Matie 25
25
'Ŋuyua kogbɔ -wa "ne 'widia -yi 'na nunɛ
1"Ne Lagɔ 'na 'Kamalezikpɛ yi ko sɛgbɛɛ 'ŋuyua kogbɔ -wa "ne 'widia -yi -wɛ, "ne -wa libhi- 'wanɛɛ "napɛ "ku "ne 'wa yi -lɔ 'ŋulele "luwli wo- -ka me. 2'Wanɛɛ 'glɛme 'na 'umgbu "ne "nɛ-, "ne 'umgbu 'na -wawɛ "nɛ-. 3'Wanɛɛ -wa "ne "nɛ- -wɛ libhi- 'wanɛɛ "napɛ "ku, -mɔ, 'wa "ne 'kpe -kɔme. 4-Wa "nɛ- "ne -wa -luɔ "klee -wɛ, libhi- 'wanɛɛ "napɛ "ku, "ne 'wa yi -lɔ 'wanɛɛ 'kpe 'na -bhotiɛ "ku 'libhi "ne 'wa yi -lɔ kɔme. 5"Ɛ 'ŋulele "luwli 'na yi dɛku "ne -yele zaa, 'yɛlɛ 'lɔbhoa- "ne "ɛ 'ŋuyua kogbɔ -wɛ yi -lɔ ŋɔŋo.
6"Ne 'nyɔkpɔ yi -lɔ zlejijɛ "ku "me "kpa. 'Ɔ nɛɛ: "Ɛ 'widi -ko yi dɛku, zaa, 'a "wlo zɔ -se 'a mo 'beku. 7"Ne "ɛ 'ŋuyua -wɛ yi -lɔ gɔlɔ- 'klekle "ne 'wa yi -lɔ 'wanɛɛ "napɛ 'wli 'jijale-. 8"Ne -wa "ne "nɛ- -wɛ yi -lɔ -wa -luɔ "klee -wɛ bhulɛle- nɛɛ: 'A "nyɛ -anye 'kpe. -Mɔ, -anyɛɛ "napɛ 'kwlile- "ku. 9"Ne -wa -luɔ "klee -wɛ yi -lɔ no nɛɛ: 'Bhɔ, 'ɛ "ne -anyɛɛ dɛku -zu, "ne 'ɛ "ne 'lelee 'anyɛɛ dɛku -zu, zaa, 'a me -pitici "me -se 'a "kɛ 'anyɛɛ 'kpe 'pea-. 10-Sɔɔdɛku 'wa -me "ɛ 'kpe 'pea- -ka -wɛ, "ne "ɛ 'ŋulele "luwli yi -lɔ 'du ylɛ. 'Wanɛɛ -wa -luɔ nɛ "klee -wɛ yi -lɔ "ɛ -jajo-bhudu "me plɛ, 'wa -nyɛ "ɛ 'ŋulele "luwli "bhaa, "ne 'wa yi -lɔ -gbulɛ "gba. 11"Ne "ɛ 'ŋuyua 'umgbu 'na -wawɛ yi -la -lɔ 'du ylɛ. Ŋwɛnɛɛ: Anyinɛnyɔ, Anyinɛnyɔ, 'kɛle- lɔbhɔ! 12-Mɔ, 'ŋulele "luwli nɛɛ: Gbɛklɛklɛ 'ye 'e bhulɛle lɛ 'anye: 'E "ne 'anye -yi. 13"Ne Zezu yi 'lelee -lɔ no nɛɛ: «Zaa, 'a te -kɛ 'ŋɔŋo, "naa- 'a "ne 'yli "ne 'gle -yi zɛ.»
"Kulɔbhɔnya ta 'na nunɛ
(Luke 19.11-27)
14«Lagɔ 'na 'Kamalezikpɛ -ko sɛgbɛɛ 'nyɔkpɔ 'na -ɔ me 'lowlime. 'Ɔ la- 'ɔnɛɛ "kulɔbhɔnya "ne 'ɔ yua 'ɔnɛɛ -klɔgbɔ "ku kulɛle-. 15'Ɔ 'je- -ɔkɔkokɔko 'na -see 'ɔ 'bhɛle- -wɛ kɔ. 'Ɔ 'je- -bholo -badlɛ -yo -glo ŋumgbu 'na 'wukwɛ ŋumgbu kɔ, 'ɔnɛɛ "sɔnɔ glo ŋumgbu 'na 'wukwɛ 'sɔ "ne 'ɔnɛɛ tanɔ -badlɛ -yo glo ŋumgbu kɔ "ne 'ɔ yi -lɔ me. 16Cuu ne, -Ɔ -yle 'bhɔbhɔ 'umgbu -wɛ -nole 'ɔnɛɛ libhɔ "me, "ne 'ɔ yi -lɔ 'bhɔbhɔ 'umgbu 'na -vinɛ keyi ylele-. 17"Ɛ sɛbhele -wɛ 'ye -ɔ -yle 'bhɔbhɔ "sɔ -wɛ -no -me -lɔ, "ne 'ɔ yi -lɔ 'bhɔbhɔ "sɔ 'na -vinɛ keyi ylele-. 18-Mɔ, 'ɔnɛɛ tanɔ -ɔ -yle 'bhɔbhɔ -bholo -wɛ -me, "ne 'ɔ yi -lɔ "sɔkɔ "bhlu, "ne 'ɔ yi -lɔ 'ɔnɛɛ "Bhenyɔ 'na 'dlasi "bhle zizi.
19Lɔbhɔ "kɛ "me 'gwlɛ ne, "ɛ "kulɔbhɔnya 'na "Bhenyɔ yi -lɔ yi, "ne 'ɔ yua -lɔ 'ɔnɛɛ 'dlasi -ye 'ɔ 'joa- kɔ -wɛ za lo 'yɔbhɔ nɛɛ: -Ye 'a -no bhɔ "ku? 20-Ɔ -yle 'bhɔbhɔ 'umgbu -wɛ 'nyiɔ-, "ne 'ɔ yi -lɔ 'bhɔbhɔ 'umgbu 'na -vinɛ -nɛme, 'ɔ nɛɛ: "Bhenyɔ, -e 'je nɛ -ame 'bhɔbhɔ 'umgbu kɔ, zaa, 'bhɔbhɔ 'umgbu 'na vinɛ -ye 'e -yle, 'ɛɛ ne lɛ. 21'Ɔnɛɛ "bhenyɔ nɛɛ: Libhɔnonyɔ 'na "namanɔ -ɔ tɛle- 'ɔnɛɛ libhɔ 'dle 'ye -e -noɔ -lɔ. 'Wa 'je- -eyi -bɛɛ' 'tekeyi kɔ 'na -see -e 'sɛ- -wɛ -tua 'nyakpa 'ylime -gbɔ -e tɛle- -neɛ' libhɔ 'dle. -Dɛmeda, 'e yi -eyi -bɛɛ' 'na "yitɛ "ku kulɛle-. 22"Ne -ɔ -yle 'bhɔbhɔ "sɔ -wɛ yi 'lelee -lɔ yi, 'ɔ nɛɛ: "Bhenyɔ, -e 'je- -ame 'bhɔbhɔ "sɔ kɔ, -mɔ, 'bhɔbhɔ "sɔ 'na -vinɛ -ye 'e -yle ne lɛ. 23'Ɔnɛɛ "bhenyɔ nɛɛ: Libhɔnonyɔ 'na "namanɔ -ɔ tɛle- 'ɔnɛɛ libhɔ 'dle 'ye -e -noɔ -lɔ. 'Wa 'je- -eyi -bɛɛ' 'tekeyi kɔ 'na -see -e 'sɛ- -wɛ -tua 'nyakpa 'ylime -gbɔ -e tɛle- -neɛ' libhɔ 'dle. -Dɛmeda, 'e yi -eyi -bɛɛ' 'na "yitɛ "ku kulɛle-. 24"Ne -ɔ -yle 'bhɔbhɔ -bholo -wɛ 'na dɛ yi -lɔ ylɛ, "ne 'ɔ yi -lɔ 'nyiɔ-, 'ɔ nɛɛ: "Bhenyɔ, 'e -yi sɛ -gbɔ -gbɔtɔgbɔtɔnyɔ 'ye -e -noɔ, -dee -e "ne -glole -wɛ, lɔbhɔ 'ye -e 'dile -lɔ, "ne -dee -e "ne 'siɛ 'mɛnele- -wɛ, lɔbhɔ 'ye -e libhile -lɔ. 25'E 'gu- -eyi -gɛ za 'e 'bhlu- glu "ne 'e yi -lɔ -neɛ' 'dlasi "bhle zizi-, zaa, "ɛ -neɛ' 'dlasi ne lɛ. 26"Ne 'ɔnɛɛ "Bhenyɔ yu -lɔ bhulɛle- nɛɛ: Libhɔnonyɔ -gbeyi 'ye -e -noɔ -lɔ, 'ylikukunyɔ -lɛ! -E -yi sɛ nɛɛ -dee 'e "ne -glole -wɛ, lɔbhɔ 'ye 'e 'dile -lɔ, "ne -dee 'e ne 'siɛ 'mɛnele- -wɛ, lɔbhɔ 'ye 'e libhile -lɔ. 27Zaa, -e yi nɛ 'se 'neɛ 'dlasi, -bhudu -mee 'wa 'kulɛle 'dlasi -wɛ "zo, "ne 'ɛ yi nɛ 'se keyi yili- "ne 'e kɛ nɛ -yi, 'e 'yi nɛ 'se "ku 'libhi ne. 28"Ne "Bhenyɔ yi 'lelee -lɔ no nɛɛ: 'A -sɔ "ɛ 'bhɔbhɔ -bholo -wɛ kɔ -se 'a 'je -ɔ -kɛ 'bhɔbhɔ kogbɔ -wɛ kɔ.» 29"Naa-, -ɔ -kɛ -wɛ, 'wa yu "nyɛ, "ne 'ɔnɛɛ yi lɔbhɔ 'ple: -Mɔ, -ɔ "ne -kɛ -wɛ, "ɛ -ye 'ɔ -kɛ -wɛ 'wa yu kɔ -sɛ. 30"Ne "Bhenyɔ yi 'lelee -lɔ no nɛɛ: 'Ɛ kɛ libhɔnonyɔ -nyɛnye -ɔ "ne -bɛɛ' "me -ko -wɛ yɔ, 'a "pɔ zikpoku 'na titiɛ -wɛ "me, -mee 'tutuɛ -nyɛ 'glɛnimiɛ "bhaa -ko -wɛ.
'Nyɔkpɔ Yowli yi 'ce 'nyakpa gbobhlele-
31Zle 'Nyɔkpɔ Yowli "kɛ 'ce -klɔgbɔsɛ -yi, 'ɔnɛɛ "nɔgɔzilia 'wɔ "bhaa, 'ɔ yi 'ce 'ɔnɛɛ 'leyli-gbɔglo "ku 'gli -klɔgbɔsɛ. 32"Ne -glɔ 'klekle "ku 'na 'nyakpa yu 'ce 'yliku 'wli 'yɔbhɔle -ka yi, "ne 'ɔ yua 'ce "me -seselia -bholo -bholo, -see wliagɛlenya 'seselia wlia 'na wlia -nyɛ 'bhlɛbhlea "bhaa "me -wɛ. 33"Ne 'ɔ yi 'ce 'bhlɛbhlea 'ɔnɛɛ lilikwlɛ "ku 'plealea-, "ne wlia 'na wlia yi 'ce 'ɔnɛɛ 'kɔpɛ "ku ko. 34"Ne -klɔgbɔnyɔ "kɛ 'ce -lɔ -wa -ko lilikwlɛ "ku -wɛ bhulɛle- nɛɛ: 'Anye -ye -a To Lagɔ 'pɔ- 'ŋu -wɛ, 'a yi, 'e 'je 'anye 'Kamalezikpɛ -ye Lagɔ 'jijalea- 'wli zikpɛ 'na "kucidɛku 'anyɛɛ za -wɛ kɔ. 35"Naa-, ŋɔŋo lɔbhɔ 'awɔ -ame, "ne 'a 'nyɛ- 'awɔ -ame lilɛ, 'ŋuto lɔbhɔ 'awɔ -ame, "ne 'a 'nyɛ- 'awɔ -ame 'ŋu. 'E -noɔ 'awɔ 'lowlinyɔ yɔ, "ne 'a 'sa- 'awɔ -ame 'tee 'anyɛɛ sueme. 36'E "ne 'awɔ "meplakoti -kɛ, "ne 'a yi 'awɔ -ame 'koti "nyɛ. 'E "ne 'awɔ -yɛ, "ne 'a -yi 'awɔ -ame "ku 'be ka. 'E -ko 'awɔ -jiɛ "me, "ne 'a -yi 'awɔ -ame "ku 'be ka. 37"Ne "meŋwinɛlenya "kɛ -lɔ no nɛɛ: Anyinɛnyɔ, -sɔɔdɛku, ŋɔŋo 'lɔbhɔ 'awɔ -eyi, "ne -a yi bhɔ -eyi lilɛ "nyɛ 'a? "Ne 'ŋuto 'lɔbhɔ 'awɔ -eyi "ne -a yi bhɔ -eyi 'ŋu "nyɛ 'a? 38-Sɔɔdɛku -e -noɔ 'awɔ 'lowlinyɔ yɔ "ne -a yi bhɔ -eyi 'tee 'sa -anyɛɛ sueme 'a? "Ne -e "ne 'awɔ "meplakoti -kɛ "ne -a yi bhɔ -eyi "koti "nyɛ 'a? 39-Sɔɔdɛku, -e "ne 'awɔ -yɛ "ne -a yi bhɔ -eyi "ku 'be ka me 'a? "Ne -e -ko nɛ -jiɛ "me "ne -a yi bhɔ -eyi "ku 'be ka me 'a? 40"Ne "ɛ -klɔgbɔnyɔ "koa -lɔ bhulɛle- nɛɛ: Gbɛklɛklɛ 'ye 'e bhulɛle lɛ 'anye, -ye 'a -no "ɛ yua -wɛ -wa -noɔ -ame "nowlia 'waa 'na 'glɛme 'na -bholo 'wli -wɛ, -ame 'ye 'a -no -lɔ 'wli!
41«"Ne -wa -ko 'ɔnɛɛ kɔpɛ "ku -wɛ, 'ɔ "koa 'ce -lɔ bhulɛle- nɛɛ: 'A 'ylile- -ame "guɔ, 'kpilɛkpilɛnyanye -lɛ, 'a me -kosu 'na -ɛ -ka "ku 'nyimɔ "ne Lagɔ -sɛ lɔbhɔ zuzu -nyɛnyea -nyɛ 'ɔnɛɛ -zilia 'wɔ "bhaa -wɛ za "me. 42"Naa-, ŋɔŋo 'lɔbhɔ 'awɔ -ame, "ne 'a "ne 'awɔ -ame lilɛ 'nyɛ-. 'Ŋuto 'lɔbhɔ 'awɔ -ame, "ne 'a "ne 'awɔ -ame 'ŋu 'nyɛ-. 43'E -noɔ 'awɔ 'lowlinyɔ yɔ "ne 'a "ne 'awɔ -ame 'tee 'sa-. "Ne 'e "ne 'awɔ "meplakoti -kɛ "ne 'a ne 'awɔ -ame 'koti 'nyɛ-. 'E "ne 'awɔ -yɛ "ne 'a "ne 'awɔ -ame "ku 'be ka -yi, "ne 'e -ko 'awɔ -jiɛ "me "ne 'a "ne 'awɔ -ame "ku 'be ka -yi. 44"Ne 'wayi, 'wa yi -lɔ sɛne bhulɛ- nɛɛ: Anyinɛnyɔ, -sɔɔdɛku -a 'ye- bhɔ -eyi 'ylime "ne ŋɔŋo -nyɛ 'ŋuto "bhaa 'lɔbhɔ 'awɔ -eyi, "ne -e -noɔ 'awɔ 'lowlinyɔ yɔ "ne -e "ne 'awɔ "meplakoti -kɛ, "ne gu 'lɔbhɔ 'awɔ -eyi, "ne -e -ko 'awɔ -jiɛ "me, "ne -a "ne bhɔ -eyi -kwɛle 'a? 45"Ne "ɛ -klɔgbɔnyɔ "koa -lɔ bhulɛle- nɛɛ: Gbɛklɛklɛ 'ye 'e bhulɛle lɛ 'anye. -Sɔɔdɛku 'a "ne yua -wɛ 'glɛme 'na -bholo -li 'na -li 'wli -no -wɛ, -ame 'ye 'a "ne -lɔ 'wli -no. 46"Ne -wa -no "nyɛnye -wɛ "kɛ 'ce -lɔ -jiɛ 'na -ɛ -ka "kubhiɛ -wɛ "me me, "ne "meŋwinɛlenya "kɛ 'ce -lɔ zikpɛ 'na -ɛ -ka "kubhiɛ -wɛ yle.»
Voafantina amin'izao fotoana izao:
Matie 25: btg
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
