2 Mpanjaka 21
21
I Manase mpanjakan’i Joda
(Jereo 2 Tan 33.1-10, 18-20)
1Feno 12 taona i Manase fony izy tonga mpanjaka; ary naharitra 55 taona no nanjakany tao Jerosalema. Ny anaran-dreniny dia Hefitsibà. 2Nanao izay ratsy eo imason’ny TOMPO izy fa naka tahaka ny fanompoan-tsampy maharikoriko fanaon’ireo firenena izay noroahin’ny TOMPO teo anoloan’ny Israelita#21.2 Jereo Jer 15.4.. 3Naorin’i Manase indray manko ny toeram-panasinana izay efa noravan’i Hezekià rainy; ka nanangana alitara ho an’i Bahala izy sady nanao tsatokazo fanajana an’i Aserà tahaka izay nataon’i Ahaba mpanjakan’i Israely#21.3 Jereo 1 Mp 16.31-33.; dia niankohofany sy nanaovany fanompoam-pivavahana koa ireo planeta aman-kintana eny ana habakabaka. 4Ary nanorenany alitara hafa aza tao an-tranon’ny TOMPO, dia tao amin’ilay nolazain’ny TOMPO hoe: «I Jerosalema no hampitoerako ny voninahitro». 5Tao anatin’ny kianja roa amin’ny tranon’ny TOMPO tokoa no nanorenany alitara hafa ho fanajana ireo planeta aman-kintana eny ana habakabaka. 6Ary na ny zanany lahy aza dia natolony ho sorony dorana; ankoatra izany dia mbola nanandro sady nisikidy ary naka hevitra tamin’ny olona tsindrian-javatra sy mpanao fitokavana#21.6 Jereo 16.3 sy nta; Deot 18.10-11. koa izy. Nahery nanao izay ratsy eo imason’ny TOMPO izy, ka nampahatezitra Azy. 7Ny sarivongan’ny andriamani-bavy Aserà, izay nampanamboariny, dia napetrany tao amin’ny tempoly izay efa nolazain’ny TOMPO tamin’i Davida sy i Salômôna zanany hoe: «Ato amin’ity tempoly ity sy eto Jerosalema izay tanàna nofidiko tamin’ny foko israelita rehetra ity no hampitoerako mandrakizay ny voninahitro. 8Koa tsy hampirenireny ny Israelita hiala amin’ny tany izay nomeko ny razany intsony Aho, raha imasoany hotanterahina ny didiko rehetra sy ny lalàna manontolo izay nandidian’i Mosesy mpanompoko azy#21.8 Ny and 7-8 dia tsy tonon-tsiahy momba ny rijan-teny iray ao amin’ny Testamenta Taloha, fa maka kosa ny vontoatin’ny andalan-teny toy ny 2 Sam 7.8-16 (2 Tan 6.4-11); 1 Mp 2.2-4. .» 9Kanefa tsy nihaino izany ny Jodeanina, fa vao mainka aza notaomin’i Manase hanao ratsy mihoatra noho ny hafa firenena izay naringan’ny TOMPO tsy ho eo anoloan’ny Israelita.
10Koa ny TOMPO dia nampiteny an’ireo mpaminany mpanompony hoe: 11«Satria nahavita izao fanompoan-tsampy maharikoriko izao i Manase mpanjakan’i Joda ka nanao ratsy mihoatra noho ny nataon’ny Amôrita teo alohany sady nampanota ny Jodeanina tamin’ny sampiny, 12dia izao kosa no lazain’ny TOMPO Andriamanitr’i Israely: Hitondra loza amin’i Jerosalema sy amin’ny Jodeanina Aho ka hampangintsina ny sofin’izay rehetra mandre izany. 13Horavako tahaka ny nandravako an’i Samaria sy ny fianakavian’i Ahaba i Jerosalema. Hodioviko toy ny fanadio lovia izay faohina sy ahohoka i Jerosalema ka tsy hisy mponina intsony ao. 14Ary hafoiko ny sisa tavela amin’ny vahoakako ka hatolotro amin’ny fahavalony rehetra mba hosamboriny sy hobaboiny, 15satria efa nanao izay ratsy eo imasoko izy ka nampahatezitra Ahy hatramin’ny andro nialan’ny razany tany Ejipta ka mandraka androany.»
16Marobe ny olona tsy manantsiny nampamonoin’i Manase ho faty ka nanerana an’i Jerosalema manontolo ny rany#21.16 Ity fiandohan’ny and 16 ity dia angamba mampahatsiahy koa ny sorona olombelona nataon’i Manase (jereo and 6).; izany moa dia ankoatra ny fahotana nitarihany an’ireo Jodeanina tamin’ny nanaovany izay ratsy eo imason’ny TOMPO.
17Ny sisa amin’ny tantaran’i Manase ary koa ny zavatra hafa rehetra nataony ary ny fahotana vitany dia voasoratra ao amin’ny boky milohateny hoe Asan’ireo mpanjakan’i Joda. 18Rehefa lasa nodimandry any amin’ny razany i Manase, dia nalevina tao an-jaridainan’ny lapa na koa «Zaridainan’i Hozà»; ary i Amôna zanany lahy no nanjaka nandimby azy.
I Amôna mpanjakan’i Joda
19Feno 22 taona i Amôna fony tonga mpanjaka; ary naharitra roa taona no nanjakany tao Jerosalema. Ny anaran-dreniny dia Mesolemeta zanakavavin’i Harotsa avy any Jôtvà. 20Nanao izay ratsy eo imason’ny TOMPO tahaka an’i Manase rainy i Amôna. 21Narahiny avokoa ny toetran-drainy fa nanompo ireo sampy izay notompoin-drainy izy sady niankohoka teo anatrehany. 22Nandao ny TOMPO Andriamanitry ny razany izy fa tsy nanaraka ny sori-dalan’ny TOMPO.
23Nikomy tamin’i Amôna ireo manamboninahiny ka namono azy ho faty tao an-dapany. 24Fa mba nataon’ny mponin’i Joda maty kosa izay rehetra nikomy tamin’ny mpanjaka; ka dia i Josià zanany lahy no voatendriny ho mpanjaka handimby azy.
25Ny sisa amin’ny tantaran’i Amôna ary koa ny zavatra hafa nataony dia voasoratra ao amin’ny Boky milohateny hoe Asan’ireo mpanjakan’i Joda. 26Dia nalevina tao amin’ny fasany tao an-jaridainan’i Hozà izy; ary i Jôsià zanany lahy no nanjaka handimby azy.
Voafantina amin'izao fotoana izao:
2 Mpanjaka 21: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.