Estera 1
1
Ny fanasambe ataon’ny amperôra Kserksesa
1Ity tantara ity dia nitranga tamin’ny andron’ny amperôra Kserksesa#1.1 Ny tenenina eto dia toa i Kserksesa 1° izay nifehy ny fanjakana persianina (taona 486-464 tal J.K.). Fantatra koa amin’ny anarana hoe Ahasoerôsa io amperôra io., izay nanjaka tamina faritany 127 hatreo India ka hatrany Etiôpia. 2-3Tamin’ny taona fahatelo nanjakany, fony izy nitoetra tamin’ny sezafiandrianana maha andriamanjaka azy tao Sosany renivohitra, dia nanaovany fanasana ireo rehetra andriambaventiny sy mpandraharahany; tonga teo anatrehany koa ny filohan’ny tafik’i Persia sy i Media#1.2 I Sosany dia anankiray amin’ireo renivohitra telo (i Sosany, i Ekbatàna na Akmeta (jereo Hez 6.2), ary i Babilôna*) nisy lapa sy sezafiandrianana ho an’ny amperôran’ny fanjakana persianina. Teo atsinanan’i Babilôna i Sosany ary fonenan-dririnina ho an’ireo amperôra persianina. –ny tafik’i Persia sy i Media dia nisy vondro-miaramila avy amin’ireo firenena isan-tokony ao anatin’ny fanjakana persianina. ary ny governora sy ny mpitondra isam-paritany. 4Nasehon’ny amperôra azy ny harena amam-boninahitry ny fanjakana ary ny harevaka aman-drentin’ny fahalehibiazany; ka enim-bolana no naharetan’izany lanonambe izany. 5Rehefa tapitra ireo andro ireo, dia nanaovan’ny amperôra fanasana teo amin’ny kianja ao anatin’ny zaridainan’ny lapa koa ireo olona rehetra izay tao Sosany renivohitra, na ny lehibe na ny kely; ka herinandro no naharetan’ny lanonana. 6Nisy lamba temitra fotsy na maitso na manga, ka tady rongony fotsy sy volomparasy no nihantonany tamina masom-bolafotsy na tamina andry vatokaranana; nisy farafara volamena sy volafotsy#1.6 farafara volamena sy volafotsy: misakafo mandrimandry mihorirana eo ambony farafara ireo olona nasaina (jereo Ham 6.4). –Tsy azo antoka tsara ny hevitry ny voambolana hebreo maromaro eto amin’ity and ity. nalahatra teo ambony lampivato alabasitra sy vatokaranana fotsy ary hara sy vatokaranana mainty. 7Tsatokaty volamena karazany samy hafa no nampisotroana ny olona ary nitobaka ny divay satria nalala-tanana tokoa ny amperôra. 8Araka ny fepetra dia samy nisotro tsy nisy naneritery azy ny olona; fa ny nandidian’ny amperôra ireo mpanompo rehetra ao an-dapany manko dia ny hanaovan’ny olona tsirairay araka izay sitrapony avy. 9Tamin’izay i Vastỳ, vadin’ny amperôra, dia mba nanao fanasana ho an’ny vehivavy koa tao amin’ny lapan’i Kserksesa.
Ny anesorana an’i Vastỳ tsy ho mpanjakavavy
10Tamin’ny andro fahafiton’izany fanasambe izany, dia falifaly i Kserksesa azon’ny divay nosotroiny. Koa nampiantsoiny ny tandapa fito lahy izay nanompo azy manokana, dia ry i Mehomàna sy i Bizetà, i Harbônà sy i Bigtà, i Abagtà sy i Zetara ary i Karkasa; 11ka nasainy hoentin’ireto tandapa ireto eo anatrehany i Vastỳ mpanjakavavy, misatroka ny satroboninahitra maha mpanjakavavy azy. Tiany haseho amin’ny manampahefana sy ny olon-kafa teo manko ny hatsaran-tarehin’i Vastỳ, satria maha te hizaha ravehivavy. 12Nampitain’izy fito lahy tamin’ny mpanjakavavy ny tenin’ny amperôra fa tsy nety nandeha mihitsy izy. Dia nisafoaka mafy ny amperôra ka nirehitra izaitsizy ny fahatezerany. 13Ary nakany hevitra ireo olon-kendry lalim-pahaizana, satria ny raharahan’ny amperôra dia nalamina teo anatrehan’izay rehetra nahay lalàna sy fitsarana. 14Ny olon-kendry teo akaikin’ny amperôra indrindra dia ry i Karsenà sy i Setara, i Admatà sy i Tarsisy, i Meresa sy i Marsenà ary Memokàna, izay minisitra fito tamin’i Persia sy i Media#1.14 I Persia sy i Media: jereo 1.3 sy nta.; nitokiany ry zareo ka nitana toerana voalohany teo amin’ny fanjakana. 15Dia hoy ny amperôra tamin’ireto olon-kendry:
–Tsy nankatoavin’i Vastỳ mpanjakavavy ny didiko nentin’ireo tandapako; ka, araka ny lalàna, dia inona no sazy tokony hampiharina aminy?
16Dia niteny teo anatrehan’ny amperôra sy ny minisitra i Memokàna ka namaly hoe:
–Tsy ny amperôra ihany no nanaovan’i Vastỳ mpanjakavavy izao fihetsika ratsy izao, fa ny manampahefana rehetra koa sy ny vahoaka tsivakivolo isan-tokony eran’ny fanjakana. 17Hiely amin’ny vehivavy rehetra manko izao zavatra vitan’ny mpanjakavavy izao ka hahatonga azy samy hanao tsinontsinona ny vadiny sy hilaza hoe: «Ny amperôra Kserksesa aza nandidy ny hitondrana an’i Vastỳ mpanjakavavy eo anatrehany, nefa tsy nety nandeha izy!» 18Ary na dia izao anio izao aza, dia handre ny nataon’ity mpanjakavavy ny vadin’ireo manampahefana manerana an’i Persia sy i Media ka samy hamalivaly ny vadiny avy; ary ny hatezeran’ny lehilahy no ho vokatr’izany famingavingan’ny vehivavy izany. 19Koa raha sitrakao, ry andriamanjaka, dia aoka hisy didy havoakanao hisakanana an’i Vastỳ tsy hiseho eo anatrehanao intsony ary hanomezana ny voninahitra maha mpanjakavavy ho ana vehivavy hafa mendrika izany kokoa noho izy; izany didy izany dia hosoratana ao amin’ny lalànan’i Persia sy i Media ka tsy ho azo ovàna. 20Rehefa ho tafaely eran’ity fanjakànao midadasika ity ny fanapahan-kevitra halainao, dia samy homen’ny vehivavy rehetra voninahitra ny vadiny, na lehibe na kely.
21Sitraky ny amperôra sy ireo minisitra ny torohevitr’i Memokàna, ka dia narahin’i Kserksesa. 22Nandefasany taratasy ny faritany rehetra manerana ny fanjakany, dia taratasy araka ny fomba fiteny sy fanoratry ny firenena isan-tokony; notakina mba ho masi-mandidy ao an-tranony avy ny lehilahy rehetra ary mba ho ny fitenim-pireneny no hampisain’ny ankohonany#1.22 ary mba... ankohonany: ny dkt latinina tranainy dia ahitana hoe ary aoka haely amin’ny firenena tsirairay avy izany. .
Voafantina amin'izao fotoana izao:
Estera 1: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.