2 Tantara 12
12
Notafihin’i Sisàka mpanjakan’i Ejipta i Joda
(Jereo 1 Mp 14.25-28)
1Rehefa nampandry ny fanjakany sady nanamafy fahefana i Rehabohama, dia nandao ny lalànan’ny TOMPO na ny tenany na ny Israelita rehetra tatsimo. 2Ary tamin’ny taona fahadimy nanjakan’i Rehabohama dia niakatra i Sisàka mpanjakan’i Ejipta mba hamely an’i Jerosalema, satria nivadika tamin’ny TOMPO ireo mponina tao. 3Nitondra kalesy 1 200 sy mpitaingin-tsoavaly 60 000 i Sisàka; ary tsy hita isa ny miaramila nanaraka azy avy any Ejipta, dia ny Libianina sy ny Sokita ary ny Etiôpianina. 4Dia azony ny tanànamimanda eran’i Joda, ka tonga hatrany Jerosalema izy.
5Noho ny fiavian’i Sisàka, dia tafavory tao Jerosalema i Rehabohama sy ireo mpifehy ny faritr’i Joda. Nanatona ny mpivory kosa i Semahià mpaminany ka nanao taminy hoe:
–Izao no lazain’ny TOMPO: «Ianareo efa nandao Ahy; Izaho koa mba mandao anareo ho eo ambany fifehezan’i Sisàka.»
6Dia niaiky hadisoana ny mpanjaka sy ireo mpifehy ny Israelita tatsimo ka nanao hoe:
–Rariny ny an’ny TOMPO!
7Ary nony hitan’ny TOMPO izany fiekena hadisoana izany, dia nisy indray tenin’ny TOMPO tamin’i Semahià nanao hoe:
–Efa niaiky hadisoana ireo, ka tsy handringana azy Aho fa tsy ho ela dia hanafaka azy; ary ny fahatezerako tsy hatosako amin’i Jerosalema avy amin’ny famelezan’i Sisàka. 8Kanefa hilefitra hanompo an’i Sisàka ihany izy ireo, mba hahafantarany fa tsy mitovy ny manompo Ahy sy ny manompo ireo mpanjakan’ny tany vahiny.
9Dia niakatra i Sisàka mpanjakan’i Ejipta mba hamely an’i Jerosalema ka namabo ny raki-tsoa tao an-tranon’ny TOMPO sy tao an-dapan’ny mpanjaka; nobaboiny avokoa ireo, indrindra ny ampinga volamena rehetra izay nataon’i Salômôna#12.9 Jereo 9.15-16; 1 Mp 10.16-17.. 10Ho solon’ireny kosa dia nampanao ampinga halimo i Rehabohama; ka ny lehiben’ny mpiambina, izay niandry ireo varavaran’ny lapan’ny mpanjaka, no nanankinany azy. 11Ary na oviana na oviana nidiran’ny mpanjaka tao an-tranon’ny TOMPO, dia tonga ny mpiambina naka ireo ampinga ireo, ka avy eo namerina azy ho ao an’efitranon’ny mpiambina indray.
12Niaiky hadisoana kosa i Rehabohama, ka niala taminy ny fahatezeran’ny TOMPO mba tsy hahalany ringana azy; sady mbola nisy hatsaram-panahy ihany tao Joda.
Fiafaran’ny nanjakàn’i Rehabohama
(Jereo 1 Mp 14.21-24, 29-31)
13I Rehabohama mpanjaka dia nanamafy ny fahefàny tao Jerosalema, ka dia nanjaka; feno 41 taona izy fony tonga mpanjaka, ary naharitra 17 taona no nanjakany tao Jerosalema, ilay tanàna nofidin’ny TOMPO tamin’ireo fokon’i Israely rehetra mba hampitoerany ny vonihahiny. Ny anaran-drenin’i Rehabohama dia i Nahamà izay Hamônita. 14Ary nanao ratsy i Rehabohama, satria tsy nampifantoka ny fony hitady ny TOMPO.
15Ny tantaran’i Rehabohama, na tamboalohany na tafara, dia voasoratra ao amin’ny boky milohateny hoe Asan’i Semahià mpaminany sy i Hidao mpahita#12.15 mpahita: jereo 1 Sam 9.9-11. Very io boky voateny eto io fa tsy ananantsika intsony. sady voavisavisa tsara. Ary niady mandrakariva i Rehabohama sy i Jerôbohama. 16Rehefa lasa nodimandry any amin’ny razany i Rehabohama, dia nalevina tao an-Tanànan’i Davida; ary i Abià#12.16 I Abià dia antsoina hoe Abiama ao amin’ny rijan-teny mirazotra 1 Mp 15.1-8. zanany lahy no nanjaka nandimby azy.
Voafantina amin'izao fotoana izao:
2 Tantara 12: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.