Yuhana 3
3
Yesu fa Nikodɛmu bi ki
1 Farinsiyɛnŋ bɛɛ wuru nmaŋ, nwɔ̀ tɔ wuru tu Nikodɛmu. Yawutu kiri ŋununtiŋ ki bɛɛ wuru-i. 2Ntiŋ i ta Yesu tɛ cii ru, ntiŋ i ǹʼbi ntiŋ tɛ tu : « Yɔɔ kalimɔɔ, yibɛɛ kɔniŋ ǹʼtɔ-i tu miŋ kalimɔɔ ɔ, nwɔ̀ po-i Kirinŋ nu, sabu miŋ i taanmashɛ wɔ̀ri ma-a, koŋ tɔri tenŋ a so nini ma-i kì, duu Kirinŋ i nwɔ̀ fan. »
3Yesu i ntiŋ nupwulu tu : « Sɛli ki ra, míŋ a ǹʼbi miŋ tɛ, ńʼtu, a konwɔtiŋ ji ǹʼŋunaŋ i kì, ńʼtu ntiŋ a so Kirinŋ wɔ Masabi ki ja-i kì. »
4Nikodɛmu i kaaba, ntiŋ i ǹʼbi tu : « Konwɔtiŋ bwuubi so-i kɔ, nintiŋ a so ji-i ǹʼŋunaŋ i dɔɔkunŋ! Ntiŋ kɔniŋ na so a pwulu de-i a ɲiŋ ki ciiru, kí i ntiŋ ji sɛbɛ kì wo! »
5Yesu tu ntiŋ tɛ tu : « Sɛli ki ra, míŋ a ǹʼbi miŋ tɛ ńʼtu koŋ woo koŋ ji ju fa Ɲiniwɔlinŋ ki baraka ra kì, ńʼtu ntiŋ a so de-i Kirinŋ wɔ Masabi ki ru kì, 6sabu konwɔtiŋ ji-i konanmini baraka ra, konanminibi i nintiŋ nu, nka konwɔtiŋ ji-i ɲini ki baraka ra, nintiŋ i ɲini i. 7Niŋ ki ra, a míŋ ǹʼbi tu : ‹ á ji ǹʼŋunaŋ ni i ›, niŋ fa bo miŋ tɔnŋ sun kì. 8Faa ki i jɔrɔkɔ-a, ŋì i tiri-ri mani nu, nwɔ̀ di-i ǹʼtɛ, miŋ i ǹʼshinwulu ki rama-a, nka ŋì i ta-a mani wɔ̀ ru niŋ fa ŋì i yiri-ra mani wɔ̀ ru, miŋ niŋ tɔ-a kì. Konwɔtiŋ ji-i ɲini ki baraka ra, nintiŋ i niŋ ɲaan ki tɛ. »
9Nikodɛmu tu sɛbɛ : « Niŋ a so ma-i dɔɔkunŋ? »
10Yesu tu ntiŋ tɛ tu : « Minwɔ̀ i Isirayɛli konanbi ki wɔ kalimɔɔ tɔtiŋ i, miŋ niŋ bi kiri tɔ-a kì wa? 11Míŋ a ǹʼbi miŋ tɛ sɛlɛsɛli ki ra, ńʼtu yibɛɛ i nwɔ̀ tɔ-a, ńʼtu yibɛɛ i niŋ bi-a, yi nwɔ̀ ja-ri, yi i niŋ nakali-li, nka ńʼtu niŋ fa a fɔn na, ábɛɛ bili-la yibɔɔ wulu ki ra kì. 12A míŋ pwɔkulinŋ sun bi ri bi ábɛɛ tɛ, a ábɛɛ bili nini na kì, a míŋ na kirinpɔli la bi ri bi ábɛɛ tɛ, ábɛɛ ra bili nini na dɔɔkunŋ? 13Sabu koŋ tɔri tenŋ tunpa kirinpɔli la kì, duu nwɔ̀tiŋ jɛri po yiri-i nmaŋ, Koŋ Danshuru ki kɔniŋ i.
14Miŋ tu Musa myɛɛn namɔnimaan ki fɛshi-i bali la ɲɛninsinaŋ ki sun ɲaan wɔ̀ tɛ, Koŋ Danshuru ki kakan-i ntiŋ i fɛshi mìŋ ɲaan ki tɛ,#Nubitan kiri 21.4–9. 15nwɔma a nwɔ̀tiŋ bili ntiŋ na, nintiŋ i ɲaninkulutɔnbi kɔbali ki kila. 16Sɛli ki ra, Kirinŋ juniɲa nu konaŋ kiri bidi-i a tɛ haali, fɔ ŋì i a Danshuru tenŋ pe ki wɔri kí ŋununu saraka, nwɔma tu koŋ woo koŋ bili niŋ na, tu nintiŋ fa haliki kì, nka tu ntiŋ ɲaninkulutɔnbi kɔbali ki kila.
17Kirinŋ a Danshuru ki bo na juniɲa ciiru, ŋì i na kiti fɛɛn juniɲa nu tɔnŋ kiri sun kì, nka nwɔma tu kí i arì mwu ǹʼsababu ra. 18A konwɔtiŋ bili ǹʼna, Kirinŋ kiti ki fɛɛn-na nintiŋ sun kì, nka konwɔtiŋ bili ǹʼna kì, Kirinŋ wɔ kiti fɛɛn-ɛ nintiŋ sun kɔ, sabu ntiŋ bili Kirinŋ Danshuru tenŋ pe ki ra kì. 19Niŋ kiti ki fɛɛn ŋuŋ ki i ntiŋ sun kaa : Manisarinŋ ki na-i juniɲa ciiru, juniɲa nu konaŋ kiri i mancinŋ ki bidi arì tɛ, ŋì i fwuu manisarinŋ ki sun, sabu kí mabi kiri juu-u. 20Aawe, manisarinŋ ki bikwɔ-i bi kulinŋ matɔnŋ ki sun, ntiŋ jɛɛn-na ntiŋ i po manisarinŋ ki tɛ kì. Ntiŋ i kɛni-na tu afinŋ po manisarinŋ ki tɛ, tu afɔɔn bi kulinŋ kiri ra ja. 21Nka konwɔtiŋ i sɛli ki sun, nintiŋ i awɔ bi kiri ma-a manisarinŋ ki tɛ, nwɔma ŋì i tɔ tu afinŋ tiri kɛɲɛ-a Kirinŋ dintɛ bi ki wu. »
Yesu fa Yuhana bi ki
22Niŋ kɔɔtɛ, Yesu fa awɔ kalindaŋ kiri i ta Yude sɔɔta ki ru. Ntiŋ fa kí i waaci pyaanŋ ma niŋ mani nu, ntiŋ i wu tan-ni. 23Yuhana yɛri ki i konaŋ kiri wu-ri Ayinɔn, ninwɔ̀ i Salimu tɔntɛ, sabu ju ki mwɔ wuru niŋ mani nu, konaŋ ki i na-ni ntiŋ tɛ nmaŋ. 24Niŋ waarinŋ ki ru, Yuhana bo-ri nkasu ki ru sun kì.
25Jibi bɛɛ, sɔsɔɔlinŋ i na jɔrɔkɔ Yuhana wɔ kalindaŋ kiri fa Yawutu bɛɛ faninmwuŋ wu fɔɔ bi ki bi sun. 26Yuhana wɔ kalindaŋ kiri i ta ǹʼbi ntiŋ tɛ tu : « Kalimɔɔ, ábɛɛ fa shuru wɔ̀ wuru Yurudɛn baa ki kɔɔtɛ, ábɛɛ i ntiŋ wulu bi yibɛɛ tɛ, á ǹʼshɛɛli, ntiŋ yɛrima ki i konaŋ kiri wu-a, konaŋ kiri bataa i ta-ri ntiŋ tɛ. »
27Yuhana tu kí tɛ : « A Kirinŋ finŋ wɔ̀ wɔri koŋ tɛ kì, ntiŋ i so-a niŋ kila-i kì. 28Ábɛɛ yɛrima kiri i míŋ shɛɛri kiri, tu míŋ ǹʼbi ábɛɛ tɛ tu, ńʼtu Kirinŋ a tɔnŋ wɔri Mwutɔnŋ wɔ̀ bira, ńʼtu míŋ niŋ i kì. Ńʼtu Kirinŋ míŋ bo na ntiŋ jɛŋ. »
29« Cɛn fu ki ru, mari ki i a shinŋ ki wɔ, nwɔ̀ i marishinŋ ki wɔ wɔshuru ki i, niŋ i ji-a nmaŋ, marishinŋ ki wɔ wulu jii kiri i niŋ ciirudi-ri. Mɔ́ɔ́n ciirudibi ki i niŋ ɲaan ki tɛ, niŋ míŋ pyii-i. 30Ntiŋ kakan-i ntiŋ i gbɛbi kila, míŋ i kuru tiri-ri. »
Koŋ wɔ̀ po-i kirinpɔlila
31« Koŋ wɔ̀ po-i kirinpɔlila, niŋ i finŋ bataa ŋununu. Nwɔ̀ po-i fwuniŋ nu, niŋ kɔli-i fwuniŋ ki ra, niŋ i fwuniŋ sun finŋ ni wulu bi-ri. Nka nwɔ̀ po-i kirinpɔlila, niŋ i finŋ bataa ŋununu. 32Ŋì nwɔ̀ ja-i, ŋì i nwɔ̀ rama, ǹʼyɔ ninki rakali-la. Nka koŋ tɔri ntiŋ wɔ wulu ki pa-a a sɔbɛ ra kì. 33Nwɔ̀tiŋ ǹʼwɔ wulu ki pa a sɔbɛ ra, nintiŋ ǹʼji-i tu Kirinŋ sɛlitiŋ i. 34Sɛli ki ra, Kirinŋ nwɔ̀tiŋ cin-i, nintiŋ i Kirinŋ wɔ wulu kiri bi-a, sabu Kirinŋ a ɲini ki wɔri-i ntiŋ tɛ, ŋì i ǹʼpyɛ tu kì. 35Danshuru ki bidi-i Tiŋ ki tɛ, niŋ ki ra, Tiŋ ki i sotinbi ki bataa wɔri ǹʼtɛ finŋ bataa sun. 36A konwɔtiŋ a gbɛbilimaŋ ki ji Danshuru ki i, nintiŋ a ɲaninkulutɔnbi kɔbali ki kila. Nka, a konwɔtiŋ a gbɛbilimaŋ ki ji Danshuru ki i kì, nintiŋ a ɲaninkulutɔnbi ki kila kì, nka ntiŋ i Kirinŋ wɔ tɔnkwulu ki fɛ. »
Voafantina amin'izao fotoana izao:
Yuhana 3: JOB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Wycliffe Bible Translators, Inc.
