Ezekiela 30
30
Haneho ny hatezerany amin’i Ejipta ny Tompo
1Ary nisy tenin’ny TOMPO tamiko nanao hoe: 2«Ry ilay taranak’olombelona, ijoroy ny maha-mpaminany anao ka ambarao fa izao no lazain’ny Tompo ANDRIANANAHARY: Midradradradrà ny amin’ny andro ho avy ianareo! 3Fa antomotra izy, eny, antomotra ny androm-pamaizan’ny TOMPO. Ho andro vesaran-drahona izany, ary fotoana hifamelezan’ny firenena. 4Hiditra any Ejipta ny ady, ka hampangorohoro hatrany Etiôpia izany. Hiampatrampatra ny fatin’ny Ejiptianina, ary horobaina ny hareny ka hatao rava mbamin’ny fanorenany. 5Ny olona avy any Etiôpia sy Pota ary Loda, ny olona avy any Arabia manontolo sy Libia, mbamin’ny teraky ny vahoakako aza, dia hisy ho faty an’ady#30.5 Pota sy Loda: jereo nta Is 66.19. –Libia: araka ny dkt tranainy grika izany, fa ny RM kosa manao hoe Kobo izay tany tsy dia fantatra loatra. –mbamin’ny teraky ny vahoakako aza: tamin’izany vanim-potoana izany dia efa nisy andiana Israelita tany Ejipta, jereo Jer 43 sy 44.. 6Izao no lazain’ny TOMPO: Hatreo Migdôla any avaratra ka hatrany Asoana any atsimo dia ho faty an’ady ireo mpiaro an’i Ejipta, ary ho fefika ny tafiny miavonavona; teny hentitra avy amiko Tompo ANDRIANANAHARY izany. 7Ho rava dia ho rava ny taniny, ary ho lao dia ho lao ny tanànany. 8Ary rehefa hodorako amin’ny afo i Ejipta sady haringako ireo rehetra mpiaro azy, dia hoekena amin’izay fa Izaho no TOMPO. 9Amin’izany andro handravako an’i Ejipta izany, dia hisy iraka avy amiko handeha an-tsambo hampandre ny Etiôpianina; ka izy no hampatahotra sy hampangorohoro ny Etiôpianina izay mitoetra tsy manahy. Eny, indro avy izany andro izany.
10«Izao no lazain’ny Tompo ANDRIANANAHARY: Hampiasaiko i Nebokadnetsara mpanjakan’i Babilôna mba handringana ny mponina maro ao Ejipta. 11Ho avy handrava io tany io izy mbamin’ny miaramilany, izay loza indrindra raha samy tafi-pirenena. Hanatsoaka sabatra hamely ny Ejiptianina ireny ka hameno faty ny tany. 12Horitiko ny sakeli-dranon’i Neily ary hatolotro an’ireo olon-dia i Ejipta. Hasaiko simban’ny vahiny izy, ka hofaohiny mbamin’izay rehetra ao aminy. Izaho TOMPO no miteny izany.
13«Izao no lazain’ny Tompo ANDRIANANAHARY: Horavako tanteraka ireo sampy sy andriamani-tsiizy an’i Memfîsa#30.13 Memfîsa: tanàn-dehibe ao atsimon’ny vavaranon’i Neily.. Tsy hisy mpitondra intsony any Ejipta ary hataoko manenika io tany io ny tahotra. 14Hosimbako i Ejipta ambony, hodorako amin’ny afo ny tanànan’i Tsôhàna ary hampihariko ny didim-pitsarako hamelezana ny tanànan’i Nao#30.14 Tsôhàna: tanàn-dehibe any Ejipta avaratra-atsinanana. –Nao: tanàn-dehibe any Ejipta ambony.. 15Hatosako ao Sina#30.16 Sina: tanàn-dehibe any Ejipta avaratra-atsinanana, angamba i Pelozy ankehitriny. izay tanànamimanda miaro an’i Ejipta ny fahatezerako ary hofongorako ny mponina maro ao Nao. 16Hodorako amin’ny afo i Ejipta. Hisavoritaka ny mponina ao Sina; ary hisy vaky ny mandan’i Nao ka ho safotry ny rano ilay tanàna. 17Ho faty an’ady ny tovolahin’i Ôna sy i Py-Beseta#30.17 Ôna na Heliôpôly sy Py-Beseta na Bobasta: tanàn-dehibe tao amin’ny faritry ny vavaranon’i Neily., ary ny mponina sisa dia hoentina ho babo. 18Tsy hisy andro mihiratra intsony ao Tahapanehesa#30.18 Tahapanehesa: tanàn-dehibe an-tsisin-tany eo atsinanan’ny vavaranon’i Neily. rehefa hopotehiko ny herin’i Ejipta ary hatsahatro ny fireharehany. Hisy rahona mainty handrakotra ny tanàna, ary ho lasan-ko babo ny mponina amin’izany faritra izany. 19Hampihariko ny didim-pitsarako hamelezana an’i Ejipta, ka hoekena amin’izay fa Izaho no TOMPO.»
Fitaovana ampiasain’Andriamanitra ny mpanjakan’i Babilôna
20Tamin’ny taona faha-11 taorian’ny fahababoana, nony andro fahafiton’ny volana voalohany#30.20 Izany hoe volana Marsa-Avrily 587 tal J.K., dia nisy tenin’ny TOMPO tamiko nanao hoe: 21«Ry ilay taranak’olombelona, nopotehiko ny sandrin’ny Farao#30.21 Ao amin’ny Baiboly ny sandry matetika dia entina milaza ny hery, jereo ohatra Lk 1.51. mpanjakan’i Ejipta. Tsy nisy nitsabo na nanome fanafody azy, tsy nisy namehy ny feriny mba hampody ny heriny hahatan-tsabatra indray. 22Koa Izao no lazain’ny Tompo ANDRIANANAHARY: ‹Hirotsaka hamely ny Farao mpanjakan’i Ejipta Aho. Ny sandriny roa mihitsy no hopotehiko, tsy ilay efa potika ihany fa ilay mbola matanjaka koa, ka hataoko latsaka avy eny an-tanany ny sabany! 23Ary haeliko any amin’ireo firenena sy haparitako any amin’ny tany samy hafa ny Ejiptianina. 24Homeko tanjaka ny sandrin’ny mpanjakan’i Babilôna ka ny sabatro mihitsy no hapetrako eo an-tanany. Ary ny Farao, izay efa nopotehiko ny sandriny, dia ho faty mitoloko toy ny voaratra eo anoloan’ny fahavalony. 25Eny, hiraviravy tsy hanan-kery ny sandrin’ny Farao; fa homeko tanjaka kosa ny sandrin’ny mpanjakan’i Babilôna, ka ny sabatro mihitsy no hapetrako eo an-tanany sy harangarangany hamelezana an’i Ejipta. Amin’izay dia hoekena fa Izaho no TOMPO. 26Haeliko any amin’ireo firenena sy haparitako any amin’ny tany samy hafa ny Ejiptianina; ka amin’izay dia hoekena fa Izaho no TOMPO›. »
Voafantina amin'izao fotoana izao:
Ezekiela 30: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.