2 Samoela 13
13
I Amnôna sy i Tamara
1Izao no nitranga taorian’izany: I Absalôma zanakalahin’i Davida dia nanana anabavy tsara tarehy natao hoe Tamara. Raiki-pitia taminy i Amnôna zanakalahin’i Davida anankiray. 2Niferinaina i Amnôna ary nandraiki-narary noho ny amin’i Tamara anabaviny, satria virijiny#13.2 Ny vehivavy izay tonga taona hanambady nefa mbola mpitovo dia tsy afaka miaraka an-kalalahana amin-dehilahy, na dia amin’ny havany aza, fa tsy maintsy mitokan-toerana any amin’ny efitry ny vehivavy izy. izy io ka sarotra tamin’i Amnôna ny haka azy. 3Fa i Amnôna kosa nanan-tsakaiza natao hoe Jônadaba sady zanakalahin’i Simehà izay rahalahin’i Davida; ary io Jônadaba io dia tena lalin-tsaina. 4Ka hoy izy tamin’i Amnôna:
–Fa nahoana no maloka endrika isan’andro toy izao ianao, ry zanaky ny mpanjaka? Tsy tianao lazaina amiko ve izany?
Dia hoy i Amnôna taminy:
–Tiako i Tamara anabavin’i Absalôma rahalahiko.
5Ary hoy i Jônadaba taminy:
–Mandria eo am-parafaranao, ka manaova sari-marary. Rehefa tonga hamangy anao ny rainao, dia lazao hoe: «Mba avelao i Tamara anabaviko no hitondra sakafo ho ahy, aoka ho eto imasoko no hikarakarany izany mba ho hitako ka hihinanako izay arosony.»
6Dia nandry i Amnôna ka nanao sari-marary. Ary tonga ny mpanjaka hamangy azy ka nilazany hoe:
–Mba avelao hankatỳ i Tamara anabaviko hanao mofo roa ho ahy eto imasoko hihinanako izay arosony.
7Naniraka olona nankany amin’i Tamara i Davida hilaza aminy hoe:
–Mankanesa kely any amin’i Amnôna anadahinao ka manamboara sakafo ho azy.
8Dia nankany amin’i Amnôna anadahiny i Tamara ka nahita azy teo am-pandriana. Naka koba razazavavy, dia nofetainy ary novolavolainy sy nendasiny ho mofo teo imasony. 9Rehefa izany, dia noraisiny ny lapoaly ka narosony azy ny tao anatiny, nefa tsy nety nihinana izy. Ary hoy i Amnôna:
–Avoahy avokoa ny olona rehetra.
Dia nivoaka ny trano avokoa ny olona rehetra. 10Ary hoy izy tamin’i Tamara:
–Ento atỳ am-parafarako ny sakafo mba hihinanako izay arosonao ahy.
Dia nalain’i Tamara ny mofo izay namboariny ka nentiny teo am-parafaran’i Amnôna anadahiny. 11Nefa raha iny nandroso mofo hohaniny iny razazavavy, dia nohazonin’i Amnôna ka nataony hoe:
–Avia handry amiko, ranabavy.
12Fa hoy izy taminy:
–Tsia, ranadahy, aza manao an-keriny ahy, fa tsy fanao eto Israely izany. Aza manao izany zava-pady izany. 13Ny amiko, hoentiko mankaiza moa ny henatro? Fa ianao koa dia ho tahaka ny iray amin’ny adala eto Israely. Mitenena re amin’ny mpanjaka fa tsy handa ny hanambadianao ahy izy.
14Tsy nety nihaino an-drazazavavy anefa i Amnôna fa natanjaka noho izy, ka nanao an-keriny azy ary niray taminy. 15Nony avy teo dia nankahala azy mafy i Amnôna, ka be lavitra ny fankahalàny azy noho ny fitiavany azy taloha. Hoy i Amnôna taminy:
–Mitsangàna ka mandehana any.
16Fa novaliany hoe:
–Tsia, fa ho heloka ratsy kokoa noho izay efa nataonao tamiko ny fandroahanao ahy.
Nefa mbola tsy nety nihaino azy ihany i Amnôna. 17Dia niantso ny zatovolahiny izy ka nanao taminy hoe:
–Roahy hiala eto amiko io vehivavy io; dia hidio ny varavarana, rehefa tafavoaka izy.
18Dia navoakan’ilay mpanompo izy; ary nohidiany ny varavarana, rehefa tafavoaka izy. Nanao akanjo lava misoratsoratra i Tamara; fa izany no fentin’ny zanakavavin’ny mpanjaka, raha mbola virijiny izy. 19Norarahany lavenona ny lohany ary notriariny ny akanjo lava teny aminy; dia niloloha tanana izy sady nikiakiaka nitomany teny am-pandehanana. 20Ary hoy Absalôma anadahiny taminy: «Nanaovan’i Amnôna anadahinao an-keriny angaha ianao? Mangina aloha, ranabavy, fa anadahinao izy ary aza malahelo amin’izany.» Koa nitoetra irery nalahelo tao an-tranon’i Absalôma anadahiny i Tamara. 21Rehefa ren’i Davida mpanjaka izany, dia tezitra mafy izy; kanefa tsy nomeny tsiny i Amnôna satria lahimatoany sady tiany loatra#13.21 kanefa...: ireo teny ireo izay tsy ao amin’ny rijan-teny hebreo mahazatra, dia naverina araka ny stf hebreo iray sy ny dkt grika sy latinina tranainy.. 22Ary tsy nifampiteny intsony tamin’i Amnôna i Absalôma, satria halan’i Absalôma izy noho ny nanaovany an-keriny an’i Tamara anabaviny.
Ny nahafatesan’i Amnôna sy ny nandosiran’i Absalôma
23Roa taona taorian’izany, dia nampanety ondry tao Bahàla-Hatsôra akaikin’i Efraîma#13.23 Bahàla-Hatsôra sy Efraîma: toerana roa tokony ho 25 km avaratr’i Jerosalema.. Nasain’i Absalôma avokoa ny zanakalahin’ny mpanjaka. 24Nankao amin’ny mpanjaka i Absalôma ka nanao hoe:
–Indro hampanety ondry aho, ry mpanjaka; koa mba tongava any amiko ny tenanao sy ireo minisitrao.
25Fa hoy ny mpanjaka tamin’i Absalôma:
–Tsia, anaka, aoka tsy handeha avokoa izahay sao dia hanahirana anao.
Nikiry ihany i Absalôma, nefa tsy nety nandeha ny mpanjaka fa nitsodrano azy fotsiny. 26Dia hoy i Absalôma:
–Raha tsy mety kosa àry ianao, dia aoka i Amnôna rahalahiko no handeha hiaraka aminay.
Ary hoy ny mpanjaka taminy:
–Fa ahoana izy no handeha hiaraka aminao?
27Mbola nikiry hatrany i Absalôma, ka farany navelan’ny mpanjaka handeha hiaraka aminy ihany i Amnôna sy ireo zanakalahiny hafa rehetra. Dia nanomana fanasana tahaka ny fanasà-mpanjaka i Absalôma. 28Izao kosa no baiko nomeny an’ireo mpanompony:
–Jereo tsara, fa rehefa falin-divay ny fon’i Amnôna ka milaza aminareo aho hoe: «Asio i Amnôna!», dia vonoy ho faty izy. Aza matahotra. Moa tsy izaho va no nanome baiko anareo? Koa sahia ary misehoa ho mahery fo!
29Dia notanterahin’ny mpanompon’i Absalôma tamin’i Amnôna araka izay baikon’i Absalôma izany. Dia nitsangana avokoa ny zanakalahin’ny mpanjaka hafa ka samy nitaingina ny borikiny ary nandositra.
30Fa raha mbola teny an-dalana izy ireo, dia efa ren’i Davida ny vaovao hoe: «Novonoin’i Absalôma ho faty avokoa ny zanakalahinao, ka tsy nisy niangana na dia iray aza.» 31Dia nitsangana ny mpanjaka ka nandriatra ny akanjony ary nandry tamin’ny tany. Nijoro teo koa ny minisitra rehetra, samy rovitra akanjo avokoa. 32Fa i Jônadaba zanakalahin’i Simehà izay rahalahin’i Davida kosa nandray fitenenana ka nanao hoe:
–Aoka ianao, ry andriamanjaka, tsy hihevitra fa maty avokoa ny tovolahy rehetra zanakao. Tsia, i Amnôna ihany no maty; ary izany dia fanapahan-kevitr’i Absalôma hatramin’ny andro nanaovan’i Amnôna an-keriny an’i Tamara anabaviny. 33Koa aoka ianao, ry andriamanjaka, tsy hieritreritra fa maty avokoa ny zanakalahinao; tsia, i Amnôna ihany no maty, 34ary nandositra i Absalôma.
Fa raha niandrandra ny mpanompo izay nasaina niambina, dia nahita andian’olona marobe nidina ny tendrombohitra tamin’ny lalan’i Hôrônaima. Dia nankany amin’ny mpanjaka ilehio ka nitantara izay zavatra hitany. 35Hoy i Jônadaba tamin’ny mpanjaka:
–Indreo tokoa, araka izay efa voalazako taminao, fa tonga ireo zanakalahinao.
36Vao tapitra ny teniny, dia indreo tonga ny zanakalahin’ny mpanjaka samy nigogogogo nitomany; ary mba nanao ranomaso havozona koa ny mpanjaka sy ny minisitra rehetra.
37-38I Absalôma dia nandositra nankany amin’i Talmay zanakalahin’i Hamihoda sady mpanjakan’i Gesora#13.37 Gesora: fanjakana kely sirianina entina printsy ao atsinanan’ny farihin’i Genesareta. Araka ny 3.3 dia i Talmay no raiben’i Absalôma avy amin-dreniny. ka nijanona tany telo taona. Nisaona an-janany hatrany kosa i Davida nandritra izany fotoana izany. 39Ary natsahatr’i Davida mpanjaka ny fanenjehany an’i Absalôma fa efa nionona ny alahelony tamin’ny nahafatesan’i Amnôna.
Voafantina amin'izao fotoana izao:
2 Samoela 13: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.