2 Mpanjaka 1
1
Melohin’Andriamanitra ny fihetsik’i Ahazià
1Taorian’ny nahafatesan’i Ahaba dia nikomy tamin’i Israely i Môaba.
2Indray andro i Ahazià mpanjakan’i Israely dia nianjera avy teny an-davarangan’ny efitrano ambony amin’ny lapany tao Samaria ka naratra mafy. Dia naniraka olona izy hanontany an’i Bahala-Zeboba#1.2 efitrano ambony: ampit 1 Mp 17.19 sy nta. –Bahala-Zeboba: izany anarana izany dia midika hoe «ny Tompon’ny lalitra»; teny fanesoana fanambaniana avy amin’ny hoe Bahala-Zebola na «Bahala Printsy». andriamanitry ny tanànan’i Hekrôna, raha toa ka ho sitrana amin’izao ratra nahazo azy izao na tsia. 3Fa hoy kosa ny anjelin’ny TOMPO tamin’i Elià avy any Tisbe:
–Mandehana mihaona amin’ny iraky ny mpanjakan’i Samaria ka lazao izy hoe: «Moa tsy misy Andriamanitra ve any Israely no mandeha hanontany an’i Bahala-Zeboba andriamanitr’i Hekrôna ianareo?» 4Dia ampio koa hoe: «Izao no tenin’ny TOMPO ho an’ny mpanjakan’i Israely: ‹Tsy hiala eo am-parafara izay nandrianao intsony ianao, fa ho faty tokoa.› »
Ary lasa i Elià nampita hafatra.
5Dia niverina tany amin’ny mpanjaka ireto iraka. Rehefa nanontany ny anton’ny niverenany kosa i Ahazià, dia novaliany hoe:
6–Nisy lehilahy iray nanatona anay sady nanome baiko anay mba hiverina atỳ aminao ka hilaza aminao izao tenin’ny TOMPO izao: «Moa tsy misy Andriamanitra ve any Israely no maniraka hanontany an’i Bahala-Zeboba andriamanitr’i Hekrôna ianareo? Noho izany, dia tsy hiala eo am-parafara izay nandrianao intsony ianao, fa ho faty tokoa!»
7Ary hoy ny mpanjaka tamin’ireo:
–Fa manao ahoana izay lehilahy tonga nitsena anareo izay ka nilaza izany teny izany taminareo?
8Dia novaliany hoe:
–Manao akanjo volom-biby sy fehikibo hoditra#1.8 Ampit Mt 3.4; Mk 1.6. izy.
Dia hoy ny mpanjaka:
–I Elià avy any Tisbe izay!
Nikasa hisambotra an’i Elià i Ahazià
9Dia nandefa manamboninahitra iray miaraka amin’ny miaramila dimampolo ny mpanjaka mba hisambotra an’i Elià. Ary ireo niakatra terỳ an-tampon-tendrombohitra izay nipetrahan’i Elià. Dia nitenenan’ilay manamboninahitra izy hoe:
–Ry olon’Andriamanitra ô, midîna ianao, hoy ny mpanjaka!
10Fa novalian’i Elià hoe:
–Raha olon’Andriamanitra tokoa aho, dia aoka hisy afo hilatsaka avy any an-danitra handevona anao sy ny miaramila dimampolo fehezinao#1.10 Ampit Lk 9.54.!
Dia nisy afo nilatsaka avy tany an-danitra ka nandevona ilay manamboninahitra sy ny miaramilany dimampolo. 11Ary nalefan’ny mpanjaka indray ny manamboninahitra iray hafa miaraka amin’ny miaramila dimampolo hankany amin’i Elià. Dia nitenenan’ilay manamboninahitra izy hoe:
–Ry olon’Andriamanitra, midîna faingana ianao, hoy ny mpanjaka!
12Fa novalian’i Elià hoe:
–Raha olon’Andriamanitra tokoa aho, dia aoka hisy afo hilatsaka avy any an-danitra handevona anao sy ny miaramila dimampolo fehezinao!
Dia nisy afo nilatsaka avy tany an-danitra ka nandevona ilay manamboninahitra sy ny miaramilany dimampolo. 13Mbola nalefan’ny mpanjaka koa ny manamboninahitra iray hafa miaraka amin’ny miaramila dimampolo. Dia niakatra ny tendrombohitra ilay manamboninahitra; rehefa tonga izy, dia nandohalika teo anatrehan’i Elià ka nitalaho taminy nanao hoe:
–Ry olon’Andriamanitra ô, mba tsimbino re ny aiko sy ny an’ireto miaramilako dimampolo ireto! 14Fantatro fa efa nisy afo nilatsaka avy tany an-danitra izay nandevona ireo manamboninahitra roa talohako mbamin’ny miaramila feheziny avy. Ankehitriny kosa mba tsimbino re ny aiko!
15Ary hoy ny anjelin’ny TOMPO tamin’i Elià:
–Midîna miaraka aminy, fa aza matahotra azy.
Dia nidina niaraka tamin’ilay manamboninahitra ho any amin’ny mpanjaka i Elià, 16ka nilaza tamin’i Ahazià ny tenin’ny TOMPO hoe:
–Satria naniraka olona hanontany an’i Bahala-Zeboba andriamanitr’i Hekrôna ianao, hoatra ny hoe tsy misy Andriamanitra mba azo anontaniana eto amin’i Israely, dia tsy ho tafala eo am-parafara izay nandrianao intsony ianao fa ho faty tokoa.
17Dia maty tokoa araka ny tenin’ny TOMPO voalazan’i Elià i Ahazià; ary satria tsy mba niteraka izy, dia i Jôrama rahalahiny#1.17 rahalahiny: araka ny dkt grika tranainy izany; fa tsy hita ao amin’ny RM io voambolana io. no nanjaka nandimby azy tamin’ny taona faharoa nanjakan’i Jôrama zanakalahin’i Jôsafata sady mpanjakan’i Joda.
18Ny sisa amin’ny tantaran’i Ahazià ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Israely.
Voafantina amin'izao fotoana izao:
2 Mpanjaka 1: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.