Kèʼlo 32
32
Jakov báʼtí ji wùn fər və Esav tárnín
1Jakov ku nèn a dù dzə́ə rə, e lòo dù, wùn à nsheèlav se Nyùy si tárnín. 2Jakov yén áwune, e njàʼàm jii, «Féne dzə̀ kiláʼáy ké vé rə́r Nyùy.» Wù nèn yòŋ kirə́ʼ kee shooy ji Mahanayim#32.2: Mahanayim: Nsàv yìr rən dzə̀ é Lǎm Hibru ji «viláʼáy vibaà.».
3Jakov tsə́nsí wír ámóʼó ji á du fó mbìy, e dù yèn á fə́r və Esav fo wù‑uù dzə́ aàgwan veé Seir e wòŋ Edom. 4Wù suúy ji á du, e tiìsí e wun woo Esav woo kitú kfə́ á ji Jakov woo wánlè və lìm tiísi a ji wun dzə̀ʼə̀m ne wùn Laban ntàmda, a wun sí kfə́n lèn a fo laʼ. 5Wun sí kér a nàʼ wùn à vimbèʼbìy ví, à njiì, à bvə́y si wùn à vé lìm vee vilum wùn à vee vikìyí. Wun tsə́nsi ntum rə̀n e kitú kfə́ kí á ji wù ku səə̀sí a wun.
6Vé ntum vìyi kfə́n é bàm, e bìnèr e Jakov jii, «Vèr dù ne, e yèn fər wò. Wù sí wiy, e yen wò, a wù wiy wùn à ŋgoo wìr ghii kweè.» 7Jakov yú bey, e nèn a fàn, shilív sə́ shí wáa buʼ. Wù nèn jàv njiì və wùn à bvə́y si, aànàʼa, aàkameri, à wír vəə́, ŋgoo sibaà. 8Wù‑uù jav bèy, a kwaʼtì rəə́ dzə̀ jii, «A Esav fə̀m laàr ŋgoo yee mòʼón, bo kibér ki waà kù goʼò.»
9Á bèy, Jakov nèn tòŋ e Nyùy jii, «Éè Nyùy atàr vém vee Abraham wùn Aysi. Nyùy Tàr, kù‑uù sùúy wò ji m kfə́n á e bàm e věr wòŋ fo wír vérí dzəə̀n, e kfə̀n kàʼ ji à yíi a geʼsín a e mò. 10Bó m yoʼ fə̀m ghèén e wìr wo dzə̀ à dìn koŋ yé ye wiyí shó mo à kù‑uù sí din e mò, lem ŋkàʼmé wo wò‑oò kàʼàn mo woo wánlè wò lìm sho. Mò‑oò tùm ndzə́v yee Jordan rə̀n, a m kér a dzə̀ mbàŋ yem cáʼcáʼ. Lèn wo m sí kfə́né, m sí kér wíri nyanyày, wùn à nyám si nyanyày, aá sì ŋgoo sibaà. 11M tóŋ e wò ji bòyìr mo fo fər wom Esav wo m fan ji a tàm é ghan símóʼ sí, é wù wiy, e laàr vèr à vikìy, à wóné. 12Wò‑oò lo kàʼ ji à yíi geʼsín e mò, e yiì, é rám yémé kuʼ, a dzə nyanyày moo síy seé ghaa *rìbà ndzə̀v se bó yòʼ dzə̀ á tàŋ.»
13Jakov ku nèn shìíy fo. Yì rán, wù dù e wun mvə̀m nyàm, e tàr símóʼ sí ji wun fó á e fər və Esav. 14Sí‑iì dzə̀ jii, bvəy se loŋ si ghii baà, kibév mbaà, njiì ghii baà, kiyáʼ mbaà, 15akamer vee vikìy mtaár wùn à wóné, anàʼ vee vikìy mkweè wùn à vee vilume e ghvə̀m, vimbèʼbìy vee vikìy mbaà wùn à vee vilum vi e ghvə̀m. 16Wù jàv e ŋgoo sí ŋgoo si, e fò e wón və́ lìme, e sùúy jii, «Vèn wáa dù sho fo mbìy, é la ŋgoo yìmòʼ yòʼ a koorí wuú yìmòʼ.» 17Wù suúy e wan və lìm wo wù‑uù du fo mbìy jii, «Vèn fər wom Esav tárninè, wù dzə́r jii, ‹Tàr won lìm dzə̀ la? À du fèé? Nyám sìn si dzə̀ sé la?› 18À nèn bìnèr sho jii, ‹Kér wánlè wò lìm woo Jakov. Dzə̀ fómo wo wù foon e wò woo kitú kfə́, a wù jumrì fo bàm.› » 19Jakov ku rùvtí a dzə̀ kíwun e ŋgaà wo wù‑uù wiy fo bàm, à ŋgaà wo wù‑uù wiy fo woo shooy bàm ji á ku sùúy a dzə̀ á kíwun kee kinyo e Esav e ghan se wùn áwune tarnin. 20Lá á yòʼ làysìn fó suúy ji wánlè və lìm woo Jakov wiy a fo bàm. Jakov‑iì tsə́nsi afómo vin fo mbìy, rəm jii, wun yún kitú kfə́ shó fo Esav, shilív sə́ shí rəsìnè, é bo wùn wun tárnín, tàm e ghan símóʼ sí, é wù səə́sí á wun. 21Afómó Jakov vìyi ku nèn a dù fo mbìy, wúnwun siíy kfə́, e kfə̀n shìíy e kilaʼáy fóo fèy.
Jakov fúnén wùn Nyùy
22Kù vitsə́ʼ vee shooy, Jakov túmnín, e lì vikìy və́ vee abaà, e lì ve lemèné vee abaà, à wón və́ vee vilum vee nshòv mòʼón e ghvə̀me, wùn áwune líysín tuúmé ndzəv yee Jabbok. 23Wù‑uù tòmbìy lì kfə́ə rə, e tùmér, e bóo tumér káv və́ e dzə̀m. 24Wù siíy, e gòʼ fo bàm, wìr wùmòʼ wìy, wùn wun fùnèn, ndzə káʼ. 25Mo wìr və̀y yenen ji bó yòʼ dzə̀ wun tàm á wùn Jakov, wù nèn tsə̀y Jakov fo nsəʼ kiyèŋ, kiyéŋ kí shóʼóm. 26Wù nèn sùúy jii, «Màʼtì mo, é m wáa dù, ndzə sí ráné.»
Jakov bìnèr sho jii, «Bó yòʼ dzə̀ m màʼtì wò, à wàa dù, a bó à səə́ví mo.»
27Wìr və̀y dzə́r shó jii, «Yír yée dzə̀ ji la?»
Wù bìnèr ji «Jakov.»
28Wù suúy shó jii, «Yír yée yòʼ kfə̀n dzəə́ yiì a dzə ji Jakov. Á yíi a yòŋ wò lèn ji Isray#32.28: Isray: E Lǎm Hibru, yír rə́ne koó fo kisuŋnìn moo kinyo kee jii, «Wù funèn wùn Nyùy.», bìʼ fo à fùnèn Nyùy, e kfə̀n fùnèn wíri, e kù sò.»
29Jakov nèn lòn jii, «Kii wò, ku sùúy e mò, yír yée dzə̀ ji la?»
Wù bìnèr jii, «À dzə́r yír yém bìʼ ka?» Wù nèn kù səə̀vì Jakov fo.
30Jakov nèn shù yír kirə̀ʼ kee shooy ji Peniel#32.30: Peniel: E Lǎm Hibru, yír rə́ne koó fo kisuŋnìn moo jí yee «sí Nyùy.», shu bèy, suuy jii, «Dzə̀ fen fo m yenen sí Nyùy, wù máʼtí dzəʼə̀m yém.» 31Wù wáa lò fo Penuel, a sì é kintoshùy, a dù, a teèsì bìʼ kiyéŋ kfə́ ke kí‑iì shoʼomen. 32Á kinyo ke kí yiìn, la rám wìr veé Israyi yòʼ a kfər jav nyàm ye yì kum nsəʼ kiyèŋ, e to lán, bìʼ fo dzəə̀n kirə́ʼ ke Nyùy‑iì tsəyin Jakov fo fo.
Voafantina amin'izao fotoana izao:
Kèʼlo 32: LNB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022 CABTAL