लूका 10

सत्तरथो चेलनहे पठागिलक

1यकरपाछे प्रभु येशू औरे सत्तरथो चेलनहे नियुक्त करलाँ। और जोन नगर और गाउँमे जैना योजना ऊ बनाइल रहिँत, वहाँ अपनसे आघे ओइन्हे दुई-दुई जहनहे पठैलाँ। 2येशू ओइन्हे कलाँ, “जसिके खेट्वामे बहुत्ते अनाज रहत, ओस्तेके असिन बहुत्ते मनै बताँ, जेने परमेश्वरकेमे विश्वास करक लग तयार बताँ। पर परमेश्वरके राजके बारेम बतुइया मनै बहुत कम बताँ। तबेकमारे फसलके प्रभुहे प्राथना करो, ताकि ऊ आकुर चेलनहे पठादिँत, और मनैनहे मोरिक थेन आइक लग सहयोग करिँत्। 3जाऊ, हेरो, मै तुहुरिन्हे बवाँसनके बिच्चेम भेँरीनके पठ्वन हस पठैम। 4ना पैँसक ठैली, ना झोला, ना जुत्ता बोक्हो, ना डगरमे किहुहे अभिवादन करहो। 5जोन घरेम पैँठ्बो सुरुमे कहहो, ‘यी घरहे शान्ति होए!’ 6यदि वहाँ पहुननहे सत्कार करुइया मनैया रही कलेसे तुहुरिन्के शान्ति ओकर संग रहिहिस। पर ओसिन नै रही कलेसे उ शान्ति तुहुरिन्के थेन घुमके आजाई। 7ओइन्के देहल चिज खा पिके वहे घरेम बैठ्हो। काकरेकी मजदूर अपन कमाही पैना योग्यक रहत। घर-घर पैँठ्के ना नेंग्हो। 8जब तुहुरे कौनो नगरमे जैबो ते यदि वहाँक मनै तुहुरिन्हे खुशीसे स्वागत करहीँ, और तुहुरिन्के आघे खाइक लग ज्या फेन खौँकके धारदिहीँ कलेसे उ खाना तुहुरे खालेहो। 9वहाँ रलक रोगीनहे मजा करहो, और ओइन्हे कहहो, ‘परमेश्वरके राज लग्गेहेँ आगिल बा।’ 10पर जब तुहुरे कौनो नगरमे पैँठ्बो, और ओइने तुहुरिन्के स्वागत नै करहीँ कलेसे वहाँसे निकरके उ नगरके डग्रिमे जैहो और कहहो, 11‘हमार गोरामे चप्टल तुहुरिन्के नगरके धुरसम हम्रे तुहुरिन्के विरोधमे झराइती। तभुन फेन तुहुरे यी जानो, कि परमेश्वरके राज लग्गेहेँ आगिल बा।’ 12मै तुहुरिन्हे कहतुँ, न्यायक दिनमे परमेश्वर सदोम नगरके मनैनहे जरुर दण्ड दिहीँ। पर उ नगरके मनैनके दण्ड सदोम नगरके मनैनके दण्डक तुलनामे बहुत धेउर हुइहिन।”

मन नै बद्लुइयन

13“ए खोराजीन शहरमे बैठुइया मनै! तुहुरिन्हे परमेश्वर दण्ड दिहीँ। ए बेथसेदा गाउँमे बैठुइया मनै! तुहुरिन्हे फेन परमेश्वर दण्ड दिहीँ। काकरेकी तुहुरिन्केमे कर्लक शक्तिशाली काम टुरोस नगर और सीडोन नगरके मनैनमे करल हुइत कलेसे ओइने तब्बेहेँ बोरक लुग्गा घालके अपनमे भुवा घाँसलेताँ। यी देखाइक लग कि ओइने अपन मन बदलके पाप करना छोर सेक्लाँ। 14पर न्यायक दिनमे परमेश्वर खोराजिन और बेथसेदा शहरके मनैनहे टुरोस और सीडोन शहरके मनैनसे धेउर दण्ड दिहीँ। 15ए कफर्नहुम नगरके मनै, का तुहुरे स्वर्गमे पुग्बी कहिके सोँच्थो? तुहुरे ते नरकमे गिरजिबो। 16जे तुहुरिन्के बात सुनत, उ मोरिक बात सुनत। जे तुहुरिन्हे अस्वीकार करत, उ महिन्हे अस्वीकार करत। और जे महिन्हे अस्वीकार करत, उ महिन्हे पठुइयाहे अस्वीकार करत।”

सत्तरथो चेलन फिर्ता अइना

17उ सत्तरथो चेलनके आनन्दसे घुमके आके असिक कलाँ, “प्रभुजी, भूत्वन फेन हमार बात मन्लाँ, जब हम्रे ओइन्हे अप्निक नाउँ लेके आज्ञा देली।” 18तब येशू ओइन्हे कलाँ, “जब भूत्वन तुहुरिन्के बात मन्लाँ, तब मै शैतानहे एकफाले स्वर्गमनसे बिज्ली हस गिरत देख्न्नु। 19मै तुहुरिन्हे सँप्वनहे और बिच्छिनहे किच्लैना और शैतानके सक्कु शक्तिमे अधिकार देहल बतुँ, और कौनो फेन चिज तुहुरिन्हे नोकसान नै करी। 20पर भूत्वन तुहुरिन्के आज्ञा मन्थाँ कहिके तुहुरे खुशी ना होऊ। पर तुहुरिन्के नाउँ स्वर्गमे लिखल बा कहिके तुहुरे खुशी होऊ।”

छावासे बाबाहे देखैना

21वहे समयमे येशू पवित्र आत्मामे आनन्दसे भरगिलाँ और कलाँ, “हे बाबा, स्वर्ग और पृथ्वीक प्रभु, मै तुहिहे धन्यवाद देहतुँ। काकरेकी तैँ यी बात बुद्धिमान और समझदार मनैनसे नुकाके धर्ले। पर साधारण मनैनहे उ प्रकट कर्ले। हाँ, बाबा! काकरेकी तुहिहे यहे मजा लागल। 22मोरिक बाबा महिन्हे सक्कु चिज दैदेहल बा। और बाबक अलावा छावा के हो कहिके जनुइया केऊ नै हो, और छावक अलावा बाबा के हो कहिके जनुइया फेन केऊ नै हो। और ऊ जेकरमे छावएहे देखैना चाहि, और जोन मनैनमे छावा अपन बाबाहे देखैना चाहि, ऊ फेन परमेश्वरहे जानत।”

23चेलनके ओहोँर घुमके येशू ओइन्हे गुप्तमे कलाँ, “धन्य हुइँत उ आँखी, जेने तुहुरिन्के देख्लक यी बातहे देख्थाँ। 24काकरेकी मै तुहुरिन्हे कहतुँ, तुहुरिन्के देख्लक बात बहुत्ते अगमवक्तनके और धर्मी जनहुँक्रिहिन्के हेरना गजब मन रहिन। पर ओइने नै देख्लाँ। और तुहुरिन्के सुनल बात सुन्ना गजब मन रहिन। पर नै सुने भेटैलाँ।”

मजा सामरीक दृष्टान्त

25एक दिन जब येशू मनैनहे शिक्षा देहतिहिँत। तब एकथो यहूदी कानुनके गुरु हुँकार परीक्षा करे ठरह्यागिल, और यी प्रश्न पुँछल, “गुरुजी, सदाकालके जीवन पाइक लग महिन्हे का करे परी?” 26येशू उहिहे कलाँ, “मोशक नियम कानुनमे का लिखल बा? ओम्नेसे तैँ का बुझ्ले?” 27ऊ कहल, “तैँ परमप्रभु, अपन परमेश्वरहे अपन पूरा मनसे, अपन पूरा प्राणसे, अपन पूरा शक्तिसे और अपन पूरा बुद्धिसे प्रेम कर और अपन परोसीहे फेन ओस्तेके प्रेम कर, जसिके तैँ अपनहे प्रेम करथे।” 28ऊ उहिहे कलाँ, “तैँ ठिक जवाफ देले। तैँ फेन ओस्तेहेँके कर, तब तुहिहे सदाकालके जीवन मिली।” 29पर ऊ कौनो-कौनो मनैनहे#10:29 कौनो-कौनो मनैनहे गैर-यहूदिनहे और विशेष करके सामरी मनैनहे परोसी और यनहे प्रेम करे नै परत कहिके ओइने सोँचित। यहाँसम कि परमेश्वर ओइन्हे प्रेम करना आज्ञा देहलमे फेन यहूदिनके गैर-यहूदिनहे प्रेम नै करिँत (व्यवस्था19:18,34)। प्रेम नै करे, यहे बातहे सही ठहराइक लग येशूहे पुँछल, “मोरिक परोसी के हो ते?” 30येशू एकथो कहानी सुनाके उहिहे जवाफ देलाँ, “एकथो मनैया यरुशलेम शहरमेसे यरिहो नगर ओहोँर जाइतेहे। ऊ डाँकनके फेला परगिल। ओइने उहिहे नंग्ते बनाके ओकर घल्लक लुग्गा और ओकर थेन रहल सक्कु चिज लूटके उहिहे पिट्लाँ, और उहिहे अरघताहा पारके छोरके चलगिलाँ। 31संयोगसे एकथो यहूदी पुजारी उ डगर ओहोँरसे जाइतेहे और अरघताहा मनैयाहे देखल ते उहिहे बिना सहायता कर्ले ऊ दोसुर ओहोँरसे खरकके चलगिल। 32ओस्तेहेँके एकथो लेवी फेन उ ठाउँमे आपुगल, जे मन्दिरमे काम करे, अरघताहा मनैयाहे देखल ते ऊ फेन उहिहे बिना सहायता कर्ले दोसुर ओहोँरसे खरकके चलगिल। 33पर सामरिया प्रदेशके एकथो मनैया वहे डगर अपन यात्रामे जाइतेहे, तब अरघताहा मनैयाहे देख्के उहिहे सोग लग्लिस। 34और ओकर थेन जाके तेल और अंगुरके रस लगाके ओकर खतरामे पट्टी बहान देहल। और अपन गडहकमे चहुँराके उहिहे एकथो पौवामे लैजाके ओकर सेवा करल। 35दोसुर दिन ऊ दुईथो चाँदीक सिक्का निकारके पौवक मलिक्वाहे देके कहल, ‘यिहिहे सहेरदेहो, आकुर धेउर खर्च लागी कलेसे मै घुमके आइबेर तुहिन्हे तिरदेहम।’” 36तब येशू उहिहे पुँछ्लाँ, “तोरिक विचारमे यी तीन जहनमेसे डाँकनके हमलामे परल मनैयक परोसी के ठहरल?” 37ऊ कहल, “जे अरघताहा मनैयकमे सोगाइल।” तब येशू उहिहे कलाँ, “जा, तैँ फेन ओस्तेहेँके करिस।”

मार्था और मरियमके घरेम

38जब येशू और हुँकार चेलनके जाइतिहिँत, तब ओइने कौनो एकथो गाउँमे पुग्लाँ। जब ओइने वहाँ पुग्लाँ ते मार्था नाउँ रहल एकथो स्त्री हुँकिन्हे अपन घरेम स्वागत करल। 39मरियम नाउँ रहल ओकर एकथो बाबु रहिस। ऊ येशूक गोरातिर बैठके हुँकार शिक्षाहे सुने। 40पर मार्था खाना पकैना काममे अँट्कल रहे। ऊ येशूक थेन आके कहल, “प्रभुजी, का अप्नि ध्यान नै देहथुइति कि मोरिक बाबु महिन्हे सक्कु काम करक लग एक्केली करादेहल बा। तबेकमारे उहिहे मोरिक सहयोग करे कही।” 41पर प्रभु येशू जवाफ देलाँ, “मार्था, मार्था, तुँ बहुत बातके चिन्ता करथो और घब्राजिथो। 42पर जरुरी एक्केथो बातके बा, वहे बहुत मजा बात मरियम भेटालेहल बा, उ उहिसे नै छिनाजैहिस।”

Voafantina amin'izao fotoana izao:

लूका 10: DVGNT

Asongadina

Hizara

Dika mitovy