2 Samoela 16
16
I Davida sy i Tsibà
1Raha vao nihoatra ny tampon-tendrombohitra i Davida, dia tonga nitsena azy i Tsibà mpanompon’i Mefibôseta#16.1 Tsibà, Mefibôseta: jereo toko 9., mitarika boriky roa voaisy lasely sady novesarana mofo roanjato sy voaloboka maina zato sampaho ary koa voankazo masaka iray harona sy divay eran’ny siny hoditra. 2Ka hoy ny mpanjaka tamin’i Tsibà:
–Hataonao inona ireo?
Dia hoy ny navalin’i Tsibà:
–Ny boriky, ry andriamanjaka, dia hitaingenan’ny ankohonanao; ny mofo sy ny voankazo hohanin’ireo miaramilanao; ny divay kosa hosotroin’izay reraka any an-taniefitra.
3Ary nanontany azy indray ny mpanjaka hoe:
–Fa mba aiza i Mefibôseta, zafin’i Saoly tomponao?
Dia hoy ny navalin’i Tsibà ny mpanjaka:
–Nijanona any Jerosalema izy, satria noheveriny fa ankehitriny no hampodian’ny Israelita ny fanjakan-draibeny aminy.
4Ary hoy ny mpanjaka tamin’i Tsibà:
–Indro fa omeko anao avokoa izay fananan’i Mefibôseta.
Dia niankohoka ho fanajana ny mpanjaka i Tsibà sady nanao hoe:
–Aoka aho, ry andriamanjaka, mba hahita fitia hatrany eo imasonao!
I Davida sy i Simehỳ
5Rehefa tonga teo akaikin’i Bahorima#16.5 Bahorima: jereo 3.16 sy nta. i Davida mpanjaka, dia nisy lehilahy iray natao hoe Simehỳ zanakalahin’i Gerà sy anisan’ny havan’i Saoly; nivoaka ny tanàna izy sady nanozona an’i Davida. 6Nitora-bato an’i Davida mpanjaka sy ny minisitra rehetra koa izy, na dia teo avokoa aza ny vahoaka sy ny miaramila izay tankavanan’ny mpanjaka sy tankaviany. 7Ary toy izao no nolazain’i Simehỳ rehefa nanozona:
–Mandehana any, mandehana any, ry ilay lehilahy mpandatsa-dra sady ratsy fanahy! 8Havalin’ny TOMPO aminao anie ny namonoanao ho faty ny taranak’i Saoly! Nangalarinao ny fanjakan’i Saoly ka natolotry ny TOMPO ho eo an-tanan’i Absalôma zanakalahinao; ary indro fa idiran-doza izao ianao satria lehilahy mpandatsa-dra.
9Hoy kosa i Abisay zanakalahin’i Tseroià tamin’i Davida mpanjaka:
–Ahoana io alika maty io no manozona anao, ry andriamanjaka? Avelao hotapahiko ny lohan’io.
10Fa novalian’ny mpanjaka hoe:
–Inona no iraharahanao izany, ry zanakalahin’i Tseroià? Matoa manozona ahy izy, dia satria ny TOMPO no nibaiko azy hanozona ahy; koa iza no sahy hanome tsiny azy amin’izany?
11Ary hoy koa i Davida tamin’i Abisay sy ny minisitra rehetra:
–Raha ny zanakalahy naterako aza no mitady ny aiko, ka mainka fa io Benjaminita io#16.11 Ampit 3.19 sy nta.! Aoka izy hanozona ahy, raha ny TOMPO no nibaiko azy hanao izany. 12Angamba ho hitan’ny TOMPO ny fahantrako#16.12 ny fahantrako: araka ny dkt tranainy grika, latinina ary siriaka; ny hebreo: ny masoko na ny fahotako. , ka hampodiny ho fanambinana ny fanozonany ahy androany.
13Fa raha mbola nanohy ny diany i Davida sy ny olony, dia nandroso tsy lavitra azy ireo tamin’ny tehezan-tendrombohitra kosa i Simehỳ, sady mbola nanozona sy nitora-bato ary namafy vovoka. 14Reraka mafy ny mpanjaka sy ny olona rehetra tafaraka taminy raha tonga teo amoron’i Jôrdàna#16.14 amoron’i Jôrdàna: araka ny dkt tranainy grika; ireo teny ireo dia tsy hita amin’ny RM., koa dia naka aina teo.
Manatona an’i Absalôma i Hosay
15Tonga tao Jerosalema i Absalôma sy ny vahoaka Israelita isan-karazany; ary tafaraka taminy koa i Ahitôfela. 16Rehefa mby teo amin’i Absalôma i Hosay, ilay Arkita sakaizan’i Davida, dia niantsoantso hoe:
–Ho ela velona anie ny mpanjaka! Ho ela velona anie ny mpanjaka!
17Fa hoy i Absalôma tamin’i Hosay:
–Izao va no fitiavanao an’i Davida sakaizanao? Nahoana ianao no tsy mba nandeha niaraka taminy?
18Ary hoy i Hosay tamin’i Absalôma:
–Tsy niaraka taminy aho, satria ny tiako hiarahana dia ianao ilay nofidin’ny TOMPO sy nofidin’ireto vahoaka ireto izany hoe ny Israelita isan-karazany; ka ao aminao no hitoerako. 19Faharoa manaraka izany, iza ianao hotompoiko izao, moa tsy ny zanakalahin’ilay sakaizako ihany va? Tahaka izay efa nanompoako an-drainao no hanompoako anao koa.
I Absalôma sy ireo vadin’i Davida
20Hoy i Absalôma tamin’i Ahitôfela:
–Mifampidiniha ianareo ny amin’izay tokony hataontsika:
21Dia hoy kosa i Ahitôfela tamin’i Absalôma:
–Mandehana mandry amin’ny vadikelin-drainao izay nasainy niandry ny trano#16.21 Jereo 15.16; 3.7 sy nta.. Ho fantatry ny Israelita rehetra fa nanao izay nahafa-baràka an-drainao ianao, ka dia hahery ny tanan’izay rehetra mpomba anao.
22Nananganan’ny olona lay teo an-tampon-trano i Absalôma, ka nandry tamin’ny vadikelin-drainy tao teo imason’ny Israelita rehetra izy#16.22 And 21-22: jereo 12.11-12..
23Tamin’izay ny torohevitr’i Ahitôfela dia natao ho tahaka ny tenin’Andriamanitra; ary toy izany avokoa ny torohevitra nataony na tamin’i Davida na tamin’i Absalôma.
Voafantina amin'izao fotoana izao:
2 Samoela 16: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.