Ezekiela 45
45
Ny faritany voatokana
1«Rehefa mizara ny tany ho an’ny isam-poko eo amin’ny Israelita ianareo, dia hisy ampahany havahanareo ho an’ny TOMPO: anjara voatokana ho Azy amin’ny tany izany ka hisy 12 km sy sasany ny lavany ary 10 km ny sakany#45.1 ary 10 km: araka ny dkt tranainy grika izany; fa ny RM kosa manao hoe ary 5 km. ; voatokana manontolo ho an’ny Tompo izany faritany izany. 2-3Io faritany io no hamaritana vakim-paritra iray izay mirefy 12 km sy sasany ny lavany ary 5 km ny sakany. Ao anatin’io vakim-paritra io dia hisy tany ho an’ny tempoly: tany iray efamira ka samy 250 metatra avy ny lafiny tsirairay sady voahodidina toera-malalaka 25 metatra ny velarany, ka ao no hisy ny tempoly izay toerana manan-kasina fatratra. 4Ho masina io vakim-paritra io eo amin’ny tany fa natokana ho an’ny mpisorona izay manatanteraka ny asa fanompoana ny TOMPO ao an-tempoly. Amin’izay tokoa dia hisy toerana ho an’ny tranon’ireo mpisorona sy toerana voatokana ho an’ny tempoly. 5Ilay vakim-paritra iray hafa, mirefy 12 km sy sasany ny lavany ary 5 km ny sakany, dia natokana ho an’ny levita izay manana anjara raharaha ao amin’ny tempoly. Hanana tanàna izay honenany ao koa ireny#45.5 tanàna izay honenany ao koa ireny: araka ny dkt tranainy grika izany; fa ny RM kosa manao hoe efitrano roapolo. . 6Manaraka ny halavan’io faritra izay natokana ho an’ny Tompo io, dia hamaritana vakim-paritra iray hafa koa izay mirefy 12 km sy sasany ny lavany ary 2 km sy sasany ny sakany mba hanorenana tanàna iray ahazoan’ny Israelita tsirairay monina. 7Ny printsy filoha#45.7 Jereo ny naoty momba ny 44.3. dia homena tany iray eo anelanelan’ny faritra voatokana ho an’ny Tompo sy ny toerana misy ny tanànan’ny Israelita. Izany tany izany dia hitohy miankandrefana hatrany amin’ny Ranomasina Mediteranea ary miantsinanana hatrany amin’ny sisin-tanin’i Israely any atsinanana. Hitovy halava amin’ny zaratanin’ny foko tsirairay izy. 8Koa ireo printsy dia hanana ny anjara taniny manokana ao Israely ka tsy hampahory ny vahoakan’ny Tompo intsony izy, fa hamela ny faritra sisa amin’ny tany ho an’ireo fokon’i Israely.»
Ny zo sy adidin’ilay printsy filoha
9Izao no lazain’ny Tompo ANDRIANANAHARY: «Tafahoatra loatra ny nataonareo, ry printsy filohan’i Israely. Koa ialao ny herisetra sy ny fitondrana jadona, manaova ny rariny sy ny hitsiny, atsaharo ny fandrobanareo ny vahoakako. Teny hentitra avy amiko Tompo ANDRIANANAHARY izany.
10«Aoka samy hampiasa mizàna sy fandrefesana marina. 11Ny efà ho an’ny voa madinika ary ny bata ho an’ny ranon-javatra, hitovy fatra ireo famarana roa ireo ka samy hahalany ampahafolon’ny hômera avy, fa ny hômera no ho fatra fototra#45.11 Ny hômera no famarana lehibe ho an’ny voamaina mitovy amin’ny 450 litatra na 300 kilao eo ho eo. Ny efà dia tokony ho 30 kilao any ho any ary ny bata dia 45 litatra.. 12Ny sekela volafotsy dia ho gera roapolo#45.12 Ny gera dia milanja mihoatra kely ny 0,55 grama, ary ny mina dia tokony ho 680 grama any ho any., ary ny sekela enimpolo kosa no ho mina iray.
13Toy izao no ampahany havahanareo amin’ny fanatitra ataonareo: ampahenimpolon’ny vokatra varimbazaha na vary ôrza, 14ary ampahazaton’ny vokatra diloilo no homenareo. Ny bata iray misy ampahafolon’ny hômera sy ampahafolon’ny kôra no hamaranareo ny diloilo. 15Ary farany momba ny biby fiompy eny amin’ny kijànan’i Israely: iray isaky ny ondry na osy roanjato no havahanareo. Ka izay navahanareo dia hatolotrareo ho fanatitra vokatry ny tany na ho sorona dorana manontolo na ho sorom-pihavanana mba hahazoanareo famelan-keloka. Teny hentitra avy amiko Tompo ANDRIANANAHARY izany.
16«Ny olona rehetra eo amin’ny tany no hanefa izany tolotra izany ho an’ny printsy filohan’i Israely#45.16 Jereo ny naoty momba ny 44.3.. 17Io printsy filohan’i Israely io kosa no hiantoka ny sorona dorana manontolo ary ny fanatitra lafarinina sy divay mandritra ny fety, indrindra fa amin’ny voaloham-bolana sy ny andro sabata ary ny fotoana hafa rehetra fivorian’ny vahoakan’i Israely. Eny, ny printsy filoha no hiantoka ny sorona fanalana ny ota sy ny fanatitra vokatry ny tany ary ny sorona dorana manontolo sy ny sorom-pihavanana mba hahazoana famelan-keloka ho an’ny vahoakan’i Israely.»
18Izao koa no lazain’ny Tompo ANDRIANANAHARY: «Amin’ny andro voalohan’ny volana voalohany#45.18 Ny volana voalohany amin’ny taona israelita dia manandrify ny Marsa-Avrily amin’ny fanisanandrontsika ankehitriny. Volana Nisàna na Abiba no fiantso azy. dia hatao sorona ny ombilahy iray tsy misy kilema mba hanadiovana ny Toeramasina. 19Hangalan’ny mpisorona ny ran’ilay biby natao sorona ka hatentiny amin’ireo tolam-bavahadin’ny tempoly sy amin’ireo zoro efatry ny marin-tampon’ny alitara ary amin’ireo tolam-bavahadin’ny kianja anatiny. 20Tahaka izany koa no hatao amin’ny andro fahafiton’io volana io ho an’izay olona nanota tsy nahy na tsy amim-pahalalana. Toy izany no hanadiovana ny tempoly.
21«Ny andro faha-14 amin’ny volana voalohany no hanombohanareo mankalaza ny fetin’ny Paska. Haharitra fito andro izany, ka mandritra izany no hihinananareo mofo tsy misy leviora. 22Ny andro voalohany amin’ny fety no hanoloran’ny printsy filoha ombilahy iray hatao sorona fanalana ny ota ho an’ny tenany sy ho an’ny vahoakany rehetra. 23Ankoatra izany, isan’andro mandritra ny fito andro, dia hanolotra ombilahy fito sy ondrilahy fito tsy misy kilema hatao sorona dorana manontolo amiko TOMPO izy ary koa hanolotra osilahy iray isan’andro hatao sorona fanalana ny ota. 24Ary farany dia hanao fanatitra varimbazaha telopolo kilao miampy diloilo enina litatra koa izy, isaky ny ombilahy sy ondrilahy natao sorona.
25«Ary ny amin’ilay fety, izay manomboka rehefa andro faha-15 amin’ny volana fahafito#45.25 Ny fety lazaina eto dia ny fetin’ny Tranotomboka (jereo Lev 23.34-36, 39-43). –ny volana fahafito dia manandrify ny Septambra-Oktôbra amin’ny fanisanandrontsika ankehitriny., dia tahaka ny amin’ny fetin’ny Paska ihany no hataon’ny printsy filoha, isan’andro mandritra ny fito andro: na ny sorona fanalana ny ota izany na ny sorona dorana manontolo na ny fanatitra varimbazaha sy diloilo.»
Voafantina amin'izao fotoana izao:
Ezekiela 45: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.