Zakarià 11
11
Ny faharavàn’ireo firenena matanjaka
1Vohay ny varavaranao, ry Libano ô!
ary aoka ny afo handevona ny sederanao#11.1 sederan’i Libano: jereo Ezek 31.3-9. Marihina fa an’ohatra no ilazana ny faharavàn’ireo firenena matanjaka eto (11, 1-3).!
2Midradradradra, ry kipresy,
fa efa nazera ny sedera,
dia ireo hazo mahafinaritra nijoalajoala.
Midradradradra, ry hazo ôkan’i Basàna,
fa ripaka ny ala mikitroka.
3Henoy ny fidradradradran’ny mpiandry firenena
fa nihintsana ny voninahiny.
Henoy ny fieroneron’ny liona,
fa rava ireo kirihitrala nireharehany
teny amoron’ny ony Jôrdàna.
Ny mpiandry roa
4Izao no lazain’ny Tompo Andriamanitro tamiko:
–Meteza ianao ho mpiandry ireo ondry hovonoina. 5Fa ny mpividy mamono azy dia tsy mihevi-tena ho meloka; ary ny mpivarotra azy kosa manao hoe: «Hisaorana anie ny Tompo fa manan-karena izahay!» Ary na dia ireo mpiandry azy aza tsy mba niantra azy. 6Izaho Tompo dia manao teny hentitra fa tsy hiantra ny mponin’ny tany intsony Aho. Indro fa hatolotro ho eo am-pelatanan’ny namany sy ny mpanjakany avy ny olona. Ary handroba ny tany ireo nefa tsy hanafaka olona amin’izany Aho.
7Ary tonga mpiandry ny ondry aho, dia ny ondry izay kasain’ny mpanondrana#11.7 mpanondrana (ondry): araka ny dkt tranainy grika, tsy dia mazava ny rijan-teny hebreo. hovonoina. Naka tehina roa aho; ny iray nataoko hoe «Fihavanana» ary ny iray kosa «Firaisankina». Ary nandrasako ny ondry. 8Tao anatin’ny iray volana monja dia telo#11.8 mpiandry telo: ny mpaminany dia mampahatsiaro tompon’andraikitra telo fantatry ny mpamaky azy, izay nifanesy voaroaka. Angamba mety ho mpisorombe telo izany. ny mpiandry azy no noroahiko; avy eo dia lotika tamin’ny ondry ny foko, sady izy koa efa tofoka ahy. 9Dia hoy aho taminy:
–Tsy hiandry anareo intsony Aho. Izay natao ho faty; izay natao ho ringana, dia aoka izy ho ringana; ary izay sisa velona dia aoka izy hifampihinana!
10Dia noraisiko ilay tehiko hoe «fihavanana» ka notapahiko mba hahafoana ny fanekempihavanana izay efa nataon’ny Tompo tamin’ny firenen-drehetra#11.10 Jereo Hôs 2.20.. 11Dia foana tamin’izany andro izany ihany ilay fanekempihavanana. Ary nijery ahy ireo mpanondrana ondry ka nahatakatra fa ny Tompo no niteny tamin’izay nataoko. 12Ary hoy aho tamin’ireto mpanondrana ondry:
–Raha heverinareo fa mety, dia omeo ahy ny karamako; fa raha tsy izany kosa, dia aoka ihany.
Dia naloany ny karamako sekela volafotsy telopolo#11.12 sekela volafotsy telopolo no vidin’ny andevo iray araka ny Fanaf 21.32. Io koa no vola azon’i Jodasy ho sandan’ny famadihany, jereo Mt 26.15.. 13Ary hoy ny Tompo tamiko:
–Ento any amin’ny mpandrendrika azy izany volabe nanombanany Ahy izany!
Dia noraisiko ny sekela volafotsy telopolo ka nentiko tany amin’ny mpandrendrika tao an-tranon’ny Tompo#11.13 Tao an-tempolin’i Jerosalema dia nisy mpandrendrika mpamadika ho vongana ireo karazana metaly aterin’ny mpivavaka.. 14Avy eo dia notapahiko koa ilay tehina «Firaisankina», hanafoanana ny firalahian’i Joda sy i Israely#11.14 Ny mpaminany eto dia mety mampahatsiaro ny fisarahana nitranga tokony ho tamin’ny taona 328 teo amin’ny Jiosy tao Jerosalema (Joda) sy ny Samaritanina* (Israely).. 15Ary hoy indray ny Tompo tamiko:
–Raiso ankehitriny ny toeran’ny mpiandry adala. 16Fa indro Aho hampijoro mpiandry vaovao eto amin’ity tany ity, dia mpiandry izay tsy hanan-draharaha ny ondry misy mitady hamono na hikatsaka ny very na hitsabo ny marary na hikarakara ny mbola matanjaka; fa dia hihinana ny henan’izay matavy kosa izy sady hamaky ny kitrony.
17Lozan’ny mpiandry adala
izay mandao ny ondriny!
Enga anie ny sabatra handrotika ny sandriny
sy hanapotsitra ny masony ankavanana!
Ka dia halemy hatrany anie ny sandriny,
ary tsy hahita intsony ny masony ankavanana!
Voafantina amin'izao fotoana izao:
Zakarià 11: DIEMDC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.