1 KORINTUS 10
10
Sejarah Mai Israel ru Behala
1Sesedara seiman, engkek hod engkeingat tentang hal adeh: Bile jenang rak hik bipimpen ya Nabi Musa, enai pernah bilindog ku kerop sagop ru pernah nailintas laot. 2Dikdij liknai ajeh begei bibaptis ku kateh sagop ru kateh laot untok naijadi pengikot Nabi Musa. 3-4Ku mase ajeh, dikdij liknai naicak caknak de sama ru naingut ngeknut de sama de biog ya Jenang. Ngeknut enai ajeh kihol ju batu entoi. Batu entoi ajeh Yesus Kristus de Kibesama ru enai. 5Hamapen begei ajeh, Jenang pek Kibekenan nu jeoi mai ku engkap enai ajeh. Kerana ajeh, enai biperdat ku padag guron ru danan enai majeh-manen.
6Dikdij hal de tejadi ajeh kijadi cuntoh nu hik supaye hik pek hihod hiha-beh jenghat begei de bibeh ya jenang rak hik ajeh. 7Agokloh engkesembah behala begei de bibeh ya engleg ju sengoi-sengoi ku engkap enai ajeh. Hal ajeh mong bicot ku kateh Alkitab begei adeh: “Bangse ajeh naigei ru mula naicakcak ru naingekngut. Telas ajeh naikos nairunggen naiha-sembah ha behala.”#Kel 32:6 8Agokloh beh kelaku seks de niknej begei de bibeh ya enai ajeh. Ku kateh nuarik, 23 ribu urag ju enai ajeh naidat kerana bihukom ya Jenang. 9Agokloh hicuba Kristus begei de bibeh enai ajeh. Enai naidat bisod ya tijik. 10Agokloh juga hiberintat begei de bibeh ya enai ajeh. Enai biperdat ya malikat de bingeng ya Jenang.
11Dikdij hal ajeh kitejadi nu enai supaye kijadi cuntoh nu hik. Dikdij ajeh bicot supaye kipeingat hik hunen de hisui ku aher jaman.
12Kerana ajeh, bok imai de kisangka ilei ajeh betol-betol kipecaya nu Kristus, bejaga-jagaloh supaye pek kijer kateh dosa. 13Jap-jap cenuba de engkerasa ajeh cenuba biasa taleh de ya birasa ya mai kilek juga. Tapi Jenang ajeh setie ru doh pek Kibiar engkek bicuba lebeh daripade kengwat liengkek sendiri. Ku mase engkek bicuba, Jenang doh Kiog engkek nong helnol supaye dapat engketempeh cenuba ajeh.
14Jadi, sesedara seiman de nghok, wesloh agok sembah behala. 15Nu engkek de engkeanggap diri liengkek cerdeg, serngik bengwal eng adeh: 16Mase hibeh Perjamuan Kudus, hiucap syukor nu Jenang ru hingut teu wain. Hal ajeh kiperneng hibenanek ku behip Kristus. Ruti de hibebahagi juga kiperneng hibenanek ku berog Kristus. 17Had mong nek nanek ruti taleh ru dikdij lihik hicak ruti de nek nanek ajeh juga, jadi hik de hijengoi adeh hijadi nanek berog.
18Begei ajehloh juga ku adat mai Yahudi. Bile naijamu korban nu Jenang, enai naicak juga korban de bijamu ku tempat ennog pesembahan ha Jenang sebegei tanda naibenanek ru Kek. 19Eng pek ngbemaksod behala ru icaknak de bijamu nu behala mong kuasa. 20Tapi hodloh engkepanei tentang hal adeh: Ma de bijamu nu behala bijamu nu nyanik-nyanik tapi pek nu Jenang. Eng ngnyek engkebenanek ru nyanik-nyanik ajeh. 21Engkek pek buleh engkengut ju cawan Tuhan telas engkengut ju cawan nyanik-nyanik. Engkek juga pek buleh engkecak ku mije Tuhan telas engkecak ku mije nyanik-nyanik. 22Amen hibeh begei ajeh, hik doh hibeh Tuhan Kibelal. Ingatloh, Tuhan ajeh lebeh kuat daripade hik.
23Mong mai naiurok, “Ma taleh ihal buleh jibeh.” Ajeh mimang betol, tapi pek dikdij hal ajeh beguna. “Dikdij hal buleh jibeh” tapi pek dikdij hal ajeh buleh kipekuat iman sesedara seiman hik. 24Amen numom kaha-beh ma-ma pen, agokloh kibeh untok kepentengan diri ilei sendiri tapi hodloh kibeh untok kepentengan mai kilek.
25Ma-ma taleh sej de bijual buleh engkecak. Pek payah engketanya sej ajeh ju belok supaye hal ajeh pek kikacau sengik engkek. 26Kerana, ku kateh Alkitab mong bicot, “Bumi ru dikdij iisi ajeh hak TUHAN.”#Mzm 24:1
27Amen engkeet nu caknak de bipelawe ya mai pek Kristian, cakloh taleh ma de bijamu nu engkek. Agokloh tanya ma-ma supaye hal ajeh pek kikacau sengik engkek. 28Tapi amen numom kipasal nu engkek “Sej ajeh ya bijamu nu behala,” agokloh cak sej ajeh supaye hihormat sengoi ajeh, ru juga supaye hijaga sengik mai kilek ku pajeh de kirasa salah kicak sej ajeh. 29Maksod eng, pek ha sengik liengkek tapi ha sengik mai kilek.
Enggamak mong mai naitanya, “Yama hak eng de ngha-beh ma-ma bipetentu ya sengik mai kilek? 30Amen ya ngbesyukor nu Jenang tentang caknak de ngcak, yama mai kilek naibual jehat tentang caknak eng ajeh?”
31Adehloh berenglag eng ha tenanya ajeh: Ma taleh de engkebeh, engkecakcakka, engkengekngutka, behloh dikdij ajeh supaye Jenang bipemulie. 32Jagaloh kelaku engkek supaye pek engkebeh mai kilek naibedosa, pek kira mai Yahudika, atao mai pek Yahudika, atao sesedara seiman hik de kilekka. 33Joiloh cuntoh sinui eng. Eng ngkerekwat ngha-pesenang sengik dikdij mai ku kateh dikdij hal de ngbeh. Eng pek ngutame kepentengan diri lieng sendiri tapi ngutame kepentengan mai kilek supaye enai buleh bipeselamat.
Voafantina amin'izao fotoana izao:
1 KORINTUS 10: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.