa ankehitriny, tanteraho izay rehetra nolazain’Andriamanitra taminao.
17Ary niainga i Jakôba ka natainginy teny ambony rameva ireo vady aman-janany; 18nentiny ny biby fiompiny rehetra sy ny fananany rehetra izay noharîny tany Mezôpôtamia ambony, dia nizotra hankany amin’i Itsehàka rainy, any amin’ny tany Kanahàna izy. 19I Labàna tamin’izay dia lasa nanety ny ondry aman’osiny; ka nangalarin’i Rahely ny sampin-drainy. 20Namitaka an’i Labàna aramianina i Jakôba fa nandositra tsy niteniteny. 21Nandositra niaraka tamin’ny fananany rehetra izy, ka niampita faingana ny ony Eofrata ary nizotra hankany an-tendrombohitr’i Gilehada.
22Nony afaka telo andro, dia nisy nitantara tamin’i Labàna fa nandositra i Jakôba. 23Nentin’i Labàna niaraka taminy ny havany, dia nanenjika an’i Jakôba tokony ho lalana fito andro izy, ka nahatratra azy teo an-tendrombohitr’i Gilehada. 24Tonga tany amin’i Labàna aramianina tamin’ny nofy anefa Andriamanitra nony alina ka nilaza taminy hoe:
–Mampitandrina anao Aho mba tsy hanao na inona na inona amin’i Jakôba!
25Dia nahatratra an’i Jakôba i Labàna, fony i Jakôba efa nanorina ny lainy teo an-tendrombohitr’i Gilehada; ary i Labàna sy ny havany koa nanorina ny lainy teo 26ka nilaza tamin’i Jakôba hoe:
–Inona izao nataonao izao? Nahoana no namitaka ahy ianao, ka nentinao mandositra toy ny babo an’ady ireo zanako vavy? 27Nahoana no nandositra an-tsokosoko ianao ka namitaka ahy? Raha nampandre ahy anefa ianao, dia ho nateriko nombàn’ny hiram-pifaliana sy ny ampongatapaka ary ny lokanga. 28Kanefa tsy navelanao hanoroka ny zanako aman-jafiko akory aho, koa dia efa nanao hadalana ianao. 29Afaka manisy ratsy anao aho, kanefa Ilay Andriamanitry ny rainao dia nilaza tamiko halina hoe: «Mampitandrina anao Aho mba tsy hanao na inona na inona amin’i Jakôba.» 30Ary ankehitriny mandeha mody tokoa ianao satria manina ny akanin-drainao, kanefa nahoana no nangalarinao ireo sampiko?
31Namaly an’i Labàna kosa i Jakôba hoe:
–Natahotra aho, dia niteny anakampo hoe: «Sao alainy an-keriny amiko ireo zanany vavy!» 32Fa raha misy ahatraranao ireo sampinao kosa ny oloko, dia aza velomina. Eto anatrehan’ireo havantsika, dia savao avokoa izay eto amiko, dia ento ny anao.
Fa i Jakôba dia tsy nahalala velively hoe i Rahely no nangalatra ny sampy.
33Nidiran’i Labàna ny lain’i Jakôba sy ny an’i Leà ary ny an’ireo mpanompovavy roa fa tsy nahita izy. Ary nivoaka avy tao amin’ny lain’i Leà izy, dia niditra tao amin’ny lain’i Rahely. 34I Rahely anefa no naka ireo sampy ka nametraka azy tao ambanin’ny laselin’ny rameva dia nipetraka teo amboniny. Ka rehefa nisava ny lay manontolo i Labàna, dia tsy nahita na inona na inona. 35Dia hoy i Rahely tamin’ny rainy:
–Azafady eo imasonao, tompoko, fa tsy afa-mitsangana eo anatrehanao aho fa tonga fotoana. Dia nikaroka i Labàna fa tsy nahita ireo sampy. 36Tezitra i Jakôba ka nifamaly tamin’i Labàna nanao hoe:
–Inona no fahadisoako, ary inona no heloko no dia nilomay nanenjika ahy ianao? 37Nosavanao ny entako rehetra, ka inona no hitanao? Asehoy eo imason’ny havanao sy ireo havako izany hitsarany antsika. 38Roapolo taona izao no efa niarahako taminao, nefa ny ondrivavinao aman’osivavinao tsy mba namotsotra; sady tsy mbola nihinana ondrilahy tamin’ny andian’ondrinao na oviana na oviana aho. 39Tsy mbola nitondra ireo fatim-biby voaviraviran’ny bibidia tany aminao mihitsy aho, fa izaho no nanolo azy; teo am-pelatanako no nitadiavanao izay nangalarin’olona na tamin’ny andro na tamin’ny alina#31.39 Ampit Eks 22.12; Ham 3.12. Ny mpiandry ondry, izay afaka mitondra ireo sisa tsy lanin’ny biby, dia tsy mizaka ny fahavoazana teo amin’ny zavatra very.. 40Niaritra ny hafanana amin’ny antoandro aho, ary jihitry ny hatsiaka amin’ny alina ka tsy nopizin-tory akory. 41Efa roapolo taona izao no nanompoako anao: efatra ambin’ny folo taona no niasako mba hanambadiako ny zanakao roa vavy, ary enin-taona mba hahazoako ondry aman’osy, saingy efa impolo kely ianao no nanova ny karamako. 42Raha tsy nomba ahy ny Andriamanitr’i Abrahama raibeko, ilay Andriamanitra nampihorohoro an’i Itsehàka#31.42 Anaram-boninahitra nomena an’Andriamanitra izany; dkt hafa: ilay havan’i Itsehàka. , dia ho nalefanao nitondra tanam-polo aho ankehitriny. Fa nahita ny fijaliako sy ny hasasarako Andriamanitra ka nananatra anao halina.
43Dia namaly an’i Jakôba i Labàna hoe:
–Ireo zazavavy ireo dia zanako, ny zanak’ireo dia taranako, ny andian’ondry aman’osy dia ondry aman’osiko, ary izao rehetra hitanao izao dia ahy avokoa. Manomboka anio dia tsy misy na inona na inona azoko atao intsony ho an’ireto zanako vavy ireto na ho an’ireo zanakalahy izay naterany? 44Koa andeha ankehitriny hanao fifanekena izaho sy ianao, ary aoka hisy vavolombelon’izany eo amintsika.
45Dia naka vato anankiray i Jakôba ka nanangana azy ho tsangambato. 46Avy eo nasain’i Jakôba nanangona vato iretsy havany an-daniny, dia naka vato ireo ka nanao antontany; ary nihinana teo ambonin’io antontam-bato io ny besinimaro. 47Nantsoin’i Labàna hoe Jegara-Sahadotà#31.47 Jegara-Sahadotà dia dikanteny aramianina tandrifin’ny teny hebreo Galehèda (antontam-bato vavolombelona). io toerana io, fa i Jakôba kosa nanao azy hoe Galeheda. 48Ary izao no nambaran’i Labàna:
–Ity antontam-bato ity dia vavolombelona eo amiko sy aminao androany.
Izany no niantsoana azy ho Galeheda, izany hoe antontam-bato vavolombelona. 49Nantsoina koa hoe Mitsepà, na toerana fanaraha-maso, satria i Labàna efa nilaza hoe:
–Aoka ny TOMPO hanara-maso ahy sy ianao, rehefa tsy mifankahita isika! 50Raha mampijaly ny zanako vavy ianao, na maka vehivavy hafa ho vadinao, dia tandremo fa tsy olona no vavolombelontsika fa Andriamanitra mihitsy.
51Avy teo dia hoy koa i Labàna tamin’i Jakôba:
–Jereo ity antontam-bato izay naoriko teo, jereo io tsangambato io. 52Ity antontam-bato ity sy io tsangambato io no vavolombelona amintsika, ka izaho mianiana tsy hihoatra hankany aminao hanisy ratsy anao ary ianao mianiana tsy hihoatra hankaty amiko hanisy ratsy#31.52 hanisy ratsy: dkt hafa fandrao hiharan-doza. ahy. 53Aoka Andriamanitr’i Abrahama sady Andriamanitr’i Nahôra no ho mpitsara antsika#31.53 Nahôra: rahalahin’i Abrahama (Gen 11.26) sady raiben’i Labàna (Gen 24.24-29). Ny narahana eto dia ireo stf hebreo sasany sy ilay dikanteny tranainy grika izay tsy manisy hoe Andriamanitry ny razany. !
Dia ilay Andriamanitra Izay nampihorohoro an’i Itsehàka rainy no nianianan’i Jakôba. 54Ary nanolotra sorona teo an-tendrombohitra i Jakôba ka nanasa ireto havany hiara-misakafo aminy. Ary rehefa avy nisakafo ny besinimaro, dia nandry teo an-tendrombohitra tamin’ny alina.
Voafantina amin'izao fotoana izao:
Genesỳ 31: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.