Kèʼlo 11
11
Kirùmèn ke bomén kí keé Babel
1Yì‑iì dzə̀ é ghan símóʼ sí fó mbìy, a wír veé kitu ke nsay adzə̀me‑eè kér lám e mòʼón, súŋnin dzə́ə e mòʼón. 2Mo vé‑eè ghán ghanén é mbìv wòŋ yee fo shùy yii tó, á nèn dù, e bvə̀ysín e mboʼ yìmòʼ é nsay Shinar,#11.2: nsay Shinar: Á yoŋ woŋ və̀n sa ji woŋ Babilon. e nèn dzə̀ʼə̀m fo. 3Á nèn wìy lò, e sùŋnín jii, «Vèn wiy, é vèsən tsə́m nsay, e tòn, é yì táv kijuŋ.» Á nèn a ker nsay ye vé‑eè tònèn rə̀y e kiliŋ ke tiy. Aá kfə̀n kér sa kunta woo túŋ fó nsay e kiliŋ ke kishàʼàr. 4Áwune nèn kfə̀n sùúy jii, «Vèsən báʼtí, e bòm ŋkàlaʼ yèsən wùn à kirùmèn ki, é kí dar, e kòʼ, e mèé e ntoò yùv, é wíri fiʼ kìíy vèsən ji antav. Vèsən yii bèy, é la vèsən yòʼ dzəə tàʼrí e kitu ke nsay.»
5 Nyùy Tàr nèn wìy lò, e sə̀ʼə́y fo yuv ji wun yén á ŋkàlaʼ wùn à kirùmèn ke wíri bómé e sí rəə́. 6Wù yén, e sùúy jii, «Kee ben á ka! Wír vìne dzə̀ amòʼón, aá súŋnin lám e mòʼón. Kin ki kù dzə̀ə́ keʼ fo kinyò ke áwune taʼ, e wìy mùm. A bó kinyo kímóʼ kí yòʼ dzəə́ wìy ghaʼ áwune ke á wayin ji á ku yiì. 7Vèsən sə́y fó, e tòvsìn lám wóv, é la wìr wùmòʼ yòʼ a yu kinyo ke wùmòʼ suuyì.» 8Á bèy, Nyùy Tàr nèn tàʼár áwune kitú ke nsay kidzə̀m, kibaʼrì ke ŋkàlaʼ rə̀y ki tiím. 9Á kinyo ke kí‑iì yiìn, bo á wáa yòŋ yír ŋkàlaʼ yee shooy ji Babel#11.9: Babel: E Lǎm Hibru, yír rə́ne koó fo kisuŋnìn moo jí yee «tovsìn.», bìʼ fo dzəə̀n fó, fo Nyùy‑iì tòvsìn lám wìr dzə̀m, e nèn tàʼár áwune kitú ke nsay kidzə̀m.
Rám Shem
(1 Wòŋ 1.24‑27)
10Rám Sheme rə̀ne. Shem‑eè mèé kiyá wií, e nèn dzə̀ə́ Arpakshad, a sì viyá vibaà mo ndzə́ví‑iì màyìn fó kitu ke nsay. 11Mo wù dzəən Arpakshad bèy, e kfə̀n dzə̀ʼə̀m viyá vímóʼ ví ghii tàn, e dzə̀ə́ wón ámóʼó vee vilum wùn à vee vikìyí.
12Arpakshad dzə̀ʼə̀m kiyá nshòv sitàn e mtaár, e dzə̀ə́ Shela, 13e kfə̀n dzə̀ʼə̀m viyá vímóʼ ví nshòv sitaár e ghiì kweè (403), e dzə̀ə́ wón ámóʼó, vee vilum wùn à vee vikìyí.
14Shela dzə̀ʼə̀m kiyá mtaár, e dzə̀ə́ Eber, 15e kfə̀n dzə̀ʼə̀m viyá vímóʼ ví nshòv sitaár e ghiì kweè (403), e dzə̀ə́ wón ámóʼó vee vilum wùn à vee vikìyí.
16Eber dzə̀ʼə̀m kiyá nshòv sikweè e mtaár, e dzə̀ə́ Peleg, 17e kfə̀n dzə̀ʼə̀m viyá vímóʼ ví kishóv mtaár e ghiì kweè (430), e dzə̀ə́ wón ámóʼó vee vilum wùn à vee vikìyí.
18Peleg dzə̀ʼə̀m kiyá mtaár, e dzə̀ə́ Reʼu, 19e kfə̀n dzə̀ʼə̀m viyá vímóʼ ví nshòv bvə̀ʼə̀ e ghiì baà (209), e dzə̀ə́ wón ámóʼó vee vilum wùn à vee vikìyí.
20Reʼu dzə̀ʼə̀m kiyá nshòv sibaà e mtaár, e dzə̀ə́ Serug, 21e kfə̀n dzə̀ʼə̀m viyá vímóʼ ví nshòv saàmbà e ghiì baà (207), e dzə̀ə́ wón ámóʼó vee vilum wùn à vee vikìyí.
22Serug dzə̀ʼə̀m kiyá mtaár, e dzə̀ə́ Nahor, 23e kfə̀n dzə̀ʼə̀m viyá vímóʼ ví ghii baà (200), e dzə̀ə́ wón ámóʼó vee vilum wùn à vee vikìyí.
24Nahor dzə̀ʼə̀m kiyá nshòv bvə̀ʼə̀ e mbaà, e dzə̀ə́ Tera, 25e kfə̀n dzə̀ʼə̀m viyá vímóʼ ví nshòv bvə̀ʼə̀ e ghvə̀m e wiì (119), e dzə̀ə́ wón ámóʼó vee vilum wùn à vee vikìyí.
26Tera dzə̀ʼə̀m kiyá msaàmbà, e dzə̀ə́ Abram wùn à Nahor, à Haran.
Rám Tera
27Rám Teràa nén a dzə jii, Tera‑aà dzə̀ tàr à Abram wùn à Nahor, à Haran. Haran‑eè dzə̀ tàr à Lot, 28e nèn lò, e kpù é Ur fo vé‑eè dzəən wun, e wòŋ Kaldea, a tàr wov dzə̀ə́ sho. 29Abram koóy wiíy, a yírí dzə̀ Saray. Nahor nèn kòóy sa və́ə, a yírí dzə̀ ji Milka. Milka və̀n‑eè dzə̀ wan Haran, a fər Milka dzə̀ Iska. 30Saray‑iì dzə̀ kár, a bó wù yòʼ‑oò ló a ker wán.
31Tera nèn lò, e lì Abram woo wán və, à Lot woo wan Haran, à Saray woo wiíy wan və Abram, wùn áwune lò fo Ur, e wòŋ Kaldea foo fèy, a dù e wòŋ Kanan. Á meé é Haran, e nèn gòʼ fo. 32Tera nèn wìy kpù fó. Viyá ve Tera vidzə̀m vi‑iì dzə̀ nshòv sitàn e ghiì baà (205).
Voafantina amin'izao fotoana izao:
Kèʼlo 11: LNB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022 CABTAL