2 Samoela 23
23
Fanambaràna farany nataon’i Davida
1Izao no fanambaràna farany nataon’i Davida:
Teny hentitr’i Davida, zanakalahin’i Jisay,
dia teny hentitry ny lehilahy
izay voafidin’ilay Andriamanitr’i Jakôba
mba ho voasandratra ho mpanjaka
sady voahasohason’ireo hiran’i Israely#23.1 Ny 1 Sam 18.7 dia manome ohatra an-kira mankalaza ireo zava-bitan’i Davida.:
2Ny Fanahin’ny TOMPO no mampiteny ahy
sy mametraka ao am-bavako ny teniny.
3Ny Andriamanitr’i Israely sady mpiaro azy
no efa niteny ka nanao tamiko hoe:
«Ny mpanjaka izay mifehy ny olona amim-pahamarinana
sy mitondra azy amim-panajana an’Andriamanitra
4dia toy ny fahazavan’ny maraina
raha miposaka ny masoandro
amin’iny maraina tsy misy rahona iny.
Ny tarany mafana mandimby ny orana
no mampaniry ny ahitra amin’ny tany.»
5Toy izany indrindra ny fianakaviako
eo anoloan’Andriamanitra;
fa fanekempihavanana maharitra mandrakizay
no nataon’Andriamanitra tamiko,
dia fanekempihavanana mirindra
sy voatandro amin’ny lafiny rehetra.
Ny fandresena sy ny zava-tsoa azoko
dia Izy no ipoiran’ireny rehetra ireny.
6Fa ny olom-poana rehetra kosa
dia tahaka ny tsilo fanary
ka tsy mba fandrain-tanana.
7Izay te hikasika azy
dia tsy maintsy mirongo
faraingo vy na zaran-defona;
ary ireny tsilo ireny dia dorana amin’ny afo
eo amin’ny toerana itobiany eo ihany.
Ireo kalazan’i Davida
(Jereo 1 Tan 11.10-47)
8Ireto avy ny anaran’ireo kalazan’i Davida: i Isbahala, zanakalahin’i Hakmônỳ sady filohan’ny «Tariky ny telo lahy». Izy no ilay nampandihy ny lefony hamelezana fahavalo valonjato lahy ka#23.8 Ao amin’ny RM mahazatra ny hoe i Isbahala... lahy ka dia azo adika hoe i Jôseby-Basebeta Takemônita no filohan’ireo manamboninahitra; izy ilay Hadinao avy any Hetsena, izay namely fahavalo valonjato lahy ka; saingy toa tsy azo antoka loatra ny RM etoana. nahafaty azy tamin’ny ady indray mandeha monja.
9Manaraka azy dia i Elehazàra, zanakalahin’i Dôdao ary zafikelin’ny lehilahy iray avy any Ahôa. Anisan’ny «Tariky ny telo lahy» kalaza izay niaraka tamin’i Davida izy, fony nihaika ny Filistinina tafangona hiady ireo. Nihemotra ny tafik’i Israely, 10fa i Elehazàra kosa niaritra ka namely ny Filistinina mandra-pahavizan’ny tanany nihazona mafy ny sabany. Fandresena miezinezina no nataon’ny TOMPO tamin’izay andro izay. Niverina nanjohy an’i Elehazàra haka ny fiadian’ireo maty no sisa nataon’ny tafika israelita.
11Manaraka azy dia i Samà, zanakalahin’i Agè avy any Harara. Rehefa tafangona tao Lehỳ teo amin’ny saham-boanemba ny Filistinina, dia nandosiran’ny tafik’i Israely; 12nefa nijanona teo afovoan’ny saha i Samà ka niaro izany ary namely ny Filistinina. Fandresena miezinezina no mbola nataon’ny TOMPO.
13Indray andro tamin’ny fararano, dia nisy telo lahy anisan’ny «andian’ny telopolo lahy» nidina ka tonga tany amin’i Davida tao amin’ny zohin’i Hadolàma, fa nisy tafiky ny Filistinina nitoby tao an-dohasahan’ny Refaîta#23.13 Hadolàma: jereo 1 Sam 22.1 sy nta. –Lohasahan’ny Refaîta: jereo 5.18 sy nta.. 14Ary i Davida efa tao amin’ny fiereny, raha mby tao Betlehema ny andia-miaramilan’ny Filistinina. 15Tamin’izay, dia velom-paniriana tampoka i Davida ka nanao hoe:
–Iza no hitondra rano hosotroiko avy amin’ilay fantsakana eo akaikin’ny vavahadin’i Betlehema?
16Dia niroatra namakivaky ny tobin’ny Filistinina izy telo lahy ireto, ka nanovo rano tamin’ilay fantsakana teo akaikin’ny vavahadin’i Betlehema, ary nentiny ho any amin’i Davida; kanjo tsy nety nisotro i Davida, fa nanolotra izany ho an’ny TOMPO kosa ho fanatitra araraka, 17sady niteny hoe: «Sanatria, TOMPO ô, raha hisotro amin’io rano io aho. Moa tsy toy ny ran’ireo lehilahy izay nanao vy very ny ainy ve io?» Ka dia tsy nety nisotro izy. Izany sy izany no nataon’ireto kalaza telo lahy ireto.
18I Abisay rahalahin’i Jôaba sady zanakalahin’i Tseroià, no filohan’ny «andian’ny telopolo lahy». Izy no ilay nampandihy lefona hamelezana fahavalo telonjato ka nahafaty azy; ary nanan-daza mitovy amin’ireto telo lahy ireto izy. 19Nomen-kaja avo roa heny kosa i Abisay teo amin’ny «andian’ny telopolo lahy», ka lasa lehibeny; saingy tsy afaka nifaninana tamin’ny «Tariky ny telo lahy» izy.
20I Benaià, avy any Kabitseela, dia zanakalahin’i Jôiadà sady zafikelin’ny miaramila anankiray maherifo. Nahavita asa goavana maro i Benaià. Izy no nahafaty ireo Ariela roa lahy tao Môaba; izy koa no nidina tanaty lavaka iray ka nahafaty liona tao tamin’ny indray andro nisy oram-panala. 21Mbola izy koa no nahafaty ilay Ejiptianina ranjanana izay nirongo lefona; tehina no namelezany azy, dia nosarihany teny an-tanan’ilay Ejiptianina ny lefony ka iny ihany no namonoany azy ho faty. 22Ireo no zava-bitan’i Benaià zanakalahin’i Jôiadà; ary nanan-daza mitovy amin’ireto kalaza telo lahy ireto izy. 23Nomen-kaja kosa i Benaià teo amin’ny «andian’ny telopolo lahy», saingy tsy afaka nifaninana tamin’ny «Tariky ny telo lahy». Izy no voatendrin’i Davida hifehy ny mpiambina azy.
24Ny «andian’ny telopolo lahy» dia nisy an’ireto koa:
I Hasahela rahalahin’i Jôaba; i Elehanàna zanakalahin’i Dôdao avy any Betlehema; 25i Samà avy any Harôda; i Elikà avy any Harôda; 26i Heletsa avy any Paltỳ; i Hirà zanakalahin’i Hikesy avy any Tekôa; 27i Abihezèra avy any Hanatôta; i Mebonay avy any Hosà; 28i Tsalmôna avy any Ahôa; i Maheray avy any Netôfà; 29i Heleba zanakalahin’i Bahanà avy any Netôfà; i Itàhy zanakalahin’i Ribay avy any Gibehà-n’ireo Benjaminita; 30i Benaià avy any Piratôna; i Hiday avy any amin’ny lohasahan-driakan’i Gahàsa; 31i Abỳ-Halbôna avy any Harabà; i Hazmavety avy any Bahorima; 32Eliahabà avy any Sahalbôna; i Jasena avy any Gizôna; i Jônatàna, 33zanakalahin’i Samà avy any Harara; i Ahiama zanakalahin’i Sarara avy any Harara; 34i Elifelety zanakalahin’i Ahasbay ary zafikelin’olona avy any Mahàka, i Elihama zanakalahin’i Ahitôfela avy any Gilao; 35i Hetsirào avy any Karmela; i Paharay avy any Aràba; 36i Jigala zanakalahin’i Natàna avy any Tsôbà; i Banỳ avy amin’ny fokon’i Gada; 37i Tselèka, ilay Hamônita; i Naharay avy any Beerôta; mpitondra ny fiadian’i Jôaba zanakalahin’i Tserôià; 38i Hirà sy i Gareba, samy avy amin’ny fianakavian’i Jetèra; 39ary i Orià, ilay Hetita. Fito amby telopolo no fitambaran’ireo kalaza rehetra.
Voafantina amin'izao fotoana izao:
2 Samoela 23: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.