1 Mpanjaka 6
6
Ny fanaovana ny tempoly
(Jereo 2 Tan 3.1-14)
1Tamin’ny taona faha-480 taorian’ny nialan’ny Israelita tany Ejipta, izany hoe ny taona fahefatra nanjakàn’i Salômôna tamin’i Israely, fony volana Ziva#6.1 Ziva: jereo ny FTS amin’ny voambolana hoe FANISANANDRO. na volana faharoa no nanombohany nanorina ny tranon’ny TOMPO.
2Ary ny trano izay nataon’i Salômôna mpanjaka ho an’ny TOMPO dia nirefy telopolo metatra ny lavany, folo metatra ny sakany ary 15 metatra ny haavony. 3Ny lalantsara fidirana, izay teo anoloan’ny efitrano malalaka amin’ny tempoly dia nirefy folo metatra toy ny sakan’ny tempoly ihany ary dimy metatra ny lafiny miditra ho amin’io efitrano io. 4Teo amin’ny rindrin’ny tempoly dia nisy ireo varavarankely nametahana fefy makarakara#6.4 fefy makarakara: mety ho takela-bato voalavadavaka mba hidiran’ny rivotra ao an-trano sady haingony rahateo ihany koa.. 5Natsangana ny paosin-trano misy rihana roa izay niankina tamin’ny rindrina ivelan’ny efitrano malalaka sy ny efitrano anatiny. 6Ny ambany rihan’ny paosin-trano dia nirefy roa metatra sy sasany ny sakany, ny rihana voalohany dia nirefy telo metatra ny sakany ary ny rihina faharoa dia mirefy telo metatra sy sasany ny sakany. Tsy mitovy manko ny hatevin’ny rindrina ivelan’ny tempoly isaky ny rihana mifanongoa, mba tsy haninteraka ny rindrin’ny tempoly ireo sakamandimbin’ny paosin-trano. 7Tamin’ny fanaovana ny tempoly, dia vato voapaika avy tany amin’ny fihadiam-bato no nampiasaina, hany ka tsy nandrenesana feon-tantanana na fandraka na fiasana vy hafa tao amin’ny tempoly#6.7 Isaky ny rihan’ny paosin-trano, ny rindrin’ny tempoly dia andatsahana 50 sm ny hateviny, ka izany no nipetrahan’ireo sakamandimbin’ny paosin-trano.. 8Ny varavarana mankamin’ny ambany rihana dia teo amin’ny lafy atsimon’ny tempoly; tohatra miolikolika no niakarana hankamin’ny rihana voalohany; tahaka izany koa no niakarana hankamin’ny rihana faharoa. 9Mba hamitana ny fananganana ny tempoly, dia napetaka ny valin-tafo izay nasiana sakamandimby sy hazo fisaka sedera. 10Ary ny paosin-trano natao manodidina dia mirefy roa metatra sy sasany ny haavony isaky ny rihana, ary hazo sedera no nanakambanany azy tamin’ny rindrin’ny tempoly.
11Dia nisy tenin’ny TOMPO tamin’i Salômôna nanao hoe:
–Manao izao tempoly izao ho Ahy ianao; 12koa raha mizotra araka ny lalànako ianao sy manaraka ny fitsipiko ary mitandrina ny didiko rehetra, dia hotanterahiko aminao ny fampanantenana izay nataoko tamin’i Davida rainao; 13honina ao amin’ny tempoly eto anivon’ny Israelita Aho ary tsy hahafoy ilay Israely vahoakako.
Ny fandravahana ny atin’ny tempoly
14Rehefa vitan’i Salômôna ny asa fananganana ny tempoly, 15dia norakofany hazo sedera ny rindrina anatiny hatreo ambany ka hatrany ambony; ary hazo fisaka kipreso no nataony gorodona. 16Norakofana hazo sedera mirefy folo metatra hatreo ambany ka hatrany ambony koa ny rindrin’ilay efitrano anatiny; ka ny atin’io efitrano io dia namboarina ho efitra voatokana izay nantsoina hoe Toeramasina Indrindra#6.16 Toeramasina indrindra: ampit Eks 26.33-34.. 17Ilay efitrano malalaka teo anoloan’io efitra voatokana io kosa dia nirefy roapolo metatra ny lavany. 18Ny hazo sedera izay tao anatin’ny tempoly dia voaravaka asa sokitra misarim-boatango sy voninkazo mivelatra; vita tamin’ny sedera avokoa izany ka tsy nisy mihitsy vato niseho. 19Teo amin’ny faritra afovoan’ny tempoly dia namboarana efitrano iray hametrahana ilay Vatamasina mirakitra ny fanekempihavanan’ny TOMPO. 20-21Efamira io efitrano io ka samy nirefy folo metatra ny lafiny rehetra ary folo metatra koa ny haavony. Nopetahan’i Salômôna takela-bolamena tsara sady madio ny atin’io efitrano io ary koa ny atin’ny tempoly manontolo. Teo amin’ny fidirana mankao amin’io efitrano io dia nasiana rojo volamena hisakana ary nametrahana alitara hazo sedera nopetahana takela-bolamena. 22Eny, nopetahana takela-bolamena toy izany ny tempoly manontolo ary koa ny alitara manontolo teo akaikin’ny fidirana mankao amin’ny efitrano misy ny Vatamasina#6.22 Ampit Eks 30.1-3. Ny alitara fandoroana vovo-javamanitra no lazaina eto (and 21, 22).
23-26Tao amin’io efitrano misy ny Vatamasina io dia namboarana kerobima roa vita tamin’ny hazo ôliva izay samy nirefy dimy metatra ny haavony. Ny voalohany dia nanana elatra roa metatra sy sasany ny halavany, izany hoe dimy metatra no elanelan’ny tendron’elatra anankiroa. Ny faharoa koa dia nirefy dimy metatra, ary nitovy refy sy bika tamin’ilay voalohany ihany. 27Napetraka teo afovoan’ny efitrano misy ny Vatamasina ny kerobima; ary natao mivelatra ny elany, ka ny ilany samy nipaka tamin’ny rindrina an-kilany sy an-daniny avy, ary ny elatra roa hafa kosa dia nifanendry teo afovoan’ny efitrano. 28Nopetahana takela-bolamena ireo kerobima roa#6.28 And 23-28: ampit Eks 25.18-20..
29Ny rindrina manodidina, na teo amin’ny efitrano anatiny na teo amin’ny efitrano malalaka, dia nisokirana sarina kerobima sy hazo rofia ary voninkazo mivelatra. 30Ary nopetahana takela-bolamena ny gorodona, na teo amin’ny efitrano anatiny na teo amin’ny efitrano malalaka.
31Nasiana varavarana kopa-droa vita tamin’ny hazo ôliva ny mankao amin’ny efitrano misy ny Vatamasina, ka ny tataony sy ny tolàny dia ampahadimin’ny sakan’ny tempoly. 32Ny lela-varavarana kopa-droa vita tamin’ny hazo ôliva dia nisokirana sarina kerobima sy hazo rofia ary voninkazo mivelatra, izay samy nopetahana takela-bolamena; ka nokaliana ny fametahana izany tamin’ny kerobima sy ny hazo rofia. 33Toy izany koa no nanaovana ny varavarana mankao amin’ny atitrano lehibe fa nasiana tolàna hazo ôliva ampahefatry ny sakan’ny tempoly; 34ny lela-varavarana kopa-droa dia hazo kipreso izay samy noravahana mason-drojo roa voasokitra. 35Nisokirana sarina kerobima sy hazon-drofia ary voninkazo mivelatra teo, ary dia nopetahana volamena ny faritra voasokitra.
36Ary nohodidinina rindrim-bato voapaika telo andalana mifanongoa sy rairainy sedera iray andalana ny kianja anatiny.
37Tamin’ny taona fahefatra nanjakàn’i Salômôna, fony volana Ziva, no nametrahana ny fototry ny tranon’ny TOMPO. 38Ary tamin’ny taona faha-11, fony volana Bola#6.38 Bola: jereo ny FTS amin’ny voambolana hoe FANISANANDRO. na volana faha-8, no nahavitan’izany an-tsakany sy an-davany tamin’ny fombany rehetra.
Fito taona no nanaovan’i Salômôna azy.
Voafantina amin'izao fotoana izao:
1 Mpanjaka 6: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.