Kisary famantarana ny YouVersion
Kisary fikarohana

กิดจะกาน 1

1
พูซาง​ซันญา​ปาย​วินญาน​บอ์ริซุด​ซี​ตัอะ
1-2ลูกา​เคียน​นังซือ​อะซวย​อะปัอะ​จอ์ะ​เทโอพีลัด​ปาย ‍ เทโอพีลัด​เอย ‍ อังกอะ​เกย​เคียน​นังซือ​อะซวย​อะปัอะ​จอ์ะ​ไม​เจอ​มู​เล็ม ‍ นึง​เล็ม​ตอ์​ญวง​อะกี#1:1,2 นังซือ​เล็ม​ญวง​นาก็​ลูกา​เคียน​ออ์น​เทโอพีลัด​อะไน​ก็​กือ​นังซือ​ลูกา ‍ อังกอะ​ก็​ออ์น​ไม​ด็าง​เรือง​คอง​พะเยซู​กดตี​ตีแม็ด ‍ จน​เตา​มือ​นาก็​พูซาง​เอด​พะเยซู​อะกี​อะซอฮ​ปัอะ​ซะวัน ‍ อังกอะ​ก็​ออ์น​ไม​ด็าง​ญิ​กู​เนว​นาก็​พะเยซู​ตาะ ‍ ทัง​เรือง​นาก็​อัน​อะเรียน​กวย ‍ กับ​นาก็​วินญาน​บอ์ริซุด​ปีา​อัน​เวา​นึง​จุม​นาก็​พะเยซู​เรือฮ​อะดอะ​ออ์น​ปัน​ตัวแทน​คอง​อัน​อะกี ‍ อังกอะ​ก็​ออ์น​ไม​ด็าง​ญิ​เจอ​นึง​นังซือ​เล็ม​ตอ์​ญวง​อะกี ‍ 
3เจอ​ฮาไน​อังกอะ​ก็​เคียน​นังซือ​อะซวย​อะปัอะ​จอ์ะ​ไม​ปัน​เล็ม​ที​ซอง​แอน ‍ นึง​เล็ม​ไน​อังกอะ​ซี​ออ์น​ไม​ด็าง​เรือง​นาก็​กัอด​อะซอฮ​ตอ​ตี​เล็ม​ตู​ญวง​อะกี​แอน ‍ เรือง​คอง​พะเยซู​ตอ​ปัอะ​ก็​ปัน​อังกิ ‍ บัด​พะเยซู​กะเจด​ตาง​กวย​ไฮ​เจอ ‍ อัน​ก็​มอ์ยฮ​แอน ‍ บัด​อัน​มอ์ยฮ​อะกี ‍ พะเยซู​อัอด​นึง​โลก​อะไน​แอน 40 มือ ‍ นึง​ซวง 40 มือ​อะไน​พะเยซู​ก็​ปัอะ​จอ์ะ​ตัวแทน​คอง​อัน​ซะเอย​ตูอ ‍ เพือ​ออ์น​อะไล​โฮม​ก็าก​ปาย​อัน​มอ์ยฮ​ลึ​อะเลอ ‍ เจอ​นึง​ซวง​นาก็​อัน​อัอด​กับ​ตัวแทน​อะกี ‍ พะเยซู​ก็​อะเรียน​อะไล​ออ์น​เคาไจ​เรือง​นาก็​พูซาง​ซี​ตัอะ​เฮะ​ตัอะ​กรัว​ตัอะ​ปกครอง​กวย ‍ ปาย​อัน​ซี​ปัน​วิลลาะ​นืยะ ‍ 
4เบิน​มู​จะไง​พะเยซู​อัอด​จีา​ดอ์ย​กับ​จุม​ตัวแทน​คอง​อัน ‍ เจอ​อัน​ก็​เวา​ปาย ‍ "อัมไป​ซู​ปีาว​ดิ​ตาฮ​กรุง​เยรูซาเล็ม​อัมปิน​เดอ ‍ ออ์น​อัมไป​อะกัน​อัอด​ตี​ไน​วาย ‍ จน​เตา​อัมปูอ​กึ​ซี​อะซวย​วินญาน​บอ์ริซุด​ออ์น​ตัอะ​อัอด​นึง​อัมไป ‍ กือ​นาก็​อัน​เกย​ซันญา​อะดอะ​กับ​อัมไป​อะกี​ออยะ ‍ เรือง​อะไน​กึ​เกย​เวา​ออ์น​อัมไป​ตะมึง​เจอ ‍  5แตเกา​ยอน​เกย​ออ์น​อัมไป​ตาะ​พิที​ดุบ​ดัอะ ‍ ฮัก​แอน​ตัอ​ดูน​พูซาง​แฮง​ซี​ตาะ​ออ์น​ก็าก​กูอ​อะกี ‍ อัน​ซี​อะซวย​ตะนายฮ​วินญาน​บอ์ริซุด​ออ์น​ตัอะ​อัอด​นึง​อัมไป ‍ อังกิ​กึ​จัง​อี​ออ์น​อัมไป​อะกัน​อัอด​ตี​ไน​วาย" ‍ 
พะเยซู​ซอฮ​อัอด​ปัอะ​ซะวัน
6เจอ​เบิน​แอน​มู​จะไง ‍ พะเยซู​ก็​จวน​จุม​ตัวแทน​อัน​ซอฮ​จอ์ะ​กอ์ฮ ‍ กอ์ฮ​อะกี​อะไล​อะโร​ปาย​กอ์ฮ​มะกอกเทด ‍ บัด​อะไล​อัอด​ตี​กี​จุม​ตัวแทน​ก็​อะบลัฮ​พะเยซู​ปาย ‍ "นีาย​เอย ‍ แจะ​เจอ​นอ ‍ นาก็​ไม​ซี​ออ์น​กวย​อิซราเอล​เบิน​ซิด​ลับ​ปัน​ปะเทด​คอง​ตอ์​เบิม​กือ​เตียะ ‍ เจอ​ไม​ก็​ซี​ปัน​กะซัด​ปกครอง​มะเฮะ?"
7เจอ​พะเยซู​ก็​เวา​นึง​อะไล​ปาย ‍ "นาก็​ซี​ด็าง​มือ​ด็าง​เวลา​นาก็​อะไน​อะกี​ซี​กัอด​อะซอฮ​อะกี ‍ อัน​ตัอ​มีน​ได​ปัน​เวียะ​คอง​อัมไป ‍ ฮัก​ปัน​อัมปูอ​กึ ‍ นาก็​ต็าง​อะดอะ​มือ​ต็าง​อะดอะ​เวลา​กู​เนว ‍  8เวียะ​คอง​อัมไป​บัด​กือ​อะตัอง​ออ์น​กวย​ด็าง​เรือง​คอง​กึ​อะกี​ออยะ ‍ ฮัก​ออ์น​อัมไป​อะกัน​ออ์น​วินญาน​บอ์ริซุด​ตัอะ​อัอด​นึง​อัมไป​วาย ‍ บัด​วินญาน​บอ์ริซุด​ตัอะ​อัอด​นึง​อัมไป​เจอ ‍ อัน​ซี​ออ์น​อัมไป​เบิน​เรง​เบิน​อำนาด ‍ เจอ​อัน​ซี​จวน​อัมไป​ปัอะ​อะตัอง​เรือง​คอง​กึ​ออ์น​กวย​กู​นาะ​กู​บอน​ด็าง ‍ อัมไป​ซี​เริม​อะตัอง​กวย​อัอด​นึง​กรุง​เยรูซาเล็ม ‍ เจอ​ซี​ปัอะ​ตัว​เคด​ยูเดีย ‍ กับ​เคด​ซะมาเรีย ‍ จน​ปัอะ​ตัว​ญิ​กู​บอน​นึง​โลก​อะไน" ‍ 
9บัด​พะเยซู​เวา​อังกิ​มม​เจอ ‍ พูซาง​ก็​เอด​พะเยซู​อะซอฮ​จอ์ะ​มะลัง​ตอ​มัด​อะไล ‍ เจอ​ตอ์​อัน​ก็​ปิด​ปัอะ​นึง​เมก
10จุม​นาก็​ปัน​ตัวแทน​คอง​พะเยซู​อะกี ‍ ก็​นัง​ตะเงือะ​อะเฮะ​ตะปูน​อัอด ‍ เจอ​พะดี​เบิน​กวยกอ์น​บาล​นาะ ‍ นาก็​จอ์ะ​อะรายะ​ซี​กลอก​ตัอะ​ตะยึง​อัอด​มะนืย​กับ​อะไล​ตี​กี ‍  11เจอ​บาล​นาะ​อะกี​ก็​เวา​ปาย ‍ "กวย​กาลิลี​เอย ‍ ตะนาะ​อัมไป​จัง​ตะเงือะ​อะเฮะ​จอ์ะ​มะลัง? ‍ พะเยซู​นาก็​พูซาง​เอด​อะซอฮ​อัอด​ปัอะ​มะลัง​อะไน ‍ อัน​นัง​ซี​ลับ​ตัอะ​จอ์ะ​อัมไป​แอน ‍ อัน​ซี​แซง​ตัอะ​ตี​มะลัง ‍ กือ​นาก็​อัมไป​โฮม​อัน​ซอฮ​ปัอะ​อะไน​ออยะ" ‍ 
อะไล​เรือฮ​มัดทีอัด​ออ์น​ปัน​ตัวแทน​คอง​พะเยซู​แทน​ยูดาด
12เจอ​จุม​นาก็​ปัน​ตัวแทน​คอง​พะเยซู​เลิด​แซง​ตัอะ​ตี​กอ์ฮ​มะกอกเทด​อะกี ‍ ตะยาฮ​ปัอะ​ปะมาน​มู​กิโล ‍ พะดี​ตัอะ​กรุง​เยรูซาเล็ม ‍  13บัด​อะไล​มูด​ตัอะ​กรุง​เยรูซาเล็ม​เจอ ‍ อะไล​ก็​ลับ​ปัอะ​จอ์ะ​ดง​บอน​นาก็​อะไล​เกย​อัอด​อะกี​ออยะ ‍ ซอฮ​อัอด​นึง​ฮอง​ซัน​ปัอง ‍ นาก็​อัอด​มะนืย​ตี​กี​ก็​เบิน​จุม​ตัวแทน​คอง​พะเยซู​นืยะ ‍ กือ​เปโตร ‍ ยอน ‍ ยากอบ ‍ อันดรู ‍ พีลิบ ‍ โทมัด ‍ บารโทโลมิว ‍ มัดทิว ‍ ยากอบ​นาก็​อัมปูอ​อัน​ละมึฮ​อัลเพอัด ‍ ซีโมน​นาก็​เกย​คะญัน​กับ​กาน​เมือง ‍ อัอด​นึง​จุม​นาก็​อี​กะบด​กวย​โรม​เพือ​อี​ปัน​อิดซะลาะ ‍ กับ​ยูดาด​นาก็​อัมปูอ​อัน​ละมึฮ​ยากอบ​อะกี ‍  14เบิน​ทัง​มารี​อัมเปะ​คอง​พะเยซู ‍ กับ​จุม​แซม​กอ์น​คอง​พะเยซู ‍ เจอ​ก็​เบิน​จุม​กวยกัน​แอน​ซะเอย​นาะ ‍ กู​นาะ​อะไน​อะไล​ก็​ปัน​มู​มิด ‍ ตัอะ​อะรอ์ม​อะทิดทาน​อัอด​มะนืย​ตี​กี​โดะ​อะเลอ ‍ 
15เจอ​เบิน​มู​จะไง ‍ เปโตร​ก็​ตะยึง​อัอด​ตอ​มัด​แซมอัอย​นาก็​อัมปรูอม​เจือ​นึง​พะเยซู ‍ กวย​นาก็​อะรอ์ม​อัอด​ตี​กี​ก็​เบิน​ปะมาน 120 คน ‍  16-17เจอ​เปโตร​ก็​เวา​ปาย ‍ "แซมอัอย​แซมอาย​เอย ‍ ตี​ตีแม็ด​พะเยซู​เรือฮ​ยูดาด​ออ์น​ปัน​กวย​มู​จุม​กับ​ไฮ ‍ อัมปรูอม​นังนึ​ตาะ​งาน​คอง​พูซาง ‍ ฮัก​บัด​เจอ​อัน​บัด​ตายะ​พะเยซู​จิ ‍ อัน​ก็​ปัน​กือ​นาก็​วินญาน​บอ์ริซุด​ออ์น​กะซัด​ดาวิด​เคียน​อะดอะ​นึง​คูอม​เวา​คอง​พูซาง​อะกี​ออยะ ‍ อัน​เคียน​อะดอะ​ปาย​ยูดาด​ซี​ปีา​กวย​ปัอะ​กอ์บ​พะเยซู ‍ เจอ​อัน​ก็​ตอง​ปัน​อังกิ​ลึ" ‍ อังกิ​เปโตร​เวา ‍ 
18(เจอ​ปราะ​นาก็​อะไล​จาง​ยูดาด​ออ์น​ตาะ​เนว​โลยฮ​เนว​ไล​อะกี ‍ อัน​เลิด​เอด​อะปัอะ​จัอง​กะแตะ​มู​บอน ‍ เจอ​ยูดาด​ก็​กะเจด ‍ อัน​ดม​จะปุก​อะแซง​ญิ​เรง ‍ จน​ปุง​อัน​ปลาฮ ‍ รูอยะ​รูอม​ก็​จะโตฮ​ลอฮ​จน​ญิ ‍  19กวย​นาก็​อัอด​นึง​กรุง​เยรูซาเล็ม​ก็​ด็าง​เรือง​ไน​กู​นาะ ‍ อะไล​จน​อะดอะ​ละมึฮ​กะแตะ​บอน​กี​ปาย ‍ กะแตะ​อะฮาม ‍ ค็าน​เวา​ปัน​พะซา​อะไล​ก็​ซี​เวา​ปาย ‍ อาเคลดามา)#มัดทิว 27:3-8
20เจอ​เปโตร​ก็​เวา​แอน​ปาย ‍ "กะซัด​ดาวิด​ก็​เคียน​อะดอะ​เจอ​ปาย​ยูดาด​ซี​กะเจด​แบบ​อังกิ​ลึ ‍ อัน​ก็​เคียน​อะดอะ​นึง​นังซือ​ซะดุดี​อะกี​ปาย ‍ 'ออ์น​ดง​คอง​อัน​ปัน​ดง​รีาง​เดอ ‍ ซู​ออ์น​มะเลอ​อัอด​ตี​กี​พาตี​นาะ'#ซะดุดี 69:25 ‍ เจอ​อัน​เคียน​อะดอะ​แอน​มู​บอน​ปาย ‍ 'ออ์น​เบิน​พู​ตะไม​แอน ‍ ตัอะ​ตาะ​งาน​นึง​ตำแน็ง​แทน​อัน'#ซะดุดี 109:8 ‍ กะซัด​ดาวิด​เคียน​อะดอะ​อังกิ​แตเกา ‍ 
21-22"ค็าน​อังกิ​เจอ ‍ ไฮ​ก็​ตอง​เรือฮ​เอด​กวย​มะนาะ​นาก็​เกย​ปัอะ​มะนืย​กับ​ไฮ​ตะลอด ‍ กดตี​ยอน​ออ์น​กวย​ตาะ​พิที​ดุบ​ดัอะ ‍ จน​ตัอะ​มือ​กี​นาก็​พูซาง​รับ​เอด​พะเยซู​อะปัอะ​ตาฮ​ไฮ ‍ กวย​แบบ​ไน​ออยะ​นาก็​ซี​เบิน​ซิด​ปัน​พะยาน​อัมปรูอม​กับ​ไฮ​ดาย ‍ ปาย​พะเยซู​มอ์ยฮ​ตาฮ​กะเจด​ลึ​อะเลอ ‍ ออ์น​ไฮ​เรือฮ​เอด​กวย​แบบ​ไน​ออยะ​แทน​ยูดาด" ‍ อังกิ​เปโตร​เวา​นึง​อะไล ‍ 
23ซัง​เปโตร​เวา​อังกิ​เจอ ‍ อะไล​เลิด​ซะเนอ​กวย​บาล​นาะ​นาก็​เกย​ปัอะ​นึง​อะไล​ตะลอด ‍ บาล​นาะ​อะกี​มะนาะ​ละมึฮ​มัดทีอัด ‍ เจอ​แอน​มะนาะ​ละมึฮ​โยเซบ ‍ ฮัก​โยเซบ​อะไน​เบิน​ซะเอย​ละมึฮ ‍ ล็าง​นาะ​ก็​อะโร​ปาย ‍ บารซับบาด ‍ เจอ​ล็าง​นาะ​ก็​อะโร​ปาย ‍ ยุดทัด ‍ 
24-25เจอ​ฮาไน​อะไล​ก็​อะทิดทาน​เวา​ปาย ‍ "พะเยซู​พู​ปัน​นีาย​เอย ‍ ยูดาด​ก็​ดิ​ปัอะ​อัอด​นึง​บอน​นาก็​มอะ​กับ​อัน​เจอ ‍ เจอ​ฮาไน​มะเฮะ​แซก​ออ์น​ไม​อะตัอง​ออ์น​มะเฮะ​ด็าง​นึง ‍ ปาย​มัดทีอัด​กับ​บารซับบาด​อะไน ‍ พู​ลาะ​ซมควน​ซี​เบิน​ตำแน็ง​แทน​ยูดาด ‍ ไม​ปัน​พู​นาก็​ด็าง​มิด​กวย​ญิ​กู​นาะ ‍ มะเฮะ​เลิด​แซก​ออ์น​ไม​อะตัอง​ออ์น​ด็าง​นึง ‍ ปาย​ไม​ซี​เรือฮ​เอด​พู​ลาะ ‍ เพือ​ซี​ปัน​ตัวแทน​คอง​ไม" ‍ 
26อะทิดทาน​มม​เจอ​อะไล​ก็​จก​ซะลาก​อะเฮะ ‍ เจอ​ซะลาก​ก็​อัอด​นึง​มัดทีอัด ‍ จุม​นาก็​ปัน​ตัวแทน​คอง​พะเยซู​นาก็​นัง 11 คน​อะกี ‍ ปัน​กวย​นาก็​พะเยซู​เรือฮ​อะดอะ ‍ เจอ​ฮาไน​อะไล​ก็​เรือฮ​มัดทีอัด​อะไน​ออ์น​ปัน​ตัวแทน​มะนืย​กับ​อะไล​เต ‍ 

Voafantina amin'izao fotoana izao:

กิดจะกาน 1: Bru Bible

Asongadina

Hizara

Dika mitovy

None

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra