Luke 22

Zuda nɛɛ 'ɔ "kɛ Zezu 'ple zufonya kɔ

(Matie 26.14-16; Malke 14.10-11)

1"Fɔlɔ -ɛ "ne manyɔ "me -ko 'na -jajo -ye 'wa la Paake -ko nɛ 'nyiɔ- dɛku. 2Bɔbɔnya "yitia "ne -Lɔsloanya tɛle nɛ -see 'wa "kɛ "zo "ne 'wa "kɛ Zezu 'lɔbhɔ -se 'ɔ "kɛ "ku -wɛ siɛ, "naa- 'wa 'gu nɛ -zejilɛ -gɛ zɛ. 3"Ne Sata yi -lɔ Zuda -ye 'wa la Isekaliɔte -wɛ "me plɛ-, "kɔlepɔnya 'kɔgbɔ "sɔ 'glɛme 'na -bholo yɔ 'awɔ -lɔ. 4"Ne 'ɔ yi -lɔ bɔbɔnya "yitia "ne -wa -kole "Mebɔbɔlebhudu "klo yle -ka me-, -se 'wa "kɛ 'de zɔ, -se 'ɔ "koa Zezu kɔ 'plele-. 5'Wayi 'ŋwɛnɛ 'lɔbhoa nɛ, ŋwɛnɛɛ: «Nɔmo -mɔ 'a yi -eyi 'dlasi "kɔ 'je.» 6Zuda 'ŋlu- "ku zaa, -see 'ɔ "kɛ "zo "ne 'ɔ "koa Zezu kɔ plele- "ne 'nyakpa -ka 'sɛ yibhlele- -wɛ 'ye 'ɔ 'tɛle nɛ -lɔ 'siɛ.

Zezu nɛɛ: 'Wa 'jijale- Paake 'na noledɛ 'wli

(Matie 26.17-25; Malke 14.12-21)

7"Fɔlɔ -ɛ "ne manyɔ "me -ko "ne 'wa 'di 'bhlɛbhlɛyu 'wli "ku -wɛ 'na 'yli -ylɛ -lɔ. 8"Ne Zezu yi -lɔ Piɛle "ne Zaa lebhe, 'ɔ nɛɛ: «'A me -se 'a "kɛ Paake 'na -jajolilɛ 'pi -se -a 'cɛ li.» 9"Ne 'wa yu -lɔ lo 'yɔbhɔ nɛɛ: «-Dee -e 'yɔbhɔ bhɔ -gbɔ -a pile- 'a?» 10"Ne 'ɔ yua -lɔ bhulɛle- nɛɛ: «'A me 'du -ce "ku, 'nyɔkpɔ "bhaa 'a yi "ku 'sibhɔle-, 'ɔ -su 'ŋunyidɛ 'wli. 'A gɛlo -kaa -bhudu 'na -mee 'ɔ "kɛ plɛ -wɛ. 11-Se 'a bhulɛle- "ɛ -bhudubhenyɔ -gbɔ: "Bhenyɔ nɛɛ: 'Ɔnɛɛ gɛlenya "bhaa -bhuducibhɛ 'na -mee 'wa "kɛ bhɔ Paake 'na -jajolilɛ lile- 'a? 12"Ɛ 'nyɔkpɔ -wɛ yi 'anye "nɔgɔ "ku -bhuducibhɛ -gwli dɛ 'sloa-, -li 'klekle -ko "bhle. "Bhle 'a "kɛ -lɔ 'wli 'jijalea-.» 13"Ne 'wa yi -lɔ me, 'wa -ylele "ɛ -li -see Zezu lɛ- nɛ -wɛ "ne 'wa yi -lɔ "ɛ Paake 'na -jajolilɛ pi.

Zezu -nyɛ 'ɔnɛɛ gɛlenya "bhaa 'wa -li 'wanɛɛ Paake 'na 'bebhiɛlelilɛ

(Matie 26.26-30; Malke 14.22-26)

14Lɔbhɔ "kɛ ylɛ ne, Zezu -nyɛ 'ɔnɛɛ "kɔlepɔnya "bhaa 'wa yi -lɔ lilɛlidɛ 'plele. 15"Ne 'ɔ yua -lɔ bhulɛle- nɛɛ: «'E 'yɔbhɔ nɛ kpɛnyee -gbɔ 'anye 'wɔ "bhaa 'a "kɛ Paakelilɛ 'gɔme lile- "bhuɔ -se 'e "kɛ -da 'gbape.» 16"Naa-, 'e bhulɛle 'anye nɛɛ: «'E -cɛ 'ce -la li -kaa "ne Lagɔ 'na 'Kamalezikpɛ "me 'na lilɛ -li dɛku "kɛ 'ce -lɔ ylɛ.» 17"Ne 'wa yu -lɔ leylislɔ "kɔ 'je, "ne 'ɔ yi -lɔ Lagɔ 'ŋlukwa- "ne 'ɔ yi -lɔ no nɛɛ: «'A 'libhi "ku, 'a dli -se 'a "nɛmɛ. 18"Naa- 'e bhulɛle 'anye nɛɛ: 'E -ka 'ce -la vinyeno "nɔmɔ -kaa "ne Lagɔ 'na 'Kamalezikpɛ "kɛ -lɔ yi.» 19"Ne 'ɔ yi "fɔlɔ "ku 'libhi, 'ɔ "kɛ Lagɔ bhɛle- "bhuɔ ne, "ne 'ɔ 'yi -lɔ "me didile-, "ne 'ɔ yua "kɔ 'je, 'ɔ nɛɛ: «-Ɛne 'neɛ ku -ye 'e -ple 'anyɛɛ za yɛ -lɔ, 'a cɛ no, 'anyɛɛ 'dle sibhɔ -ame "ku.» 20'Wa "kɛ li "bhuɔ ne, "ne 'ɔ yi 'lelee -lɔ 'leylislɔ "ku 'libhi, "ne 'ɔ 'yi "ɛ sɛbhele -wɛ "sa, 'ɔ nɛɛ: «-Ɛne, 'neɛ 'mɛneledlu yɛ -lɔ, 'ɛɛ "kɛ -lɔ 'kwli 'anyɛɛ za.»

Zezu nɛɛ 'wa yu ylo no

(Matie 26.20-25; Malke 14.17-25)

21«-Mɔ, 'a -gɛ 'yli, -ɔ "kɛ -ame 'ple -wɛ "bhaa -a 'pɛle 'kwlɛ.» 22"Naa-, 'Nyɔkpɔ Yowli yi "ku, -see Lagɔ lɛ- -wɛ yɛ -lɔ. -Mɔ kpilɛkpilɛ "yitɛ -ɔ ple 'Nyɔkpɔ Yowli -wɛ 'na dɛku! 23"Ne 'wa 'yɔbhɔyɔbhɔle -lɔ lo nɛɛ: «-Anye 'glɛme 'na nyɔ 'yɔbhɔ -tia 'a?»

-Ɔ 'kpɔ- bhɔ "ne -ɔ zi bhɔ "ku gɛlenya 'glɛme?

(Matie 20.25-28; 19.28; Malke 10.42-45)

24"Ne gɛlenya yi -lɔ kpɛle-. 'Wa 'yɔbhɔyɔbhɔle nɛ lo: -Anye glɛme 'na -ɔ -noɔ bhɔ "yitɔ yɔ 'a? 25"Ne 'ɔ yua -lɔ bhulɛle- nɛɛ: «-Glɔ ne zɔ 'na -klɔgbɔnya 'klekle 'nɔŋole 'walua "ku, ŋwɛnɛɛ 'wayi 'wa -na "zo bhlegbi "me -se 'wa loa "nɛne konya. 26'Anyɛɛ dɛku, sɔbhɔ 'na -bɛɛ' te 'ce 'anye 'glɛme ylɛle-. "Yitɔ 'kwlialea- 'ɔyi "ku, -se -ɔ kamalea -wɛ "zo "kulɔbhɔnyɔ. 27'Anyɛɛ dɛku, -ɔ -noɔ bhɔ "yitɔ yɔ 'a? -Ye 'wa 'nɛme lilɛ -wɛ bha, -mɔ -ɔ nɛme -wɛ bha? 'Ɛ "ne bhɔ -ye 'wa 'nɛme lilɛ -wɛ yɔ? 'Ɛ kɛ -ame yɔ, 'e -ko 'anye 'glɛme "kulɔbhɔnyɔ 'nasɛ. 28-Sɔɔdɛku 'e -ko nɛ 'kleyeɛ "me -wɛ, 'a "ne -ame 'guɔ -ylile. 29-See -ame To je- -ame 'Kamalezikpɛ kɔ -wɛ, sɔbhɔ 'ye 'e 'je -me -lɔ 'anye kɔ. 30'Ɛ kɛ soɔ -ko, 'anye 'wɔ "bhaa -a yi 'ce 'gɔme lile- "ne -a yi 'ce 'gɔme "nɔmɔle 'neɛ 'Kamalezikpɛ "me, "ne 'a yi 'ce leyli-gbɔglo "ku 'gli, -se 'a "kɛ Izlayɛle 'na -gligbɛwli kogbɔ "sɔ 'gbobhlele-.»

Zezu nɛɛ: Simɔ Piɛle 'yi 'ce 'ɔnɛɛ lo -sɛ

(Matie 26.31-35; Malke 14.27-31; Zaa 13.36-38)

31Zezu -bhulɛle Simɔ Piɛle nɛɛ: «Simɔ, Simɔ 'fo 'yukwli, Sata 'yɔbhɔ -gbɔ 'ɔ "kɛ 'anye "me 'fo -see 'wa 'fo 'ble "me bitɛ "me -wɛ. 32-Mɔ, 'e -bhubhɔ -neɛ' za, -se -neɛ' 'dlekukɛleɛ te -kɛ 'wlimɔnɔ. -Se -eyi, -zle -e kɛ 'ce "kusɔ -ame lo -yli, 'e "kɛ -kɛ 'e "nowlia 'na 'dlekukɛleɛ "me "tamalea-.» 33"Ne Piɛle yu -lɔ bhulɛle- nɛɛ: «Anyinɛnyɔ, 'wa kɛ -eyi -jiɛ "me 'pɔ-, 'e yi "mɔme. 'Kwiɛ 'ye 'ɛ kɛ 'se -noɔ -ce, -eyi "bhaa -a yi 'gɔme "kule.» 34Zezu nɛɛ: «'E bhulɛle -eyi Piɛle, -zeka 'na sabo ne, nunu -namlɛ 'weli "pɔ, "ne -e "kɛ -lɔ "ku ta 'na lo -sɛ -gbɔ -e "ne -ame -yi.»

Zezu nɛɛ: 'A 'luɔ- -kɛ

35"Ne 'ɔ yua -lɔ bhulɛle- nɛɛ: «-sɔɔdɛku 'e -lebhe 'anye "ne 'a "ne 'dlasi, "flokpo "ne -kpɔklo -su "ne 'a yi me -wɛ, -bɛɛ' -bɔ bhɔ 'anye kɔ 'a?» Ŋwɛnɛɛ: «-bɛɛ' 'na yɛ -bholo "ne nɛ -anye kɔ -bɔ.» 36"Ne 'ɔ yua -lɔ bhulɛle- nɛɛ: «-Dɛme 'na dɛku, -ɔ kɛ 'dlasi -kɛ, 'ɔ libhi "ku, -ɔ kɛ 'flokpɔ -kɛ, 'ɔ libhi "ku "ne -ɔ "mɔ -jijigbɛlɛ -kɛ, 'ɔ "pɔ 'ɔnɛɛ 'koti pɔlo "ku -se 'ɔ "kɛ -bholo pea-. 37"Naa- 'ɛ kɛleɔ- nɛɛ: 'Wa -zɛle -mo 'nyakpalɔbhɔnya 'glɛme. "Ne "ɛ welicibhɛ -wɛ, 'ɛ yi 'yli 'wlole 'neɛ za.» 38Ŋwɛnɛɛ: «Anyinɛnyɔ, -jijigbɛlɛ "sɔ ne lɛ.» "Ne 'ɔ yua -lɔ bhulɛle- nɛɛ: «'Ɛ -zu.»

Zezu bhubhɔle olivietlo 'vli.

(Matie 26.36-46; Malke 14.32-42)

39Zezu 'wlo- zɔ, "ne 'ɔ yi -lɔ olivietlo 'vli me, -see 'ɔ sɛ "kle -wɛ. "Ne gɛlenya yu -lɔ 'beku bhli. 40'Ɔ "kɛ lɔbhɔ ylɛ ne, "ne 'ɔ yua -lɔ bhulɛle- nɛɛ: «'A bhubhɔ -se 'a te -kɛ "mebeamɔ 'bhlile-.» 41"Ne 'ɔ yua -lɔ guɔ 'ylile- 'tekeyi, "ne 'ɔ yi -lɔ kokomini "pɔ, "ne 'ɔ yi -lɔ bhubhɔ- nɛɛ: 42«-A To, -e kɛ 'yɔbhɔ 'ylilea- -ame "ɛ 'gbapegbapeɛ ne guɔ, -mɔ 'ɛ te -kɛ 'neɛ -see 'e -wa -wɛ ylɛle-, -mɔ, -neɛ' -see 'e 'yɔbhɔ -wɛ, 'ɛɛ -na tole- -kɛ lɔbhɔ!» 43"Ne "nɔgɔzilɔ yu -lɔ 'yliku sibhɔ -se 'ɔ "kɔ 'kwɛme "tamalea-. 44Zezu 'na 'dle 'yiɔ nuɔ "ne 'ɔ bhubhɔ -lɔ 'yiɛ, "ne 'ɔnɛɛ bhubhu -le 'awɔ sɛgbɛɛ 'dlu -kwi bhli dodo "ku. 45'Ɔ "kɛ bhubhɔ- "bhuɔ ne, "ku 'ye 'ɔ -sɔ -lɔ, "ne 'ɔ yi -lɔ 'ɔnɛɛ gɛlenya lo mele-. 'Ɔ 'na 'wolo, 'wa klu 'yɛlɛ, "naa-, 'nyɛze lɔbhɔa nɛ zɛ. 46"Ne 'ɔ yua -lɔ bhulɛle- nɛɛ: «'Anye, 'ylɛ 'ye 'a klu bha! 'A -sɔ "ku, 'a bhubhɔ- -se 'a te -kɛ "mebeamɔ 'bhlile-!»

'Wa 'nyegbea- Zezu

(Matie 26.47-56; Malke 14.43-50; Zaa 18.1-11)

47Weli -ko -namlɛ nu, "ne -zakpɛ yi -lɔ lɔbhɔ zɔ 'wlole, "kɔlepɔnya kogbɔ "sɔ 'na -bholo -ye 'wa la Zuda Iskaliɔte -gɛloa 'yuku, "ne 'ɔ yi -lɔ Zezu yɔko 'nyiɔ- -se 'ɔ "kɔ nuɔ "ku "nyɛ. 48"Ne Zezu yu -lɔ bhulɛle- nɛɛ: «Zuda, nuɔkunyɛɛ "me 'ye -e "kɛ bhɔ 'Nyɔkpɔ Yowli ple 'a?» 49Gɛlenya "kɛ -ɛ "kɛ lɔbhɔ ylɛle- -wɛ 'ylime 'ye ne, 'wa 'yɔbhɔ -lɔ lo nɛɛ: «Anyinɛnyɔ, -a 'lɔbhoa bhɔ -jijigbɛlɛ nu 'a?» 50"Ne 'wanɛɛ 'glɛme 'na -bholo yi -lɔ bɔbɔnyɔ "yitɔ 'na "kulɔbhɔnyɔ 'na lilikwlɛyukwli "ku 'di. 51-Mɔ, Zezu libhi- weli "ku, 'ɔ nɛɛ: «'A 'tale- 'yi -se 'ɛ ko soɔ.» "Ne 'ɔ yi -lɔ "ɛ 'yukwli -wɛ kɔ ze "ne 'ɛ yi -lɔ yamale-. 52Bɔbɔnya "yitia, "Mebɔbɔlebhudu 'na "klokolenya 'na "cifia "ne -gligbɛyitia, -wa yu -lɔ 'sa 'ka -wɛ Zezu yua -lɔ bhulɛle- nɛɛ: «'Nyɔkpɔ -gbeyi 'ye 'e -noɔ bhɔ za 'a su -jijigbɛlɛ "ne sucibhi 'neɛ za? 53-Sɔɔdɛku zle o -zle 'anye 'wɔ "bhaa -a -ko nɛ "Mebɔbɔlebhudu "me -wɛ, 'a "ne -ame 'sa-, -mɔ, 'anyɛɛ 'gle -ylɛ -lɔ -dɛme ne, -dee Zuzu -nyɛnyea kamalea titiɛ "me -wɛ.»

Piɛle -sɛ Zezu 'na lo

(Matie 26.57-58; Malke 14.53-54,66-72; Zaa 18.15-18,25-27)

54"Slojanya 'sa- 'awɔ Zezu "ne 'wa yu 'awɔ -lɔ bɔbɔnyɔ "yitɔ 'na -bhudu "me kɔme-. Piɛle -ko nɛ -gboji "ne 'ɔ 'ylɛ nɛ "ɛ -li -wɛ 'wɔ. 55'Wa -zɔbhɔ nɛ -kosu sue -jijɛ "ku, 'nyakpa suɛle- nɛ "ne Piɛle yua -lɔ glɛme 'gli- -me. 56"Kulɔbhɔŋuyu 'na 'wolo Piɛle 'gli- "ɛ -kosu -wɛ yɔko, "ne 'ɔ yu -lɔ "ku 'wolo- -vlee, 'ɔ nɛɛ: «-Ɔne -gɛle -me nɛ Zezu.» 57-Mɔ, 'ɔ 'kpɛle- nɛɛ: «'Ŋɔnɔ, 'e "no -kɛ -yi.» 58-Kpaa ne, -vinɔ 'wolo "ku, 'ɔ nɛɛ: «-Eyi, 'wanɛɛ 'glɛme 'na -bholo 'ye -e -noɔ -me -lɔ.» Piɛle nɛɛ: «'Ɛ "ne -kɛ -ame yɔ.» 59'Gle -bholo "kɛ "ple ne, 'ɔnɛɛ -vinɔ "titli kɔ, 'ɔ nɛɛ: «'Diɛɛ, yɛ -lɔ, 'ɔ -nyɛ Zezu "bhaa 'nɔŋole- nɛ 'gɔme, "ne Galile 'na 'nyɔkpɔ yɔ -me -lɔ.» 60Piɛle nɛɛ: «'E "ne -see -e lɛ -wɛ "me -nyini.» 'Ɛ -ko nu cuu, "ne nunu yi -lɔ 'weli "pɔ. 61"Ne Anyinɛnyɔ yi -lɔ 'beme 'yli "pɔ "ne 'ɔ yi -lɔ Piɛle "ku wolo-. "Ne Piɛle 'na 'dle yi -lɔ "Bhenyɔ 'na weli -ye 'ɔ -bhulɛlo -wɛ "ku 'luɔle-. «Nunu -gba "pɔ 'weli 'sabo ne "me, -e 'ya -lɔ "ku ta 'na lo -sɛle.» 62Piɛle 'wlo- zɔ "ne 'ɔ yi -lɔ "tu "yitɛ "ku 63"Ne 'nyakpa -wa -kole nɛ "ɛ Zezu "klo -wɛ, silo nɛ "ne 'wa 'lɔbhɔ nɛ -lɔ. 64'Wa -gbɛto nɛ 'yli "klo "ne 'wa 'yɔbhɔ nɛ -lɔ lo nɛɛ: No guɔkwɔmenyɔ 'na -li! -Se 'slo -anye -ɔ 'lɔbhɔ- -eyi -wɛ? 65"Ne 'wa -kɛ -lɔ 'ɔnɛɛ 'yli 'yli libhɔ.

'Wa -kɔme Zezu Zufonya 'na gbobhlenya "yitia 'na dɛce

(Matie 26.59-68; Malke 14.55-64; Zaa 18.19-24)

66Zle "kɛ ze ne, -gligbɛyitia, bɔbɔnya "yitia "ne -Lɔsloanya yɔbhɔ- 'wli "ne 'wa yu -lɔ 'wanɛɛ gbobhlezejilɛ "yitɛ "ku kɔme-. 67"Ne 'wa yu -lɔ bhulɛle- nɛɛ: «-E kɛ Klise yɔ, bhulɛle- -anye.» "Ne 'ɔ yua -lɔ bhulɛle- nɛɛ: «'E kɛ 'anye -bhulɛle, 'a -ka -ame 'dleku kɛle-.» 68"Ne 'e kɛ 'anye lo 'yɔbhɔ-, 'a -cɛ 'lelee keyi -sɛ. 69-Mɔ, 'Nyɔkpɔ Yowli yi 'ce -la Lagɔ -ɔ -kɛ 'bhɛloɛ 'na lilikwlɛ -gbɔsɔ "ku gli. 70'Wayi 'klekle nɛɛ: «Lɔbhɔ 'na dɛku Lagɔ 'na Yu 'ye -e -noɔ bha?» "Ne 'ɔ yua -lɔ bhulɛle- nɛɛ: «'Anye 'nabhɛ 'anye no -lɔ nɛɛ 'ɔyi 'ye 'e -noɔ.» 71Zaa, ŋwɛnɛɛ: «-A -ka -la -vinɔ lo 'yɔbhɔ-, "naa-, -anye 'nabhɛ -a 'no- 'ɔnɛɛ 'nu 'na weli.»

Voafantina amin'izao fotoana izao:

Luke 22: btg

Asongadina

Hizara

Dika mitovy