यूहन्ना 5
5
बेथसेदा छोगी सुहरला ङ्याहल्दी तेहक्योगी नेहपा टा़हक्यो
1ओहले ङ्यिहमा तोबा तिङले यहूदीया़की छ्येपा च्यी़ लेप्ते येहकें ओहले येशू यरूशलेमला फेप नाङसीन। 2यरूशलेम क्याहसा नाहङला स्य़ूहगेन्गी “ल़ूहगी कोह” माएँ कोह च्यी़ येहबा, ओहले ओ़ह कोह पोहला तेहरी ङा थल येहकेन्गी छो च्यी़ येहबा, ओ़ह छोला हिब्रू तामला बेथसेदा म़ेदी माएँ। 3ओहले ओ़ह तेहरीला मी़ मेहथोङगेनया़, काङबा कुच्याया़ ओहले काङबा लाहक्पा स्योरक्योगी नेहपाया़ माहङबुराङ तेहक्यो ओहङगो येहकें। [खुङ नाहम छोगी छ्यु युहङवा म़ेदी कू़हदे तेहको येहकें। 4च्यिबे मासीमाना, नाहम-नाहम चो़वोगी स्याहप्च्यी च्यी़ माहर फेप्ती कोल्मुगी छ्यु युङ नाङगो येहकें। ओहले छ्यु युहङ फान्ज्यो तोहङस्यो छ्यु नाहङला स्य़ूहगेन नेहपादी काहन्डुमु नाहजा क्याहप्क्यो येहॱनाङ टा़हउ येहकें।]#५:४ माहङबुराङ ग्रीक तामगी बाइबलला दि आङ-टा़हङ म़ेह।
5ओहले ओ़ह छो सुहरला ने़हदी लोह सो-क्ये़ह काहल्ग्योगी नेहपा च्यी़ येहकें। 6येशूगी खोला ओ़ह छ्या़ला थू़दी तेहक्यो ज़ी़ नाङसीन। खो लोह माहङबु यिहन्ज्यु नाहक्यो थु ङ्ये़दी येशूगी खोला सुङ नाङसीन, “च्यि ख्येला टा़हज्ये सेम्बा येहबा?”
7ओ़ह नेहपागी स्युहसीन, “लाहसो लाह, छ्यु युहङगेमु ङाहला छ्यु नाहङला क्याल तेर्केन ङाहती मिह सुज्यीॱआङ म़ेह। ओहले ङाहराङ डोज्ये छोल्गेमुनी लेहमेन मिह तोहङले काहल सिहन्ग्यो ओहङगे।”
8येशूगी खोला सुङ नाङसीन, “लोहङ, ओहले राहङगी तेङगो ती़हदी खुर्ती सोङ।” 9ओ़हजेलाराङ ओ़ह मिह टा़हसीन ओहले राहङगी तेङगो खुर्ते काहल्सीन। (यिहॱनाङ ओ़ह ङ्यिहमादी थाङ सोएँ ङ्यिहमा#५:९ थाङ सोएँ ङ्यिहमा : हिब्रू तामलादी “शबाथ-ङ्यिहमा” म़ेदी माएँ। ओ़ह ङ्यिहमुदी च्यिॱआङ ल़ेह पेहच्ये मेहयोहङगे। दिगी तेहन्दाला माहङबुराङ ङोहस्यी ताङज्येला ताम साम्बागी कार्छ्याया़ला ज़ी़-नाङदोङ। यिहम्बा यिहन्गे।)
10ओ़ह सोङबे यहूदी गोबाया़गी ओ़ह टा़हक्यो मिहला मासीन, “तिहरीङनी थाङ सोएँगी ङ्यिहमा यिहम्बा, ख्येगी तेङगो खुर मिहङ्युहङगे।”#नहे १३:१९; यर १७:२१
11खोगी खुङया़ला मासीन#नहे १३:१९; यर १७:२१, “का़हन्दीगी ङाहला टा़ह च्य़ू नाङबा मिहरोगीॱराङ ङाहला ‘तेङगो खुर्ते सोङ’ म़ेदी सुङ नाङग्यो यिहन।”
12खुङया़गी खोला टी़हसीन, “ख्येला तेङगो खुर्ते सोङ माएँ मिह सु यिहम्बा?”
13यिहॱनाङ राहङला टा़ह च्य़ू नाङगेन मिह सु यिहम्बा म़ेदी खोला क्यी़ह म़ेहबा येहकें च्यिबेमाना ओ़ह ग्या़ला मिह मिह-माहङ माहङबु येहकें सोङबे येशू ओहलेगी फेप सिहन्दी येहकें। 14याहम्बी तिङले येशूगी खोला छ्योखाङला थू़दी सुङ नाङसीन, “त़ेदोङ, ता़ह ख्ये टा़ह सिहन्दी येह। येहपाराङ तिहक्पा माहबे, मिहन्सीमाना ख्येला तोहङले म़ेदीॱआङ चोक्पा ओहङज्ये येह।”
15राहङला टा़ह च्य़ू नाङगेन मिहनी येशूॱराङ गा यिहम्बा दुबा म़ेदी खोगी काहल्दी यहूदीया़ला स्य़े तेर्सीन। 16ओ़ह सोङबे यहूदीया़गी येशूला तुहक्पु तेर्च्ये छ़ूसीन, च्यिबेमाना येशूगी दि छ्या़ले थाङ सोएँ ङ्यिहमाला जे नाङग्यो येहकें। 17ओहले येशूगी खुङया़ला सुङ नाङसीन, “ङाहगी याहपगी ताहन्दा थु छ्या़ले जे नाङगेराङ येह, ओहले ङाहॱआङ ल़ेह पेहकेनॱराङ येह।”
18ओ़ह सोङबे यहूदीया़गी येशूला सेच्ये म़ेदी माहङबुराङ स्युक पेहसीन, च्यिबेमाना मिहरोगी थाङ सोएँ ङ्यिहमागी ठिम च्यी़राङ माहगोम, यिहॱनाङ येशूगी किन्ज्योला याहप सुङदी राहङला किन्ज्यो ङ्याम्बा ज़ो नाङग्यो येहकें।
किन्ज्योगी स़ेबुगी ओङ
19येशूगी खुङया़ला सुङ नाङसीन, “तेहम्बाराङ ङाह ख्याया़ला माएँ, स़ेबु राहङगीनी च्यिॱआङ पेह मी़हखुएँ, यिहॱनाङ याहपगी च्यि जे नाङग्यो थोङगे ओ़ह च्यी़राङ पेहकें, च्यिबेमाना याहपगी च्यि जे नाङगे, स़ेबुगीॱआङ ओहराङ पेहकें। 20च्यिबेमाना याहपगी स़ेबुला चेवा जे नाङगे ओहले मिहरो राहङगी जेती ज़्य़ू नाङग्योकी छ्या़लेया़ थाम्ज्यीराङ स़ेबुला तेन नाङगे। दि म़ेदीॱआङ छ्यिम्बु छ्या़ले मिहरोगी स़ेबुला तेन नाङज्ये येह, ओहले ख्याया़ ह्अ ल़ेहज्ये येह। 21च्यिबेमाना काह-ठि जेती याहपगी स्यिक्योया़ला सोम्बो लो़ह च्य़ू नाङगे ओहले खुङया़ला मिहली नाङगे, ओ़हठीॱराङ पेहती स़ेबुगीॱआङ का़हन्दीला थु ङ्ये़गे ओ़हदीला मिहली नाङगे। 22-23च्यिबेमाना याहपगी सुॱलाङ ठिम ताङ मेहनाङ। खुङया़गी याहपला ची़नाङ पेहक्यो ल़ेहमु थाम्ज्यीगी स़ेबुला ची़नाङ पेहच्यु म़ेदी ठिम ताङगेन्गी छ्या़ले थाम्ज्यीराङ स़ेबुला नाङदी येहबा। स़ेबुला ची़नाङ मेहबेकेन्दीगी खोला ताङ नाङगेन याहपॱलाङ ची़नाङ मेहबेकें।”
24 “तेहम्बाराङ, ङाह ख्याया़ला माएँ, सुगी ङाहती ताम ङ्यिहन्गे ओहले ङाहला ताङ नाङगेन्दीला यिह-छ्य़े पेहकें, खो ङ्याम्बु नाहमॱआङ मिहस्यीएँगी मिहली ज़ाङबु ओहङगे। खोला ठिम ताङज्ये म़ेह, यिहॱनाङ खो स्यिवालेगी मिहलीला स्य़ूह सिहन्दी येह। 25तेहम्बाराङ ङाह ख्याला माएँ, ओ़ह ती़हजी ओहङगेॱराङ येह, ओहले ओ़ह ती़हजीदी ताहन्दाॱराङ यिहन, दि ती़हजीला स्यिक्यो मिहया़गी किन्ज्योकी स़ेबुगी सुङ-क़े थे़ज्ये येह ओहले ङ्यिहन्गेया़ थार्च्ये येह। 26च्यिबेमाना याहप राहङ ङ्याम्बुराङ मिहली येहबा ओहले मिहरोगी राहङगी स़ेबुॱलाङ मिहली तेर्केन्गी ओङ नाङदी येहबा। 27ओहले खोला ठिम आप्ता च्येकेन्गी ओङ नाङदी येहबा, च्यिबेमाना खो मिहगी स़ेबु यिहम्बा। 28दि तामला ख्या ह्अ मा़हलेह, च्यिबेमाना ती़हजी ओहङगेॱराङ येह, ओहजेला तुहर्साला येहकें थाम्ज्यीगी मिहकी स़ेबुगी क़े थे़ज्ये येह, 29ओहले ल़ेह या़हबु पेहकेनया़ तुहर्साले सोम्बो लो़हदी ओहङज्ये येह ओहले ल़ेह चोक्पा पेहकेनया़दी ङ्य़ेहबा खुर्च्येकी तेहन्दाला तुहर्साले सोम्बो लो़हदी ओहङज्ये येह।”#दान १२:२
30 “ङाह राहङगीनी च्यिॱआङ पेह मी़हखु, काह-ठि ङाहगी थे़गे, ओ़हठीॱराङ ङाह ठिम ताङगे, ओहले ङाहगी ताङग्यो ठिम ठाबे सी़हजे येह, च्यिबेमाना ङाह राहङगी सेमला ने़क्यो ल़ेहमु मिहम्बा, यिहॱनाङ ङाहला ताङ नाङगेन याहपकी थुला ठुङग्यो ल़ेहमुराङ ल़ेह पेहकें।”
31 “का़हलेॱआङ ङाहगी राहङगी तेहन्दाला पाङबु तेर्सीमाना ङाहती पाङबु तेहन्दाम मेहयोहङगे। 32ङाहती तेहन्दाला पाङबु नाङगेन्दी लेहमेनॱराङ ज़्य़ू नाङदी येह, ओहले ङाहला क्यी़ह येहबा, ङाहगी तेहन्दाला मिहरोगी च्यि पाङबु नाङगे, ओ़ह ठाबे सी़हगे।”
33 “ख्याया़गी यूहन्नासाला ताम टी़हज्येला ताङसीन, ओहले खोगी तेहन्दामकी पाङबु तेर्सीन। #
यूह १:१९-२७; ३:२७-३० 34यिहॱनाङ ङाहगी तेहन्दाला पाङबु तेर्च्येला ङाह ङ्याम्बु सु मिह च्यी़ॱआङ तेह कोहबा म़ेह, यिहॱनाङ ख्याया़ थार ख़ूज्यु म़ेदी गा ङाहगी दि तामया़ माक्यो यिहम्बा। 35यूहन्नानी ती़हदी तेहकेन लो दाङ क्या-साङे येहसेर ल़ेहमु येहकें, ओहले ख्या खोगी क्या-साङेला याहम्बीज्यीगी तेहन्दाला च्यी़राङ सेम काहसो पेहच्येला ङ्यिहन्सीन।”
36 “यिहॱनाङ यूहन्नागी तेरक्यो पाङबु म़ेदीॱआङ छ्यिम्बु पाङबु ङाह ङ्याम्बु येह। च्यिबेमाना का़हन्दी ल़ेहया़ छाङबु पेहच्येला याहपगी ङाहला ताङ नाङग्यो यिहम्बा, ओ़ह ल़ेहया़ ङाहगी पेहकेनॱराङ येह, ओ़ह सोङबे ङाहला याहपगी ताङ नाङग्यो यिहन म़ेदी ओ़ह ल़ेहया़गीॱराङ ङाहगी तेहन्दाला पाङबु तेर्के। 37ङाहला ताङ नाङगेन याहप राहङगीराङ ङाहगी तेहन्दाला पाङबु नाङदी येह। मिहरोगी सुङ-क़े ख्याया़गी नाहमॱआङ थे़दे म़ेह, ओहले मिहरोगी कुसोला नाहमॱआङ थोङदी म़ेह।#मत्ती ३:१७; मर्क १:११; लूक ३:२२ 38याहपगी ताङ नाङग्यो मिहला ख्याया़गी यिह मा़हछ्येबा सोङबे मिहरोकी सुङ ख्या ङ्याम्बु ज़्य़ू मेहनाङगे। 39ख्यागी सुङरापला था़ म़ेहबा मिहली ज़ाङबु ज्योर्के म़ेदी सुङराप लोङदीनी ताएँ। ङाहगी तेहन्दाला पाङबु तेर्केन्दी ओ़ह सुङरापॱराङ यिहन। 40यिहॱनाङ था़ म़ेहबा मिहली साम्बा ज्योर्च्येला ख्याया़ ङाहसाला ओहङज्येला मा-लोक पेहकें।”
41 “ङाहला मिहया़गी ची़नाङ पेहच्यु माएँ ङाहती सेम्बा म़ेह। 42यिहॱनाङ ख्याया़गी सेमला किन्ज्योगी चेवा मेह माएँ ताम ङाहगी ङोह स्य़े सिहन्दे येह। 43ङाह राहङगी याहपकी छेनला ओहङदी येह, यिहॱनाङ ख्याया़गी ङाहला मा-लोक पेहसीन। ओहले लेहमेन सुज्यी राहङदीराङ मिहनला ओहङसीमाना खोला ख्यागी लोक पेहच्ये येह। 44ओहले ख्या राहङ नाहङदोङराङ च्यी़गी च्यी़ ङ्याम्बु ची़नाङ छोल्गु दु यिहॱनाङ च्यिमे च्यी़राङ ज़्य़ू नाङगेन किन्ज्यो लाहमले ओहङगेन्गी ची़नाङला मेहछोल्सीमाना ख्यागी काह-ठि पेहती यिह-छ्य़े ख़ूज्ये ले? 45ङाहगी ख्याया़ला याहपकी दिनला फातुर च़ूगे म़ेदी ख्याया़गी सेमला मा़हने। ख्याया़गी रेहवा पेहक्योगी मोशागीराङ ख्याया़ला फातुर च़ूज्ये येह। 46ख्याया़गी तेहम्बाराङ मोशाला यिह छ्य़ेक्यो येहसीमानानी ङाहॱलाङ ख्याया़गी यिह छ्य़ेज्ये येहकें, च्यिबेमाना मोशागी ङाहगी तेहन्दाला प्री़हदे येहकें। 47यिहॱनाङ ख्याया़गी मोशागी प्रुहक्योगी तामया़ यिह मे़हछ्य़ेसीनमाना, ङाहती ताम ख्यागी काह-ठि पेहती यिह-छ्य़े ख़ूज्ये ले?”
Voafantina amin'izao fotoana izao:
यूहन्ना 5: HYLM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 (Active), Wycliffe Bible Translators, Inc. All rights reserved.
