Josoa 18
18
Ny fanaovana antsapaka ho an’ireo foko sisa
1Taorian’ny nandresen’ny Israelita ilay tany, dia nivory tao Silao ny fiangonana israelita tsivakivolo ka tao no nananganany ny Tranolay fihaonana amin’Andriamanitra#18.1 Rehefa naorina tao Silao teo amin’ny faritanin’i Efraîma ny Tranolay fihaonana, dia nanjary foibem-pivavahana sy toeram-pihaonambe ho an’ny Israelita rehetra io tanàna io.. 2Ary mbola nisy foko fito tsy mbola nahazo ny zarataniny. 3Ka hoy i Josoa tamin’ireo Israelita ireo:
–Mandra-pahoviana no hiandrasanareo tsy handeha handray ny tany izay nomen’ny TOMPO Andriamanitry ny razanareo anareo? 4Koa manendre lehilahy telo isam-poko mba hirahiko hitety ny tany; avy eo dia hiverina hanao tatitra eo anatrehako ny amin’ny anjara tany noteteziny. 5Dia hozarain’ireo ho fito toko ny tany. Ny taranak’i Joda dia hijanona amin’ny faritaniny ao atsimo, ary ny taranak’i Jôsefa kosa hijanona amin’ny azy ao avaratra. 6Ataovinareo an-tsoratra ny toetoetr’ireo tany fito toko ireo ka ento atỳ amiko izany; dia hataoko antsapaka eo anatrehan’ny TOMPO Andriamanitsika izay ho anjara fokonareo avy. 7Tsy hisy anjara ho an’ny Levita eo anivonareo satria ny fisoronana amin’ny TOMPO no lovany. Ny fokon’i Gada sy fokon’i Reobena ary antsasa-pokon’i Manase koa dia efa nahazo ny zaratany teny ampita atsinanan’i Jôrdàna, ka i Mosesy mpanompon’ny TOMPO no nanome azy izany.
8Dia nioman-kandeha ireo lehilahy voatendry hisafo ny tany, ka izao no baiko nataon’i Josoa taminy:
–Mandehana, tetezo ny tany, ataovy an-tsoratra ny toetoetrany, dia miverena atỳ amiko; fa eto Silao, eto anatrehan’ny TOMPO no hanaovako antsapaka izay ho anjaranareo avy.
9Dia nandeha ireo lehilahy ireo ka nitety ny tany sy nanao an-tsoratra ny toetoetrany ary nizara azy ho fito toko miaraka amin’ny lisitry ny tanàna; dia niverina ho any amin’i Josoa tao amin’ny toby tao Silao. 10Ary nanao ny antsapaka teo anatrehan’ny TOMPO tao Silao i Josoa ka nizara ny tany ho an’ny Israelita araka ny anjara tandrifin’ny fokony avy.
Ny zaratanin’i Benjamîna
11Ny anjara voatendrin’ny antsapaka voalohany dia azon’ny foko benjaminita ho an’ireo tarika ao anatiny; ka ny velaran-taniny dia teo anelanelan’ny an’ny taranak’i Joda sy ny an’ny taranak’i Jôsefa#18.11 Ny faritanin’i Benjamîna dia tao avaratr’i Jerosalema no nisy azy.. 12Ny sisin-taniny, lafy avaratra, dia miainga hatreo Jôrdàna ka miakatra ho any amin’ny ilany avaratr’i Jerikao, dia mahazo ny tendrombohitra any andrefana, ary miafara amin’ny taniefitr’i Bety-Avena; 13avy eo dia mankany Lozy ka mandalo amin’ny ilany atsimon’i Lozy izay antsoina koa hoe Betela, ary midina ho any Hatarôta-Adara, rehefa avy mandalo ny tendrombohitra eo atsimon’i Bety-Hôrôna ambany. 14Ao andrefan’io tendrombohitra io no miolaka ny sisin-tany ka mihodina mianatsimo ary miafara ao Kiriata-Bahala (antsoina koa hoe Kiriata-Jeharima), izay tanànan’ny taranak’i Joda. Izany no sisin-tany lafy andrefana.
15Ny sisin-tanin’i Benjamîna, lafy atsimo kosa, dia miainga hatreo Kiriata-Jeharima, ka miankandrefana#18.15 Mandroso miankandrefana na hoe mankany Gasîna araka ny dkt tranainy Septoazinta. ary miafara any amin’ny loharanon’i Neftoa. 16Avy eo midina hatrany am-pototr’ilay tendrombohitra manoloana ny lohasahan’i Hinôma ao avaratry ny lohasahan’ny Refaîta, dia manaraka ny lohasahan’i Hinôma amin’ny ilany atsimo manamorona ny havoanan’ny Jebosita, ary midina hatrany Haîna-Rôgela. 17Avy eo mihodina mianavaratra ka mandroso hatrany Haîna-Semesa sy hatrany Gilelôta#18.17 Gilelôta: toerana voatsiahy amin’ny anarana hoe Gilgala ao amin’ny 15.7 (jereo 15.7 sy nta). izay manoloana ny fiakaran’i Adomima, ary midina ho any amin’ilay vato atao hoe vaton’i Bôhana (I Bôhana dia zanakalahin’i Reobena). 18Avy eo mihazo ny ilany avaratr’ilay havoana mandondona ny lohasahan’i Jôrdàna, dia midina amin’io lohasaha io, 19ary mitohy any avaratr’i Bety-Hôglà ka miafara any amin’ny tendrony avaratry ny Ranomasina Maty, eo am-bavaranon’i Jôrdàna. Izany no sisin-tany, lafy atsimo. 20I Jôrdàna kosa no sisin-tany, lafy atsinanana.
Izany no zaratany nolovan’ny Benjaminita ho an’ireo tarika ao anatiny, araka ny sisin-tany manodidina azy.
21Ireto avy ny tanàna azon’ny foko benjaminita ho an’ny tarika ao anatiny: i Jerikao, i Bety-Hôglà, i Hemeke-Ketsitsa, 22i Bety-Harabà, i Tsemaraîma, i Betela, 23i Havima, i Parà, i Hôfrà, 24i Kefara-Hamônà, i Hôfnỳ, ary i Geba; izany hoe tanàna 12 miampy ireo tanàna kely miankina aminy. 25Tao koa i Gibehôna, i Ramà, i Beerôta. 26i Mitsipè, i Kefirà, i Môtsà, 27i Rekema, i Jirpeela, i Taralà, 28i Tselà, i Elefa, ny tanànan’ny Jebosita (izany hoe i Jerosalema), i Gibehata, ary i Kiriata; izany hoe tanàn-dehibe 14 samy miampy ireo tanàna kely miankina aminy.
Izany no zaratany nolovan’ny Benjaminita ho an’ireo tarika ao anatiny.
Voafantina amin'izao fotoana izao:
Josoa 18: DIEMDC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.