Lukas 4

Yesus nakaɓani kabalka

(Mat. 4:1-11; Mrk. 1:12-13)

1Yesus nabanun Wad Ɓiha-madnai Alla kole ɓana hagga walta laiwe Yordan. Wad ɓiha-madnai Alla nakodon ta maraɗa gilra. 2Yoɗa neɗa dau kaɓanani kabalka#4.2 Kabalka nyiꞌna kapala kahhadi wad japata. kapata bul laɗona. Kataukalana moʄage Nyi walena yaa hinguꞌmana. Ta balge neɗo napaɗage kalabba.

3Kabalka hanewenage tabara-Na, “Ɓa Yau takkaꞌna Anai Alla, ɓatauge halewai naɗe wat kanaɗaꞌ ha yaa.”

4Balehanagei Yesus, “Lar ta Jurata Ɓiha ɗaage kamatulha, ‘Kaɗaꞌ ata wale mawakelmage mourha walta ha yaa.’ ”#4.4 Nne hatakki ɗaage lar ta Jurata Ulangan 8ː3.

5Maɓegge kabalka nangidiyi Yesus ta hadau kamadehta, mana hatingonage tangngad pareha pan-tana. 6Malinage kabalka tabaranai Yesus, “Tangngad pareha pan-tana mono hapote engage ɓag yiigud tabara-Mu. Oroge tangngadi yiikahaɓegad tabaragu, mono nauwa naɗaꞌwe ɓag yiigudi ɗoukge hakab ategu. 7Ɓam kawoʄo-katabawu tabaragu, tangngad raɗe enga ɗaumud.”

8Balehanagei Yesus, “Nna lar ta Jutara Ɓiha ɗaage kamatulha, ‘Haɗi-ɗaikayi Mori Allamu mono dukaɗahege manud-manono tabara-Na.’ ”#4.8 Nne haɗouk ɗaage lar ta Jurata Ulangan 6ː13

9Maɓegge kabalka nangidiyi Yesus ta Yerusalem mono nahadedeyi ta pan Ummanai Mori kahadda madehta, mana hanewe ɗanga-Ni, “Ɓa Yau takkaꞌna Anai Alla, ɓatauge leij holau wal nehe. 10Oroge ta Jurata Ɓiha ɗaage kamatulha, ‘Alla nahalewai malaikat-Na kana ʄawa hadahha-Wu.’ 11Lohho malaikat ɗarema waigu limmaɗa, tannam leɗu-Mu iyana ʄoʄai ta watu.’ ”

12Yesus nabalehawe, “Lar ta Jurata Ɓiha namatulhawe, ‘Ilam kaɓan Mori Allamu.’ ”

13Kolei kabalka ɓanaɓe hakaɓani Yesus waige tangnga ngara uk, nyi na ijakanani Yesus mono naremage mahiggo kadahha.

Yesus halegenage ha ulla-Na ta tana Galilea

(Mat. 4:12-17; Mrk. 1:14-15)

14Ɗajalage haggalnagei Yesus ta tana Galilea, nabanun Wad Ɓiha-madnai Alla, lii tut-Na namahaɓarawe ta tangngad hadau neɗo. 15Mana hanuwad ata ta umma hadau kangote ata Yahudi,#4.15 Umma hadau kangote ata Yahudi, yoɗa hadau bahhaɗage Jurata Lii-Kira Kamema, hadau kangote, hadau hanuwa ha akka mono hadau pohta palakara. mono tangngaɗa ata ɗahaɗi-Yi.

Yesus wale ɗahibaꞌmai ta kota Nazaret

(Mat. 13:53-58; Mrk. 6:1-6)

16Yesus kakonage ta kota Nazaret ta tana hadau matu-Na. Nna ta laɗo ngah mono habayangɗa ata Yahudi, laɗo Sabat haliɗana, Yesus tamanage ta umma hadau kangote ata Yahudi ɗoukge kakaldamma. Nadede mono nabahhawe Jurata Ɓiha, 17mono ɗayiinage juratana lede liinai Alla kangaranai Yesaya. Naɓugerage lun-ge nna jurata, manaʄamui mata Jurata Ɓiha kalinana,

18“Wad Ɓiha-madnai Mori ɗaani tabara-Gu,

oronage ɓanaɓe hadidarawa Nauwa tannam kahatomage Lii Dahha

tabaraɗa ata milla.

Nyiyo nahalewawa Nauwa katalarage

tut halogayi ata hakoga

hataggahayi ata moro;

halogayi ata hapiꞌha

19mono talarage rah mainai Mori,

hamanemarai ata-Na.”

20Yesus na lun haggage nna jurata mono napahaggage manangoɗo. Tangngaɗa ata neꞌ lar ta umma hadau kangote ata Yahudi ɗatoro-Yi. 21Yesus nahalegewe hanewena tabaraɗa, linage, “Raɗe matad Jurata Ɓiha nabanɓege ta til ɓam rangewe ɓa-Gu bahhawe, oroge ɓa ɗaaɓe-Ga ta jongam.”

22Tangngadi hatak-Na nadahha takkayi, nyiɗawe maɗa ɓangara tabolo waɗeka ɗahangatara mono liɗage, “Wale nyikaꞌNa anai Yusup?”

23Maɓeggei Yesus nahanewe tabaraɗa, “Mi enga waiɗahingmi-Ga hanewe kalinaɗana, ‘Marabba dotera, hataggaha wik ɗautom yau. Kam rayihoge kahekagaina ta kota ɗau-Mu, katauna kahekagaina harangeɓema harayi-Mu ta kota Kapernaum.’ ” 24Malinawalgei Yesus, “Apewela, nahatakki-Gu natenawe, walaꞌma lede-liinai Alla hahiba ta hadau walna. 25Tabolo rangewela: ɓana mourhaho lede-liinai Alla kangaranai Elia buta lawai ɓaal ta tana Israel. Ɓewalge walena burrliꞌma urra katal dau an wullana, nyiɗawe manaɗaꞌwe kareba kalla ta tangngage tana Israel. 26Loko ɓatauɗaꞌge, Alla wale nahalewaꞌmai Elia lede-liina kako ta wu ak lawai ɓaal kaɗaana ta tana Israel, tabolo dukaɗahena ta wu lawai ɓaal kaɗaana ta Sarfat, ta tana Sidon. Naɗe lawai ɓaal wale ata Israelmayi. 27Tauɗa ɗummoge ɓana mourhaho lede-liinai Alla kangaranai Elisa, ɗaa buta ata Israel hayanana katoub, tabolo walaꞌma wu ak pahataggaha, dukai Naaman naɗa ata Siria.”

28Tangngana ata neɗo ta umma hadau kangote ata Yahudi wale anaꞌmanage baanɗa ɓaɗa rangewe nahataknai Yesus. 29Yiɗɗa ɗadede mono ɗawugai Yesus huuna wal neꞌ ta kota. Mono ɗawerakani ta ngaba dau hadedeɗage kotaɗa. Yiɗɗa ɗakab atege tulara-Ni lar ta lirra. 30Tanyiɗuwei Yesus natiwai ata buta mono kakonage.

Ata hatamana wad japata

(Mrk. 1:21-28)

31Ɓewe neꞌge, Yesus nakako ta kota Kapernaum ta tana Galilea. Neꞌ bal nahanuwad ata, ta laɗo ngah mono habayangɗa ata Yahudi. 32Yiɗɗa ɗaɓangara rangewe haɗa hanuwana, oroge Nyi ɓana hanewe waina ɓiꞌta-pareha. 33Lar ta umma hadau kangote ata Yahudi ɗaan wu ata hatamana wad japata. Naɗa ata nakawula-wula, 34“Taa…Yesus ata Nazaret, agawe harayim tabarama? Yau mai halilokomugama? Nauwag tadawu ɓa iya-Wu: Yau kateingna pahalewanai Alla.”

35Yesus nahagagtayi wad japata, “Kaɗanna! Huuna walta naɗa ata.” Halegenage wad japata napaɓahani naɗa ata ta aroɗa tangngaɗa ata buta, mono nahuuna walta naɗa ata wale nahapaꞌhaꞌmai.

36Tangngaɗa ata ɓangara, mono ɗahanewege tutna ɗiha-ɗiha, “Nno hanewe-Na wale haɓataꞌmawe. Oro waige ɓiꞌta-pareha-Na naharehai wad japata huuna, maɗa huuna!” 37Maɓegge lii tutnai Yesus namahaɓarawe ta tangngage hadau ta tana Galilea.

Yesus nahataggaha ata buta

(Mat. 8:14-17; Mrk. 1:29-34)

38Yesus na ijakage umma hadau kangote ata Yahudi, mono nakako ta ummanai Simon.#4.38 Simon pahangara ʄalayi, Petrus. Yera lawainai Simon tangra kalawara mut ngihnage mono ɗakaraiwe tabarai Yesus tannam kana hataggahayi. 39Yesus nakako tabbara hadau durana naɗa ha inya mana hataggahayi, hawingge ɓana bungawe kalawarana. Maɓegge yera lawainai Simon kaɗenage mono naha inyakadi ha yaaɗa.

40Ta jongage ɓana tama matalaɗo, tangngaɗa ata ɗangidiyi tabara-Na ngaradukaɗa oleɓaiɗa kamayilla tangnga-ngara kapore. Maɓeggei Yesus na ijalai limmana ta ngihɗa ɗiha-ɗiha mono nahataggahayi. 41Wad japata ɗahuuna wal kataukalana butana ata, mono wad japata ɗakawula, “Yau Ananai Mori!”

Tanyiɗuwei Yesus nahagagtayi, mono walena yiiꞌmad mahiggo ɓaɗa hanewe, oroge yiɗɗa ɓaɗa tadayi ɓa Nyiꞌnai Kristus, Raja Kahatoulka-manemara.

Yesus natodo-talarage Lii Dahha ta umma hadau kangote ata Yahudi

(Mrk. 1:35-39)

42Kole ɓana hudda matalaɗo, Yesus nayelana neꞌ ta kota mono nakako ta ɗiha hadau kahika. Raɗa ata buta hakitaɗage ɓaɗa mayega-Ni, mono kole ɓaɗa taɓokayi, ɗapatuyi ilana hiltannadi. 43Tanyiɗuwei Yesus nahanewe, “Lii Dahha tutge agalinaɗawei Alla ɓana hareha ɗaꞌ Raja, Nauwa engaɗahoge ɓag haɗikge ta kota waɗeka, oro nyiꞌwei Alla mana halewawa ta pan-tana.”

44Nyiɗawei Yesus mana haɗikge Lii Dahha ta umma hadau kangote ata Yahudi ta tangngage tana Yudea.

Voafantina amin'izao fotoana izao:

Lukas 4: lmy

Asongadina

Hizara

Dika mitovy