2 Samoela 21
21
Ny Gibehônita sy ny taranak’i Saoly
1Nisy mosary naharitra telo taona misesy tamin’ny andron’i Davida. Nanontany ny TOMPO momba izany i Davida ka novaliany hoe:
–Avy amin’i Saoly sy ny fianakaviany lian-dra izao, satria i Saoly no namono nahafaty ny Gibehônita#21.1 Momba an’i Gibehôna dia jereo 2.12 sy nta..
2Nampiantso ny Gibehônita ny mpanjaka mba hiresahany. Ny Gibehônita moa tsy mba isan’ny Israelita, fa sisa tsy maty tamin’ny Amôrita. Efa nianiana taminy manko ny Israelita fa tsy haninona azy; nefa i Saoly, noho ny fitiavany an’i Israely sy i Joda, dia nitady hamongotra azy#21.2 nianiana... tsy haninona azy: jereo Jos 9.3-27.. 3Ka hoy i Davida tamin’ny Gibehônita:
–Inona no hataoko ho anareo! Ahoana no hanonerako ny ratsy izay nihatra taminareo, mba hitsofanareo rano ny vahoakan’ny TOMPO?
4Dia hoy ny Gibehônita taminy:
–Tsy vitana volafotsy na volamena, na koa fahafatesan’ny Israelita iray ny adinay amin’i Saoly sy ny fianakaviany.
Ka hoy i Davida:
–Koa lazao àry izay tianareo hataoko, fa hotanterahiko.
5Dia hoy ireo tamin’ny mpanjaka:
–I Saoly no nikasa handripaka anay sy hamongotra anay tsy hisy tavela eo amin’ny tanin’i Israely manontolo; 6ka avelao hisy fito lahy amin’ny taranany hatolotra anay mba hahantonay eo anatrehan’ny TOMPO ao Gibehà#21.6 Gibehà: jereo 1 Sam 10.5 sy nta. tanànan’i Saoly ilay mpanjaka voafidin’ny TOMPO.
Ka hoy ny mpanjaka:
–Hatolotro ireo.
7Notsimbinin’ny mpanjaka manokana i Mefibôseta, zanakalahin’i Jônatàna sady zafikelin’i Saoly, noho ny fianianana nataon’i Davida sy i Jônatàna tamin’ny anaran’ny TOMPO#21.7 Mefibôseta: jereo 9.1-13. –fianianana...tamin’ny anaran’ny Tompo: jereo 1 Sam 20.14-16,42.. 8Fa nalain’ny mpanjaka i Armônỳ sy i Mefibôseta zanakalahin’i Ritsepà izay zanakavavin’i Aià, ka izy roa lahy ireo dia naterany tamin’i Saoly; ary nalainy koa izy dimy lahy zanak’i Mikàla izay zanakavavin’i Saoly, ka ireo dia naterany tamin’i Adriela zanakalahin’i Barzilay avy any Mehôlà#21.8 Mikàla: araka ny 1 Sam 18.19 dia i Meraba no nanambady an’i Adriela. Abela-Mehôla: jereo Mpits 7.22 sy nta.. 9Natolotr’i Davida teo an-tanan’ny Gibehônita izy fito lahy ka nahanton’ireo teo an-kavoana iray teo anatrehan’ny TOMPO. Niara-maty avokoa izy fito lahy, satria samy novonoina ho faty tamin’ny fiandohan’ny vaninandro fijinjana ôrza#21.9 ny fijinjana ôrza amin’ny ankapobeny dia ny volana aprily..
10Naka ny lamba gony fisaonana i Ritsepà zanakavavin’i Aià, ka novelariny teo ambony vatolampy; dia nitoetra teo izy nanomboka tamin’ny fiandoham-pijinjana ka mandra-pilatsaky ny orana avy any an-danitra tamin’ireo faty ireo. Tsy navelany hipetrahan’ny voromanidina teo aminy tamin’ny antoandro; ny bibidia kosa no tsy navelany hankeo tamin’ny alina. 11Nisy nanambara tamin’i Davida izay nataon’i Ritsepà zanakavavin’i Aià sady vaditsindranon’i Saoly. 12Koa dia nalain’i Davida ny taolambalon’i Saoly sy i Jônatàna zanany tamin’ny mponin’i Jabesa any Gilehada; ireo manko no nangalatra azy tao an-kianjan’i Bety-Seàna, toerana nanantonan’ny Filistinina azy tamin’ny andro namonoan’ny Filistinina an’i Saoly tao Gilbôa#21.12 Momba ny toerana voalaza sy izay zava-nitranga dia jereo 1 Sam 31 sy nta.. 13Dia nentin’i Davida avy tany ny taolambalon’i Saoly sy i Jônatàna zanany, ary nangoniny koa ny taolan’ireto fito lahy voahantona. 14Nalevin’ny olona tany amin’ny tanin’i Benjamîna, tao Tsela, tao amin’ny fasan’i Kisy rain’i Saoly ireo taolambalo rehetra ireo; ary vitany avokoa izay nandidian’ny mpanjaka. Rehefa izany, vao nanambina ny tany Andriamanitra.
Ady tamin’ny Filistinina
(Jereo 1 Tan 20.4-8)
15Nipoaka indray ny ady teo amin’ny Filistinina sy ny Israelita. Dia nidina nanafika ny Filistinina i Davida sy ireo miaramila niaraka taminy; ary nahatsiaro reraka i Davida. 16Koa nihevitra ny hahafaty an’i Davida i Jisby-Benôba isan’ny taranak’i Harafà#21.16 Harafà: na Rafà, mety ho ny razamben’ny Refaîta. Jereo Deot 2.11 sy nta., izay nanana lohan-defona halimo milanja telo kilao mahery sy fiadiana vaovao. 17Fa tonga nanampy azy i Abisay zanakalahin’i Tseroià ka namely ary nahafaty an’ilay Filistinina. Tamin’izay ireo olon’i Davida dia nianiana taminy hoe: «Tsy hiara-miainga aminay intsony ianao ho amin’ny ady, mba tsy hamonoanao ho faty ny fahazavan’i Israely#21.17 fahazavan’i Israely: ny fiandrianam-pitondrana miankina amin’ny mpanjaka hatrany no ambara amin’izany hoe fahazavana izany..»
18Rehefa izany dia mbola nisy ady indray tamin’ny Filistinina tao Gôba; tamin’izay i Sibekay avy any Hosà no namono ho faty an’i Safa isan’ny taranak’i Harafà. 19Mbola nisy ady hafa tao Gôba, ary tamin’izay i Elehanàna zanakalahin’i Jahiry-Ôregima sady avy any Betlehema, no namono ho faty an’i Gôliata avy any Gata#21.19 Gata: jereo 1 Sam 5.8 sy nta., izay nanana zaran-defona vaventy tahaka ny voditenon’ny mpanenona. 20Dia mbola nisy ady koa tany Gata; ary tao dia nisy olona raindahiny nanana rantsan-tanana enina sy rantsan-tongotra enina, izany hoe efatra amby roapolo no fitambarany. Ilehio koa dia taranak’i Harafà. 21Nihaika ny Israelita izy ka matin’i Jônatàna zanakalahin’i Simehà izay rahalahin’i Davida.
22Ireo miaramila filistinina efa-dahy ireo, izay samy taranak’i Harafà sady tao Gata, dia lavo noho ny famelezan’i Davida sy ny miaramilany azy.
Voafantina amin'izao fotoana izao:
2 Samoela 21: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.