1 KORINTUS 7
7
Bekenah-gengsir
1Ku padeh eng ngha-berlag tenanya de engkecot nu eng ku kateh surat. Engketanya nu eng, “Borka amen numom keral pek kibeh seks ru kerdor?” Ngberlag tenanya engkek ajeh, “Hooh, bor.” 2Tapi lebeh bor amen jap-jap keral kibeh seks ru ikenah, ru jap-jap kerdor kibeh seks ru igengsir, supaye pek engketegode engkeha-beh kelaku seks de niknej. 3Heknod gengsir tanggongjawab ikenah, ru heknod kenah tanggongjawab igengsir. 4Numom kenah pek bekuasa ku iberog ilei sendiri tapi igengsir de bekuasa ku berog ikenah. Begei ajeh juga, numom gengsir pek bekuasa ku iberog ilei sendiri tapi ikenahloh de bekuasa ku berog igengsir. 5Kenah-gengsir wesloh agok peraknyak. Tapi jerkek buleh jerkeperaknyak amen ya jerkebepakat jerkeha-beh begei ajeh had memerip iluniu taleh supaye mong peluang pek bikacau jerkebedoa. Telas ajeh hodloh jerkebesama nij supaye Ibles pek kicuba ru kibeh jerkebedosa kerana pek dapat jerketahan heknod seks.
6Bengwal eng tentang hal engkeperaknyak kenah-gengsir ajeh apeka ernor tapi had nasihat taleh. 7Sebenarnye, ngrasa lagi bor amen dikdij mai pek naijekjeg begei ha eng. Tapi pek jap-jap mai buleh amen pek naijekjeg kerana dikdij lihik hiterima kurnie de belaen-laen ju Jenang. Mong mai de naiterima kurnie adeh ru mong mai de naiterima kurnie ajeh.
8Ngurok nu mai de pek jekjeg ru de balu, bor naigei naihalei begei ha eng. 9Tapi amen pek dapat naiterhan heknod seks liknai, hod naijekjeg kerana lebeh bor naijekjeg daripade naibiar diri liknai selalo jadi tegang kerana ya heknod seks enai.
10Nu mai de ya naijekjeg, adehloh ernor eng. Sebenarnye apeka ernor eng tapi ernor Tuhan. Tuhan Kiget numom kenah kicerei igengsir. 11Tapi amen numom kerdor kicerei igengsir, kek hodloh kisui kihalei atao kijekjog nij nu igengsir ajeh. Numom gengsir pen pek buleh kicerei ikenah.
12Nu mai kilek, ngnasihat begei adeh (Adeh nasihat lieng sendiri, apeka ju Tuhan): Amen mong numom Kristian kibekenah ru mai de pek Kristian ru kerdor ajeh lekat kaha-sui ru ilei, agokloh kicerei ikenah ajeh. 13Begei ajeh juga, amen numom kerdor kibegengsir ru mai pek Kristian ru keral ajeh lekat kaha-sui ru ilei, agokloh kicerei igengsir ajeh. 14Kerana, numom gengsir de pek Kristian ajeh biterima ya Jenang kerana kijeg kerdor de pecaya nu Kristus. Begei ajeh juga, numom kenah de pek Kristian ajeh biterima ya Jenang kerana kijeg keral de pecaya nu Kristus. Amen Jenang pek Kiterima enai, kekenon enai doh naijadi begei kekenon mai de pek naikenal Jenang. Tapi kekenon enai ajeh mimang ya biterima ya Jenang. 15Tapi amen kenah atao gensir de pek Kristian naicerei kenah atao gengsir de Kristian, biarloh naibeh begei ajeh. Amen hal ajeh kitejadi, mai Kristian de bicerei ya ikenah atao igengsir pek perlu terikat nu mai de pek Kristian ajeh nij. Tapi, amen buleh, hodloh engkek lekat engkebekenah-gengsir kerana Jenang Kihod engkesui damei. 16Amen engkek kekenah de Kristian pek engkebecerei, mungken gegengsir liengkek doh naipecaya nu Kristus kerana engkek. Begei ajeh juga nu gegengsir de Kristian. Mungken kekenah liengkek doh naipecaya nu Kristus kerana engkek.
Kerakmik ru Sinui de ya Bipetetap ya Jenang
17Engkek hodloh lekat engkesui sinui de bipetetap ya Tuhan ku mase Jenang Kicereg engkejadi Kristian. Ajehloh peraturan de ngajar nu dikdij jemaah. 18Cuntoh, amen numom ajeh ya bisunat mase kijadi Kristian, kek pek payah kibepure-pure ilei ajeh pek besunat. Ru amen numom pek bisunat bile kijadi Kristian, kek pek payah bisunat. 19Kerana, kibesunatka tok, hal ajeh pek penteng. De penteng kitaat nu ernor-ernor Jenang. 20Dikdij lihik hodloh hisui sinui de bipetetap ya Jenang ku mase hijadi Kristian. 21Icuntohjeh, amen engkek ajeh hambe bile engkejadi Kristian, agok susah sengik. Tapi amen mong peluang engkek biterlas, gunaloh peluang ajeh. 22Engkek ajeh hambeka tok, hal ajeh sama taleh nu Tuhan. Kerana numom hambe de ya kijadi Kristian, kek ya biterlas ju kuasa dosa. Begei ajeh juga, mai biasa de ya kijadi Kristian, kek ya kijadi hambe Kristus. 23Jenang ya Kibeli engkek ru iregak ya Kibayar dij. Kerana ajeh, agokloh jadi hambe manusia. 24Jadi, sesedara seiman, jap-jap mai hodloh kisui sinui de bipetetap ya Jenang ku mase kijadi Kristian.
Mai Bujang ru Mai Balu
25Eng pek ngkep ma-ma ernor pen ju Tuhan tentang mai menaleh tapi ngha-og nasihat nu engkek. Nasihat eng adeh buleh engkepecaya kerana Tuhan Kiyayak nu eng ru Kiog cerendeg nu eng.
26Eng ngrasa bor lekat engkesui sinui liengkek hunen kerana ya dikdij seniksa de hitempeh hunen. 27Icuntoh, amen mong numom keral ya kibekenah, agokloh kerekwat kaha-cerei ikenah ajeh. Amen keral pekseg kibekenah, agokloh kerekwat kaha-bekenah. 28Tapi hamapen kibekenah, kek pek kibedosa. Sama juga amen numom menaleh kibegengsir. Kek pen pek kibedosa. Tapi mai de ya naijekjeg doh naitempeh jeoi senusah, ru eng ngha-perwir engkek ju senusah ajeh.
29Maksod engjeh begei adeh: Hik ya pek mong jeoi mase nij sebelom helnol Kristus nukali nij. Jadi, ku mase de lekat mong adeh, mai de ya kibekenah hodloh kisui begei pek kibekenah supaye kibeh kerjak ha Jenang. 30Mai de jinjap hodloh kisui begei mai pek kisedeh. Mai de leklog hodloh kisui begei mai pek naikerakmik. Mai de bakli barang hodloh kisui begei kek walah barang de kibeli ajeh. 31Engkek de sibok ya hal dunia, agokloh hal ajeh taleh de engkeserngik kerana dunia de mong hunen doh kinyep.
32Nghod engkek bebas ju nerisau tentang hal-hal ajeh. Numom de pekseg kibekenah kiog iperhatian nu hal-hal Tuhan kerana kaha-pesenang sengik Tuhan. 33Tapi mai de ya bekenah kiog iperhatian nu hal-hal dunia adeh kerana kaha-pesenang sengik ikenah. 34Begei ajehloh doh isengik bebelah bahagi. Numom kerdor de pek begensir, atao numom menaleh naiog perhatian liknai nu hal-hal Tuhan. Naiog berog ru sengik liknai nu Tuhan naiha-pesenang sengik Tuhan. Tapi kerdor de ya begengsir kiog iperhatian nu hal-hal dunia adeh kerana kaha-pesenang sengik igengsir.
35Dikdij nasihat de ngpasal adeh ha bernor liengkek sendiri, pek ngha-kerlag hak engkek. Ngharap, ju nasihat eng adeh, engkebeh ma de patot engkebeh ru engkeog sengik engkek nu Tuhan taleh pek bebelah bahagi ya hal dunia.
36Amen numom keral kirasa ilei pek kibeh bor nu itunang amen pek kijeg ha itunang ajeh, ru amen ilei pek dapat kiterhan iheknod seks, ru amen ilei kirasa patot kijeg ha itunang ajeh, keral ajeh hodloh kijeg itunang ajeh. Kek pek kibedosa hamapen ubai baijekjeg. 37Tapi amen numom keral mimang kinyek pek kaha-jekjeg ru itunang, ru amen kek dapat kiterhan iheknod seks, ru amen kirasa ilei pek bipaksa kijekjeg, lebeh bor kek pek kijekjeg ru itunang ajeh. 38Jadi, mai de naijekjek ajeh bor tapi lebeh bor nij mai de pek naijekjeg. 39Numom kenah kiteikat nu igensir selame igengsir lekat sui. Telas igengsir ya dat, kerdor ajeh kijadi bebas kijeg bok-bok taleh de kihod, janji ikeral ajeh mai Kristian. 40Ku peniker eng, lebeh bor amen kerdor ajeh lekat kibalu. Ajeh peniker eng tapi ngrasa peniker eng adeh biog ya Kelog Jenang.
Voafantina amin'izao fotoana izao:
1 KORINTUS 7: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.