Mateo 20
20
Diidza run lsaki'i kieke bënni tuune dxin lu layeel
1»Yëla rnabe' ki yewayuba rak ki ka rak kie' tue' bënni xaani tu layeel, bayën ziil brooje yajtiilje bënni wendxin naar luune dxin lu layeel kie'. 2Gulabë'xhbei'de ki ugiixhje leke ki tu dza dxin, ati psë'le'e leke tzajen'ke dxin lu layeel kie'. 3Kati gdëëd xhsiil yubl brooje, ati ble'i'de la'ke bënni tadaaze lu ye'i. 4Gudxe leke: “Lekz'ka' lbi'ili gultzajen dxin lu layeel kia', ati ugiixhja lbi'ili le zaki'i.” Ati leke yajake. 5Bënni xaani layeel'a yubl brooje lau'i dza'a, ati rdëëd xhwë yubl ka brooje len lekz'ka' psë'le'e bënni wendxin lu layeel kie'. 6Kati chi za'kz rbia gbiidz, yubl gyiije lu ye'i len budzëël'de ye la'ke bënni tadaaze, ati bnaab'de leke: “¿Bixhkia' gdu dza rdaaz'li ni len ti run'li dxin?” 7Leke gulubi'ke diidza: “Koma nutunu benn xhchin'tu.” Na' gudxe leke: “Lekz'ka' lbi'ili gultzajen dxin lu layeel kia'.”
8»Kati gul dza, bënni xaani layeel'a gudxe bënni'a nak'lu'ne'e dxin'a: “Bliidz'ke bënni wendxin'a ati be'ke laaxhj'ke, sulau'u len bënni'a zia'a gulayaaz'ze dxin, na' buudx'a gui'ku'ne laaxhj'ke bënni gulayaazie zia'al.” 9Na' guladxiine bënni'a gulayaazie kati chi za'kz rbia gbiidz len tu tu'ke gulazi'ke laaxhj'ke ki tu dza dxin. 10Buudx'a, kati gula laaz'ke bënni'a gulayaazie dxin zia'al, glaki'de ki ulazir'ke zxhëni; san tu tu'ke gulazi'ke laaxhj'ke ki tu dza dxin. 11Kati chi gulazi'ke laaxhj'ke'a, gulazulau'e tanéke kie' bënni xaani layeel'a, 12tanáke: “Bënni'a zia'a gulayaaz'ze, ye tuchi'iz gluune dxin, len tuuz ka gdiixhju netu, nak'te netu gdu dza ben'tu dxin lu gbiidz'tou.” 13San bënni xaani layeel'a gudxe tue' bënni wendxin'a: “Bë'cha'a, keg rsaka'dë'a li' ¿Naru ti grë'xhbei'ru ki kiixhja li' ki tu dza dxin? 14Na'a gxhi' laaxhju ati buaj. Xhki neda rna' kia' kiixhja'ne bënni'a beene dxin tuchi'iz tzka gdiixhja li', 15nak koma zua'lu'na'a guuna len xhdumia' le gna kia'. ¿U rdi'i'du koma naka bënni tzawi?”
16»Ka nak, bënni'a na'a nak'ke bënni zia'al ulak'ke bënni zelau, len bënni'a na'a nak'ke bënni zelau ulak'ke bënni zia'al.
Jesús rgixhjë'e bunn lzu ki yëla gut kie'
(Mr 10:32-34; Lc 18:31-34)
17Tzal Jesús yu'e nëëz ziije Jerusalén, bliidze kiizi chin'nu'ke bënni useed kie' len gudxe leke:
18—Ka rak'be'i'kz'li, na'a tziaj'ru Jerusalén, ga uludëëde Le' Xi'ine Bënni lu naa'ke bënni tunabe'i'de pxuuz len bënni useed xhba kie' Dios, bënni ni luchuug'be'e ki rala gatie' 19len ludëëde le' lu naa'ke bënni zitu naar lutitj'de le', ulagiine le' len uludëëd'de le', san kati gak tson dza ubaane lu yëla gut.
Jesús rubi'e diidza kieenu xhne'e Santiago len Juan
(Mr 10:35-45)
20Nguul kie' Zebedeo, dzaag'nu'ne bënni xi'in'nu gbiiga'nu ga ze' Jesús ati bzechu xhiib'nu lau'e naar gnaabi'nu'ne gak'leene'nu. 21Jesús bubi'e diidza:
—¿Bixh re'en'du?
Lenu guudx'nu'ne:
—Gnabe' ki lu yëla rnabe' kiu' bënni xi'ina ni labë'ke kuiti'le'u, tue' kë'e kuiti'le'u yubeel len ye tue' kë'e kuiti'le'u yëëgl.
22Jesús bubi'e diidza:
—Lbi'ili ti nëëzi'li bixha rnaab'li. ¿Naru uxikji'li tëëd'li yëla rzi'be' le rala tëëda neda?
Leke gulubi'ke diidza:
—Ja', uxikji'tu.
23Jesús gudxe leke:
Le nak'te, uxikji'li tëëd'li yëla rzi'be' ni, san lea kë'li kuiti'le'a yubeel len kuiti'le'a yëëgl ti zua lu na'a gunna, Dios chi nuune nu rala labë' na'.
24Kati bënni'a ye chi'ke'a gulayëën'de le ni, guladza'a'ke Santiago len Juan. 25Na' Jesús bliidze leke len gne':
—Lbi'ili chik'z nëëzi'li, ladj'ke bënni yëdz yubl, bënni tunabe'ke tusaka'zi'ke bënni laadz'ke ka tanaaz kieke, len bënni nakr'ke blou tunabe'i'de ye la' bunach ka te'enz'de. 26San lbi'ili ti rala këëz'li ka. San, xhki nuul'li lbi'ili re'eni'li gak'li bënni blou, rala gun'li dxin ki bë'chi' lza'a'li; 27ati bënni re'en'de gake bënni zia'al rala gake bënni wendxin nado'u'e kieeli. 28Koma Le' Xi'ine Bënni ti ze'e ki luune kie' dxin, ze'e gunne dxin len gdëëde yëla naban kie' naar usle' bunach zian.
Jesús ru'uune chope' bënni lau'chul
(Mr 10:46-52; Lc 18:35-43)
29Kati gularooje yëdz Jericó, zian'k bunach zjak'leene Jesús. 30Rë'ke kuiti nëëz chope' bënni lau'chul len kati gulayëën'de ki Jesús rdëëde na', guluskua'ke:
—¡Xan, Xi'ine David buechilaadxi'i netu!
31Bunach tadil'leene leke naar ti lakua'ke ruzbë', san leke guluskua're zidzj:
—¡Xan, Xi'ine David, buechilaadxi'i netu!
32Na' Jesús glëëze, bliidze bënni lau'chul'a len bnaab'de leke:
—¿Bixh re'eni'li guuna kieeli?
33Leke gulubi'ke diidza:
—Xan, re'eni'tu yule'i'tu.
34Jesús buechilaadxe'e leke len gdaane lau'ke. Na'teez bënni lau'chul'a gulule'i'de len zjak'leene Jesús.
Voafantina amin'izao fotoana izao:
Mateo 20: PZD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Biblica de México AC
