मत्ति 2
2
नुहेँसो दर्सिगेलाइ इसुहेङ खाङलि लोका
1राजा हेरोदको पहरता यहुदिया माउजाको बेथलेहेम देराता इसुको जोलोम जेङका न्हुअ्सो, नुहेँको दर्सिगेलाइ यरुसलेम पुरता लोहि। 2एम्बालाइ द्याङगेलाइहेङ हिअ्हि, “यहुदिगेलाइको राजा जेङतेङ जोलोम जेङका हिता हि? हाइदोनु केलाइ वाको फुरु ल्होका तिङन्हाहि रो केलाइ वासेहेङ बाखिन्लि लोका हिन्हाहि।”
3जेलाउ राजा हेरोद इदोइ हिङहि, वाको मन आसान्ति जेङहि रो यरुसलेमको झाराङ द्याङगेलाइको मन बुङ आसान्ति जेङहि। 4कालाउ वा झाराङ मुल धामिगेलाइ रो धरममास्टरगेलाइहेङ जोम्पातेङ, “ख्रिस्टको जोलोम हिता ज्याङ?” दोअ्तेङ हिअ्हि। 5एम्बालाइ वासेहेङ दोअ्हि, “यहुदिया माउजाको बेथलेहेम देराता। हाइदोनु आगाधुइका धरमकिताबता इसिका लेखेका हि:
6‘ओइ, यहुदा माउजाको बेथलेहेम देराको द्याङगेलाइ,
ना यहुदाको हाकिमगेलाइको माझाता हासुखान्तेङ म्हुइका मान्थुन्हा,
हाइदोनु नासो एमि हाकिम ओल्हेतेङ लावा,
जाइ काङको द्याङ इस्राएलहेङ खानावा।’”#मिका ५:२
7इदोइ हिङतेङ हेरोद इङको दर्सिगेलाइहेङ लिअ्ता काइतेङ फुरु हिदोइ पहर देखाल पिका हिघाहि इङको एम्बालाइसो गेहि। 8इङकोन्हुअ्सो वा एम्बालाइहेङ एसा दोअ्तेङ बेथलेहेमता दिङगिल्हि, “हानेसु, इङको जामालहेङ रेम्फा भोसु। वासेहेङ निङतेङसाङ कासेहेङ बानाल पिसु रो का बुङ हानेतेङ वासेहेङ बाखिनाङका।”
9कालाउ राजाको काथा हिङतेङ एम्बालाइ ताइको दामा लाअ्हि। जेदोङ फुरु एम्बालाइ ल्होका तिङका हिघाखे, इङको फुरु एम्बालाइको आगाआगा हानेहि रो जामाल हिका थामेता थुकातेङ इङको फुरु इन्ताङ आरेहि।
10जेलाउ एम्बालाइ इङको फुरु तिङहि, कालाउ एम्बालाइ हेन्जाङ लेङचाहि। 11कालाउ साअ्लिअ्ता दुल्तेङ एम्बालाइ जामालहेङ वाको आमाइ मरियम दोसा तिङहि रो तिर्हो थोतेङ वासेहेङ बाखिन्हि। कालाउ ताइको बाकस हेतेङ वासेहेङ सोना, मालामालाका धुमाना रो जाङका आतर ओल्हेपातेङ पिहि।
12न्हुअ्सो हेरोदकोता घुरितेङ मान्हेसु दोअ्का सोपोन्दाता चेतानि निङतेङ एम्बालाइ भेनेङ दामा जेङतेङ ताइको मुलुकता घुरिहि।
योसेफ ताइको खाल चुमपुतेङ मिस्रता खाअ्का
13दर्सिगेलाइ हानेकान्हुसो, परमप्रभुको एलोङ सादेलचर सोपोन्दाता योसेफकोता देखाल पिहि रो इङको एसा दोअ्हि, “ल्हो, आतुइका जामाल रो वाको आमाइहेङ दोसा चुमतेङ मिस्रमुलुकता खाअ् रो नासेहेङ का मादोअ्पाधाउ इन्ताङ हि। हाइपानु, हेरोद जामालहेङ सेअ्लि भोलि तेङका हि।”
14कालाउ वा ल्होतेङ जामाल रो वाको आमाइहेङ दोसा चुमतेङ मिस्रमुलुकता न्हिसिङता दोङ हानेहि 15कालाउ हेरोद मासिपाधाउ इन्ताङ हि। एसापा परमेस्वर आगाधुइकासो परमप्रभुको दोअ्का कथन पोङघाहि, “का ताइको चानहेङ मिस्रमुलुकसो काइघा।”#होसे ११:१
हेरोद जामालाइहेङ सेअ्लि लागाइका
16जेलाउ दर्सिगेलाइ ताइमिहेङ जालपाका काथा हेरोद गेहि कालाउ वा खुब चेर ताम्पाहि। कालाउ दर्सिगेलाइसो गेका पहरआन्सार बेथलेहेम देरा रो इङको कोरबितिङता हिका न्हे बाअ्सार रो इङकोखान्तेङ लेताको गोताङ जामालाइहेङ सेअ्लि लागाइहि। 17कालाउ आगाधुइका यर्मियाको धुइका इदोइ कथन पोङघाहि:
18“रामाता एलोङ गाला हिङहि,
घोनोघोपा खारका रो बिलापको बारा गाला,
राहेल ताइको जामालाइको भाअ्सिङ खारतेङहिका,
वासेहेङ हासु बुङ लाइपालि मादोहि,
हाइपानु वाको जामालाइ एला मान्थु।”#यर्मिया ३१:१५
19कालाउ हेरोद सिकान्हुसो परमप्रभुको एलोङ सादेलचर सोपोन्दाता योसेफकोता मिस्रता देखाल पिहि रो एसा दोअ्हि, 20“ल्हो, जामाल रो वाको आमाइहेङ दोसा चुमतेङ इस्राएल मुलुकता हाने, हाइदोनु जामालहेङ सेअ्लि भोकालाइ सिलिदोहोइ।” 21वा ल्होतेङ जामाल रो वाको आमाइहेङ दोसा चुमतेङ इस्राएल मुलुकता घुरिहि।
22कालाउ बुङ हेरोद सितेङ वाको थामेता वाको चान अर्खिलाउस यहुदिया माउजाता राज पादोङखे दोअ्का हिङतेङ योसेफ इन्ता हानेलि थिहि रो सोपोन्दाता चेतानि निङतेङ वा गालिलको माउजाता हानेहि 23रो नासरत दोअ्का पुरता हि। एसापा आगाधुइकासो धुइका “वासेहेङ नासरि दोअ्तावा” दोअ्का कथन पोङघाहि।#मर्कुस १:२४; लुका २:३९; युहन्ना १:४५
Voafantina amin'izao fotoana izao:
मत्ति 2: DHIM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
