Wikhikən 9
9
1Pemihat onəmiyal oskitapiyəl nehkahpelicil tanil nekapilitsəpənil nemikosilihte.
2Tanik wetəkehkimocik ohəkek opapehcimawal Sesohsəl: Nsakəmamən, wen milkamikasits, wət skitap, kesəna onikihko, otəlinəmikosin onehkapin?
3Sesohs asitewtəm: otoskitap skat milkamikasiwis, kesəna onikihko; kenok Kelowəsit otəlohkewakənəl limoskehtaso ohəkek.
4Ntacowiyəlok otəlohkewakənəl tan petəkimitpən, tan kwenicehkwək. Nipayiw weckowihak tan toci skat wen kislokekw.
5Tan kwenihiyi skitkəmikw nil opəshakwhekəm skitkəmikw.
6Kisi itək nihtəl əsomskwe kətakəmikok, ocitonkwahkwəlonskw osəsokow ikək, osonehtowan nekapilicil osiskok kwahkwəlonskwol.
7'Tiyal: Ŭlih kəsikwens pekotepeyakek Silomk, tan kwelpiwiktasik itəmowiw: Elkimot. Nit tehc macəhat ksəsikwenso; toci apacihat, nəmihta.
8Nit tehc mawikemacihi, tanik nemihatpənik təmk otətlipakowəsilin, itəmok: Skat ihiw wət nət tan ehpit pakowəsit?
9Ankwoc itəmok: Nət nekəm. Kətəkik itəmok: Otəlkwinakwsin. Nekəm itəm: Nil nət.
10Nit tehc 'tiyawal: Tan nali kisi pantehtaso ksiskol?
11Nekəm asitewtəm: Oskitap liwiha Sesohs okisi halkwahkwəlonskwol, ənsonehtakonepənil nsiskok, ntihokon, əli pekotepeyakek Silomk kəsikwens. Toci ntəlihaneyehpən, nkəsikwensihpən, nəmihtahpən.
12Nekəmaw 'tiyawal: Tama iyo nekəm? Itəm: Kətama nkəcicihao.
13Opeciphawal Palosi ewoltilit tanəl nekapilitpənil.
14Atəlahsimowikiskwəkiwopən tan toci Sesohs kisihat kwahkwəlonskwol pantehtowat osiskol.
15Nit tehc Pelosiyək apc papehihimatit tan otəlimsənəməlin elinəmihtalit. 'Tiya: Oponehlapənil kwahkwəlonskwol nsiskok, nkəsikwensihpən, nəmiht.
16Nit tehc ankwoc Palosiyək itəmotowək: Wət skitap skat oceyawiw Kelowəsit ikək, ipəcəl atəlahsimowikiskwək skat okəlnəmowən. Ankwoc itəmotowək: Tanəp otəlikisehton nit telikəl kinowaskoltikənəl skitap lahkamiksowin? Sisehlotowakən ikehe ohəkewikhowak.
17'Tiyawal apc nekapilitpənil: Kil kekw ktəlima, ipəcəl pantehtakonəl ksiskol? Itəm: Asəkintatowin.
18Kenok Leswihsək skat olamsətəmoniya onehkapilines oməsənəməlin onəmitalin, akimte wikwimawa onikihko tan oməsənəməlin onəmitalin.
19Papehihimawa: Wət kilowaw kwəssowa tan itəmekw nkapos nemihkwosit? Nitəl tan otəlikisinəmihtan təlec?
20Onikihko 'tasitemawa itəmok: Nkəcicihtonen nokwəssinen wət ənkapopən nemihkwosit;
21Kenok tan otəlikisinəmihtan təkec skat nkəcicitonewin, kesəna wen pantehtowat osiskol skat nkəcicihawin. Nekəm kisiko; papehcimok nekəm. Nekəm kəlositəmowewsoc.
22Yohtəl kəlosowakənəl itəmoticil onikihko, ipəcəl onəkalawa Leswowis. Ipəcəl Leswihsək okislotəməniya tan tepəkt wen sahpakənotək Sesohs Oniweskowin ocinotephap himiyewikwamək.
23Nit tehc onikihko itəmok: Nekəm kisiko; nekəm papehihimok.
24Nit tehc nit nisewe wihkwimatit skitapiyəl tanil nehkapilitpənil, 'tiyawal: Kelowəsit milan kcitəmi təhamkosowakən: nkəcicihtonen wət skitap lahkəmiksowinowiw.
25Nit tehc itəm: Skat nkəcicihaw otəlakəmiksowinowin. Peskonəlo kecicihto: nil nekapihpən; kenok təkec nəmiht.
26Toci apc otcawal: Tan ktəlehlokones? Tan ktəli kisipantehtakones ksiskol?
27Asitemat: Kis kisi iyalolniyapən, skat knotəmohtipakopən. Tanəp apc ktəliciksetəməniya? Kpawatəməniya ktəkehkimkoniya?
28Ŭnotalmimaniya itəmok: Kil ktəkehkiməkw; kenok Mowis ntəkehkimkon nilon.
29Nkəcicihtonen Kelowəsit oskowimapənil Mowisəl; kenok wət skitap skat nkəcicihawin tan tet weceyawit.
30Nət skitap asitewtəm: Asəkinakwot skat kilowaw kəcicitoniya tan weceyawit, npantehtakonəl nsiskol.
31Kəcicitonen Kelowəsit skat awciksətowawi lahkəmiksowino; kenok tan wen wikowaci wihwinowamat Kelowəsitəl, əlehtaket olitahatəmowakən, nekəm Kelowəsit ociksətowal.
32Tanek kisitasikpən skitkəmikw mehc meskw notəmawən wen pantetowan wen osiskol tanil nit elinəmihkwəsilit onehkapilin.
33Skat nekəm ocihakosəpən Kelowəsit ikək, skatəp kekwse kisi lehtakawəp.
34Nekəmaw 'tiyawal: Kil nekawhciwnəmikosiyəpən lahkəmiksowakən ikək, əktəkehkimihpən nilon? Toci ontiyakaniyal.
35Sesohs notəmat ontiyakaniyal, meskowat, 'tiyal: Kolamsətəmən Kelowəsit 'Kwəssəl ohəkek?
36Asitemat: Wen iyo nekəm, Nsakəmam, nolamsətəmən ohəkek?
37Sesohs 'tiyal: Knəmiyapən, nət nekəm weskowiməsk.
38Itəm: Nsakəmam, nolamsətəmən. Wihwinowamal.
39Sesohs itəm: ətplotəmowakən weci pəkəciyaw skitkəmikw, welaman tanik skat nemihitatikwik onəmihtaniya; tanik nemihtaticik onəka pikwehtasoltiniya.
40Ankwoc Palosiyək tanik wiciyewacik notəməniyal yohtəl kəlosowakənəl, 'tiyawal: Nilon na nehkapoltihpən?
41Sesohs 'tiya: Nkapoltiyekw, skatəp lahkəmiksowakən ktewltiwniyal. Kanokəlo tahkec ktitəmotihpa nəmihtatihpən. Nit tehc ktəlkəmiksowakənowal ənkesik.
Voafantina amin'izao fotoana izao:
Wikhikən 9: PQM2014
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Maliseet Gospel of John © Canadian Bible Society, 2014
