लुका 20
20
इसुको खाबरा बारेता हिअ्का
(मत्ति २१:२३-२७; मर्कुस ११:२७-३३)
1एनि इसु थानता द्याङगेलाइहेङ बिद्या पिदोङ घाखे रो परमेस्वरको पिगिल्का रेम्काबानाल हिम्पादोङ घाखे। इङको पहर मुल धामि, धरम मास्टरगेलाइ बो आगुवागेलाइदोफाङ मिलितेङ वाकोता लोतेङ दोअ्हि, 2“केलाइहेङ दोअ्, ना हितासो खाबरा निङतेङ इदोइ कामगेलाइ पाखेना? इदोइ खाबरा नासेहेङ हासु पिहि?”
3इसु एम्बालाइहेङ दोअ्हि, “का बुङ नेलाइहेङ एलोङ काथा हिअ्ताङका ते दोअ्सु, 4युहन्ना बुङ चिभुअ्लि पिका खाबरा हितासो निङहि? परमेस्वर पाहासो ना द्याङसो?” 5इदोइ हिङतेङ एम्बालाइ ताताइमिता एसापा काथा पालि तेङहि, “एला केलाइ हाइ दोअ्ताङ? परमेस्वर पाहासो दोअ्ताङ पानु ‘नेलाइ हाइपालि युहन्नाहेङ खान्धुर मापासुन्हा दोअ्तावा?’ 6द्याङसो दोअ्ताङ पानु इदोइ जोम्का द्याङगेलाइ केलाइहेङ उन्ठुइ तोतेङ सेअ्तावा। हाइदोनु एम्बालाइ युहन्नाहेङ आगाधुइका दोअ्तेङ खान्धुर पाखे।” 7इदोइभाअ्सिङ एम्बालाइ इसुहेङ दोअ्हि, “खोइ, वा इङको खाबरा हितासो निङहि केलाइहेङ फोम मान्थु।” 8कालाउ इसु दोअ्हि, “एन्सा जेङनु का हितासो खाबरा निङतेङ इदोइ काम पादोङखा दोअ्तेङ का बुङ नेलाइहेङ मादोअ्ताङका।”
आङगुर बारिको आधियारगेलाइको तुलना
(मत्ति २१:३३-४६; मर्कुस १२:१-१२)
9इङकोन्हुअ्सो इसु द्याङगेलाइहेङ तुलनाको आकारता इसिका काथा दोअ्हि, “एमि द्याङ ताइको बारिता आङगुर थिङहि। कालाउ ताइको लागाइका आङगुरबारि काम्हाइलि आध्यार गेलाइहेङ पितेङ वा बो मुलुक हानितेङ हेन्जाङ दिनाथिकापा उसोङ हि।#यसैया ५:१ 10आङगुर मिङकान्हुअ्सो वा एमि कामत्याहेङ ताइको निङका आधिया भाग नाःनि दिङगिल्हि। कालाउ इङको आधियारगेलाइ वासेहेङ हाइदोङ मापिसिङ दान्हाइतेङ घुरिपागिल्हि। 11आरोङ बारिको गिर्हि ताइको भेनेङ कामत्याहेङ दिङगिल्हि। कालाउ आध्यारगेलाइ वासेहेङ बुङ दान्हाइहि रो लेदेरपातेङ हाइदोङ मापिसिङ गिल्गिल्हि। 12इङकोन्हुअ्सो बारिको गिर्हि पाकाहेङ बुङ आधियारगेलाइ सिलि तोम्पाङ दान्हाइतेङ आङगुर बारिसो बाहार थाइगिल्हि।
13“कालाउ अङगुरबारिको गिर्हि दोअ्हि, ‘एला का हाइ पाआँ? ताइको माया पाका चानहेङ दोङ दिङगिलाङका। एम्बालाइ काङको चानहेङ ते एम्बालाइ पाक्काङ मान्याङ वाला।’ 14कालाउ बारि गिर्हिको चानहेङ दुरेसोङ लोका तिङतेङ इङको आधियारगेलाइ एसा दोअ्तेङ मतो पाहि, ‘ला, याते बारि गिर्हिकोङ चान! एला यासेहेङ केलाइ सेअ्ताइने रो वाको आङगुर बारि केलाइको दोङ ज्यावा।’ 15एसा दोअ्तेङ एम्बालाइ वासेहेङ आङगुरको बारिसो घोक्राइतेङ बाहार चुमपुतेङ सेअ्हि।”
इसु एम्बालाइहेङ हिअ्हि, “एला इङको आङगुर बारिको गिर्हि एम्बालाइहेङ हाइ पावा? 16वा ताइमिङ लोतेङ इङको आसाति आधियारगेलाइहेङ सेअ्तावा रो ताइको आङगुर बारि बोमिहेङ काम्हाइलि प्यावा!”
इदोइ हिङतेङ द्याङगेलाइ दोअ्हि, “एन्सा ते हेअ्लाउ माज्याको!” 17कालाउ इसु एम्बालाइभारि खाङतेङ दोअ्हि, “एन्सा जेङनु धरमकिताबता लेखेन्हाका इदोइ काथागेलाइको माने हाइ कुनु?
‘जेदोङ उन्ठुइहेङ डकर्मिगेलाइ काम मालाग्याङ दोअ्तेङ थालगिल्का हिघाहि;
इङको उन्ठुइ दोङ साअ्को जग लागाइलाउ मुल उन्ठुइ जेङलि लोहि।’#ले ११८:२२
18“इङको उन्ठुइर्हुता हुल्का द्याङगेलाइ झाराङ फेअ्न्हातेङ भोयावा। कालाउ इङको उन्ठुइ जाइ र्हुता हुलावा ओबालाइ झाराङ धुला ज्यावा।”
तिरो तिरिका बारेता हिअ्का
(मत्ति २२:१५-२२; मर्कुस १२:१३-१७)
19धरम मास्टरगेलाइ रो मुल धामिगेलाइ इदोइ काथा ओबालाइकोङ खिलापता दोअ्का गेतेङ इसुहेङ एन्सालाउ रिम्लि भोहि, कालाउ एम्बालाइ द्याङगेलाइ दोफा थिहि। 20एन्साजेङलाउ एम्बालाइ वासेहेङ सिकापा रिम्लि दाउ भोलि तेङहि। एम्बालाइ वासेहेङ रिम्तेङ रोमि बाराहाकिमको खुर्ता सोम्पिलि भोघाखे। कालाउ धरम भाइपा जेन्तेङ एम्बालाइ द्याङगेलाइहेङ टाका पितेङ चेवा हिलि दिङगिल्हि। 21कालाउ चेवाहिका इङको द्याङगेलाइ हानेतेङ इसुहेङ हिअ्हि, “मास्टर, केलाइ गिन्हाखे ना ठिक दोङ दोअ्खेना रो ठिक दोङ धिरपाखेना ना द्याङको र्हाइ खान्तेङ हासु भारि बुङ मालागेखेना कालाउ ना ते परमेस्वरको सत्य दामा दोङ तिम्पाखेना। 22एला केलाइहेङ दोअ्, हाइ केलाइ रोमि सारकारहेङ पोत तिरिलि यहुदि बेबस्थाता पिखे ना मापिखे?” 23एम्बालाइको मनको केउका काथा गेतेङ इसु दोअ्हि, 24“खोइ, कासेहेङ एलोङ रोमि टाका तिम्पासु। इङको टाकाता हासुको मिङ रो छाप लागाइका हि?” एम्बालाइ दोअ्हि, “रोमि राजाको।” 25कालाउ इसु दोअ्हि, “एन्सा नु राजाको झोको राजाहेङ दोङ पिसु रो परमेस्वरको झोको परमेस्वरहेङ दोङ पिसु।” 26एम्बालाइ द्याङगेलाइको आगाता इसुहेङ हिदोइ काथाता बुङ फासेपालि मादोहि। कालाउ वाको दोअ्का काथाता एम्बालाइ भारभुसाइतेङ सिकापा हि।
सितेङ सिन्हुका बारेता इसुहेङ हिअ्का
(मत्ति २२:२३-३३; मर्कुस १२:१८-२७)
27इङकोन्हुअ्सो आधेमि सदुकिगेलाइ इसुकोता लोहि। एम्बालाइ द्याङ सिकान्हुसो आरोङ सिन्हुतावा दोअ्का काथाता खान्धुर मापाघाखे।#साल्तेङ दिङगिल्का २३:८ 28एम्बालाइ इसुहेङ हिअ्हि, “मास्टर, मोसा केलाइहेङ नियमता एसापा लेखेपिका हि, ‘जेदोङ वाबाल चान चामिन्दि माजेङपासिङ सिनु, वाको ओने ताइको रान्दि भाउजिदोफा बिहु पाको रो दादाको भाअ्सिङ सान्तान जेङपाको।’#नियम २५:५ 29ए पहरता न्हिअ्मि दादा ओनेगेलाइ हिघाहि। जेठा दादा बिहु पाहि रो वा चान चामिन्दि माजेङपासिङ सिहि। 30एन्साजेङलाउ वाको माहिला ओने ताइको भाउजिहेङ बिहु पाहि। कालाउ वा बुङ सान्तान माकोसिङ सिहि। 31इङकोन्हुअ्सो साहिँला ओनेहेङ बुङ एन्साङ जेङहि। एन्साङ दोङ न्हिअ्मि ओने दोङ पालाङ पाला भाउजिहेङ बिहु पाहि। कालाउ झाराङ निसान्तान जेङतेङ सिहि। 32कालाउ आखिरता इङको बेबाल बुङ सिहि। 33एला दोअ्सु, सिकासो ल्होका पहरता वा हासुको बेअ् ज्याङ? हाइदोनु वासेहेङ न्हिअ्मि दादा ओनेदोङ बिहु पाका हिघाहि।”
34इसु एम्बालाइहेङ दोअ्हि, “इदोइ दुनियाता हिका द्याङगेलाइ ना बिहु पाखे ना बिहु दोङ पापाखे। 35कालाउ सिकासो सिन्हुतेङ सादेल हानेलि भाअ्सिङ योग्य जेङकालाइता बिहु पाका रो पापाका काथा दोङ माजेङखे। 36एम्बालाइ हेअ्लाउ बुङ मास्यावा कालाउ सादेलचरगेलाइ भाइपाङ ज्यावा। कालाउ एम्बालाइ सिकासो सिन्हुका परमेस्वरको सान्तान ज्यावा। 37हाइदोनु सिकालाइ सिन्हुतावा दोअ्का काथाको दासि मोसा दोङ पिका हिघाहि। वा जोल्तेङ हिका बुट्यानको बारेता लेखेलाउ प्रभु परमेस्वरहेङ, ‘आब्राहामको परमेस्वर, इसहाकको परमेस्वर रो याकुबको परमेस्वर’ दोअ्तेङ दोअ्का हिघाहि।#दामालाअ्का ३:६ 38वा सिकालाइको परमेस्वर माको कालाउ सिन्हुकालाइको परमेस्वर हि! हाइदोनु वाको नजरता झाराङ सिन्हुका हि।” 39कालाउ एमि न्हेमि धरम मास्टरगेलाइ इसुहेङ दोअ्हि, “मास्टर, ना ठिक दोङ दोअ्न्हा।” 40इङकोन्हुअ्सो द्याङगेलाइ वासेहेङ आरोङ हिदि बुङ काथा हिअ्लि लुर दोङ मापाहि।
ख्रिस्ट हासुको सान्तान
(मत्ति २२:४१-४६; मर्कुस १२:३५-३७)
41इसु एम्बालाइहेङ हिअ्हि, “द्याङगेलाइ हाइपालि मुक्तिपिका ख्रिस्टहेङ हेसापा दाउदको सान्तान दोअ्खे? 42हाइपानु दाउद राजा लेको किताबता एसापा लेखेका हि:
‘परमेस्वर काङको प्रभुहेङ दोअ्हि, ना काङको दाम्पाहा योम,
43जेलाउ थिकापा का नाङको दुस्मनगेलाइहेङ नाङको पाइतालालेता माताअ्ताङका।’#ले ११०:१
44“राजा दाउद ताइमिङ मुक्तिपिका ख्रिस्टहेङ प्रभु दोअ्नाङसिङ एन्सानु हेसापा मुक्तिपिका ख्रिस्टहेङ दाउदको सान्तान दोअ्लि?”
धरममास्टरगेलाइको खिलापता चेतानि
(मत्ति २३:१-३६; मर्कुस १२:३८-४०)
45कालाउ झाराङ द्याङगेलाइ हिङकाताङ पालाउ इसु ताइको चात्यागेलाइहेङ दोअ्हि, 46“धरममास्टरगेलाइसो होसपातेङ हिसु। एम्बालाइ तिम्पालि भाअ्सिङ र्हिङका धाबा लागाइतेङ हिगिल्लि मनपाखे। हातेगेलाइता द्याङगेलाइ ताइमिहेङ सम्मान पातेङ सेउपाको दोअ्तेङ लाल्सा पाखे। कालाउ कचहरिसाअ्ता रो भात्यारता मानपाका थामेता योम्लि भोखे। 47एम्बालाइ रान्दिको साअ्द्वार घिम्पिखे कालाउ तिम्पालि भाअ्सिङ एम्बालाइ हेन्जा बेलोम्पा पुकार पाखे। इन्सिका द्याङगेलाइ झाराङ खान्तेङ बाराका दार निनावा।”
Voafantina amin'izao fotoana izao:
लुका 20: DHIM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
