Lǔka 6
6
Kò gwè Yṳ̌daphû̌ a mṳni̤dǔ awi̤akè̌
(Matěo 12:1-8; Mǎ̤riko 2:23-28)
1Bǎ Yṳ̌daphû̌ mṳni̤dǔ ti̤ni̤ khanu, Ye̤shǔ ta akhophijaû̌ toǒ hǎhtò̌cû̌klè̌ dě cû̌nṳkǎbò̌ kò bǔkû̌lǎ hǔklakhû̌ toǒ. Dě akhophijaû̌ toǒ phwě lǒkho kò Bǔkû̌lǎ sǎplo̤ dě tihtǐbò ǎ lǒkho nû̌û. #Ta̤dǒhtû̌ǐ 23:25 2Dě Pharisè̌phû̌ toǒ gwè, “Cǒmara ta̤sû̌ta̤tòwò hî̌ ta Yṳ̌daphû̌ a mṳni̤dǔ htǒonu, ta̤ma̤ htě sî tobǎ ma̤yǎ tò̤nu toǒ, sî cû̌ma̤ lǒkho sîya hǐnu ma̤tè?”
3Ye̤shǔ hî̌shǔ asî, “Bǎ Dǎ̤wi̤ ta asû̌kho toǒ lòdǒǎlòdǒo akhanu, a ma̤kwè̌꤮ titè numî̌ sî dǒnǒ kû̌kò tò̤ ya? 4Asî cû̌nṳ lǒkho Cǒmara ahǐkû dě a phî̌ǎ Mû̌ htě kò lṳhtò̌ yǎta Cǒmaranu toǒ, Mû̌ htǒo numî̌ a ǎnṳ pwǎpǒ̤ pwa̤lṳhtò̌ta̤ toǒ pwǎ, pò̤̌ta Dǎ̤wi̤ ta akhophijaû̌ toǒ cû̌nṳphî̌ǎ mè̤tò̤ya?”#Ta̤subusaba 24:9; Shamuělè awǐlǒ tabǎ 21:1-6 5Dě Ye̤shǔ hî̌ bǎ po̤ asî, “Kòyòphû̌khû mî̌ he htǒo a mî̌ mṳni̤dǔ a Běcǎ tapwa̤hǒ.”
Ye̤shǔ ma̤bǎ kòyò cǔdesi tokho tapwa̤
(Matěo 12:9-14; Mǎ̤riko 3:1-6)
6Bǎ Yṳ̌daphû̌ a mṳni̤dǔ ahǔwa̤ ti̤ni̤lè̌nu, Ye̤shǔ cû̌nṳ dě ta̤sabahǐkû dě cû̌nṳ sû̌ǐtòwòǐ kò bǎnu. Bǎ ta̤sabahǐkûnu kòmakhû cǔgosi cǔdemû tokho ǒ tapwa̤. 7Pwa̤sû̌ǐ ta̤sû̌ta̤tòwò asara toǒ ta Pharisè̌phû̌ toǒ kè̌lǎ lǒkho ta̤wi̤ta̤kè̌ tacǎcǎ dě a glè pṳ̂ lǒkho Běcǎ Ye̤shǔ a ta̤sǔ. Hǐnu akhû̌akhî, asî ǒpo̤kè̌ lǒkho ta Yṳ̌daphû̌ a mṳni̤dǔ htǒonumî̌ a ma̤bǎ bǎ kòta̤sha pě ya, mî̌ tò̤ ya, hǐnu. 8Pwǎ̤tadě Ye̤shǔ sî̌ya asî ata̤gènè̤ toǒ akhû̌akhî, a hî̌ kòyò cǔgosi tokhonu tapwa̤, “Hè ihtǒ ǒ bǎ kò kǎmakûbǎo,” dě kòyònu tapwa̤ hè ihtǒ ǒ bǎnu.
9Hǐnuhtodě Ye̤shǔ hî̌ asî, “He gwèpo̤ sî yo̤sǎ tûmû, pa ta̤sû̌ta̤tòwò hî̌ pa ta bǎ Yṳ̌daphû̌ a mṳni̤dǔ akhanumî̌, pa tobǎ ma̤jè kòyò ya? Mè̤tò̤mî̌ pa tobǎ ma̤pò̤ma̤sha kòyò ya? Pa tobǎ ma̤lû̌htò̌ge kòyò tapwa̤pwa̤ ayola htûpwa̤ ya? Mè̤tò̤mî̌ pa tobǎ ma̤pî̌ma̤lṳ̂kè kòyò ya?”
10A kè̌ te̤we̤lṳ̂ htobò asî dě a hî̌ kòyò cǔgosi tokho htǒotapwa̤, “Yṳ̂htò̌ na cǔgonu,” dě a gûma̤kû̌ pwǐ Ye̤shǔ hî̌ nû̌nu, dě acǔgo wǒgebò sǒ. 11Pò̤̌ta pwa̤sû̌ǐ ta̤sû̌ta̤tòwò asara toǒ ta Pharisè̌phû̌ toǒ sò̌phlǒdû̌ jî̌ Běcǎ dě asî tobǎ ma̤ Ye̤shǔ hî̌tènu, asî cû̌ ǒhtuhî̌bǎplǒ kè̌khînû̌û.
Ye̤shǔ wû̌lǎ Pwa̤nophû̌ shǐsò̌gini̤
(Matěo 10:1-4; Mǎ̤riko 3:13-19)
12Bǎnuhtodě, Ye̤shǔ glè cû̌ kwisaba dě a cû̌htò̌ khololo̤. Dě a cû̌ kwisabahtò̌ Cǒmara bǎnu ta̤nǎ̤mṳshě. 13Bǎ lṳmṳlî akhanu, a kaǎhèplǒbò akhophijaû̌ toǒ a ǒ, dě a wû̌lǎ kòyò shǐsò̌gini̤ bǎ asî kla, dě asî shǐsò̌gini̤ htǒonu, a kaǎ nû̌ûmi̤ ta pwa̤nophû̌ toǒ. 14Shîmǒ̤nè̤ (htě Ye̤shǔ kaǎpo̤ nû̌ûmi̤ ta Petru) ta apṳ Adrěa, Jǎgomo̤ ta Jowǎ̤ni̤, Phǐlǐpo ta Batolomě̤o, 15Matěo ta To̤mǎ̤jo, Alphěo aphû̌khû Jǎgomo̤, ta Shîmǒ̤nè̤ (a mo̤ǐ ashiaga htě a ǒ dě Sè̌lò dě kò kaǎ nû̌ûta Sè̌lòphû̌.) 16Jǎgomo̤ aphû̌khû Yṳ̌da, ta Yṳ̌da Isakarǐo htě a htûhtò̌ pwa̤shaǎlò̤kè Ye̤shǔnu tapwa̤.
Ye̤shǔ a ta̤sû̌ǐtòwòǐ ta a ta̤ma̤bǎ
(Matěo 4:23-25)
17Ye̤shǔ ta akhophijaû̌ toǒ ǒ dě kholokhû̌ hǎte̤ gilò̤ ǒ lǒkho bǎ khodûkhû̌ tò̤glò. Akhophijaû̌ ahǔwa̤ tṳ̂prṳ̂taphǎ ta kòyò ǒ dě Yṳ̌daga tagabò toǒ ta dě Ye̤rǔshèlèwî̤kû ta Turǔwî̤phû̌ ta Sidowî̤phû̌ htě a ǒ dě shidû̌shite̤we̤htu toǒ hè ǒplṳ̂ǒphǎ wǐbò tû̌ bǎnu. 18Asî sò̌yṳ gana̤de lǒkho Ye̤shǔ a ta̤hî̌bǎ htohǒtò̤ a sò̌yṳ noma̤bǎ lǒkho Ye̤shǔ ta a ta̤shǐta̤sha dě a hè lǒkho pwǎ. Ye̤shǔ wṳ̂hǎhtò̌kè bǎ kòyò htě khînǎkhîno ma̤bǎ nû̌ûnu toǒ. 19Kòyò pṳ̂̌pwa̤ kè̌lǎ tè̌bǎbò nû̌û, ma̤tè̤hî̌dě ta̤po̤ta̤phǎ ǒ nû̌ûlo̤ hǎhtò̌ dě a ma̤bǎbò bǎ kò ta̤shǐta̤sha pṳ̂̌꤮ pwa̤ hǒ.
Ta̤sò̌le̤sò̌lò̤ ta ta̤sǎpla̤sǎyṳ
(Matěo 5:1-12)
20Ye̤shǔ kè̌wǒkè̌bǎ꤮ akhophijaû̌ toǒ dě a hî̌ asî,
“Sî htě a shuphǔshèwè htǒotoǒnu, Cǒmara howi̤ mè̤mè̤̌ sî hǒ, ma̤tè̤hî̌dě Cǒmara shila̤gakû numî̌ kòyò hǐnu toǒ ata hǒ.
21Sî htě a sǎǎsò̌o khònò̤ htǒotoǒnu, Cǒmara glè howi̤ mè̤mè̤̌ sî hǒ, ma̤tè̤hî̌dě Cǒmara ǐǎkǒobe sî pě!
Sî htě a hǎwo khònò̤ htǒotoǒnu, Cǒmara glè howi̤ mè̤mè̤̌ sî hǒ, ma̤tè̤hî̌dě sî sǎya̤bǎ pě!
22Sî yṳǎ kòyòphû̌khû mî̌ hehtǒo akhû̌akhî, kò sò̌khě sî, kò kaǎshǔ sî tò̤, kò pi̤jishǐcǒ sî dě kò hî̌ phû̌mò̤shî̌hto sî akhû̌akhî, sî glè nî̤bǎ mè̤mè̤̌ ta̤howi̤ hǒ.#Petru awǐlǒ tabǎ 4:14
23“Ma̤tè̤hî̌dě asî phiphu dě꤮ awǐ toǒnu, a ma̤jîma̤jûhtobò pwa̤po̤ toǒ hǐnu hǒ. Bǎ sî kè̌shǐ bǎ hǐnu pě akhanu, sò̌le̤sò̌lò̤ lǒkho nî̌꤮. Sò̌le̤sò̌lò̤ dě pe̤kalî̌ lǒkho nî̌꤮, ma̤tè̤hî̌dě sîyanu, Cǒmara bè̌nǎ bǎ sî ta̤ma̤khû̌kǎ dě mǒkhû̌nu adû̌ na̤cè̌ hǒ. #Ta̤khwè̌mǎnǎ ginǐ̤bǎ tabǎ 36:16; Pwa̤nophû̌ toǒ 7:52
24Pwǎ̤tadě sî htě a dû̌yò̤htò̌sa lǒkho htǒotuhtu toǒ sî, sî ǒhtûpwa̤bǎ lǒkho dě ta̤ aphiamo̤ akû akhû̌akhî, ta̤jîta̤jû hèbǎ na̤cè̌ sî pě.
25Sî htě a ǎkǒobe lǒkho khònò̤ toǒ sî꤮, ta̤jîta̤jû bǎ mè̤mè̤̌ sî pě, sî ǒti̤wi̤ gesǒlè̌ pě!
Sî htě a ya̤ khònò̤ toǒ sî, ta̤jîta̤jû hèbǎ mè̤mè̤̌ sî pě, ma̤tè̤hî̌dě khîkha glè hèto̤ ta sî nî̤bǎ ta̤sǎpla̤ dě guhǎguwo lè̌pě!
26Sî htě kòyò pṳ̂̌pwa̤ htû̌sò̌ǐ sî htǒotoǒnu, sî nî̤bǎ na̤cè̌ ta̤jîta̤jû pě, ma̤tè̤hî̌dě sîphisîphu dě꤮ wǐ toǒnu a htû̌sò̌ǐhtotû̌ pwa̤po̤lòhǎlòho toǒ hǐnu hǒ.
Mo̤ǐ kòyò htě a sò̌khě pa toǒ
(Matěo 5:38-48, 7:12)
27“Pwǎ̤ta sî dè sò̌yṳ gana̤de hî̌dě he sò̌yṳ pwe̤ǐnṳ bǎ sî ta̤toǒ, mo̤ǐ lǒkho kòyò htě a sò̌khě sînu toǒ#6:27 Amûasǎ sǒsǒta “Pwa̤sò̌khě” a hî̌nu hǒ dě ma̤wǒshǔ kòyò htě a sò̌khě sînu toǒ nî̌꤮. 28Howi̤ kòyò htě a ǐsho sînu toǒ, dě kwisaba bǎ kòyò htě a ma̤ phû̌mò̤shî̌hto sînu toǒ aya nî̌꤮. 29Kòyò tapwa̤pwa̤ dè pla̤ na nò̌shî̌ tokho dèhî̌dě ǐ pla̤po̤ yǎ htě a ǒkènu tokho nî̌꤮. Kòyò tapwa̤pwa̤ dè phî̌sigwi na hǐdokhlo dèhî̌dě, nophî̌cû̌nṳpo̤ yǎ ta nahǐdo akûnu tṳpṳ nî̌꤮. 30Ûpèpè̌ bǎbǎ a dè kwi nata̤ tacǎcǎ hî̌dě ǐpa̤ yǎ dě bǎ kòyò tapwa̤pwa̤ phî̌ nata̤ tacǎcǎ akhanu, kwi gesǒ pûma̤ yǎ ma̤ nî̌꤮. 31Ma̤ bǎ kò pwǐ sî sò̌yṳ noma̤ kò ta sîna̤nu nî̌꤮.#Matěo 7:12
32“Sî dè mo̤ǐ pwǎpǒ̤ kòyò htě amo̤ǐ sînu toǒ pwǎ dèhî̌dě kò htû̌sò̌ǐnǒ sî dǐpwǎ̤꤮ tò̤. Ta̤ma̤sǔphû̌ toǒ pwǎ dě amo̤ǐ geshǔ sǒsǒta kòyò htě a mo̤ǐ nû̌ûnu toǒ hǐnu hǒ. 33Dě sî dè ma̤wǒ pwǎpǒ̤ kòyò htě a ma̤wǒ sînu toǒ pwǎ dèhî̌dě kò htû̌sò̌ǐnǒ sî dǐpwǎ̤꤮ tò̤. Ta̤ma̤sǔphû̌ toǒ pwǎ dě a ma̤wǒ geshǔ sǒsǒta kòyò htě a ma̤wǒ asînu toǒ hǐnu hǒ. 34Dě sî dè ǐbǒ tû̌pwǎ sî ta̤kî̌ta̤kû̌ ta kòyò htě sî kè̌shuǐ ta sî glè nî̤bǎ gesǒ sî ta̤kî̌ta̤kû̌ dě a ǒnu toǒ pwǎ dèhî̌dě kò htû̌sò̌ǐnǒ sî dǐpwǎ̤꤮ tò̤. Ta̤ma̤sǔphû̌ toǒ pwǎ dě a ǐbǒ ata̤kî̌ta̤kû̌ ta ta̤ma̤sǔphû̌ htě asî kè̌shuǐ ta a glè ǐgebe bò̌sǒ nû̌û toǒ a ǒ, sǒsǒpwǎta hǐnu. 35Tobǎ ma̤ hǐnu tò̤! Mo̤ǐ sî khuwè̤nu toǒ dě ma̤wǒbǎ asînu. Ǐbǒ ta̤ dě kè̌shuǐ pûta nî̤bǎ gesǒ ta̤tacǎ꤮ ma̤. Sî dè ma̤hǐnu hî̌dě Cǒmara howi̤hî̌wǒ sî pě, sî dè ǐbǒ kò dě sî kè̌shuǐ ta nî̤bǎ gesǒ ta̤ dǐcǎ꤮ tò̤ hî̌numî̌ kò kè̌shǐ sî ta ahtò̌yî̤gutṳ̌ Cǒmara aphû̌mǔphû̌khû sîtoǒ pě, ma̤tè̤hî̌dě Cǒmara ma̤wǒshǔ kòyò htě a sî̌yashǔ kû̌ kòbwǐkòsîrî tò̤nu toǒ ta kòyò htě ajîphû̌mò̤ tû̌ayanu toǒ. 36Sî bǎ gwèbǎǐ kû̌kò pwǐ sîpha Cǒmara gwèbǎǐ kònu.
Ta̤hî̌bǐhî̌ǒ kò, gènè̤sǔbǐ gènè̤sǔǒ kò
(Matěo 7:1-5)
37“Hî̌bǐhî̌ǒ pûma̤ kò ma̤, gènè̤bǐaǒ pûma̤ kò ma̤. Sî dè hî̌bǐhî̌ǒ kò tò̤, gènè̤bǐaǒ kò tò̤ hî̌numî̌ Cǒmara ma̤ geshǔ sî ta ali̤ tò̤. Bè̌pûma̤ kò ta̤sǔ ma̤, dě Cǒmara bè̌nǒ sî ta̤sǔ tò̤. Bòlû̌ kòta̤sǔ nî̌, dě Cǒmara bòlû̌nǒ sî ta̤sǔ pě. 38Ǐpa̤ kòyò, dě Cǒmara ǐ pa̤lè̌ sî pě. Cǒmara to̤beco lò̤gulò̤wṳ̂shǔ sî pě, ma̤tè̤hî̌dě, Cǒmara to̤shǔ bǎ sî pwǐ sî to̤bǎ kònu pě.”
39Htodě Ye̤shǔ hî̌ bǎ asî ta yo̤sǎkhěkhǒ tûmû, dě a hî̌ asî, “Kòyò mi̤sǎkhǐ tapwa̤nu a sûcû̌jò bǎ kòyò mi̤sǎkhǐ ahǔwa̤tapwa̤ klè̌ tò̤. A dè sû hî̌dě asî lò̤te̤bò hǎkû sò̌gini̤ pě.#Matěo 15:14 40Khophijaû̌nu asî̌ajòkhlo ta asara dǐkhò̌꤮ tò̤. Pwǎ̤tadě, khophijaû̌ tapwa̤pwa̤ dě a sû̌ǐ phlǔhtobò asara ǒ tapwa̤nu a glè sî̌jò sǒsǒta asaranu pwǎ.#Matěo 10:24-25; Jowǎ̤ni̤ 13:16, 15:20
41“Amǔaphî ǒpwǎ dě sî pṳwè̤ pwa̤yṳǎphû̌ tapwa̤ a mi̤sǎphlǒkû pwǎ dě sî kè̌shǐ, pò̤̌ta sǒglo ǒ sî mi̤sǎphlǒkû dě, sî kè̌shǐ yǎtò̤ ma̤tè? 42Sî cû̌hî̌tǒ̤ sî pṳwè̤ ta, ‘Pṳwè̤ he tèkhwè̌htò̌kè bǎ na amǔaphî ǒ na mi̤sǎphlǒkûnu,’ sî hî̌ hǐnu pwǎ̤ta sǒglo ǒ sî mi̤sǎphlǒkû dě sî kè̌shǐ yǎ tò̤. Sî cû̌hî̌ kò hǐnu mî̌ anî̤ tò̤. Pwa̤ jîcǒjîtè̤ ana̤ sî꤮ phî̌htò̌wǐkè sǒglo ǒ dě sî mi̤sǎphlǒkûnu, dě sî kè̌shǐlṳwǒ dě sî tèkhwè̌htò̌jòkè amǔaphî ǒ dě sî pṳwè̤ a mi̤sǎphlǒkû htǒonu pě.
Sǒmṳ tṳmṳ ta asǎ
(Matěo 7:17-20, 12:34-35)
43“Sǒmṳwî̤ tṳmṳnu asǎhtò̌ sǒsǎ htě awî̤tò̤nu aǒtò̤. Hǐnudě sǒmṳwî̤tò̤ tṳmṳnu asǎhtò̌jò sǒsǎ awî̤ tò̤. 44Lǎlǎ꤮ na kè̌pwǎ asǎnǔ꤮ na sî̌yajòpwǎ amṳ. Kò cû̌běǎ dǐshisǎ dě ta̤shî̌shǒmṳ alo̤ dǐpwǎ̤꤮ tò̤. Hǐnudě kò cû̌běǎ sobîsǎ dě jojijopò̤lo̤ dǐpwǎ̤꤮ tò̤.#Matěo 12:33 45Kòyòwǒ tapwa̤nu a hî̌bǎhtò̌pwǎ ta̤wǒ ǒ nû̌û sò̌phlǒkûnu toǒ. Kòyòphû̌mò̤ tapwa̤nu, a hî̌bǎhtò̌pwǎ ta̤phû̌mò̤shî̌hto ǒ nû̌û sò̌phlǒkûnu toǒ. Kòyònu a sò̌phlǒkû ǒbetî̌pî̌ pwî̌tèdě akhû̌phě gû hî̌bǎhtò̌ kû̌pwǎ hǐnu.#Matěo 12:34
Pwa̤ma̤htò̌ hǐ sò̌gini̤
(Matěo 7:24-27)
46“Sî gana̤de heyo̤ dǐmû̌꤮ tò̤ dě sî cû̌ kaǎ he ta ‘Běcǎ꤮ Běcǎ,’ hǐnumî̌ ma̤tè? 47He glè yṳ̂lṳ bǎ sî ta kòyò lǒ̤꤮ bò htě a hè he ǒ dě a gana̤de hele̤heyo̤, dě a gana̤de gûma̤kû̌ toǒnu asǒsǒta titè hî̌numî̌, 48alò̤ta kòyò htě a ma̤htò̌ hǐ, a khǔlò̤yo̤ hǎkhû̌ dě a bǒ hǐkòkhǒ ta lo̤ htǒonu tapwa̤ hǒ. Shidû̌htò̌, shidû̌hè bǎ hǐhtǒo tama pwǎ̤tadě kò ma̤htò̌ měglowǒbò hǐ ta lo̤ akhû̌akhî, a guyṳpè̤ tò̤. 49Pò̤̌ta kòyò tapwa̤pwa̤ a gana̤de hele̤heyo̤ dě a gana̤de gûma̤kû̌ tò̤ tapwa̤nu, asǒsǒta kòyò htě a ma̤htò̌ ahǐ dě a bǒmě nû̌û kòkhǒ ta lo̤ tò̤ tapwa̤nu hǒ. Bǎ shidû̌htò̌, shidû̌hè hǐhtǒo tama akhanu, taplǎpa a lòte̤jakè dě a la̤gala̤prû̌bòkè pwǎ.”
Voafantina amin'izao fotoana izao:
Lǔka 6: KRC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Wycliffe USA
