Yuhana 18
18
Yesu pa bi ki
(Matiyu 26.45–56; Maraka 14.43–50; Luki 22.47–53)
1Yesu kɔ-i niŋ wulu kiri ra waarinŋ wɔ̀ ru, ntiŋ fa awɔ kalindaŋ kiri i fwuu po Sedirɔn su ki kɔɔtɛ. Jirinŋ ji bɛɛ wuru niŋ mani ki ru, Yesu fa awɔ kalindaŋ kiri i de niŋ nu. 2Yudasi wɔ̀ wuru Yesu janfatɔnŋ ki i, niŋ wuru niŋ mani ki maŋ tɔ-a, sabu Yesu fa awɔ kalindaŋ kiri wuru ta mwɔɔnna tan-a niŋ mani ki ru. 3Niŋ ki ra, Yudasi i ǹʼpa tiri surudashi kiri fa Kirinfusinaŋ ki ɲaannasuutɔnŋ kiri jɛŋ niŋ nankɔ ki ru. Sarakawɔrɔtɔnŋ kiri ŋununtiŋ kiri fa Farinsiyɛnŋ kiri wɔ cintɔnŋ ni wuru-i. Kari tanfinŋ ni fa tuucu ri fa sifilɛn ni wuru kí gbɛ.
4Bi wɔ̀ wuru-ra ma Yesu wu, miŋ tu ntiŋ nini bataa tɔ wuru kɔ, niŋ ki ra, ntiŋ i kí ŋununafu, ntiŋ i kí ranɔri tu : « Ábɛɛ nkɛnŋ ceeli-la? »
5Kí i ntiŋ nupwulu tu : « Yesu Nansarɛtitɔnŋ ki. »
Ntiŋ i ǹʼbi kí tɛ tu : « MÍŊ YƐ. » Yudasi, ninwɔ̀ wuru-ra ntiŋ wɔri a ɲa kiri tɛ, niŋ wuru kí fan. 6Yesu ǹʼbi-i kí tɛ mani wɔ̀ ru, tu « MÍŊ YƐ », kí i ta arì kɔɔtɛ, kí bataa i fɛɛn fwuniŋ sun. 7Yesu i a pwulu, ntiŋ i kí ranɔri tu : « Ábɛɛ nkɛnŋ ceeli-la? » Kí tu ntiŋ tɛ : « Yesu Nansarɛtitɔnŋ ki. »
8Yesu tu kí tɛ : « Míŋ ǹʼbi-i ábɛɛ tɛ, MÍŊ YƐ. A ábɛɛ ji mínki ceeli-la, á ncusun kari tiri. » 9Niŋ ma-i, nwɔma ntiŋ wɔ wulu bimaan ka i nafaa tu : « Míŋ Tiŋ, ábɛɛ nwɔ̀ri bataa wɔri-i míŋ tɛ, niŋ tɔri dantenŋ fɔni kì. »
10Baamwuru wuru Simɔŋ Pyɛɛri gbɛ, niŋ i niŋ sari po, ntiŋ i kaan tenŋ jɛri sarakawɔrɔtɔnŋ kiri ŋununtiŋ ki wɔ joŋ ki sun, ntiŋ i niŋ pantɛ tɔɔn ki tɛri san nmaŋ. Niŋ joŋ ki tɔ ki wuru tu Malikusi. 11Yesu tu Pyɛɛri tɛ : « Nʼwɔ baamwuru ki de a foo ki ru nmaŋ! Míŋ Tiŋ ki cɔɔri wɔ̀ ji-i mɔ́ɔ́n, míŋ a ńʼkaan niŋ tɛ wa? »
Yesu bo ta-i Anɛ tɛ
12Surudashi kiri fa arì ŋununtiŋ kiri fa Yawutu kiri wɔ Kirinfusinaŋ ki ɲaannasuutɔnŋ kiri ŋununtiŋ kiri i Yesu pa, kí i ntiŋ kɔli. 13Kí i tiri ntiŋ wu Anasi tɛ sun, niŋ wuru Kayifu tii i. Niŋ Kayifu ki wuru sarakawɔrɔtɔnŋ kiri ŋununtiŋ ki i, niŋ jiri ki fɛ. 14Niŋ Kayifu ki Yawutu kiri racin wuru-i tu, ǹʼpari koŋ tenŋ i beeni konaŋ ki bataa bira.
Pyɛɛri tu afinŋ Yesu tɔ-a kì
(Matiyu 26.69–70; Maraka 14.66–68; Luki 22.55–57)
15Ŋì i kí tirira ki tu Yesu wu, Simɔŋ Pyɛɛri fa a kaashi kalindaŋ bɛɛ i ǹʼpa Yesu cɛfan. Tɔbi wuru niŋ kalindaŋ tɔri ki fa sarakawɔrɔtɔnŋ kiri ŋununtiŋ ki faninmwuŋ, niŋ i de kí fan sarakawɔrɔtɔnŋ kiri ŋununtiŋ ki wɔ kaniŋ ki ru. 16Nka Pyɛɛri i tu kaniŋ ki demantɔnŋ ki ra. Kalindaŋ wɔ̀ wuru sarakawɔrɔtɔnŋ kiri ŋununtiŋ ki tɔtɔnŋ ki i, niŋ i po taanna, ntiŋ i na wulubi demantɔnŋ ki ɲaannasuumari ki tɛ, ntiŋ i Pyɛɛri de. 17Niŋ jonmari ki i Pyɛɛri ranɔri tu : « Miŋ i ka koŋ ka wɔ kalindaŋ ki bɛɛ ɛ kì wa? »
Pyɛɛri tu : « Aayi, míŋ kí tɔri kì. » 18Miŋ tu shii ki wuru po-a, joŋ kiri fa surudashi kiri tuu rakili wuru-i, kí i tu niŋ na, Pyɛɛri yɛrima ki tu wuru kí fan.
Yesu i sarakawɔrɔtɔnŋ kiri ŋununtiŋ sinaŋ ki ɲaanfɛ
(Matiyu 26.59–66; Maraka 14.55–64; Luki 22.66–71)
19Sarakawɔrɔtɔnŋ kiri ŋununtiŋ sinaŋ ki i Yesu ranɔri awɔ kalindaŋ kiri fa awɔ kalinŋ ki bi sun. 20Yesu i ntiŋ nupwulu tu : « Míŋ wulubi-i juniɲa bataa ɲaanna, míŋ konaŋ kiri kali-i kalinfu kiri fa Kirinfusinaŋ ki ru, Yawutu kiri bataa wuru arìmaŋ nakɔli-la mani wɔ̀ri ru, míŋ ńʼwɔ wulu ki tɔri dantenŋ bi du ru kì. 21Nfɛnŋ na, miŋ ji faa míŋ nanɔri-ra? Nwɔ̀ri mɔ́ɔ́n wulu kiri rama-i, miŋ nini nanɔri, míŋ nwɔ̀ bi-i, kíbɛɛ niŋ tɔ-i. »
22Yesu niŋ wulu ki bi wɔ̀ tan-i, Kirinfusinaŋ ki ɲaannasuutɔnŋ kiri bɛɛ tenŋ i gbɛta bo ntiŋ ɲaanfɛ, ntiŋ i ǹʼbi tu : « Miŋ i sarakawɔrɔtɔnŋ kiri ŋununtiŋ ki rupwulu-la ka ɲaan ka tɛ wa? »
23Yesu i niŋ koŋ ki rupwulu tu : « Míŋ wulu wɔ̀ bi-i, niŋ jɛ maŋ ki ji ńʼwu, nka a wulu jɛ ji-i kì, nfɛnŋ na miŋ i míŋ bwɔ? » 24Niŋ ma-i, Anasi i Yesu gbɛ fuuli ki kɔlimaan ki bo tiri niŋ jiri fɛ sarakawɔrɔtɔnŋ kiri ŋununtiŋ sinaŋ Kayifu tɛ.
Pyɛɛri tu afinŋ Yesu tɔ-a sɛbɛ kì
(Matiyu 26.71–75; Maraka 14.69–72; Luki 22.58–62)
25Simɔŋ Pyɛɛri tu wuru faa tuu ki ra, kí i ntiŋ nanɔri tu : « Miŋ yɛrima ki ka koŋ ka wɔ kalindaŋ ki bɛɛ i kì wa? »
Nka Pyɛɛri i a sɔsɔ ǹʼna tu : « Aayi, míŋ niŋ bɛɛ i kì. »
26Pyɛɛri koŋ wɔ̀ ki tɔɔn tenŋ ki tɛri wuru-i, niŋ koŋ ki tindaŋ wuru sarakawɔrɔtɔnŋ kiri ŋununtiŋ sinaŋ ki wɔ joŋ ki bɛɛ i sɛbɛ, niŋ i ǹʼbi Pyɛɛri tɛ tu : « Míŋ miŋ ja ntiŋ fan nankɔ ki ru kì wa? »
27Nka Pyɛɛri i a sɔsɔ ǹʼna sɛbɛ, mìŋ manaanŋ tenŋ ki ru, ɲandaŋ kiri i bulu.
Pilati saa wɔri-i tu kí Yesu kilɛn
(Matiyu 27.1–2, 11–14, 15–31; Maraka 15.1–5, 6–20; Luki 23.1–5, 13–25)
28Kí po-i Yesu wu Kayifu wɔ mani ki ru, kí i tiri ntiŋ wu masafu ki ru. Niŋ bi kiri ji-i siira jona. Yawutu kiri jɛɛn, kí i de masafu ki ru kì, sabu kí wuru ǹʼtɛ arì i arì yɛri nɔɔ Jonbikɔ ɲaannabyɛ ki nufinŋ numaanna ki jɛŋ kì. 29Niŋ ki ra, faantiŋ Pilati i po kí tɛ taanna, ntiŋ i kí ranɔri tu : « Ka shuru ka bi pɔlimaan danwɔ ma? »
30Kí i Pilati rupwulu tu : « Ka koŋ ka ji wuru pɔli-li kì, yibɛɛ wuru-ra na ntiŋ wu ábɛɛ tɛ kì. »
31Pilati tu kí tɛ : « Ábɛɛ yɛrima kiri ntiŋ wɔ kiti ki kwuru, ŋì i kɛɲɛ áwɔ sariya ki wu kɛ. » Yawutu kiri i Pilati rupwulu tu : « Yibɛɛ kakan yi i kiti fɛɛn koŋ sun, yi i ntiŋ kilɛn kì. »
32Niŋ ma-i, nwɔma Yesu wulu wɔ̀ bi-i a beenika ɲaan ki sun, niŋ i nafaa.
33Niŋ na, Pilati i a pwulu de awɔ masafu ki ru, ntiŋ i Yesu dɔri, ntiŋ i ntiŋ nanɔri tu : « Minki i Yawutu kiri wɔ masa ki i wa? »
34Yesu i Pilati rupwulu tu : « Miŋ yɛrima ki nʼmiiri, ŋi i ǹʼbi daa, walima koŋ ǹʼbi miŋ tɛ míŋ bi sun? »
35Pilati i Yesu rupwulu tu : « Míŋ i Yawutu u wa? Miŋ yɛrima ki wɔ shiya ru konaŋ kiri fa sarakawɔrɔtɔnŋ kiri ŋununtiŋ kiri na-i miŋ wu míŋ tɛ. Miŋ nfɛnŋ ma? »
36Yesu i ǹʼnupwulu : « Mɔ́ɔ́n masabi ki ka juniɲa ka wɔ kì. A mɔ́ɔ́n masabi ki ji wuru ka juniɲa ka wɔ, míŋ cɛfantɔnŋ kiri wuru-ra míŋ ŋununu kari tan, nwɔma Yawutu ŋununtiŋ kiri fa míŋ pa kì, nka sɛli ki ra, mɔ́ɔ́n masabi ki ka juniɲa ka wɔ kì. »
37Pilati i ǹʼbi ntiŋ tɛ : « Miŋ i masa a wa? »
Yesu i ǹʼnupwulu : « Miŋ yɛrima ki i ǹʼbi-a kaa dɛ! Míŋ i masa a. Míŋ na-i juniɲa nu, ŋí i na sɛli ki ji konaŋ kiri wu. Koŋ finŋ woo finŋ i sɛli ki tɛ, nini i arì tɔɔnye-a mɔ́ɔ́n wulu ki tɛ. »
38Pilati tu : « Nfɛnŋ sɛli ki i? » Niŋ wulu kiri bimaan ki kɔɔtɛ, Pilati i po tiri Yawutu kiri cɛfan tanŋ ki na sɛbɛ, ntiŋ i ta ǹʼbi kí tɛ tu : « Míŋ pɔlimaŋ ja koŋ ka ra nwɔ̀ a ntiŋ kilɛn ŋuŋ po kì. » 39Ntiŋ tu kí tɛ : « Ŋì i kɛɲɛ ábɔɔ ladaŋ ki wu, míŋ i nkasudaŋ tenŋ pani-na ábɔɔ Jonbikɔ ɲaannabyɛ ki sun, ábɛɛ tu dɔɔkunŋ? Ŋí Yawutu kiri wɔ masa ki pani wa? » 40Konaŋ ki i fali tu : « Aayi! Niŋ i kì! Barabasi pani! » Niŋ i faa Barabasi tɔ ka wuru koŋ kilɛntɔnŋ i.
Voafantina amin'izao fotoana izao:
Yuhana 18: JOB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Wycliffe Bible Translators, Inc.
