मात्ति 3
3
बाप्तिस्मा पिखुबा युहान्नाङा चोगुहा पार्चार
(मार्कुस १:१-८; लुका ३:१-१८; युहान्ना १:१९-२८)
1ङ्खिङ्बेला बाप्तिस्मा पिखुबा युहान्ना याहुदिया लिङ्खामगा इसा चा मेॽनिङ्ना सुन्नेना ठोङ्बे तायाहोङ् याॽमिचि खाॽला लुसाङ् पार्चार चोक्मा तारोक्तुचि, 2“पास्चाताप चोगानि, इजाङ्बाङ्निङ् वालोक्का राज्या न्निङ्युम्बे तायाब्यामाना॥”#मात्ति ४:१७; मार्कुस १:१५ 3उका उतुम्बे प्याक ओन्दाङ् निङ्वाफुमाभाङ् चेक्खुबा यासाइयाङा खाॽला कायामा–
“खेप्सानुम, इसा चा मेॽनिङ्ना सुन्नेना ठोङ्बे एको याॽमिङा माडा सेम्लाङा खाॽला कामासिम्मे,
‘हाङ्बा निङ्वाफुमा तामाना लाम्बु तोयानुम, उङ् लाम्माहा लाम्बुचि सिधा चोगानुम्चिम!’”#यासाइया ४०:३
4युहान्नागा वाॽमाहा तेफेन च्हेन ओओक्का उमुङ्गा फायाना तेक नुङ् काम्बोरबे थुन्माना ह्वारिक्का पेटि साया॥ उका चाम्योङ्बा च्हेन सालाहा#३:४ आङ्गालुॽमाङ् लोॽवाना एक खाले चामा लेङ्माना चोङ्खुबाक॥ नुङ् पुङ्दा थाङ्सुगा उवा साया॥#२ हाङ् १:८ 5यारुसालेम साहार नुङ् याहुदिया लिङ्खामगा घाक तेनचिभाङ् न्हाङ् यार्दान होङ्मागा योप्पारिक-खेप्पारिक्हा घाक ठोङ्भाङ् याॽमिचि युहान्नागाबे न्दाया, 6न्हाङा उङ्चि पाप पाहाङ् लाखुबाचि घाक युहान्नाङा यार्दान होङ्माबे बाप्तिस्मा पिचि॥
7ङ्खाॽनिङ्गो फारिसि नुङ् सादुकि छुमगा प्याक याॽमिचि बाप्तिस्मा लियाचोक्से न्दायाहा निसुचिहोङ् उङा ङ्खाचि खाॽला लुचि, “ओ पुछाक्का सान्तानचि, न्निङ्दा निङ्वाफुमागा तायेॽना दान्डाभाङ् जोगाचोक्मा इसाङा चिन्दिघा?#मात्ति १२:३४; २३:३३ 8न्निङ्दा जेप्पा पास्चाताप चोगिघा ओमभोङ्, न्निङ्दा उचुन्हा काम चोगानुम॥ 9‘कानिङ् आब्राहामगा सान्तानसिङान’ कामाहोङ् ङ्खा दान्डाभाङ् हिङिॽवाङ्हा भोङ् म्मितानिन॥ इजाङ्बाङ्निङ् का न्निङ्दा लुमेॽनेनिन, निङ्वाफुमाङा खा लुङ्खाकचिभाङ् चा आब्राहामगा सान्तान चोक्मा यास्वाचिहा॥#युहान्ना ८:३३ 10लोप्माङ् निरिक्का फेन्दिक सिङ्गा उसामबे आयाब्यामाना॥ हाकु उचुन उसा मेङ्गेङ्खुबा घाक सिङ् इम्मेहोङ् मिबे लेम्नाहाङ्मेहा॥#मात्ति ७:१९; लुका ३:९
11“का गो न्निङ्दा पास्चाताप चोगिघा चेॽया सोॽमेमागा माङ्च्वाङा बाप्तिस्मा पिमेॽनेनिन, ङ्खाॽनिङ्गो का हाक्निङ् हेक्साङ् ताखुबाङा च्हेन न्निङ्दा पाबित्तारा आत्मा नुङ् मिङा बाप्तिस्मा पिइवाघा॥ उङ् का हाक्निङ् साक्तिसालिना, का गो उका लाङ्खोप खुॽमा चा न्थेन्सिमेॽङान्ना॥ 12उङा चाचिॽया थाप्माना नाङ्लो उमुकपे याङिक्सुना॥ उङा उका खालो उचुन फेक्त्वा, न्हाङ् थाब्वाहोङ् चाचिॽया भाखारिबे युक्स्वा, ङ्खाॽनिङ्गो उसिप च्हेन हेॽनिङ्चा मेन्सिमाना मिबे तुन्धाक्स्वाहा॥”
येसुगा बाप्तिस्मा
(मार्कुस १:९-११; लुका ३:२१-२२; युहान्ना १:३२-३४)
13ङ्खिङ्बेला येसु चा गालिल लिङ्खामभाङ् यार्दान होङ्माबे बाप्तिस्मा लियाचोक्से युहान्नागाबे ताया॥ 14ङ्खाॽनिङ्गो युहान्नाङा उङ् खाॽला लुसाङ् ओन्मा योगु, “मेन्ना, न्दाभाङ् ले का बाप्तिस्मा लियाचोक्मा पोर्ने, ङ्खाॽनिङ्गो न्दा ले काबे तायागाना!”
15येसुङा उङ् लु, “लोपका लागि खाॽलामाङ् लेङ्मा पि, इजाङ्बाङ्निङ् खाॽलामाङ् निङ्वाफुमाङा मितुहा लोॽवा घाक चेॽया कानिङ् पुरा चोक्माहा॥” खा चेॽया खेप्सुहोङ् युहान्ना बाप्तिस्मा पिॽमा काक्सा॥
16येसुङा बाप्तिस्मा लियाचोगिहोङ् सोलोक माङ्च्वाभाङ् पाखा लोन्दा॥ ङ्खिङ्बेला वालोक होसा, न्हाङ् उङा निङ्वाफुमागा आत्मा ढुकुवा लोॽवा लेक्सुक्साहोङ् उङ् छोङ्बे उङ्मास्याना निसु॥ 17न्हाङ् वालोकपाहाङ् एको खाॽलाना सेम्ला ताया, “ना का आलुङ्मा तुक्तुङ्ना आच्या ओम, नाभाङ् का तुक्नुङ् चोन्दास्यामाङ्ना॥”#उथुक २२:२; छेम २:७; यासाइया ४२:१; मात्ति १२:१८; १७:५
Voafantina amin'izao fotoana izao:
मात्ति 3: YAKH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. and Nepal Bible Society
