युहन्ना 3
3
निकोदेमसहेङ इसुको बिद्या
1फरिसिगेलाइता निकोदेमस मिङ हिका एमि द्याङ हिघाखे। इङको यहुदिगेलाइको बाराकचहरिको एमि सदसे हिघाखे। 2वा न्हिसिङ इसुकोता लोहि रो वासेहेङ दोअ्हि, “मास्टर, केलाइ गेन्हाखे ना परमेस्वरसो लोका मास्टर हिन्हा। हाइपानु परमेस्वर दोसा माहिना पानु नाङको पाका इदोइ चिनोगेलाइ हासुङ पालि माद्वावा।”
3इसु इङकोहेङ दोअ्हि, “जातिङको का नासेहेङ दोअ्खा, हासुङ नावा पातेङ जोलोम माजेङनु वा परमेस्वरको सारभि तिङलि माद्वावा।”
4निकोदेमस वासेहेङ दोअ्हि, “द्याङ वाराङ जेङकान्हुअ्सो हेसापा जोन्मेलि द्वावा कुनु? हाइ इङको ताइको आमाइको कोखेता न्हेखे खेप जोन्मेलि द्वावा?”
5इसु इङकोहेङ दोअ्हि, “जातिङको का नासेहेङ दोअ्खा, हासुङ चि रो हाङसासो माजोन्मेहि पानु परमेस्वरको सारभिता दुल्लि माद्वावा। 6जिउसो जोन्मेका जिउ एइ रो हाङसासो जोन्मेका हाङसा एइ। 7का नासेहेङ नावा पातेङ जोन्मेलिगोयाङ दोअ्लाउ भारभुसाइ मामाने। 8भेर्मा जेसोङ मन पाखे इन्सोङ फोअ्खे। ना भेर्माको गाला हिङखेना, कुलाउ इङको हितासो लोखे रो हिसो हानेखे, इङको माग्याना। हाङसासो जोन्मेका झाराङ खामाल इन्सिकाङ जेङखे।”
9निकोदेमस वासेहेङ दोअ्हि, “इदोइ हेसापा जेङलि द्वावा?”
10इसु इङकोहेङ दोअ्हि, “ना इस्राएलको मास्टर जेङतेङ बुङ इदोइ काथा मागेखेना? 11जातिङको का नासेहेङ दोअ्खा, केलाइ जेदोङ गेन्हाखे इङको दोअ्न्हाखे रो केलाइ जेदोङ तिङका हिन्हाहि इङको दासि पिन्हाखे। कुलाउ नेलाइ केलाइको दासि मन्जुर मासाअ्सुखेना। 12का नेलाइहेङ दुनियाको काथा दोअ्घा, कोलाउनुङ नेलाइ खान्धुर मापासुखेना। नेलाइहेङ सादेलको काथा दोअ्पिघा पानु हेसापा खान्धुर पालि दोस्वाना? 13सादेलसो खुअ्तेङलोका का द्याङको चानबिना हासु बुङ सादेलता ताङका मान्थु। 14जेसापा मोसा उदादाङका थामेता पुह्याँहेङ तोल्हेहि, एन्सा दोङ का द्याङको चान तोल्हेन्हालि गोयाङ।#गान्देका २१:९ 15एसापा जाइजाइ वासेहेङ खान्धुर पावा, इङको असिम ज्यान निनावा।
16“हाइदोनु परमेस्वर दुनियाहेङ इसिका इन्ताना पाहि, वा ताइको एखिनिङ चान पिहि, कोलाउ वासेहेङ खान्धुर पाका हासु बुङ मामुअ्ताको, कुलाउ इङको असिम ज्यान निनाको। 17हाइपानु परमेस्वर दुनियाहेङ फतुर पिलि दोअ्तेङ चानहेङ दुनियाता दिङगिल्का माको, कालाउ दुनिया वासो सिन्हुताको दोअ्तेङ दिङगिल्हि। 18जाइ वासेहेङ खान्धुर पावा, इङको फतुर माठर्हेन्हावा, कालाउ खान्धुर मापाकालाइचाहिँ लाम्फा दोङ फतुर ठर्हिन्हाका हि। हाइदोनु वा परमेस्वरको एखिनिङ चानको मिङता खान्धुर पाका मान्थु। 19ठहरचाहिँ इदोङ एइः जोल्का दुनियाता लोका हि रो द्याङगेलाइ जोल्काखान्तेङ भुरुङ कितिकितिकाहेङ मोन्दाताहि। हाइपानु एम्बालाइको काम आसाति हिघाखे। 20हाइदोनु आसाति काम पाका झाराङ जोल्काहेङ दिगमिग पाखे रो जोल्काता मालोखे, माकोनुते इङकोको काम देखाल जेनावा। 21सतता सिन्हुका द्याङ जोल्काता लोखे रो एसापा वाको पाका कामगेलाइ परमेस्वरता पाका एइ दोअ्का छ्याङ तिङखे।”
चिभुअ्लि पिका युहन्नाको न्हुअ् दासि
22इङकोन्हुअ्सो इसु रो वाको चात्यागेलाइ यहुदिया माउजाता हानेहि। इन्ता एम्बालाइदोफा आतुइसा दिना हि रो चिभुअ्लि पिहि। 23युहन्ना बुङ सालिमको भेर्पा एनोनता चिभुअ्लि पिघाखे, हाइपानु इन्ता हेन्जा चि हिघाहि। इन्ता द्याङगेलाइ लोघाखे रो चिभुअ्लि र्हुघाखे। 24(इङको पहरथिकापा युहन्ना थुना निङचाका मान्थुघाखे।)#मत्ति १४:३; मर्कुस ६:१७; लुका ३:१९,२०
25इङकोङ पहर युहन्नाको चात्यागेलाइको ए मि यहुदिदोफा पुनितताको बारेता गालाबाजि जेङहि। 26एम्बालाइ युहन्नाकोता लोतेङ दोअ्हि, “मास्टर, यर्दन ओदोइपार जाइ नाङकोदोफा हिघाहि, जाइको बारेता ना दासि पिन्हा। खाङ, वा चिभुअ्लि पिदोङखे रो झाराङ वाकोता हानेदोङखे।”
27युहन्ना दोअ्हि, “द्याङहेङ सादेलसो मापिपाधाउ इङको हिदिङ काथा निङलि माद्वावा। 28‘का ख्रिस्ट माको, कुलाउ का वाखान्तेङ लाम्फा दिङगिलन्हाका एइ’ दोअ्का काङको दासि नेलाइ ताइमिङ पिसुखेना।#युहन्ना १:२० 29जाइदोफा कान्या हि, दारुवा इङकोङ एइ। दार्वाको सानाइति जाइ वाको भेर्पा जाअ्खे, वाको गाला हिङतेङ हेन्जाङ लेङचाखे। इदोङखातिर काङको इदोइ लेङ एला पोङघाका हि। 30वा बारालि, कुलाउ काचाहिँ म्हुइलि जरुरि हि।”
सादेलसो लोका चान
31र्हुतासो लोकाचाहिँ झाराङखान्तेङ झाउका हि। दुनियाता हिका दुनियाकोङ जेङखे रो दुनियाकोङ काथा पाखे। सादेलसो लोका झाराङखान्तेङ झाउका हि। 32वा जेदोङ तिङका रो हिङका हि, इङकोको दासि वा पिखे। कुलाउ, वाको दासि हासुङ मार्हुखे। 33जाइ वाको दासि र्हुका हि, इङको परमेस्वर सत हि दोअ्का काथाको दासि पिखे। 34हाइदोनु जाइहेङ परमेस्वर दिङगिल्हि, इङको परमेस्वरको बचन धुइखे। हाइपानु परमेस्वर मादोङसिङ पुनित हाङसा पिखे। 35आबा चानहेङ इन्ताना पाखे रो गोताङ थोक वाकोङ खुरता पिका हि#मत्ति ११:२७; लुका १०:२२। 36जाइ चानहेङ खान्धुर पाखे, इङकोदोसा असिम ज्यान हि। जाइ चानको हुकुम मासाअ्खे, इङको ज्यान मातिनावा, कुलाउ परमेस्वरको चेर इङकोर्हुता हितेङह्यावा।
Voafantina amin'izao fotoana izao:
युहन्ना 3: DHIM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
