Estera 4
4
Angatahin’i Môrdôkay i Estera mba hanao fanelanelanana ho an’ny Jiosy
1Nony fantatr’i Môrdôkay ny zava-drehetra nitranga, dia nandriatra ny fitafiany izy ka nitafy gony sady nihosin-davenona ary nankeo afovoan’ny tanàna ka nitaraina sy nidradradradra mafy. 2Tonga hatrany anoloan’ny lapa aza izy, saingy nijanona teo satria tsy azon’ny olona mitafy gony atao ny miditra ny lapa. 3Tany amin’ny faritany rehetra nahatongavan’ny baiko aman-didin’ny amperôra, dia nalahelo mafy koa ny Jiosy ka nifady hanina sy nitomany ary nidradradradra, sady maro no nitafy gony sy nandry teo ambony lavenona#4.3 sy nandry teo ambony lavenona: jereo ny naoty tandrifin’ny Jôn 3.6..
4Tonga nilaza izany tamin’i Estera ireo mpanompovaviny. Dia nalahelo tokoa ity mpanjakavavy ka nampanatitra akanjo hitafian’i Môrdôkay mba hanesorany ny gony teny aminy; kanefa tsy nety nandray izy. 5Ary nantsoin’i Estera i Hatàka, anisan’ireo tandapa tinendrin’ny amperôra hanompo azy; io Hatàka io no nalefan’ny mpanjakavavy ho any amin’i Môrdôkay mba hanontany azy ny zava-nitranga sy izay nahatonga azy hitafy gony. 6Dia lasa i Hatàka nankany amin’i Môrdôkay izay teo an-kianjan’ny tanàna anoloan’ny lapan’ny amperôra; 7ary nambaran’i Môrdôkay taminy avokoa ny zava-drehetra nanjo azy sy ny tontalim-bola nokasain’i Hamàna haloa ho ao an-trano firaketan’ny amperôra noho ny handringanana ny Jiosy. 8Nomeny an’i Hatàka koa ny kopian’ny didy navoaka tao Sosany handringanana ny Jiosy; nasainy hampiseho izany amin’i Estera izy sy hampahafantatra azy ny toe-javatra ary hiangavy azy hankao amin’ny amperôra mba hifona aminy sy hangataka famindrampo ho an’ny fireneny. 9Dia lasa i Hatàka nanambara ny tenin’i Môrdôkay tamin’i Estera; 10fa mbola nirahin’ity mpanjakavavy indray izy hilaza amin’i Môrdôkay hoe: 11«Ny olona rehetra, hatramin’ny mpanompon’ny amperôra sy sarambabem-bahoaka any amin’ny faritany aza, dia samy mahalala fa na iza na iza mankeo amin’ny amperôra ho eo an-kianja anatin’ny lapa, na lehilahy na vehivavy, nefa tsy nantsoina, dia lalàna tokana manameloka ho faty no mihatra aminy; izay hotondroin’ny amperôra amin’ny tehim-bolamena ihany no ho velona. Izaho kosa efa telopolo andro izay no tsy nantsoina hankao amin’ny mpanjaka.» 12Rehefa nilazana ny tenin’i Estera i Môrdôkay, 13dia izao no nasainy navaly azy: «Aza mihevitra anakampo fa ho afaka irery amin’ny Jiosy rehetra ianao satria monina ao an-dapa. 14Raha hangina mihitsy ianao amin’ity toe-javatra ity, dia hisy fanampiana sy fanafahana hipoitra avy any an-kafa#4.14 avy any an-kafa: firotsahan’Andriamanitra an-tsehatra no fonosin’izany fomba fiteny izany. ho an’ny Jiosy; fa ianao no haringana ary ho lany tamingana ny fianakavianao. Ary iza no mahalala fa angamba ho amin’ity toe-javatra ity mihitsy no nanandratana anao ho mpanjakavavy?» 15Izao kosa no nasain’i Estera navaly an’i Môrdôkay: 16«Ndeha vorio àry ny Jiosy rehetra eto Sosany; dia manaova fifadian-kanina noho ny amiko ianareo, ka aza mihinana na misotro mandritra ny telo andro sy telo alina. Hifady hanina toy izany koa ny tenako sy ireo mpanompovaviko; avy eo dia hankao amin’ny amperôra aho, na dia tsy ara-dalàna aza izany. Koa raha tsy maintsy ho faty aho, dia ho faty!» 17Dia lasa i Môrdôkay nanao araka izay rehetra nandidian’i Estera azy.
Voafantina amin'izao fotoana izao:
Estera 4: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.