1 Mpanjaka 22
22
I Ahaba te haka indray ny tanànan’i Ramôta
(Jereo 2 Tan 18.1-3)
1Roa taona no tsy nisian’ny ady intsony teo amin’i Siria sy i Israely. 2Fa tamin’ny taona fahatelo dia nankany amin’ny mpanjakan’i Israely i Jôsafata mpanjakan’i Joda. 3Ary hoy ny mpanjakan’i Israely tamin’ny manamboninahiny: «Fantatrareo tsara fa antsika ny tanànan’i Ramôta any Gilehada#22.3 Tanàna ao atsimo atsinanan’ny farihy Genesareta, niadian’ny Israelita sy ny Sirianina hatry ny ela., koa inona no isalasalantsika tsy haka izany amin’ny mpanjakan’i Siria?» 4Ary hoy izy tamin’i Jôsafata:
–Mba hiaraka amiko hanafika an’i Ramôta-Gilehada ve ianao?
Dia novaliany hoe:
–Eny, fa tahaka ny tenanao ihany aho, ka ny tafiko dia tafikao, ary ny soavaliko dia soavalinao.
Naminany fahombiazana ireo mpaminany matihanina
(Jereo 2 Tan 18.4-11)
5Mbola niteny tamin’ny mpanjakan’i Israely indray i Jôsafata ka nanao hoe:
–Mba anontanio aloha ny TOMPO.
6Ary novorin’ny mpanjakan’i Israely ny mpaminaniny tokony ho efajato#22.6 Ireo mpaminany matihanina ireo dia niantohan’ny mpanjaka ara-pivelomana; hanohana ny pôlitikam-panjakana no nandrasana taminy toy izay hiteny zavatra avy amin’Andriamanitra (ampit and 13). ka nanontaniany hoe:
–Handeha hanafika an’i Ramôta-Gilehada ve aho, sa tsia?
Dia novalian’ireo hoe:
–Mandehana fa hatolotry ny Tompo eo an-tananao ny tanàna.
7Ary hoy kosa i Jôsafata:
–Moa tsy misy mpaminan’ny TOMPO koa ve eto mba hanontaniantsika?
8Dia novalian’ny mpanjakan’i Israely hoe:
–Mbola misy lehilahy iray ahazoantsika manontany ny TOMPO ao, dia i Mikaià zanakalahin’i Jimlà; saingy halako izy, satria tsy mba maminany soa ho ahy fa loza hatrany.
Ka hoy i Jôsafata:
–Aza miteny izany ianao, ry mpanjaka.
9Tamin’izay dia niantso tandapa anankiray ny mpanjakan’i Israely, ka nandidy azy haka faingana an’i Mikaià zanakalahin’i Jimlà.
10Ary ny mpanjakan’i Israely sy ny mpanjakan’i Joda dia samy nipetraka teo amin’ny sezafiandrianany sy efa niakanjo ny fanamiany avy, teo amin’ny kianja manoloana ny vavahadin’i Samaria, nandritra ny naminanian’ireo mpaminany rehetra ireo. 11Fa i Tsedekià, zanakalahin’i Kenahanà, dia namboatra tandro-by ka niteny hoe:
–Izao no lazain’ny TOMPO: «Ireto tandroka ireto no hanotoanao ny tafika sirianina mandra-paharingany.»
12Dia nilaza hafatra toy izany avokoa ny mpaminany rehetra ka nanao hoe:
–Tafiho i Ramôta-Gilehada fa ho resinao, ry mpanjaka! Eny, hatolotry ny TOMPO eo an-tananao io tanàna io.
Faharesena no nambaran’i Mikaià mpaminany
(Jereo 2 Tan 18.12-17)
13Ilay iraka izay nandeha naka an’i Mikaià kosa dia niteny taminy hoe:
–Indro efa iray teny avokoa izao ireo mpaminany, ka milaza soa ho an’ny mpanjaka; enga anie ny teninao mba ho tahaka ny azy, ka hilaza soa ihany koa.
14Fa hoy i Mikaià hoe:
–Velona ny TOMPO, ka mianiana aho fa izay lazain’ny TOMPO amiko ihany no hambarako.
15Rehefa tonga teo anatrehan’ny mpanjaka izy, dia nanontaniany hoe:
–Ry Mikaià, handeha hanafika an’i Ramôta-Gilehada ve isika sa hijanona ihany?
Ka hoy ny navaliny azy:
–Mandehana fa handresy ianao, ry andriamanjaka, ary hatolotry ny TOMPO eo an-tananao io tanàna io.
16Fa hoy indray ny mpanjaka taminy:
–Impiry moa no hampianianako anao mba tsy hilaza amiko afa-tsy ny marina ihany amin’ny anaran’ny TOMPO?
17Dia hoy ny navalin’i Mikaià:
–Hitako fa ny tafik’i Israely manontolo dia niely teny an-tendrombohitra toy ny ondry tsy misy mpiandry#22.17 Jereo Nom 27.17; Ezek 34.5; Mt 9.36, Mk 6.34.. Ary ny TOMPO niteny hoe: «Tsy mana-mpifehy intsony ireo miaramila ireo, ka aoka izy samy hody soa aman-tsara any an-tranony avy.»
18Dia hoy ny mpanjakan’i Israely tamin’i Jôsafata:
–Tsy efa voalazako taminao va fa tsy mba mety maminany soa ho ahy izy fa loza ihany?
19Ary hoy indray i Mikaià:
–Henoy àry ny tenin’ny TOMPO: Hitako nipetraka teo amin’ny sezafiandrianany manko ny TOMPO; ary ireo anjeliny marobe any an-danitra nijoro teo ankavanany sy teo ankaviany. 20Ka hoy ny TOMPO nanontany hoe: «Iza no hitaona an’i Ahaba handeha hanafika an’i Ramôta-Gilehada mba hahafaty azy any?» Ary samy nanana ny fomba famaliny avy ny tsirairay. 21Fa nandroso ka nitsangana teo anoloan’ny TOMPO ny fanahy anankiray ary nanao hoe: «Izaho no hitaona azy!» Hoy kosa ny TOMPO hoe: «Amin’ny fomba ahoana?» 22Dia hoy izy: «Handeha aho, ka ho tonga fanahy mandainga ao am-bavan’ireo mpaminanin’i Ahaba rehetra». Ary hoy indray ny TOMPO: «Ho voataonanao tokoa izy, sady zavatra manavanana anao izany; ndeha àry ka ataovy!» 23Ankehitriny, raha ny TOMPO efa nanisy fanahy mandainga ao am-bavan’ireto mpaminaninao rehetra ireto, dia satria IZY mihitsy no efa nilaza ny loza hanjo anao.
24Tamin’izay nanatona an’i Mikaià i Tsedekià zanakalahin’i Kenahanà, ka namely tehamaina azy sady nanao hoe:
–Niala tamiko ve ny Fanahin’ny TOMPO mba hiteny aminao?
25Dia novalian’i Mikaià hoe:
–Indro fa ho hitanao izany amin’ny andro izay hitsofotsofohanao efitrano mba hiery.
26Tamin’izay ny mpanjakan’i Israely dia nibaiko hoe:
–Sambory i Mikaià, dia ento miverina any amin’i Amôna governoran’ny tanàna sy any amin’i Jôasy zanako lahy, 27ka lazao ireo fa baiko avy amiko ny hanaovana ity olona ity an-tranomaizina ary ny hamahanana azy mofo kely sy rano kely fotsiny mandra-piveriko soa aman-tsara.
28Fa hoy kosa i Mikaià:
–Raha tàhiny ka tafaverina soa aman-tsara ianao, dia tsy nampitenenin’ny TOMPO#22.28 Ny RM eto dia manampy izao: Ary hoy koa izy: Samia mihaino ianareo, ry firenena rehetra. Jereo Mik 1.1-2; teny avy amin’ny fiandohan’ny bokin’i Mikà mpaminany ireo, ka toa ny fampifangaroana an’ity Mikaià ity amin’ilay Mikà avy any Môreseta no nahatonga ny fanisihana ireo teny ireo eto. aho tsy akory.
Maty an’ady i Ahaba mpanjaka
(Jereo 2 Tan 18.28-34)
29Dia lasa nanafika an’i Ramôta-Gilehada ny mpanjakan’i Israely sy i Jôsafata mpanjakan’i Joda. 30Ary hoy ny mpanjakan’i Israely tamin’i Jôsafata:
–Hody olon-kafa aho, dia hirotsaka an’ady; fa ianao kosa miakanjoa ny fanamianao ihany.
Dia nody olon-kafa ny mpanjakan’i Israely ka nirotsaka an’ady. 31Fa ny mpanjakan’i Siria kosa efa nanome baiko ireo komandy 32 mifehy ny kalesiny mba tsy hamely miaramila tsotra na mpitari-tafika fa ny mpanjakan’i Israely ihany. 32Nony nahita an’i Jôsafata ireo komandin-kalesy, dia nihevitra azy ho ny mpanjakan’i Israely mihitsy. Dia isangodinany hiadiana izy; kanjo niantsoantso mafy i Jôsafata. 33Rehefa hitan’ireo komandin-kalesy fa tsy ny mpanjakan’i Israely io, dia nialany.
34Ary nisy miaramila sirianina anankiray nandefa zana-tsipîka tsy nahy, ka nahavoa ny mpanjakan’i Israely teo anelanelan’ny famavàn’ny akanjo vy fiarovan-tratrany. Dia hoy ity mpanjaka tamin’ny mpamily ny kalesiny:
–Ahodino ny kalesy, ka ento miala ny toeram-piadiana aho fa maratra mafy.
35Kanefa nihamafy ny ady tamin’izay andro izay; koa tsy maintsy notohanana ny mpanjaka mba hitsangana teo amin’ny kalesiny nanoloana ny tafika sirianina; ary maty izy nony hariva ny andro, fa nitsika tao anatin’ny kalesiny ny ra tamin’ny ratrany. 36Rehefa nilentika ny masoandro, dia nanako eran’ny toby izao antsoantso izao hoe:
–Samia mody any an-tanànany sy any amin’ny taniny avy, 37fa maty ny mpanjaka#22.37 fa maty ny mpanjaka: araka ny dkt tranainy grika izany; ny RM kosa manao hoe: Dia maty ny mpanjaka, ka nentina... !
Dia nentina tany Samaria ny razana ka nalevina tao. 38Ary rehefa nosasana teo amin’ny farihin’i Samaria ny kalesin’i Ahaba, dia avy ny alika nilelaka ny rany, ary ny mpivarotena nandro teo, araka ny tenin’ny TOMPO#22.38 Ny Testamenta taloha dia tsy nitahiry io faminaniana momba ny fandroan’ny mpivarotena io..
39Ny sisa amin’ny tantaran’i Ahaba ary koa ny zavatra hafa rehetra vitany, ny trano ivoara nataony sy ny tanàna rehetra naoriny, dia voasoratra ao amin’ny boky milohateny hoe Asan’ireo mpanjakan’i Israely. 40Rehefa lasa nodimandry any amin’ny razany izy, dia i Ahazià zanany lahy no nanjaka nandimby azy.
I Jôsafata mpanjakan’i Joda
(Jereo 2 Tan 20.31–21.1)
41Tamin’ny taona fahefatra nanjakàn’i Ahaba mpanjakan’i Israely no tonga mpanjakan’i Joda i Jôsafata zanakalahin’i Asà. 42Feno 35 taona i Jôsafata fony vao nanjaka, ary naharitra 25 taona no nanjakàny tany Jerosalema. Ny anaran-dreniny dia i Hazobà, zanakavavin’i Silehỳ. 43Narahiny avokoa ny toetran’i Asà rainy ka tsy niala tamin’izany izy, fa nanao izay mahitsy eo imason’ny TOMPO. 44Kanefa ny toeram-panasinana tsy voafongotra, fa ny olona dia mbola nanao sorona sy nandoro azy hanetona teny ihany. 45Ary nanao fanekempihavanana tamin’ny mpanjakan’i Israely i Jôsafata.
46Ny sisa amin’ny tantaran’i Jôsafata ary koa ny herimpo nasehony sy ny ady natrehiny, dia voasoratra ao amin’ny boky milohateny hoe Asan’ireo mpanjakan’i Joda. 47Izy no namongotra teo amin’ny tany ireo lehilahy sy vehivavy nitolo-tena hijangajanga ho fanompoan-tsampy ka mbola velona tamin’ny andron’i Asà rainy. 48Tsy nisy mpanjaka tany Edôma tamin’izany fotoana izany, fa governora notendren’ny mpanjaka ihany#22.48 Ampit 2 Mp 8.20.. 49Nanamboatra sambo vaventy haka volamena any Ôfira#22.49 Jereo 9.28 sy nta. i Jôsafata; nefa tsy afa-niainga ireo sambo ireo, satria rendrika tao Hetsiôny-Gebera. 50Dia hoy i Ahazià zanakalahin’i Ahaba tamin’i Jôsafata:
–Aoka hiaraka amin’ny tantsambonao ny tantsamboko.
Fa tsy nety i Jôsafata. 51Ary rehefa lasa nodimandry any amin’ny razany i Jôsafata, dia nalevina am-pasan-drazana tao an-tanànan’i Davida; ary i Jôrama zanany lahy no nanjaka nandimby azy.
I Ahazià mpanjakan’i Israely
52Tamin’ny taona faha-17 nanjakàn’i Jôsafata mpanjakan’i Joda no tonga mpanjakan’i Israely tao Samaria i Ahazià zanakalahin’i Ahaba; ary naharitra roa taona no nanjakàny tamin’i Israely. 53Nanao izay ratsy eo imason’ny TOMPO izy fa nanaraka ny toetran’ny rainy sy ny reniny ary ny toetran’i Jerôbohama izay zanakalahin’i Nebata sady nampanota an’i Israely. 54Nanompo an’i Bahala sady niankohoka teo anatrehany izy ary nampahatezitra ny TOMPO Andriamanitr’i Israely tahaka izay nataon-drainy ihany.
Voafantina amin'izao fotoana izao:
1 Mpanjaka 22: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.