Ipakilya 37
37
1N’alwaṉi Yakob gô ntye yi Kanaan, gô ntye y’alwanyô ne reri yè ôgènda.
2Siṉo ne imbamba si Yakob.
Yôsèf dwaṉa p’igôm̃i ny’impum̃a n’impum̃’ôrwageṉô g’ôṉèro wè, anyezagi yè ôlemba n’awareri yè; ômwaṉa wiṉo avegagi n’awaṉ’aṉôm̃e wi Bilya, n’awaṉ’aṉôm̃e wi Zilpa, y’ômwantô wa reri yè. N’aṽagi Yôsèf ôsam̃u ômbe gôre reri yaô. 3Ndô Israèl arondi Yôsèf vyagaṉô n’awaṉi wè am̃ori, konde nè ayaṉi yè ayè twa pe mbôlô, n’avanginyè yè ôrôgôsambala w’ôboy. 4Ndô gw’ayeṉ’awareri yè inè, reri yaô arondi yè vyagaṉô na waôdu, w’aṉumbi yè; wi pa jolye gô kamba na yè mbyambye.
5N’ayinô Yôsèf nyinô, n’arakilyi yè yô gôr’awareri yè, n’arô numbi waô yè pôlô. 6N’awulinyi yè waô inè: Sambô, vôganyôṉi nyinô yiṉo yi re myè jinô pa! 7Azwè akôrag’ata gô ntyaga, na vôna, iti nyam̃ ny’aṉongwa agum̃aṉa gôre, n’ati maṉi m’apingwavingwa nyô avuraṉa mbè gô nyô. 8N’awareri yè w’awulinyi yè inè: Ô be penda gôre zwè? Ô be pangiṉa zwè? N’arô numbi waô yè pôlô, g’ômwanja w’inyinô‐sè na g’ômwanja w’agambi mè.
9N’arô jinô yè nyinô nyèṉè, n’arakilyi yè yô gôr’awareri yè. Awulyi yè inè: My’are jinô pe nyinô nyèṉè! Na vôna, nkômbe, n’ôgwèli, n’igôm̃i ny’igègèṉi n’ôgègèṉ’ôm̃ori y’apuraṉa mbè g’ôzô wam̃. 10N’arakilyi yè yô gôre reri yè na gôr’awareri yè. N’azèmbyô yè ne reri yè, awulinyè inè: Inyinô siṉo si re wè nyinô pa si pivya sè? Myè ni ngi yo, n’awareri yo, azwè be bya, ko zwè puraṉa mbè g’ôzô wô? 11N’awareri yè w’ayeṉi ñandi g’ômwanji wè, ndô reri yè avig’agamba miṉo gô jônginya mô.
12N’agèndi awarerè wi Yôsèf gô Sikèm, gô nyez’ôlemba wa reri yaô. 13N’awulinyi Israèl Yôsèf inè: Awareri yo wi zele gô nyez’ôlemba gô Sikèm? Yôgô, mi bele tôm̃o gôre waô. N’awiṉizi yè inè: Vôna, myè wiṉo! 14N’awulinyô yè ne Israèl inè: Kokolo, gènda ko jeṉa twa pa awareri yo wi re mbyambye, na twa pa kè ôlemba wi re mbyambye, ko wè baga myè ntyangô. Yeṉo arôm̃yè yè g’ôdèdè w’Ebron, n’agèndi Yôsèf gô Sikèm. 15N’alataṉi yè n’ôma, gw’awôlangaṉagi yè gw’intyaga. Aṽambyô yè n’ôma mè inè: Ô but’ande? 16N’awiṉizi Yôsèf inè: Mi but’awareri yam̃; kokolo, reva myè mbôra yi nyeza waô ôlembi waô. 17N’awulyi ôma inè: W’adubwi avila vèṉo, konde my’ayogyô wi bulya inè: Azwè ga gèndeṉi gô Dôtan. N’agèndi Yôsèf gô sông’awareri yè, n’alèngi yè waô gô Dôtan.
18N’ayeṉi waô yè davadavye, n’ayè zèvyaga ro pyèrè gôre waô, w’awôndi môndo gô jôṉè. 19N’awulyaṉi waô inè: Vônaṉi ôma wi jinô inyinô, ayè woṉo e bya. 20Sambô yôgôṉi, azwè ga yôṉeṉi yè, ko zwè falè gw’iṽemba, ko zwè bulya inè, anyô ne nyam̃a mbendi, ko zwè jeṉare nte be tw’inyinô sè. 21N’ayogyô Rubèn igamba, n’azunginyè yè avila gw’ago maô. N’awulyi yè inè: Azwè ga rige ayôṉè. 22N’awulinyô waô ne Rubèn inè: Avôvizaṉi du ntyiṉa, ndô walaṉi yè gw’iṽemba nyiṉo nyi re gw’itôve ko aralyaṉ’ôgo gôre yè. Avegagi ni môndo gô bele sungiṉè avila gw’ago maô, gô fwiṉizè gôre reri yè.
23N’arweṉi gw’aṽyeṉi Yôsèf gôr’awareri yè, w’azôruṉi yè ôrôgôsambali wè, ôrôgôsambala w’ôboy, w’avegôgô yè bora pa. 24N’agôti waô yè, awelè gw’iṽemba. Iṽemba nyiṉo ny’avegag’irevô; e re pegeg’aṉingô gô nyô. 25Avila vovo alwaṉi waô baru gô nya. N’arômbiṉi waô antyo, ayeṉi waô nkondo yi Yismaèl mbyaga avila gô Galaad; ikamèli saô s’avegagi twaṉizô pe yom̃a yi nkangô, ni bôme, ni mira y’arwaṉôgô waô gw’Egipt. 26N’awulinyi Yuda awareri yè inè: Ôba nde wi be dèngô zwè gô jôṉ’ômwareri yazô na gô jumbuṉe ntyiṉi yè? 27Yôgôṉi, azwè ga gôle yè gôre mongi Yismaèl, ko zwè araly’ago gôre yè, konde ayè mwô’ngi yazô, n’ôzôṉe wazô. N’avôganyô yè ne awareri yè. 28Gw’avyagaṉ’igôlisi yi Madyan, aluri waô avandize Yôsèf avila gw’iṽemba, n’agôli waô yè vo agôm̃i mi sika ambaṉi gôre mongi Yismaèl, n’arwaṉi waô yè gw’Egipt.
29N’aṽyeṉi Rubèn g’iṽemba, na vôna, Yôsèf e re pegege g’iṽemba; n’ayôkuṉi yè ingoy sè. 30N’awinyi yè gôr’awareri yè, awulya inè: Ômwaṉa e zele nyèṉè gôgô! Na myè, mi be kènda na gweṉi? 31N’awongi waô ôrôgôsambala wi Yôsèf, n’ayôṉi waô mbôṉi, avundy’ôrôgôsambala gô ntyiṉa. 32N’arwaṉizi waô ôrôgôsambala w’ôboy gôre reri yaô, awulinyè inè: Vôna, wiṉo azw’adènga wô! Myare vendetwa wiṉo ne ôrôgôsambala w’ômwaṉi wo, ntyo aranga wô.
33N’amyenyô wô ne Yakob, awulya inè: Wiṉo ne ôrôgôsambala w’ômwaṉi wam̃! Are nyô pa ne nyam̃a mbendi! Yôsèf are jaruṉô p’imbèy. 34N’ayôkuṉi yè ingoy sè; n’aṉwaṉi yè pinde g’ôni wè, n’alwaṉi yè iwoga ny’ômwaṉi wè ôling’ôla. 35N’aṽyeṉ’awaṉi wè aṉôm̃e waôdu, n’awaṉi wè antô waôdu gô sindyè, ndô e pa jivira gô sindyô. N’awulyigi yè inè: Mi be sum̃iṉa n’edingô z’ômwaṉi wam̃ gôre mongi wi re juwa pa! N’aleṉagi yè ômwaṉi wè.
36Ndô mongi Madyan w’agôli yè gw’Egipt gôre Pôtifar, yôfisyè yi Faraô, egogi z’isozè.
Voafantina amin'izao fotoana izao:
Ipakilya 37: MYE
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Published by the British and Foreign Bible Society in 1927.