Ezekiela 43
43
Miverina ao amin’ny tempoly Andriamanitra
1Ary nentin-dralehilahy hankeo amin’ny vavahady atsinanana aho. 2Koa hitako tonga avy any atsinanana ny voninahitr’ilay Andriamanitr’i Israely#43.2 Ny voninahitr’ilay Andriamanitra izay hitan’i Ezekiela nihataka nanalavitra niantsinanana (jereo 10.19; 11.23) dia efa niverina izao (and 4).; narahina feo tahaka ny firohondrohon’ny ranomasina izany ary nanazava ny tany tamin’ny famirapiratany. 3Io fahitana io dia mitovy amin’ireo fahitana hitako fony Andriamanitra tonga handrava an’i Jerosalema sy fony aho teo amoron’ny ony Kebara#43.3 amoron’ny ony Kebara: jereo 1.1-3.; koa lavo nihohoka nitehi-tany aho. 4Ary ny voninahitry ny TOMPO dia niditra tao an-tempoly avy eo amin’ny vavahady atsinanana. 5Ary ny Fanahin’Andriamanitra nanainga ahy avy amin’ny tany ka nitondra ahy hankeo amin’ny kianja anatiny; ary hitako nameno ny tempoly ny voninahitry ny TOMPO. 6Dia reko nisy niteny tamiko avy tao an-tempoly, kanefa ilay lehilahy nitarika ahy dia teo anilako ihany. 7Ary hoy ny Tompo tamiko: «Ry ilay taranak’olombelona, ity toerana ity no misy ny sezafiandrianako, eto no fametrahako ny tongotro. Eto no honenako mandrakizay eo anivon’ny Israelita. Na ny vahoakan’i Israely na ny mpanjakany dia tsy hanala baràka ny anarako masina intsony amin’ny fanompoan-tsampy sy amin’ny fandevenana ny fatin’ireo mpanjakany eto#43.7 ny fandevenana ny fatin’ireo mpanjakany eto: ny fasan’ny mpanjaka tao Jerosalema dia tao anatin’ny tanàna (jereo 1 Mp 2.10; 11.43) tamin’ireo trano niankina tamin’ny lapan’ny mpanjaka izay mifanolotra amin’ny tempoly (jereo and 8 sy 1 Mp 7.12); dkt hafa ny fananganana tsangambato eto ho an’ireo mpanjakany maty. . 8Napetraky ny mpanjakany teo anilan’ny tokonana sy tolam-bavahadin’ny tempoliko ny tokonana sy tolam-bavahadin’ny lapany, hany ka rindrina iray sisa no nanelanelana ny tranony sy ny tranoko. Nanala baràka ny anarako tamin’ireo zavatra maharikoriko nataony izy, hany ka naringako tamim-pahatezerana. 9Ankehitriny kosa hariany lavitra Ahy ny fanompoan-tsampiny sy ny fatin’ireo mpanjakany; ka dia honina mandrakizay eo aminy Aho.
10«Ianao, ry ilay taranak’olombelona, visavisao amin’ny Israelita ny tempoly. Aoka ho menatra ny amin’ny helony izy ary handinika izao drafi-panorenana izao. 11Raha menatra ny amin’izay rehetra nataony tokoa izy, dia asehoy azy ny sarin’ny tempoly miaraka amin’ny fitsitokotokoan’ny trano ary koa ireo vavahady miditra sy mivoaka, izany hoe ny drafitra ankapobeny. Ataovy an-tsoratra eo ambany masony avokoa ny lalàna sy fepetra amam-pitsipika tsy maintsy arahiny mba hahafahany mitandrina sy mampihatra azy. 12Izao no foto-pitsipika momba ny tempoly: ny faritra manontolo eo an-tampon-tendrombohitra sy manodidina dia tena voatokana ho an’Andriamanitra. Eny, izany no foto-pitsipika momba ny tempoly.»
Ny alitara sy ny sorona isan-karazany
13Ireto avy no refin’ny alitara, araka ny fandrefesana fampiasa ankehitriny. Ny halalin’ny tatatra manodidina azy dia dimampolo santimetatra; ny velarany dia dimampolo santimetatra ary ny morony manodidina dia niavo 25 santimetatra. Izao kosa ny amin’ny haavon’ny alitara: 14nisy iray metatra manomboka eo am-potony ambony tatatra ka hatramin’ny marin-tampona ambany izay efamira dimampolo santimetatra avy ny lafiny tsirairay. Nisy roa metatra manomboka amin’io marin-tampona ambany io ka hatramin’ny marin-tampona manaraka izay efamira dimampolo santimetatra avy ny lafiny tsirairay. 15Ny fanambonin’ny alitara, izay misy ny fatana, dia roa metatra ny haavony, ka tandroka efatra no teo amin’ny zorony efatra. 16Efamira ny fatana ka enina metatra avy ny lafiny tsirairay. 17Efamira ihany koa ny marin-tampona ambony ka fito metatra avy ny lafiny tsirairay. Ny morony manodidina dia niavo 25 santimetatra; ary ny velaran’ny tatatra manodidina dia dimampolo santimetatra. Ny tohatohatra fiakarana eo dia manatrika ny atsinanana.
18Ary hoy ralehilahy tamiko: «Ry ilay taranak’olombelona, izao no lazain’ny Tompo ANDRIANANAHARY: Ireto no lalàna arahina rehefa vita ny alitara mba hanolorana sorona dorana manontolo eo ary hamafazana ram-biby aminy. 19Homenao ombilahy iray ny Levita mpisorona, taranak’i Tsadôka#43.19 taranak’i Tsadôka: jereo ny naoty momba ny 40.46., izay hany mahazo manompo Ahy; teny hentitra avy amiko Tompo ANDRIANANAHARY izany. Ho sorona fanalana ny ota io ombilahy io. 20Dia hangalanao ny rany ka hatentinao amin’ny tandroka efatry ny alitara sy amin’ny zorony efatry ny marin-tampona ambony ary amin’ny morony manodidina. Toy izany no hanadiovanao ny alitara sy hanokananao azy. 21Avy eo dia halainao ny ombilahy natolotra ho sorona fanalana ny ota ka hodorana eo amin’ny faritra voatokana ho an’izany ao an-tempoly, any ivelan’ny Toeramasina. 22Ny andro faharoa dia haka osilahy tsy misy kilema ianao ary hanolotra azy ho sorona fanalana ny ota ihany koa. Hataonao ny fanadiovana ny alitara tahaka izay efa nataonao tamin’ny ombilahy. 23Rehefa vita io sorona io, dia haka ombilahy iray sy ondrilahy iray tsy misy kilema ianao. 24Manoloana Ahy TOMPO no hitondranao ireo ka handrarahan’ny mpisorona sira eo amboniny#43.24 Ny sira dia manadio (jereo Eks 30.35; 2 Mp 2.20) ary indraindray aza dia mariky ny fanekempihavanana (jereo Lev 2.13; Nom 18.19). ary hatolony ho sorona dorana manontolo ho Ahy TOMPO. 25Isan’andro isan’andro, mandritra ny herinandro, dia hanolotra osilahy iray ho sorona fanalana ny ota ianao ary koa ombilahy iray sy ondrilahy iray tsy misy kilema. 26Koa mandritra ny fito andro no hanaovam-panavotana ny alitara ka hanadiovana azy sy hanokanana azy. 27Rehefa tapitra ny herinandro ka mitehina ny andro fahavalo, dia hahazo manolotra sorona dorana manontolo sy sorom-pihavanana eo amin’ny alitara ny mpisorona. Amin’izay dia ho sitrako ianareo; teny hentitra avy amiko Tompo ANDRIANANAHARY izany.»
Voafantina amin'izao fotoana izao:
Ezekiela 43: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.