Kôheleta 3
3
Misy fotoany ny zava-drehetra
1Ny zava-drehetra dia samy misy vaninandro voatendry ho azy avy; ary samy manana ny fotoany avy ny raharaha rehetra eto ambonin’ny tany. 2Misy ny fotoana ahaterahana ary misy ny fotoana ahafatesana; misy fotoana ambolena ary misy fotoana anongotana ny nambolena; 3misy fotoana amonoana ary misy fotoana itsaboana; misy fotoana andravana ary misy fotoana ananganana. 4Misy fotoana itomaniana ary misy fotoana ihomehezana; misy fotoana isentoana ary misy fotoana andihizana. 5Misy fotoana anariam-bato ary misy fotoana anangonam-bato; misy fotoana anorohana ary misy fotoana ifadiam-panorohana. 6Misy fotoana itadiavana ary misy fotoana ahaverezana; misy fotoana itahirizana ary misy fotoana anariana; 7misy fotoana androvitana ary misy fotoana anjairana. Misy fotoana anginana ary misy fotoana itenenana. 8Misy fotoana itiavana ary misy fotoana ankahalana; misy fotoana iadiana ary misy fotoana ihavanana.
9Inona no tombontsoa azon’ny mpiasa amin’izay isasarany? 10Nodinihiko ny asa asain’Andriamanitra hilofosan’ny olona; 11fa nataon’Andriamanitra ho tsara amin’ny fotoany avy ny zava-drehetra. Nomeny antsika koa ny fanirian-kahafantatra ny lasa sy ny hoavy. Nefa tsy ho fantatry ny olombelona ny asan’Andriamanitra ankapobe hatramin’ny voalohany ka hatramin’ny farany. 12Fantatro araka izany fa ny mifaly sy ny manao izay hahasoa finaritra azy ihany no tsara ho an’ny olona, raha mbola velona koa izy. 13Ary koa, raha mihinana sy misotro ka mahatsiaro sambatra amin’ny asany rehetra ny olona, dia fanomezan’Andriamanitra izany. 14Fantatro fa izay rehetra ataon’Andriamanitra dia haharitra mandrakizay; tsy misy anampiana na anesorana izany fa nataony mba hanajan’ny olona Azy#3.14 Jereo Oha 1.7 sy nta.. 15Izay rehetra mitranga amin’izao fotoana izao sy izay mbola ho avy dia efa nisy tamin’ny lasa. Ataon’Andriamanitra miverimberina ny zava-mitranga.
Miafara amin’ny fahafatesana avokoa ny zava-drehetra
16Izao koa no zavatra hitako teto ambonin’ny tany: ny toerana tokony hampiharana ny rariny sy ny fahamarinana no anjakan’ny faharatsiana. 17Hoy aho anakampoko: «Samy hotsarain’Andriamanitra avy ny olo-marina sy ny olon-dratsy, satria misy fotoany avokoa ny zava-drehetra mbamin’ny asa rehetra.» 18Ny amin’ny olombelona dia nihevitra aho fa ampandalovin’Andriamanitra fitsapana izy mba hahitany fa raha ny tenany ihany, dia tsy mifankaiza amin’ny biby izy akory. 19Mitovy amin’ny fiafaran’ny biby ihany ny fiafaran’ny olona. Fofonaina mitovy no mamelona ny olona sy ny biby ka tsy maintsy ho faty izy roa tonta. Tsy manana hamboniana eo anatrehan’ny biby ny olona, satria zava-poana ny zava-drehetra#3.19 Jereo Sal 49.13, 21.. 20Mitovy avokoa ny fiafaràn’ny mananaina rehetra fa samy hody vovoka izy satria vovoka no nanaovana azy#3.20 Jereo Gen 3.19; Sal 104.29.. 21Tsy misy afaka manamarina fa ny fofonain’ny olona dia miakatra any ambony ary ny an’ny biby kosa dia midina any ambany, ao anaty tany. 22Tsapako fa tsy misy tsara ho an’ny olombelona afa-tsy ny mifaly amin’ny vokatry ny asany. Tokony hionona amin’izany anjarany izany izy, satria tsy misy hampahita azy izay hitranga any aoriany.
Voafantina amin'izao fotoana izao:
Kôheleta 3: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.