2 Mpanjaka 17
17
I Hôsea mpanjakan’i Israely; ny nahazoana an’i Samaria
1Tamin’ny taona faha-12 nanjakan’i Ahaza tamin’i Joda no tonga mpanjakan’i Israely tao Samaria i Hôsea zanakalahin’i Elà; ary naharitra sivy taona no nanjakany tao. 2Nanao izay ratsy eo imason’ny TOMPO izy nefa tsy dia tahaka ny nataon’ireo mpanjakan’i Israely talohany. 3Tonga nanafika azy i Salmanesera mpanjakan’i Asiria, koa dia nanaiky handoa hetra ho azy i Hôsea. 4Tato aoriana anefa dia nikomy taminy i Hôsea, satria sady nandefa iraka tany amin’ny mpanjakan’i Ejipta tany Saîsa#17.4 Tamin’izany fotoana izany, i Saîsa tao amin’ny faritry ny vinanin’i Neily no renivohitr’i Ejipta. izy no tsy nety nandoa ny hetrany isan-taona ho an’ny mpanjakan’i Asiria intsony. Koa rehefa hitan’i Salmanesera izany fikomiana izany, dia nasainy nosamborina sy nogadraina i Hôsea. 5Dia nidirany an-kery ny tany ary nataony fahirano i Samaria nandritra ny telo taona. 6Tamin’ny taona fahasivy nanjakan’i Hôsea no nahazoan’ny mpanjakan’i Asiria an’i Samaria; ka dia nataony sesitany tany Asiria ny Israelita tavaratra ary namponeniny tao Halà sy tao Gôzàna teo amoron’ny ony Habôra ary teny amin’ny tanànan’i Media#17.6 Tamin’ny 722 na 721 tal J.K, dia i Sargôna II mpanjaka, rahalahin’i Salmanesera V sy mpandimby azy no naka an’i Samaria. –Halà: toerana any Mezôpôtamia avaratra (jereo Gen 10.11); Gôzàna: mbola toerana any Mezôpôtamia avaratra; Habôra: Khabur ankehitriny, sampan’ony havia amin’ny ony Eofrata; Media: tany ao atsinanan’i Asiria sy atsimon’ny Ranomasina Kaspienina..
Ny nahatonga ny faharavan’ny fanjakan’i Israely
7Tonga izany rehetra izany noho ny nanotan’ny Israelita tavaratra tamin’ny TOMPO Andriamaniny Izay nanafaka azy teo ambany fifehezan’ny Farao mpanjakan’i Ejipta sy nitondra azy niala tao amin’io tany io. Fa nanompo andriamani-kafa ireo 8ka nanaraka ny fanaon’ny hafa firenena izay efa noroahin’ny TOMPO tsy ho eo anoloan’ny Israelita ary koa nanaraka ny fomba noforonin’ireo mpanjakan’i Israely#17.8 Avaho tsara ny hoe Israelita (and 7) izay ilazana ny foko folo tao Israely fanjakana avaratra sy ny hoe Israelita (and 8) izay manondro ny foko 12 mitambatra ary ny hoe Israely (and 8) izay ilazana ny fanjakana avaratra mahafaoka ny foko folo.. 9Niteny ratsy ny TOMPO Andriamaniny izy ka nanorina toeram-panasinana teny an-tanànany rehetra teny, manomboka amin’ny tilikambom-piambenana ka hatrany amin’ny tanànamimanda. 10Nananganany tsangambaton-tsampy sy tsatokazo fanajana an’i Aserà teny an-tampon-kavoana nisy hazo midoroboka maitso rehetra teny#17.10 And 9-10: jereo 1 Mp 14.23.; 11dia nandoro sorona hanetona teny amin’ny toeram-panasinana rehetra koa izy tahaka ny nataon’ireo hafa firenena izay noroahin’ny TOMPO tsy ho eo anoloany. Nahavita zava-dratsy tokoa ny Israelita, hany ka nampahatezitra ny TOMPO: 12nanompo sampy izy na dia efa noraran’ny TOMPO tsy hanao izany aza.
13Nampitandrina ny vahoakan’i Israely sy i Joda tamin’ny alalan’ny mpaminany sy mpahita rehetra ny TOMPO nanao hoe:
–Ialao ny toe-dratsinareo#17.13 Sahabo ho 150 taona tatỳ aoriana dia niteny tahaka izany koa i Jeremià (18.11) sy i Ezekiela (33.11). ka tandremo ny didy sy baiko nataoko araka ny lalàna manontolo izay nandidiako ny razanareo sy nampitondraiko ireo mpaminany mpanompoko ho anareo.
14Nefa tsy nihaino izany izy roa tonta fa nanamafy hatoka tahaka ireo razany izay tsy nino ny TOMPO Andriamaniny. 15Nolaviny ny lalànan’Andriamanitra sy ny fanekempihavanana izay nataony tamin’ny razany ary ny fampitandremana nananarany azy. Nanenjika zava-poana izy ka dia tonga zava-poana koa; ary nanaraka ny hafa firenena manodidina azy sady efa nandraran’ny TOMPO azy tsy hotahafina. 16Nafoiny avokoa ny didin’ny TOMPO Andriamaniny, ka nanao sarivongan’ombilahikely anankiroa izy sy nanangana tsatokazo fanajana an’i Aserà ary niankohoka teo anatrehan’ny planeta aman-kintana#17.16 Jereo 1 Mp 12.28. sady nanompo an’i Bahala. 17Nanolotra ny zanany lahy sy vavy ho sorona dorana#17.17 Jereo 16.3 sy nta. izy, sady nanao majika sy sikidy, ary nivarilavo nanao izay ratsy eo imason’ny TOMPO, ka nampahatezitra Azy. 18Dia vinitra tamin’ny Israelita ny TOMPO ka nanaisotra azy tsy ho hitan’ny masony. Ny fokon’i Joda ihany no sisa tafajanona.
19Na dia i Joda koa aza tsy nitandrina ny didin’ny TOMPO Andriamaniny, fa nanaraka ny fomba najoron’ny Israelita tavaratra. 20Izany no nandavan’ny TOMPO ny taranak’i Israely rehetra ka nampahoriny azy sy nanolorany azy ho eo an-tanan’ny mpandroba ary farany hanesorany azy ho lavitra ny fanatrehany.
21Rehefa nendahan’ny TOMPO tamin’ny fianakavian’i Davida#17.21 Jereo 1 Mp 12. i Israely, dia natsangany ho mpanjaka i Jerôbohama zanakalahin’i Nebata izay nampiala an’i Israely avaratra tamin’ny TOMPO sy nitarika azy tamin’ny fahotana lehibe. 22Ary nizoran’ny Israelita hatrany fa tsy nialany akory ny fahotana rehetra izay nataon’i Jerôbohama. 23Farany dia nesorin’ny TOMPO ho lavitra ny fanatrehany mihitsy ireo, araka ny nambarany tamin’ny alalan’ny mpaminany rehetra mpanompony; ka voababo lavitry ny taniny tokoa izy ho any Asiria izay mbola misy azy mandraka ankehitriny.
Fanompoan-tsampy tany Samaria
24Fa nitondra olona avy tany Babilôna sy Kotà na avy tany Havà sy Hamata ary Sefarvaîma#17.24 Babilôna... Sefarvaîma: toerana izay nalain’ny mpanjakan’i Asiria. –Ireo mpanjakan’i Asiria, tahaka ireo an’i Babilôna, dia matetika nanao sesitany ny mponina resy mba hahatsara antoka ny fanjakazakany. ny mpanjakan’i Asiria mba hapetrany amin’ireo tanànan’i Samaria hisolo ny Israelita izay voasesitany; ireo no nahazo ny faritr’i Samaria ho fananany ka nitoetra tamin’ny tanànany. 25Raha vao nanomboka nipetraka tamin’ireny toerana ireny izy, dia tsy nanaja ny TOMPO ka nandefasany liona izay nahafaty maro taminy. 26Dia nilazana ny mpanjakan’i Asiria hoe:
–Ny olona izay nafindranao sy nampitoerinao teny amin’ny tanànan’i Samaria dia tsy mahalala izay fomba fanao amin’ny Andriamanitry ny tany any ka dia nandefasany liona izay nahafaty maro taminy.
27Koa nanome baiko ny mpanjakan’i Asiria nanao hoe:
–Maniraha mpisorona iray amin’ireo nataonareo sesitany mba handeha honina any, ka hampianatra azy ny fomba fanompoana ny Andriamanitry ny tany any.
28Izany no nahatonga ny mpisorona voasesitany iray avy tany Samaria honina tao Betela ka nampianatra ny mponina ny fomba fanajana ny TOMPO.
29Kanefa mbola samy nanao sarivongan’ny andriamaniny avy ny isam-pirenena ka nametraka izany tao amin’ireo tranon’ny toeram-panasinana, trano izay namboarin’ny mponina taloha tany Samaria; eny, samy nanao izany avokoa ny isam-pirenena tao amin’ny tanàna nitoerany: 30ny olona avy any Babilôna dia nanao sarivongan’i Sokôta-Benôta; ny avy any Kota nanao sarivongan’i Nergala; ny avy any Hamata nanao sarivongan’i Asimà; 31ny Havita nanao sarivongan’i Nibihaza sy i Tartàka; ny olona avy any Sefarvaîma aza nanolotra ny zanany ho sorona dorana tamin’i Adramelèka sy Hanamelèka#17.31 Amin’ity lisitry ny andriamanitra vahiny ity, dia i Nergala ihany no fantatra fa andriamanitra nivavahana tany Mezôpôtamia. andriamaniny. 32Nanaja ny TOMPO koa izy rehetra ka nanendry olona avy tamin’ny sarambabem-bahoaka ihany ho mpisorona amin’ireny tranon’ny toeram-panasinana ireny ary hitarika ny fombam-pivavahana amin’ny anaran’ny vahoaka. 33Koa sady nanaja ny TOMPO izy no mbola nanompo ny andriamaniny avy ihany koa araka ny fomba fanaon’ny firenena niaviany avy.
34Ny taranak’ireo vahiny ireo dia mbola manarakaraka izany fomba tranainy izany mandraka androany, fa tsy tena manaja marina ny TOMPO. Samy tsy tena arahiny na ny fomban-drazany, na ny lalàna sy ny didy izay nandidian’ny TOMPO ny taranak’i Jakôba, dia ilay Jakôba nomeny anarana hoe Israely#17.34 Jereo Gen 32.29; 35.10.. 35Rehefa nanao fanekempihavanana taminy manko ny TOMPO, dia nanome azy izao didy izao hoe: Aza manaja ny andriamani-kafa; aza miankohoka aminy ary aza manompo azy na manao sorona aminy. 36Fa ny TOMPO Izay nitondra anao niala tany Ejipta tamin-kery lehibe sy tamim-pahefana tsy hay tohaina no hany hohajainareo sy hiankohofanareo ary hanoloranareo sorona. 37Ary aoka hotandremanareo isan’andro ny didy sy ny lalàna ary ny didy izay nosoratany ho anareo; aza manaja ny andriamani-kafa. 38Aza hadinoina ny fanekempihavanana nataoko taminareo ary aza manaja ny andriamani-kafa. 39Izaho TOMPO Andriamanitrareo no aoka hohajainareo, fa Izaho ihany no mahavonjy anareo amin’ny fahavalonareo rehetra#17.39 Ny and 35-39 dia tsy milaza rijan-teny iray akory, fa fomba fiteny fampiasan’ny Deoterônômy matetika kosa..
40Nefa ireo olona ireo tsy nety nihaino fa mbola nanohy ny fomba fanao taloha ihany. 41Tetsy andaniny dia mba nanaja ny TOMPO ihany izy, fa tetsy ankilany kosa dia nanompo ny sampiny izy hatramin’ny zanaka aman-jafiny mandraka ankehitriny.
Voafantina amin'izao fotoana izao:
2 Mpanjaka 17: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.