KISAH 20
20
Paulus Kiet nu Lengrik Makedonia ru Lengrik Yunani
1Telas kenacau ku kote Efesus ya dij, Paulus kikumpol pengikot-pengikot Yesus ku pajeh. Telas kipegalak enai, kek kiurok, “Abor,” ru kicip nu lengrik Makedonia. 2Kek kipegalak mai de pecaya ku jap-jap tempat de kisingah. Telas ajeh kiet nu lengrik Akhaya de bisebot juga sebegei lengrik Yunani. 3Kek kigei ku pajeh iluniu nik gencek. Tengah kisekyap kaha-belayar nu lengrik Syria, kek kicerngai tentang hal adeh: Mai Yahudi naibepakat naiha-perdat kek. Kerana ajeh, Paulus kibeh keputusan kaha-los nu lengrik Syria kijoi nong lengrik Makedonia. 4Memerip urag naiperop ha Paulus. Enai ajeh Sopater kenon Pirus ju kote Berea, Aristarkhus ru Sekundus ju kote Tesalonika, Gayus ju kote Derbe, Tikhikus ru Trofimus ju lengrik Asia, ru Timotius. 5Enai naicip canuk ru naipoj jik ku kote Troas. 6Telas Arik Raya Ruti Pek Beragi, jibelayar ju kote Filipi. Lima arik ju kenjeh jiburuk enai ku kote Troas. Jigei ku pajeh iluniu seminggu.
Sengweg Paulus de Ipenyudah nu Kote Troas
7Ku arik petame minggu ajeh, jibekumpol jiha-bebahagi ruti besama ru sesedara seiman ku pajeh. Paulus kibeajar sengoi ku pajeh ru teros kibelwal lei nu semakdek kelem kerana ku ihuper kek kaha-et ju kenjeh. 8Mong jeoi pelite de bipasag ku tingkat kemil deg de jibekumpol. 9Mong numom litau imuh Eutikhus kigei ku tingkap. Paulus pek behenti kibelwal lei sanget litau ajeh kingengep lalu kijer nu matik ju tingkat tige. Bile naiangket sanget litau ajeh, naineng kek ya kidat. 10Paulus kiceleh nu kerop lalu kiperdak ilei ku kemil sanget litau ajeh ru kikawal kek. Paulus kiurok, “Agokloh risau, kek ya kisui nij!” 11Telas ajeh Paulus kihuj nij nu kemil lalu kibahagi ruti ru kicak besama ru mai ku pajeh. Telas kek kibelwal lei pegelap, Paulus pen kiet ju kenjeh. 12Enai pen naien jog sanget litau de sui ajeh nu imadeg ru ihad naikerakmik.
Ju Kote Troas nu Kote Miletus
13Jik jiet nu kapal lalu jibelayar canuk nu kote Asos. Ku pajeh doh Paulus kihuj nu kapal jik. Kek ya kior jik belayar canuk kerana ya kirancang kaha-et nu majeh kijoi nong darat. 14Bile Paulus kilei ku kote Asos, kek kihuj nu kapal jik lalu jibelayar nu kote Metilene. 15Ju kenjeh jibelayar nij. Ku ihuper jilei ku tempat de rek beg Pulau Khios. Ku temuteh jilei ku Pulau Samos, ru nuarik nij jilei ku kote Miletus. 16Paulus kibeh keputusan pek kaha-singah nu kote Efesus kerana pek kaha-buang mase ku lengrik Asia. Kek kihod deras kaha-lei nu kote Yerusalem, amen buleh sebelom arik Pentakosta.
Paulus Kiog Bengsat nu Pemimpen-pemimpen Jemaah Kote Efesus
17Ju kote Miletus, Paulus kibesat gah nu jemaah-jemaah ku kote Efesus. Kek kihod pemimpen-pemimpen jemaah ku pajeh naihol nu kek. 18Bile ya nailei, Paulus kiurok, “Ya engkepanei tentang care sinui eng mase ngbesama ru engkek sejak imula nglei ku lengrik Asia. 19Eng ngmelayani Tuhan ru rendah sengik ru ya jengnam. Iman eng biuji ya seniksa ju mai Yahudi de naitentang ha eng. 20Engkek ya engkepanei hal adeh: Mase ngperlei engrok Tuhan atao ngajar engkek ku tempat mai jengoi ataopen ku jap-jap deg, eng pek pernah ngkerdik ma taleh hal de beguna nu engkek. 21Ngog amaran nu mai Yahudi ru mai pek Yahudi supaye naibetobat ju dosa-dosa ru naijog nu Jenang ru naipecaya nu Yesus Tuhan hik. 22Hunen, supaye ngtaat nu ernor Kelog Santen, eng nget nu kote Yerusalem hamapen pek ngpanei ma de belaku nu eng doh ku pajeh. 23Ngpanei had ma de Kelog Santen ya Kipasal nu eng. Kek kiurok eng doh bisiksa ru bijel ku jap-jap kote de ngcip. 24Tapi pek ngirau ha nyawe lieng asal buleh ngpeselesei tugas de biog ya Tuhan Yesus. Tugas ajeh ngperlei Gah Bor tentang bernor sengik Jenang.
25Eng ya ngajar engkek tentang begeiharok Jenang Kimemerintah sebegei Raja. Tapi hunen ngpanei pek mong numom pen ju engkek doh engkeburuk eng nij. 26Kerana ajeh, ku arik adeh eng betol-betol ngurok begei adeh: Eng pek ngbetanggongjawab nu danan mai de ya naicerngai neajar eng tapi pek naipecaya nu Yesus 27kerana eng pek pernah ngabei tugas eng ngperlei dikdij heknod Jenang nu engkek. 28Hodloh engkejaga diri ru engkejaga jemaah-jemaah de ya biserah ya Kelog Santen nu engkek. Jagaloh jemaah-jemaah ajeh begei gembale de kijaga nukenawat dombe. Kerana, Jenang ya Kipejadi jemaah-jemaah ajeh hak Ilei melalui danan IKenon. 29Telas ya nget, cok lig de ihad jehat doh naihol nu engkap engkek ru doh naiserag jemaah-jemaah de engkejaga ajeh. 30Memerip urag ju liengkek juga doh naiajar neajar de pek benar supaye pengikot-pengikot Yesus naijoi ha enai. 31Kerana ajeh, bejaga-jagaloh! Ingatloh hal adeh: Selame nik tenahut iluniu, kelem yah ngjinjap ngajar jap-jap sengoi ku engkap liengkek.
32Hunen ngserah engkek nu Jenang ru ngpecaya Gah bor tentang bernor sengik Jenang ajeh doh kijaga ha engkek. Gah Bor ajeh buleh kipekuat iman engkek ru kiog ma de Jenang ya Kijanji nu sengoi-sengoi de naijadi hak Ilei. 33Eng pek pernah nghod duet atao leknog ju bok-bok pen. 34Liengkek sendiri ya engkepanei tentang hal adeh: Eng ngbeh kerjak ya teg lieng sendiri ngha-pecukop keperluan lieng ru kekawat eng. 35Ku dikdij hal, ya ngperneng hal adeh nu engkek: Hodloh hikerjak kuat begei ajeh ru hitulog mai misken. Ingatloh ha engrok Tuhan Yesus, ‘Jenang lebeh Kiberkat mai de engog daripade mai de beterima.’ ”
36Telas Paulus kibual begei ajeh, kek kibelutot besama ru dikdij enai lalu naibedoa. 37Sambel naijap, naikawal ru nainyui#20:37 Naikawal ru nainyui: Ajehloh care mai Yahudi naiha-ucap cip abor Paulus ru naibesat cip abor. 38Enai ihad naisedeh kerana Paulus kiurok enai doh pek naibeburuk nij ha kek. Lalu naingeng kek lei nu kapal.
Voafantina amin'izao fotoana izao:
KISAH 20: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.