Markus 6
6
A ɓiin ma Yeso i Nazarat
1Yeso la ɓoɓa ki bili bwa'al a shik bana, a ɓeer i ban ma i gul gha. 2Ma lib wuusyid la Yahudawa yu, i bwal ban yi'il kun la Koǝl ɓi ɓoɓa raam, i nda ban raam la Yahudawa ma. Pyang ɓoɓa wu'i sheel ya. She a maas na, “Ɓomi kum ɓyal gǝrɓi ke? Ya la pa ɓyal sak mi ɓi ɓomi, ma yi gamban pak gǝr sheel ɓi! 3Ba yi na kafinta mi ɓara? Ba yi na ɓola Maryamu, ki ɓi ngyimi na ɓi Yakubu, la Yusufu, la Yahuda, la Siman ɓara? Ba ɓi ngyimi ɓa nggalap, la suna ya bǝni mi ɓara?” She ɓaas walya la yi. 4Yeso shappe na, “Muntum la Koǝl gha kum gul i la li, la ɓaal ɓoɓa li, la ban ma i gul gha ɓa.” 5I sun pak bǝlǝn gǝr sheel i bana ɓa, ɓoɓa yidkwanan ɓa bǝl la, la i mak ɓu'i ɓe i mud, she a kum ɓǝs. 6Yak kun mamiin ka ɓaal ya ɓa, she sheeli shangmi. La i ki ɓeer, i ban nǝk la ɓiɓo, ɗangɗang, i ki yi'il ya.
Yeso tum ɓoɓa ki bili lum ko rwap
7La i tu'ul ɓoɓa ki bili lum ko rwap ɓa, i tum ya rwap-rwap ɓe ɓeer, she i pa ngyap pe i mud ɓiɓin kwa'ar. 8Gǝrɓa i mak ɓe pak la mi: “Wun la ban ɓeer, gan ɗab na gǝrmaan ɗa, she njalang ma sa kwa'at lawun, gan ɗap na - burodi, ko lut, ko wurup i ɓaal gǝrma kud ɓun wun ɗa. 9Ama mak na koǝt ma nggur, gan makna mwala lu'ut i ɓaal nggayi ɓa. 10Lama wun la koom nga, nǝk na lama, she wun la shi'ǝm gari ma. 11Ban ma a sun yak wun ko a wak wun ɗa, kyat na rung ma mudzum kwa'at wun, ma wun la ban shik bana, ɓi kad te i mud.” 12La a ɓeer, a shapkun la Koǝl ɓiɓo, ɓe yak tubi. 13A purun ɓiɓin kwa'ar gywak, a bik mut i yid bǝlǝn ɓoɓa yidkwanan, la a pa ɓǝsse.
A kas myal ɓi Yohana ma pak baptisma
14Rangan Hiridus wak kun ɓi pyang i mud Yeso, lakunla lwak Yeso ya'am koyab ban. Ɓoɓaan shab na, “Yohana ma pak baptisma la a nga'aɗi ɓaal ɓawuun, gǝr ma mak ki yi gha la ngyap ma pak gǝr sheel i ɓaal yiɗi lama.” 15Ɓaan shap na, “Yi na Iliya.” Pyang la wa, ɓaan na, “Yi mayak taktum la Koǝl na, wa maan na i ɓaal ɓayak taktum la Koǝl ma mun-mun.” 16Ama ma Hiridus wak wami, she i shap na, “Yohana ma kas myal ɓi, la a nga'aɗi ɓaal ɓawuun!” 17Lakunla Hiridus la nggiɗi ma'am ɓe bwal Yohana, a kuɗi, a mak mi ɓaal nda ma gib ɓo. I pa'an wami lakunla Hirudiya, maam la ngimi Filibus ma i yak. 18Lakunla Yohana ki shaɓam ɓi Hirudus na, “Nzu sun yakti'i ɓi yak maam la ngimi ɓa.” 19She Hirudiya ki wad gǝrɓa Yohana ki shab ɓa i ɓaali, la i yadti wuli ɓi wu. Ama i sun gam ɓa, 20lakunla Hirudus ɓi ɓang wup Yohana yi ki swarami, i mud i daal ma na Yohana ɓoma nǝk li tǝk-tǝk na dum Koǝl, miik ka yiɗi ɓa kwad. Ma Hirudus la wa'am Yohana, she nga'at ɓaal li. Pyang la wa, yi ki yaɗan ɓi ta kiɗi, i wak ni.
21I libmaan, Hiridus ɓi pak nggwam lib ban ɓil li. I raam ma ɓoɓa jiinjiin ɓa yiɗi, la ɓa la kud nggin ɓa wal lo, la nggala ɓoɓa Galili . She Hirudiya kum njar wama yi pak gǝr ma yi yad. 22Ma mun la Hirudiya yu i ɓil nggwam, she i mak ɓi ɓaal ɓi Hiridus la ɓi ɓobit ɓali nwang. La rangan Hiridus ma shappi mun ma na, “Ɗwa'ara la gǝr ma wu yad pyang, mi panɗu.” 23I kan kuni na i ya'am ti'i na, “Komana wu yad mi paanɗu, ko kaana ban nwang rangan la, mi gǝɓǝn ɓaali rwap, she pa maɗik ɓu.” 24I pur kaa ban nggǝyi, i shappi na, “Mana mi maas i bǝni?” She nggǝyi shappi na, “Mud Yohana ma pak baptisma.” 25She i kangar ko ban rangan, i zatti na, “Mi yad mud Yohana ma pak baptisma tutumi i ɓaal gǝr.” 26Ɓaal rangan ma suk, ama lakunla kuni ma i kaan ma, la ɓi ɓobit ɓali ɓa, ki yi ɓiin gǝrma mun ma kam ɓa . 27Sun ganɗa, she i tum ɓoma ki wal ɓo ɓi wu, ɓi kaa yu na mud Yohana. Ɓoma ɓeer i kas myal ɓi Yohana, i nda ma gib ɓo, 28yi yu na mud Yohana a ɓaal gǝr, she i pa ɓi mun ma, la mun ma kaa ra yi ɓi nggiyi. 29Ma ɓoɓa ki bil Yohana wak gǝrma pak mi, she a yu ɓe yak yiɗi a limǝs i ɓaal mbwang.
Yeso pa gǝrliin ɓi ɓo, lumi lum, ti'i lum, njiri twangan
30Ɓi muntum ɓa la Yeso kad i njar ban gaan laya, she a shappi Yeso, gǝrma a pak, la ma a kam. 31Ama lakunla ɓiɓo ɓa bǝlǝn, ban ki yu, na ban ki kaa, Yeso na muntum ɓali sun kum njar ɓi ya li gǝrra. She Yeso shappiya na, “Su kaa ra ban ɓa ɓiɓo gha ɓa, ɓi su kumban wuus ka gap.” 32She a ko ɓaal kurlukbiin a kaa ban ma ɓo gha ɓa, ban ma ye nǝkka la mwa'anya. 33Ama ɓo gywak i ban ɗangɗang, ɓa sun ban bwa'al laya, daal ya, she a ɓang la kus ya a tuban ɗe na dum. 34Ma Yeso pur i ɓaal kurlukbiin ma, she i sun ɓoɓa bǝlǝn, na i sun shuur laya, lakunla ya wa nzur na, ɓoma yal ya ɓa. La i bwal ban kam ya la gǝr gywak. 35Ma kurup pak tuu, ɓoɓa ki bili yu bǝni a shappi na, “Bana swa mi ɓo gha ɓa, tangal ban ko kwad. 36Tum ɓoɓi ɓe bwa'al a ɓeer i kab ɓa gyang ban la ɓi ban nǝk ɓa mbasa'a ɓe kumban kur gǝrliin ɓe li.” 37La i kaɗan ɗe na, “Paana gǝrmaan ɓe li.” A shappi na, “Ma ɓi pa'an tǝk-tǝk na la wurup gaan la ɓo ma lyang kyasshiin! Su sa walan wa, i mud burodi ɓi su pa ɓe li?”
38I ɗwa'ar na, “Wun la burodi sha'a? Sa sun na.” Ma a sa sun, she a na, “Twangan-la nji rwap.” 39She Yeso shappi ɓoɓa ki bili, ɓe mak ɓoɓa ɓe nǝk ndii-ndii, i mud ɓǝsǝn ka'ar ɓa. 40La a nǝk ndii-ndii ɓa lumi lum la ɓa lumi twangan. 41Ban ɗab burodi twangan la nji rwap ɓa, she i sun takkoǝl, i kaak, la i ɓun burodi ɓa. She i paaɓi ɓoɓa ki bili ɓe shik i dum ɓiɓo. Wa la nji ɓa, i gǝb ya ɓi koyab ɓo. 42Pyang ɓoɓa li a jwak, 43la ɓoɓa ki bili ɓa pwan dǝ'ǝt ɓunun ɓi nji la burodi, she ma wal tu'ur lum ko rwap. 44Ɓiɓo lumi lum ti'i lum njiri twangan ɓa bid na, la li gǝrɓa.
Yeso sa la kwa'aɗi i mud yam
45Sun ganɗa takwad wa, Yeso mak ɓiɓo, ɓa ya bili, ko ɓaal kurlukbiin ɓe li dum a kaa Batasda, she yi shappi dǝ'ǝt ɓoɓa bana ɓe kaa. 46Ma yi shap she jim ɓe, she yi yab i yid taal, ɓi kam Koǝl. 47Ma kurup pak ki kurlukbiin ma ɓaal mudkid shiim, yi kwad i somna nzaal. 48I sun ɓoɓa ki bili ɓa, i ɓaal bung, lakunla yuut ɓi ki tudya takwad. I tak duru yi kaa ban ya i mud shiim na kushi. Yi yad ban ngaar ya, 49ama ma a suni ban kaa na kushi i mud shiim she a rangas na, “Ɓawuun na!” She a ngam na shiini, 50ma a suni she wup wal ya. Sun ganɗa takwad wa, she i shap kunɗiya na, “Jim na ɓaal wun! Mi na. Ɓi wup gan walwun ɗa.” 51She i ko ɓaal kurlukbiin ma, i kum ya, she yuut ma ɓwar. Gǝrma sheel ya shangmi, 52amud na a sun daal gǝr, i mud gǝr sheel, ma i pa burodi twangan ɓi ɓiɓo, lumi lum, ti'i lum, njiri twangan; kun ɓaal ya shiina.
53Ma a dal shiim ma, a su'ul i Janisarata a shik kurlukbiin laya gha. 54Ban pur laya i ɓaal kurlukbiin ma, she ɓiɓo daal Yeso. 55Koyab ban ɓa kab ɓa, ma a wak na yi gha, ɓiɓo ɓang ki yu na ɓoɓa yidkwanan, a mud kal#6.55 kal ko gǝr nwang, i koyab ban ma a wak na yi gha. 56Ban ɓa yi na kaa ma pyang- mwala ban, nggala ban ko gyang ban- a ki shik ɓoɓa yidkwanan i ban ma a kur gǝr. A kǝmi na ɓi shik ya ɓe dul gyang lu'utli, koyab ɓoma duluk kum ɓǝs.
Voafantina amin'izao fotoana izao:
Markus 6: JGK
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2023 Seed Company in collaboration with Language Developers and Bible Translators Association
