Eksôdy 15
15
Hiran’i Mosesy sy ny Israely
1Noho izany dia nihira izao hira izao ho fanomezam-boninahitra ny TOMPO i Mosesy sy ny Israelita ka nanao hoe:
Hihira ho fanomezam-boninahitra ny TOMPO aho#15.1 Jereo Apôk 15.3.;
fandresena miezinezina no azony,
natsipiny any an-dranomasina
ny soavaly sy ny mpitaingina azy!
2Ny TOMPO no heriko ka hataoko an-kira,
tonga namonjy ahy Izy,
Izy no Andriamanitro, ka hoderaiko
izy no Andriamanitry ny razako, ka hankalazaiko#15.2 Jereo Sal 118.14; Is 12.2..
3Mpiady mahery ny TOMPO;
mandia ny anarany hoe TOMPO.
4Fa navariny ao an-dranomasina
ny kalesy sy ny andian-tafiky ny Farao,
ireo manam-boninahiny voafantina
nasitriny ao an-dranomasin’ny Volotara.
5Nandrakotra azy ny ranobe:
nilentika any amin’ny farany ambany
toy ny vato alatsaka izy.
6TOMPO ô, malaza ho mahery
ny sandrinao ankavanana,
ka manorotoro fahavalo!
7Mahatalanjona ny fahalehibiazanao
fa manapotika ny mpanohitra Anao.
Alefanao ny fahatezeranao
ka mandoro azy toy ny mololo.
8Noho ny hamafin’ny fofonainao
dia nisavovona ny ranobe;
nivangongo toa rindrina ny onjan-drano;
teo amin’ny fanambanin’ny ranomasina
no nifitsaka ny alon-drano.
9Dia hoy ireo fahavalony hoe:
«Hoenjehintsika ireny ka hotratrarintsika,
halaintsika ho babo ka hanaranantsika fo;
hotsoahantsika ny sabatra,
ka hamongotra azy ny tanantsika.»
10Saingy natsokanao ny rivotrao,
dia norakofan’ny ranomasina ireo.
Nilentika ao anaty ranomody
toy ny vongam-piraka izy.
11TOMPO ô, iza moa no andriamanitra tahaka Anao?
Iza no malaza amin’ny fahamasinana tahaka Anao,
mahatahotra, mendri-piderana,
afaka manao zava-mahagaga?
12Nahinjitrao ny tananao ankavanana,
dia natelin’ny tany ireny.
13Tarihinao amin’ny fitiavanao
ny vahoaka izay navotanao.
Amin’ny herinao no itondranao azy
ho amin’ny fonenany masina.
14Mandre izany ny firenena maro ka mihorohoro;
mihoron-koditra ny Filistinina,
15raiki-tahotra ireo lehiben’i Edôma
ary mangovitra ireo andriandahin’i Môaba;
kivy ny mponina rehetra any Kanahàna.
16Tahotra sy horohoro no mahazo azy ireo!
Manoloana ny halehiben’ny herinao, ry TOMPO,
dia tsy nihetsika toy ny vato izy
ambara-pahatafita ilay vahoakanao,
dia ny vahoaka izay navotanao.
17Entinao izy ka hamponeninao
ao an-tendrombohitrao,
ao amin’ny toerana izay nataonao
ho fonenanao, ry TOMPO,
dia ny Toeramasina izay naorinao#15.17 Ny tany Kanahàna dia misy ampahany be tendrombohitra. An-tampon’ny tendrombohitra iray no haorina ny tempolin’i Jerosalema, toeramasin’ny Tompo..
18TOMPO ô, Ianao no mpanjaka mandrakizay!
19Rehefa niditra tao anaty ranomasina ny soavalin’ny Farao sy ny kalesiny ary ny mpitaingina azy, dia naverin’ny TOMPO hanafotra azy ireo ny ranomasina; fa ny Israelita kosa niampita teo afovoan’ny ranomasina nandia tany maina. 20Naka ampongatapaka i Miriama, mpaminanivavy anabavin’i Aharôna, ary lasa nanaraka azy avokoa ny vehivavy israelita rehetra ka nitondra ampongatapaka sady nandihy. 21Ary niventy hira ho azy ireo i Miriama manao hoe:
Mihirà ho fanomezam-boninahitra ny TOMPO:
fandresena miezinezina no azony,
natsipiny any an-dranomasina
ny soavaly sy ny mpitaingina azy!
NY DIAN’NY ISRAELITA TANY AN-TANIEFITRA
Ny rano tao Marà
22Notarihin’i Mosesy niala tao amin’ny Ranomasin’ny Volotara ny Israelita, ka nizotra nankany amin’ny taniefitra Sora#15.22 Ny taniefitra Sora dia ny faritra avaratra amin’ny saika-nosy Sinay, eo anelanelan’ny ranon-driakan’i Ejipta (jereo Nom 34.5 sy nta) sy ny lakan-dranon’i Suez ankehitriny, morony atsinanana.. Telo andro nandehanana tany an-taniefitra izy ireo nefa tsy nahita rano. 23Nony tonga tao Marà izy, dia tsy azony nosotroina ny rano tao satria nangidy. Koa izany no niavian’ny anarana hoe Marà, izay midika hoe «mangidy#15.23 Ny toerana atao hoe Marà dia toa teo amin’ny morontsiraka atsinanan’ny helodranon’i Suez..» 24Dia nimonomonona tamin’i Mosesy ny vahoaka nanao hoe: Inona no hosotroinay? 25Niantso vonjy tamin’ny TOMPO i Mosesy, dia natorony rantsan-kazo iray. Natsipin’i Mosesy tao anaty rano izany ka nanjary mamy ny rano.
Tao no nanomezan’ny TOMPO fitsipika sy fombafomba ho an’ny Israelita ary nizahany toetra azy ireo. 26Hoy Izy taminy: «Raha ankatoavinareo tokoa Aho TOMPO Andriamanitrareo, ka ataonareo izay heveriko ho marina, raha henoinareo ny didiko, ka tandremanareo ny fitsipiko dia tsy hisy hataoko aminareo ny aretina rehetra izay namelezako ny Ejiptianina, satria Izaho no TOMPO Izay manasitrana anareo.»
27Avy eo dia tonga tao Elima#15.27 Elima: toerana heverina ho teo atsimo kelin’i Marà no nisy azy. ny Israelita; nisy loharano 12 sy rofia fitopolo tao, ka nitoby teo akaikin’ny rano izy ireo.
Voafantina amin'izao fotoana izao:
Eksôdy 15: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.