Wikhikən 6
6
1Akimte yohtəl kekwseyal Sesohs kwosəkasopən Koliletk 'cey sopekw tan Tiypiliyəs osopekwəm.
2Ktanakwsowək pəmawsowinowək onosokwawapənil, ipəcəl onəmi htoniyapəni l ki nowaskolti kənəl tanil kisitakwil kesinokəticik ohəkewikowak.
3Sesohs tkwakweheyepən wocək, nit tet omawopihi anepənihi tanihi ekehkimatpənihi.
4Nit nankəmihakewe, wikopaltimək kəti ikehe nit Leswihsək wikopaltimkeweyəmowak.
5Nit tehc Sesohs ewepiw lapesopən onəmiya kesilit pəmawsowino weckowapasilicihi tan nekəm eyit, toci 'tiyal Pilipəl: Tamapal kisotənohan həpan tanil kisi məhaticil yohoht?
6Weciyəhat nit otokwetskolal: Ipəcəl Sesohs okəcicihton tanəc elehtakec.
7Pilip 'tasitemapənil 'tiyal: Nisatkw tineliyəl, (man nit tan ap nkotinsk kesitkikon,) eltaotit həpan skatəp memihew cikaw ehtasiw wikwehlat apsəkilsəswəl.
8Peskowəl yohoht peməkehkimacihi, Atəle Simo Piyel wicikititicil, 'tiyal Sesohsəl:
9Oskinosis eyolo tan ewowat nanənol paliyeweya pkwesikən; naka, niso psəkilsəsilicihi nəmesis. Kekw pal nit əliyolehtakiyək kesit pəmawsowin?
10Sesohs itəm: Kisehtowok pəmawsowinowək olakwaniya, Nit olaskike. Nit na olakwaniya oskitapiyək, tamahal nanamkwakəsowək.
11Sesohs wikwehlan yohoht əpkwesikən, kisi olasoweltək osisenmowan nihiht elakwelicihi. Naka, nəmese tan kesipawatəmotit.
12Tan toci memihpoltitit, Sesohs 'tiya tanihi ekehkimacihi: Makwayewotək piyapənekol; welaman skat kekw ksihkehew.
13Nit tehc mawewototit, weci əpsənehtoticil nisankotol pəsənotiyəl piyapənekol tanil weci piyemihakil wehketkək nanəwol paliyeweyak əpkwesikənək tanik kisihpoltitpənik.
14Nit tehc pəmawsowinowək tan nemihtotitpən kinowaskoltikən tan Sesohs elikisehtakwpən, itəmotopənik: Olamewakən ikək wət nət nikanitəhasowin tan kehtipəkəciyatpən skitkəmikw.
15Nit tehc tan toci kecicihat Sesohs okətipetapasilin onacit kwənkən onacikinceməs wehləkon, apc omacihan, tkwakwehe wəcək nkwəlokwayw.
16An welakwiwik tanik wetəhkehkimocik ohəkek mətapiyapasilin sənohciw.
17Nohotepapasiniya əpəsoləkok kwəsəkahaniya sopekw, limtətəkahiyək Cepəlniyəmk. Akis piskitpokət, mehc meskw Sesohs pəkəcihawən ewoltilit.
18Asopekw ksatkwin elikslamsək.
19Nit tehc kis eliyelcinaskwesoltihtit tamahal nəhowək mayelək, kəsəna nəhowək mihiyelək, onəmiyawal Sesohsəl pemihalicil oskitpemək, ckowicəsihihəl əpəsoləkok, seksoltowək.
20Kenok Sesohs 'tiya: Ekwiseksoltikw! Nit nil.
21Toci olitəha sowimsənawal əpsoləkək; nit tehna əpsoləkw kwehe tan elcatitpən.
22Ehcehkwiwik ehtayiwkisok, tan toci pəmawsowinowək tanik sekəlticik kamiw sopekək onəmitoniya, kətama kətək əpəsoləkw ew nit, tepəkt peskon, Sesohs skat wiciyewawipənihi tanihi ekehkimacihi əpəsoləkək; kenok tanik wetəkehkimopənik ohəkek macehiyopənik nkwotəkokayo;
23Kanokəlo kis ocikwəhehtopənil kətəkil əpəsoləkol Tipiliyəsk, kwəhehtopənil kwihiw tan tet etli micoltititpən əpkwesikən, kisi olasoweltəkpən 'Sakəmamowal.
24Nit tehc kisinəmitotit kwtanakwsicik mawihamək Sesohsəl skat otiyeliwən nit, tehna tanik wetəkehkimocik ohəkek, nekəmaw na tepesoltowək əpəsoləkw ikək əkkwahlətowək Cepəlniyəmk opeci kwilowahawal Sesohsəl.
25Kisimskowalit kamək, 'tiyawal: Nsakəmamən, tanek kpəkəcihaps yot?
26Sesohs 'tasitema: Leyo, yoholekw, kwelowihihpa, skat ipəcəl knəmihtoniyapənil kinowaskoltikənəl; kenok ipəcəl kəmahawapənik əpkwesikənək naka kəmemi poltipapən.
27Mosahk ocilokətikekw nit micowakən ikək tan pemiksikahak olamistak ocilokətikw nit micowakən ikək, tan cenesik askəmawsowakən ikək, tan pəmawsowin 'Kwəssəl lkəmilkoniyac. Ipəcəl Mihtakwsit Kelowəsit kisi kinowaskolal nihtəl.
28Nit tehc iyalahtit: Tanəc ntəlehtakhətinen lokitəmokt Kelowəsit otəlohkewakənəl?
29Sesohs 'tiya: Yot Kelowəsit otəlohkewakən, kolamsətəmotiniya nekəm ohək, tanil Kelowəsit kisi ləkimacil.
30Nit tehc 'tiyawal: Kekwse kinowaskoltikən elokiyən? Welaman kisinəmihtonenəp, welaman kolamsətolpən? Kekw elokatəmən?
31Kəmitakwsənok micoltititpənik mana penekwikpənekw pahkahtakəmikw. Tahalo tan elowikhasikpən: Wecimilatpənek həpan spəmkik, micoltilits.
32Nit tehc Sesohs 'tiya: Leyo, yoholekw, Mowis skat kəmilkoni awipənil həpan spəmkik təleyaw: kenok Nmihtakws kəmilkoniyal olamewe həpanəl spəmkik təleyaw.
33Ipəcəl Kelowəsit otəpanəməl nit nət tan weci pənekwesit spəmkik, omilowan pəmawsowakən oskitkəmikw.
34Nit tehc 'tiyawal: Nsakəmamən, mecimiw milini wət həpan.
35Sesohs 'tiya: Nil nit pemawsowakəna həpan. Nekəm tan ikəhat nhəkek skatəc kətopiw; nekəm tan welamsətəknhəkek skatəc kətowosmin askəmiw.
36Kemokəlo ktiholopapən, kisi nəmihipapən, skat kolamsətəmotipa.
37Msiw wen tan Nmihtakws milit pəkəciyec nhəkek. Tanəc wen nekəm ikəhat nhəkek skatəc notekimaw kwəcəmək.
38Ipəcəl weci pənekwesiyənpən spəmkik skat ntəlokawən tan nil eliyolitəhatəm; kenok ntəlok tan nekəm iliyolitəhatək tan petəkimitpən.
39Ipəcəl yot Nmihtakws olitahatəmowakən, msiw wen tan nemihat Wemitakwsilicil, tehna olamsətəmənəl ohəkek, otiyinp askəmawsowakən. Nil nonakehlac mcəsəlewe kisok.
40Yot nekəm olitahatəmowakən tan petəkimitpən, msiw tan militpən, skatəp nkəskatowən kekwse, kenokəc nonakehton mcəsəlewe kiskət.
41Nit tehc Leswihsək mamselewestotihtit nekəm oci, ipəcəl itəm, Nil həpan tan weci penikwesitpən spəmkik.
42Etəmotowək: Skat yot Sesohs, Sosep 'kwəssəl tan onikihko kəcicitowaneno? Nit tehc tan otəlikisiyitəmən: Nil weci penikwesi iyanpən spəmkik?
43Sesohs 'tiya: Ekwimamselitoltikw.
44Skat wen kisi ikəhew nhəkek Nmihtakws tan petəkimitpən skat wihkwonakw. Nonakehlac mcəsəlewe kiskət.
45Nit telowikhasik nikani təhasowinowək otowikhikənowaw ikək: Msiw kehkim kwəsoltowək Kelowəsitow ikək. Msiw wen tan wecinotəkəpən Mihtakwsit Kelowəsit owikok wetəhkehkimkositpən ohəkek npetehkakw.
46Kətama wen onəmiyayəl Mihtakwsilicil Kelowəsitəl, tepəkt nekəm tan weciyatpən Kelowəsitow ikək, nekəm kisi nəmiyapənil Mihtakwsilicil Kelowəsitəl.
47Leyo, tan yoholekw, tan welamsətək nhəkek otiyin askəmawsowakən.
48Nil pəmawsowakəne, həpan.
49Kəmihtakwsowawk omicoltiniyahpən mana penekwikpən, mehcinhətopənik.
50Wət nət həpan tan wecipənekwesit spəmkək, welaman wen mahatp skatəc mehcinewəp.
51Nil nhək wət həpan pemawsit nit, tan weci pənekwesitpən spəmkik. Tan wen wecimahat yohtəl həpanəl askəmawsoc. Cə ketəlal həpanəc tan nil milowih, nil nowiyosəm, tan nil milowanc ociskitkəmikw opəmawsowakən.
52Nit tehc Leswihsək kweciwekwa mawtoltihtit, yəhotoltowək Tanəpəl wət skitap təli kisi milkonen ohək kəmici mowanen?
53Nit tehc Sesohs 'tiya: Leyo, yoholekw, skat miciwekw pəmawsowin 'Kwəssəl ohək, opəkənom skat kətosəmoltiwekw pəmawsowakən kətama ktiwniya khəkewikowak.
54Tan micit nhək kitosəmit npəkəmom, otiyin askəmawsowakən; nonakehlac mcəsəlewe kiskət.
55Ipəcəl nil nhək olamewi micowakən nit, npəkənom olamewi kətosəmowakən nit.
56Tan micit nhək ketosəmit npəkənom, omecimkatəmən nhəkek, nil nənmecimkala ohəkek.
57Tahalo Nmihtakws pemawsit petəkimitpən wecipemawsi Nmihtakws ohəkek, nit elehik tan mihit ocipəmawso nhəkek.
58Nit wət həpan tan weci pənekwesitpən spəmkik. Skat tetpiw kəmitakwsowa otəlimicititpən mana penekwikpən pakətakəmikw, təli mehcinhətopənik. Nekəm tan micit nhək askəmawsoc.
59Sesohs onəstəhmənəl nihtəl kekwseyal himiyewikwamək, toci tan etlikehkihkemit Cepəlniyəmk.
60Nit tehc ktanakwsowək tanik kisi kehkimocik ohəkek, tan toci notəmotihtit nihtəl, kəlosowakənəl, itəmotowək: Mətowew kəlosowakən nit; Wenəpal kisi ciksətək?
61Kenok Sesohs wecikcicihtawk ohəkek tanik weci kisi kehkimocik ohəkek otəlimamselewestotiniya ociyot kəlosowakən 'tiya: Nit nit tehc napiskwahmatiyekw?
62Tanəpəl nəmihehkw pəmawsowin 'Kwəssəl otəliwonakihan tan təmk eyitpən?
63Kehtakws nət tan pemawsowihowet. Mhək skat wicokekemwiw. Nihtəl kəlosowakənəl tanil yoholekwil, nihtəl təkeh kehtakwsikil, tehna pəmawsowiwəl.
64Kenok kilowaw ankwəc kətama kolamsətəmoniyal. Ipəcəl Sesohs okociciya amskwahsete wecehtakemək tan yəhot skat welamsətəmo tilikwihi, tehna iyo tanil ehkinowehlihcil.
65'Tiya: Nit tehna weciholekwpən, skatəc wen kisi ikəhew nhəkek skat ocilelmoksikw Nmihtakws.
66Akimte nit wesowi apasititpən ktanakwsititpən, tanik wici kisəkekimocik ohəkek, kətama, akwamk tələmi wicewawiwal.
67Nit tehc Sesohs iyalhat nisankoso weswiweskacihi: Kilowaw na kəti maciyapasipa?
68Simo Piyel 'tasitemal: Nsakəmamən wenəcalo ohəkek elapasiyek? Kil eyyin kəlosowakənəl askəmawsowakəneyal.
69Tehna nilon nolamsətəmotinen nkəcicitonenen kil. Kelowəsit wewesinoməl.
70Sesohs 'tasitema: Skat nil kisimkənəlopapəs kilowaw nisankosiyekw? Kilowaw peskw məcəhant.
71No oskowiman Sotahəl Iskaliyotəl, Simo 'kwəssəl, tanəc wət ehkinowehlat wət nət peskw nisankosicik wesiweskacihi.
Voafantina amin'izao fotoana izao:
Wikhikən 6: PQM2014
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Maliseet Gospel of John © Canadian Bible Society, 2014
