Zaa 4
4
Zezu -nyɛ Samali 'na 'ŋɔnɔ "bhaa 'wa sibhɔle- "ku
1-Sɔɔdɛku Zezu 'no- lɛ "me -gbɔ Faliziɛnya -yibhlele sɛ nɛɛ 'ɔnɛɛ gɛlenya "ne 'nyakpa 'na -ye 'ɔ 'nyɛ- batɛme -wɛ -zu "ne 'wa -zi Zaa -noa "ku ne, 2(-tiaa sɛku Zezu 'nabhɛ -na nɛ 'nyakpa batɛme "nyɛ, -mɔ 'ɔnɛɛ gɛlenya 'nyɛ nɛ -lɔ 'nyakpa batɛme), 3Zude 'ye 'ɔ 'bha- -lɔ, "ne 'ɔ yi -lɔ Galile 'wlizɔ zi. 4-Mɔ 'ɔ "kɛ 'awɔ "ɛ Galile me ne, Samali 'na 'du "me 'ye 'ɔ "kɛ 'awɔ -lɔ ylɛle-.
5"Ne 'ɔ yi -lɔ Samali 'na 'du -ye 'wa la Sikale -wɛ ylɛ. 'Ɛ "ne Zakɔbo 'na dodo -ye 'ɔ 'je- 'ɔ yowli Zozɛfo kɔ -wɛ 'dɛtlole-. 6Lɔbhɔ 'ye Zakɔbo 'na 'ŋuwli -ko 'awɔ -lɔ. Zezu 'kpɛlɛ- 'awɔ 'nɔŋo -za, "ne 'ɔ yi 'awɔ -lɔ "ɛ 'ŋuwli -wɛ yɔkɔ 'gli. Glee 'na 'gbeplo -nɛ "me yɛ 'awɔ -lɔ.
7"Ne Samali 'na 'ŋɔnɔ -bholo yi -lɔ 'ŋu "lu -ka yi, "ne Zezu yu -lɔ no nɛɛ: «"Nyɛ -ame 'ŋu -se 'e "kɛ "nɔmɔ.» 8'Ɛ dɛ -wɛ "ku, 'ɔnɛɛ gɛlenya -me 'du "yitɛ "me lilɛ -pea -ka. 9"Ne "ɛ Samali 'na 'ŋɔnɔ -wɛ bhulɛle -lɔ Zezu nɛɛ: «Sɛko bhɔ? -Eyi Zufonyɔ -e zlɛ -ame 'ŋu, -ame Samali 'na 'ylokwlɔ!» "Naa- Zufonya "ne Samali 'na 'nyakpa "bhaa 'wa "ne memele "me.
10"Ne Zezu yu -lɔ bhulɛle- nɛɛ: «-E kɛ nɛ Lagɔ 'na -jɔlo -yi, "ne -e kɛ nɛ -ɔ zlɛ -eyi 'ŋu -wɛ -yi, -eyi -mɔɔ "kɔ nɛ -lɔ zɛlɛ-, "ne 'ɔ "kɛ nɛ -lɔ -eyi 'ŋu 'na -ɛ 'nyɛ zikpɛ -wɛ kɔ 'je.» 11"Ne "ɛ 'ŋɔnɔ -wɛ yu -lɔ bhulɛle- nɛɛ: «Anyinɛnyɔ, -e "ne -solu -su, "ne "ɛ 'ŋu sɔkɔ ne tlo- "me; Zaa, "ɛ 'ŋu -ɛ 'nyɛ zikpɛ -wɛ, -dee -e 'cɛ bhɔ -sɛ? 12-Eyi, -mɔɔ 'kpɔ bhɔ "ne -e -zi -a to "yitɔ Zakɔbo "ku -a? 'Ɔyi 'ɔɔ 'je- -lɔ -anye "ɛ 'ŋu sɔkɔ ne kɔ. "Ne 'ɔyi 'nabhɛ, 'ɔ "nɔmɔ- -me "ɛ 'ŋu sɔkɔ ne "me 'na 'ŋu, 'ɔnɛɛ yua "ne 'ɔnɛɛ glɛglɛ -nɛmea 'wɔ "bhaa.» 13"Ne Zezu yu -lɔ bhulɛle- nɛɛ: «-Ɔ kɛ "ɛ 'ŋu ne 'nɔmɔ-, 'ŋuto yu -nazɛ 'lɔbhɔ. 14-Mɔ, -ɔ kɛ 'ŋu 'na -ye 'e "kɔ kɔ 'je -wɛ 'nɔmɔ-, 'ŋuto -kɔ 'ce -la 'lɔbhɔ; "Naa-, 'ŋu 'na -ye 'e "kɔ kɔ 'je -wɛ yu 'ce 'ŋuwli "me ylile-, "ne "ɛ 'ŋuwli -wɛ yu 'ce zikpɛ 'na -ɛ -ka "kubhiɛ -wɛ "nyɛ -godogodo 'na dɛ.»
15"Ne "ɛ 'ŋɔnɔ -wɛ yu -lɔ bhulɛle- nɛɛ: «Anyinɛnyɔ, "nyɛ -ame "ɛ 'ŋu -wɛ, -se 'ŋuto te 'ce -la -ame 'lɔbhɔ, -se 'e te -ka -la -dɛne 'ŋu "lu ka yi.» 16"Ne Zezu yu -lɔ bhulɛle- nɛɛ: «Me, -se la -e "luwli, -se yile- "kusɔ -dɛne.» 17"Ne "ɛ 'ŋɔnɔ -wɛ yu -lɔ bhulɛle- nɛɛ: «'E "ne 'widi -kɛ.» Lɔbhɔ 'ye- Zezu -bhulɛlo -lɔ nɛɛ: «-ye -e no nɛɛ -e "ne 'widi -kɛ -wɛ, 'diɛɛ yɛ -lɔ. 18"Naa-, -e -kwɔ 'widia 'umgbu, "ne 'nyɔkpɔ 'na -ye -e -kɛ -dɛme ne, 'ɔ "ne -neɛ' 'widi yɔ, 'ɛyi -wɛ 'na dɛku -e -bhulɛ gbaa.» 19"Ne "ɛ 'ŋɔnɔ -wɛ yu -lɔ bhulɛle- nɛɛ: «Anyinɛnyɔ, 'e -yi -la -dɛme sɛ -gbɔ "guɔkwɔmenyɔ 'ye -e -noɔ -lɔ. 20-A to 'wɔ, "ɛ tlo ne 'vli 'ye 'wa bɔbɔle 'awɔ -lɔ 'wanɛɛ lagɔ, "ne 'anye 'a no -lɔ nɛɛ Zeluzalɛme 'ye Lagɔ 'na bɔbɔledɛ -ko -lɔ.» 21"Ne Zezu yu -lɔ bhulɛle- nɛɛ: «'Ŋɔnɔ -lɛ, kɛle- -ame 'dleku, -mɔ, lɔbhɔ yi ylɛ -ka yi, "ne 'a -ka -la tlo 'vli, "ne Zeluzalɛme To bɔbɔle- -ka me. 22'Anye Samali 'na 'nyakpa, -ye 'a "ne -yi 'ye 'a bɔbɔ -lɔ, -mɔ -anye Zufonya, -ye -a -yi 'ye 'a bɔbɔ -lɔ. "Naa- 'popoɛ, Zufonya "me 'ye 'ɛ 'bhale -lɔ. 23-Mɔ, lɔbhɔ -yi ylɛ, "ne lɔbhɔ -ylɛ "bhuɔ 'nabhɛ -ye -diɛnadiɛ 'na bɔbɔnya "kɛ -la -lɔ To, Zuzu Wlewle "ne gbɛklɛklɛ "me bɔbɔle-. "Naa- bɔbɔnya -ye To tɛle 'siɛ -wɛ -lɔ. 24Lagɔ Zuzu Wlewle yɔ -lɔ, -ɛwɛza, -wa 'bɔbɔ -wɛ, "kɛ -lɔ Zuzu Wlewle, "ne gbɛklɛklɛ "me bɔbɔle.»
25"Ne "ɛ 'ŋɔnɔ yu -lɔ bhulɛle- nɛɛ: «'E -yi sɛ -gbɔ Lagɔ 'na ŋwɛnɛŋwɛnɛyu -ye 'wa la Klise -wɛ yi 'ce yi. 'Ɔ "kɛ 'ce -yi, 'ɔ yi 'ce -anye -li 'klekle zɔ -sɛle.» 26"Ne Zezu yu -lɔ bhulɛle- nɛɛ: «-Ame 'mɔɔ -noɔ -lɔ "ɛ Klise yɔ.»
27'Wa -ko bhulɛ dɛku "ne 'ɔnɛɛ gɛlenya yi -lɔ 'du ylɛ-, "ne 'ɛ yua -lɔ nyea-, "naa-, Zezu -nyɛ 'ŋɔnɔ "bhaa 'wa lɛtɛ zɛ. -Mɔ, 'nyɔkpɔ 'no lo 'yɔbhɔ- -gbɔ, «-Ye -e 'yɔbhɔ bhɔ? "Ne sɔɔbɛɛza 'ɔyi "bhaa 'a lɛtɛ bhɔ?»
28"Ne "ɛ 'ŋɔnɔ yi -lɔ 'ɔnɛɛ 'ŋunyidɛ lɔbhɔ tele-, "ne 'ɔ yi -lɔ zoku me, "ne 'ɔ yi -lɔ 'nyakpa 'de -sɛle 29nɛɛ: «'a yi, -se 'a "kɛ 'nyɔkpɔ -ɔ -bhulɛle -ame -ye 'e -no 'klekle -wɛ 'ylime 'ye. Bɛsɛza, 'ɔ "ne bhɔ "ɛ Klise yɔ?» 30"Ne 'wa yi -lɔ guɔ- 'klekle "ne 'wa yi -lɔ Zezu "bhle yle.
31'Ɛ dɛ -wɛ "ku, "ɛ Zezu 'na gɛlenya bhubhɔ 'awɔ nɛɛ: «"Bhenyɔ, li -na 'se!» 32"Ne 'ɔ yua -lɔ bhulɛle- nɛɛ: «'E -kɛ lilɛ 'na -ye 'e "kɛ lɛ li, -mɔ, 'a "ne -yi.» 33Lɔbhɔ 'ye "ɛ gɛlenya 'yɔbhɔyɔbhɔle -lɔ lo nɛɛ: «'Nyɔkpɔ "no bhɔ "bhle -lalɛce lilɛ "nyɛ- 'a?»
34"Ne Zezu yua -lɔ bhulɛle- nɛɛ: «'Neɛ lilɛ -noɔ -lɔ -gbɔ 'e no -ɔ -lebhe -ame 'na -ye 'ɔ 'yɔbhɔ, "ne 'e no 'ɔnɛɛ libhɔ -se 'ɛ bhiɛ 'wlizɔ. 35'Anye 'nabhɛ, 'a "ne gbɔ bhɔ sɛne nɛɛ 'ɛ -to -na "bhle 'ce -mɔɔnɔ -se 'di dɛku "kɛ ylɛ? -Mɔ, -ame 'e bhulɛle 'anye nɛɛ: 'A libhi- 'wli "ku -se 'a wolo- 'lɛɛ- "me! "Naa-, lilɛ 'ya zɛle- "bhuɔ, zaa 'ɛnɛɛ 'di dɛku -ylɛ -lɔ. 36"Naa-, 'didinyɔ yle 'ɔnɛɛ 'peɛleɛ, "ne 'ɔ "zo zikpɛ 'na -ɛ -ka "kubhiɛ 'na bhi 'wli, -se gloglonyɔ "ne 'didinyɔ "kɛ 'gɔme 'ŋwɛnɛ nole-. 37Zaa nunɛ ne 'diɛɛ yɛ -lɔ: -Ɔne glo, "ne -vinɔ 'di. 38-Ame 'e -lebhe 'anye -dee 'a "ne glole- -wɛ 'di ka. -Bedia 'yele- "bhle 'kle, "ne 'anye 'a me -lɔ -dee 'a "ne "kplɛle- -wɛ 'dile -ka.»
39Samaliglɔ "me 'na 'du -wɛ "ku 'na 'nyakpa -kwleyia 'wa -kɛle Zezu 'dleku "ɛ 'ŋɔnɔ -wɛ 'na 'desɛweli kɔ. "Naa- sɛnɛ 'ɔ lɛ 'awɔ -lɔ nɛɛ: «'ɔ -bhulɛle -ame -ye 'e -no 'klekle -wɛ.» 40"Ɛ 'ylime za, "ɛ Samali 'na 'nyakpa bhubhɔ -lɔ Zezu -gbɔ 'ɔ 'gliloa lo, "ne 'ɔ yua -lɔ 'yli "sɔ yɔko -sɛ. 41"Ne 'nyakpa 'na -wa -kɔlo 'dleku -wɛ yi -lɔ 'lelee zimale- pluplu "naa- 'ɔyi 'nabhɛ bhulɛloa nɛ -lɔ zɛ. 42"Ne 'wa yi -lɔ "ɛ 'ŋɔnɔ bhulɛle- nɛɛ: «'Ɛ "ne -neɛ' -ye -e -bhulɛle -anye -wɛ 'ɛyikɔ za yɛ; -Mɔ, -a 'no- -ayigɛsɛ 'ɔnɛɛ bhulɛweli, "ne -a -yibhlele -la -dɛme sɛ -gbɔ 'ɔɔ -noɔ -lɔ 'diɛɛ -glonya 'na 'fuɔnyɔ yɔ.»
Zezu yamalea Kafanaɔɔme 'na "slojayu "yitɔ 'na yu
(Matie 8.5-13; Luke 7.1-10)
43'Yli "sɔ "kɛ 'ple ne, Zezu 'bha- "ɛ 'du -wɛ "ku, "ne 'ɔ yi -lɔ Galile me. 44'Ɔyi 'nabhɛ, 'ɔ la- 'awɔ sɛne nɛɛ: «"Guɔkwɔmenyɔ "ne -la 'ɔ 'luku 'plome -ko.» 45'Ɛ 'ylime za, Zezu -ylɛ lɛ Galile ne, "bhle 'na 'nyakpa 'sɔ- 'tee. "Naa- 'wa "mɔme- 'awɔ Zeluzalɛme Paake 'na -jajo "ku; "ne 'wa 'ye- -me 'awɔ Zezu 'na nonoli 'klekle 'ylime.
46"Ne Zezu yi -lɔ Kana, Galile 'na 'du -bholo "ku me, -mee 'ɔ -yliale 'awɔ 'ŋu duvɛ "me -wɛ. "Ɛ 'du -wɛ "me ne, -klɔgbɔnyɔ -bholo 'na "slojayu "yitɔ -ko 'awɔ "bhle, 'ɔnɛɛ yu "ne 'awɔ Kafanaɔme -yɛle. 47'Ɔ "kɛ "no -gbɔ Zezu 'bha Zude, "ne 'ɔ yi Galile ne, "bhle 'ye 'ɔ -mo -lɔ ylele- -ka, "ne 'ɔ yu -lɔ bhulɛle- nɛɛ: «'E bhubhɔ -eyi, yi Kafanaɔme, -se -e "kɛ 'na yu yamalea-, -mɔ, 'ɔ -le "ku dɛku.» 48"Ne Zezu yu -lɔ bhulɛle- nɛɛ: «'A "mɔ -na -li 'na -ɛ sɛ geji "ku -nyɛ zɛzɛ "bhaa 'ylime 'ye ne, 'a "ne 'dleku -kɛ!» 49"Ne "ɛ "slojayu yu -lɔ bhulɛle- nɛɛ: «Anyinɛnyɔ, -yaya yi 'neɛ sueme, -bhle 'neɛ yu -namlɛ "ku -wɛ.» 50"Ne Zezu yu -lɔ bhulɛle- nɛɛ: «Me, -mɔ, -neɛ' yu -yamale.» "Ɛ 'nyɔkpɔ -wɛ -kɛle Zezu 'na bhulɛweli 'dleku, "ne 'ɔ yi -lɔ me. 51-Sɔɔdɛku 'ɔ -ko me dɛku -wɛ, "ne 'ɔnɛɛ "kulɔbhɔnya yu -lɔ sibhɔle- -ka yi; Ŋwɛnɛɛ: «-Neɛ' yu -yamale!» 52"Ne "ɛ "slojayu yua -lɔ lo 'yɔbhɔ nɛɛ: «-Sɔɔdɛku 'ɔ -yamale bhɔ?» "Ne 'wa yu -lɔ no nɛɛ «Kugblɔku 'na glee 'na -gbɔsɔ -nɛ -wɛ "me 'ye wɔtlɔ 'bhɔ- -lɔ 'ku "me.» 53"Ne "ɛ yu 'ɔ 'to yi -lɔ luɔ- -gbɔ "ɛ glee -wɛ "me 'ye Zezu -bhulɛlo -lɔ nɛɛ: «-Neɛ' yu -yɛ.» "Ne 'ɔ yi -lɔ Zezu 'dleku kɛle-, 'ɔ -nyɛ 'ɔnɛɛ -bhudu "me 'na 'nyakpa 'klekle "bhaa.
54Zezu 'na zɛzɛ 'na "sɔnɛ -ye 'ɔ 'pɔ- -wɛ -lɔ; -Sɔɔdɛku 'ɔ 'bha- nɛ Zude "ne 'ɔ -yile Galile "kusɔ -wɛ.
Voafantina amin'izao fotoana izao:
Zaa 4: btg
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
