Hezrà 7
7
I Hezrà mpisorona
1Tatỳ aoriana, tamin’ny andro nanjakàn’i Artakserksesa amperôran’i Persia, no nipoiran’i Hezrà. Io Hezrà io dia zanakalahin’i Seraià sy zafin’i Hazarià sy zafiafin’i Hilkià 2sy zafin-dohalik’i Saloma sy zafin-kitrokelin’i Tsadôka sy zafim-paladian’i Ahitoba 3ary zafin-dorian’i Amarià, dia i Amarià zanakalahin’i Hazarià sy zafin’i Meraiôta 4sy zafiafin’i Zerahià sy zafin-dohalik’i Hozy sy zafin-kitrokelin’i Boky 5sy zafim-paladian’i Abisoa ary zafin-dorian’i Pinehasa, dia i Pinehasa zanakalahin’i Elehazara sy zafin’i Aharôna mpisorombe. 6Niakatra avy tany Babilôna i Hezrà; mpahay lalàna izy, ka fatra-pahalala tokoa ny lalàna izay nampitain’ny TOMPO Andriamanitr’i Israely tamin’i Mosesy. Nomen’ny amperôra an’i Hezrà avokoa izay rehetra nangatahiny, noho izy nombàn’ny herin’Ilay TOMPO Andriamaniny#7.6 I Hezrà mpisorona dia toa mpiasam-panjakana ambony tao an-dapan’ny amperôran’i Persia sady mpahay lalàna jiosy nikoizana ary nijoro tamin-kafanam-po hiaro ny finoana jiosy.. 7Tamin’ny taona fahafito nanjakàn’i Artakserksesa no nisy Israelita niverina tany Jerosalema, dia mpisorona sy levita mbamina mpihira sy mpiandry varavarana ary mpanampy ny levita. 8Niaraka tamin’ireo i Hezrà ka tonga tany Jerosalema tamin’ny volana fahadimin’io#7.8 Tamin’ny taona 458 na 398 tal J.K., volana jolay-aogositra (jereo ny naoty tandrifin’ny 7.1) taona fahafito nanjakàn’i Artakserksesa io. 9Ny andro voalohan’ny volana voalohany no niaingan’i Hezrà avy tany Babilôna; ary ny andro voalohan’ny volana fahadimy no nahatongavany tao Jerosalema noho ny fiarovana mahery nombàn’Andriamanitra azy. 10I Hezrà manko dia efa niorim-po hianatra ny lalànan’ny TOMPO sy hanatanteraka azy ary hampianatra ny didy amam-pitsipika raketiny.
Ny andraikitra ankinin’i Artakserksesa amin’i Hezrà
11Izao no kôpian’ilay taratasy nomen’i Artakserksesa an’i Hezrà mpisorona izay mpahay lalàna fatra-pahalala ny antsipirian’ireo didy aman-dalàn’ny TOMPO ho an’i Israely:
12«Avy amiko Artakserksesa#7.12 Ny rijan-teny fototra momba ny and 12-26 dia amin’ny fiteny aramianina., mpanjakan’ny mpanjaka, ity taratasy ho an’i Hezrà mpisorona izay mpahay lalana fatra-pahalala ny lalànan’Ilay Andriamanitry ny lanitra. Mamangy anao aho sns...
13«Manao didy aho fa na iza na iza Israelita eto amin’ny fanjakako, na sarambabem-bahoaka na mpisorona na levita, no te hiaraka aminao hankany Jerosalema, dia mahazo mandeha izy. 14Fa izaho sy izy fito lahy mpanolotsaiko dia maniraka anao any Jerosalema sy any Joda mba handinika raha mifanaraka amin’ilay lalànan’Andriamanitrao izay any an-tananao ny toetran’ny Jiosy. 15Irahinay koa ianao hitondra ny volafotsy sy volamena izay efa sitrako sy sitrak’ireo mpanolotsaiko nomena ho an’Ilay Andriamanitr’i Israely Izay ao Jerosalema no fonenany; 16ary dia hoentinao koa ny fanomezana rehetra volafotsy sy volamena izay ho azonao eran’ny faritr’i Babilôna, miaraka amin’ny fanomezana an-tsitrapo aterin’ireo mpiray firenena aminao na mpisorona na sarambabem-bahoaka, mba ho an’ny tranon’Ilay Andriamaniny izay any Jerosalema. 17Koa himasoanao ny hividy amin’io vola io ny ombilahy sy ondrilahy ary zanakondry mbamin’izay ilaina hatao fanatitra hohanina sy fanatitra araraka; dia haterinao eo ambonin’ny alitara ao an-tranon’Andriamanitrareo any Jerosalema ireny. 18Izay heverinao sy ny Israelita mpiara-dia aminao hatao amin’ny volafotsy sy volamena sisa dia ataovy araka ny sitrapon’Andriamanitrareo. 19Ny fanaka nomena anao ho an’ny fanompoam-pivavahana ao an-tranon’Andriamanitrao dia apetraho eo anatrehan’Andriamanitra any Jerosalema. 20Ary izay rehetra mbola hilaina ho an’io trano io ka tsy maintsy hiantsorohanao, dia ny tahirim-bolam-panjakana no hampandoavinao azy.
21«Izaho, Artakserksesa amperôra, dia manao izao didy izao ho anareo rehetra mpitahiry harem-panjakana any andafy andrefan’ny ony Eofrata; iny i Hezrà mpisorona, izay mpahay lalàna fatra-pahalala ny lalànan’ilay Andriamanitry ny lanitra; na inona na inona ilainy ka takîny aminareo, dia hotanterahina tsy misy tomika izany. 22Hatolotrareo an’i Hezrà hatramin’ny volafotsy 3 400 kilao sy ny varimbazaha telo alina kilao, ny divay efatra arivo litatra sy ny menaka efatra arivo litatra ary ny sira araka izay tiany. 23Na inona na inona andidian’ilay Andriamanitry ny lanitra momba izany tranony izany, dia hotanterahina haingana mba tsy hiharan’ny fahatezerany amin’ny fanjakako sy amin’ny tenako ary amin’ny taranako. 24Ampahafantarinay anareo mpitahiry harem-panjakana koa fa ny mpisorona sy ny levita, ny mpihira sy mpiandry varavarana, ary ny mpanampy sy mpiasa hafa ao amin’io tranon’Andriamanitra io dia tsy mba hampandoavina hetra na haba na sara.
25«Ary ianao, ry Hezrà, araka ny fahendren’ny lalànan’Andriamanitrao izay eny an-tananao, dia manendre mpanapaka sy mpitsara mba hitsara ny olona rehetra mahalala ny lalànan’Andriamanitrao amin’ny mponina any andafy andrefan’ny ony Eofrata; fa izay tsy mbola mahalala izany lalàna izany kosa dia aoka hampianarinareo. 26Ary na iza na iza tsy mety mankatò ny lalànan’Andriamanitrao sy ny lalànan’ny amperôra, dia aoka izy hotsaraina araka ny rariny ka hovonoina, na horoahina#7.26 horoahina na hoe hesorina tsy ho anisan’ny vahoaka israelita. , na hosazîna vola, na hatao am-ponja».
Misaotra an’Andriamanitra i Hezrà
27«Hankalazaina anie ny TOMPO#7.27 Manomboka eto amin’ny 7.27 dia amin’ny fiteny hebreo indray ny rijan-teny fototra. Andriamanitry ny razanay, hoy i Hezrà. Fa Izy no nanoro hevitra ny amperôra hanatsara endrika ny tranony any Jerosalema; 28sady teo anatrehan’ny amperôra sy ireo mpanolotsainy ary ny manampahefana rehetra manodidina azy koa no nanehoany fitiavana ahy. Ary nampaherezin’ny fiarovan’ny TOMPO Andriamanitro aho ka nahangona loholona israelita mba hiara-miverina amiko any an-tanindrazana».
Voafantina amin'izao fotoana izao:
Hezrà 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.