2 Mpanjaka 5
5
Fanasitranana an’i Nahamàna marary hoditra
1Nahamàna no anaran’ny filohan-tafiky ny mpanjakan’i Siria. Lehilahy mendri-kaja sy to teny teo anatrehan’ny tompony izy satria ny Sirianina efa nampandresen’ny TOMPO tamin’ny alalany. Marary hoditra anefa izany lehilahy maherifo izany. 2Ary nisy mpandroba sirianina nitsofoka an-keriny tany amin’ny tanin’i Israely ka nitondra zazavavikely iray ho babo, izay lasa mpanompon’ny vadin’i Nahamàna. 3Ary hoy io tamin’ny tompovaviny:
–Raha mba afaka mankany amin’ny mpaminany any Samaria manko ny tompoko, dia hositraniny amin’izao aretin-koditra izao.
4Dia lasa i Namahàna nilaza tamin’ny mpanjaka ny zavatra nambaran’ilay zazavavikely israelita taminy.
5Ka hoy ny mpanjakan’i Siria:
–Mandehana àry mankany amin’ny mpanjakan’i Israely, fa hampitondra taratasy ho azy aho.
Dia lasa i Nahamàna nitondra volafotsy telonjato kilao sy volamena enimpolo kilao ary akanjo fitondra mianjaika folo. 6Natolony ny mpanjakan’i Israely ny taratasy milaza hoe: «Alefako atỳ aminao miaraka amin’ity taratasy ity i Nahamàna filohan-tafiko mba hositraninao amin’ny aretin-kodiny.» 7Raha vao voavakin’ny mpanjakan’i Israely ilay taratasy, dia nandriatra ny fitafiany izy sady niteny hoe:
–Andriamanitra angaha aho ka hahafaty na hahavelona, no andefasan’ilehiny olona hositranina amin’ny aretin-kodiny? Jereonareo tsara fa mila ady amiko mihitsy izy.
8Raha ren’i Elisà olon’Andriamanitra fa nandriatra ny fitafiany ny mpanjakan’i Israely, dia naniraka hankany amin’ny mpanjaka izy nanao hoe:
–Nahoana no nandriatra ny fitafianao ianao? Aoka hankatỳ amiko i Nahamàna mba hahafantarany fa misy mpaminany tokoa amin’i Israely.
9Dia tonga àry i Nahamàna niaraka tamin’ny kalesy aman-tsoavaliny ka niandry teo anoloan’ny varavaran’ny tranon’i Elisà. 10Ary i Elisà naniraka olona hankany aminy hilaza hoe:
–Mandehana mandro impito ao Jôrdàna, fa hiverina amin’ny toetrany taloha indray ny hoditrao, ka hadio ianao.
11Fa tezitra i Nahamàna, dia lasa sady nanao hoe:
–Noheveriko fa mba hankatỳ amiko tokoa ilay mpaminany ka hivavaka amin’ny TOMPO Andriamaniny sy hanevaheva ny tanany eo amin’ny faritra marary ary hanasitrana ny aretin-koditro. 12Tsy tsara noho ny renirano rehetra amin’i Israely ve i Abanà sy i Farpara reniranon’i Damasy? Moa tsy azoko atao ve ny mandro ao amin’ireo mba hampahadio ahy?
Dia nihodina i Nahamàna ka lasa tamim-pahatezerana. 13Fa nanatona azy ny mpanompony ka nanao taminy hoe:
–Ry ikaky ô, raha toa ka zavatra sarotra no nampanaovin’ny mpaminany anao, moa va tsy ho nataonao izany? Koa nahoana no tsy hataonao izay lazainy aminao hoe: «Mandroa, dia hadio ianao?»
14Dia nidina i Nahamàna ka nisitrika impito tao Jôrdàna araka ny tenin’ilay olon’Andriamanitra; ary ny hodiny dia tonga tahaka ny hodi-jazakely indray, ka nadio izy#5.14 And 1-14: jereo Lk 4.27.. 15Dia niverina nankao amin’ilay olon’Andriamanitra izy mbamin’ireo rehetra mpanaraka azy; ary niseho teo anatrehany izy ka nanao taminy hoe:
–Fantatro ankehitriny fa tsy misy Andriamanitra eto ambonin’ny tany tontolo afa-tsy ato amin’i Israely ihany. Koa mba raiso ny fanomezana atolotro anao.
16Fa hoy ny navalin’i Elisà:
–Velona ny TOMPO izay tompoiko, ka manizingizina aminao aho fa tsy handray izany.
Nitambezo azy handray ihany i Nahamàna, saingy nanda hatrany kosa i Elisà, 17ka nilazany hoe:
–Satria nolavinao ny fanomezako, dia avelao aho mba hitondra tany kely zakan’ny boriky roa avy amin’ny taninao; fa izaho tsy mba hanolotra intsony sorona dorana manontolo na sorom-pihavanana amin’ny andriamani-kafa afa-tsy amin’ny TOMPO ihany#5.17 Tamin’izany fotoana izany izay nananan’ny isam-pirenena ny andriamaniny avy, dia noheverina fa ao amin’ny taniny ihany no ahazoana mivavaka amin’ny andriamanitra iray. Koa dia nanantena i Nahamàna fa hoeken’Andriamanitr’i Israely ny sorona nataony, raha toa ka tany Damasy no nanolorany izany teo amin’ny alitara vita tamin’ny tany avy any Israely.. 18Saingy mangata-pamelana mialoha amin’ny TOMPO aho momba izao zavatra izao: Raha miditra mba hivavaka ao amin’ny tempolin’i Rimôna andriamaniny ny tompoko mpanjakan’i Siria, dia tsy maintsy hiankohoka hitehi-tany miaraka aminy koa aho satria mitehina amin’ny tanako izy. Ny TOMPO anie hamela heloka ahy amin’izany fihetsiko izany!
19Ary hoy i Elisà taminy:
–Mandehana ombàm-piadanana.
Ary lasa nandeha i Nahamàna.
Ny fahadisoan’i Gehazỳ
Raha mbola tsy lasa lavitra akory i Nahamàna, 20dia niteny anakampo i Gehazỳ mpanompon’i Elisà hoe: «Nalefan’ny tompoko tamin’izao fotsiny lahy i Nahamàna ilay Sirianina fa tsy nakany na inona na inona tamin’ny zavatra nentiny. Velona ny TOMPO, ka milokaloka aho fa tsy maintsy hotratrariko iny hahazoako zavatra.» 21Dia lasa i Gehazỳ nanenjika an’i Nahamàna; ary nony nahita azy mihazakazaka manatona kosa i Nahamàna, dia niala faingana tamin’ny kalesiny hitsena azy ka nanao hoe:
–Tsara ihany va ianao?
22Ary hoy ny navaliny:
–Tsara ihany aho; saingy nirahin’ny tompoko fotsiny aho hilaza aminao, fa misy zatovo roa lahy anisan’ny andia-mpaminany tonga ao aminy avy any amin’ny faritra havoan’i Efraîma. Koa miangavy anao izy mba hanome azy roa lahy volafotsy telopolo kilao ary akanjo fitondra mianjaika roa.
23Dia hoy i Nahamàna:
–Volafotsy enimpolo kilao re entina e!
Notereny handray izany i Gehazỳ, ary dia nataony tao anaty kitapo roa tsara fehy ny volafotsy enimpolo kilao sy ny akanjo roa; ka nasainy nentin’ny mpanompony roa lahy izay nanaraka an’i Gehazỳ ireo rehetra ireo. 24Rehefa tonga teo amin’ny toerana atao hoe Hôfela#5.24 Hôfela: mety ho faritra akaikin’ny fidirana amin’ny tanàna. Io voambolana io dia midika hoe haavo ka mety hanondro havoana anankiray. Nisy Hôfela iray koa tany Jerosalema, jereo Ne 3.26-27. izy, dia nalain’i Gehazỳ ny kitapo sy ny akanjo ka napetrany tao an-tranony; ary nasainy niverina ireo mpanompon’i Nahamàna, ka lasa.
25Nony tafaverina teo anatrehan’ny tompony kosa i Gehazỳ, dia nanontanian’i Elisà hoe:
–Avy taiza ianao, ry Gehazỳ?
Ka hoy ny navaliny:
–Tsy avy taiza tsy avy taiza aho, tompoko.
26Fa hoy indray i Elisà:
–Moa ataonao tsy ho hitako am-panahy ve iny lehilahy izay niala tamin’ny kalesiny hitsena anao iny? Tsy fotoana fandraisam-bola na fitafiana, na tanin’ôliva na tanimboaloboka, na ondry aman’osy, na omby, na mpanompolahy na mpanompovavy izao; 27satria ny aretin-koditr’i Nahamàna dia hiraikitra aminao sy ny taranakao hatrany hatrany.
Rehefa niala teo anatrehan’i Elisà i Gehazỳ, dia indro fa niempaka fotsy toa oram-panala ny hodiny.
Voafantina amin'izao fotoana izao:
2 Mpanjaka 5: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.