PALABURU 4
4
I Kai pai Abeli
4:1-16
1Ungka lairia maroo-roomo i Adama pai rongonya i Hawa, bareʼe masae mongkenimo i Hawa setu. Napoana sambaʼa ana tuama, natoʼo, “Ua kapuru ndaya i mPue yaku maratamo sambaʼa ana tuama.” Napapotoʼoka ananya setu i Kai. 2Nepa napoana woʼu sambaʼa ana tuama, toʼonya i Abeli. I Abeli mewali topongkambi bimba, paikanya i Kai mewali topojamaa. 3Ri anu sangkani natima i Kai santila ungka ri pandatanya nepa napanyombaka ri Pue. 4#Ib. 11:4 I Abeli woʼu natima ana bimbanya anu uyue anu bereʼe posarinya nasambale, nepa nasampa pai waʼa anu madago inceʼe anu napanyombaka ri Pue. Ndapokawongko i mPue i Abeli pai panyombanya, 5paikanya bareʼe ndapokono i Kai pai panyombanya. Inceʼe painaka majaʼa raya i Kai tongawa ri kamapodi lionya. 6Inceʼe painaka ndatoʼo i mPue ri Kai, “Wenu painaka majaʼa rayamu? Pai tongawa ri kapodi liomu? 7Ane madago powiamu, manoto siko da tekalumiri yau; paikanya ane majaʼa powiamu, salaa tumundamo da mesua ri rayamu. Salaa setu inceʼe anu da mamparenta siko, paikanya siko sangaya-ngaya da mompari-mpari da naka nunangi siʼa.”
8 #
Mat. 23:35, Luk. 11:51, 1 Yoh. 3:12 Nepa natoʼo i Kai ri tuaʼinya i Abeli, “Maʼimo takanjoʼu ri bonde.” Kajela ntau seʼe njairia, nabobaki i Kai tuaʼinya i Abeli napepate.
9Meoasi i Pue ri Kai ndatoʼo, “Mbeʼimo tuaʼimu i Abeli?”
Mesono i Kai natoʼo, “Bareʼe kuincani. Ara yaku da mampotiana tuaʼiku?”
10 #
Ib. 12:24
Nepa ndatoʼo i mPue, “Ara wenu painaka nuwianaka anu majaʼa setu? Daa ntuaʼimu meboo ri yaku ungka ri tana, ewa oni nganga anu meboo merapi da ndapesawaka. 11Siko tetadeasi painaka bareʼemo maya da mampotetalaka tana. Tana setu mamposimo daa ntuaʼimu, jaʼewa mekunganga siʼa maomo daa ntuaʼimu setu ri tempo nupampepate siʼa. 12Ane nupomuya pinamuya ri tana, tana bareʼemo da mawai bara nunjaa-njaa sili lengemu; siko da mewali topowelua pai bareʼemo reʼe da kareʼe mpearimu ri wawo lino.”
13Natoʼo i Kai ri Pue, “Popahuku setu manee gaga, bareʼe da kukoto mangangkoyo. 14Komi mangairi yaku ungka ri tana seʼi, lawamo ungka ri suarami. Yaku da mewalimo tau topowelua anu bareʼemo reʼe da kareʼe mpeariku ri lino, pai yaku da napepate isema ntano anu mangarata yaku.”
15Paikanya ndatoʼo i mPue, “Bareʼe. Ane siko ndapepate, da kupesawaki papitu tau da ndapepate tesuamo pai tau anu mampepate siko.” Roo setu ndadika i mPue petondoni ri Kai da naka bara isema ntano anu momberata pai siʼa neʼe napepate. 16Nepa malai i Kai ungka ri suara i mPue, maroo-roomo ri tana anu mampotoʼo “Powelua” ri tondo pebetea bonde mParadesi.
Muli i Kai
4:17-24
17I Kai pai rongonya marata ana tuama anu napapotoʼoka i Heno. Ungka lairia nabaresi i Kai sambaʼa kota, pai kota setu napapotoʼoka toʼo ananya. 18I Heno mampoana i Ira. I Ira mampoana i Mehuyaeli. I Mehuyaeli mampoana i Lame. 19I Lame radua rongonya sambaʼa toʼonya Ada, anu sambaʼa woʼu toʼonya i Sila. 20I Ada mampoana Yabali, muli i Yabali inceʼemo waʼa ntopongkambi anu maroo-roo ri raya ngkema. 21Tuaʼinya mampotoʼo Yubali, pai muli i Yubali inceʼe anu loʼe modunde pai mosanggona. 22I Sila mampoana i Tubalikai, waʼa mulinya anu loʼe mampowia parewa ungka ri tambaga pai besi. Tuaʼi i Tubalikai anu weʼa toʼonya i Naama.
23Natoʼo i Lame ri rongonya anu radua setu,
“Ada pai Sila, pedongeka!
Sambaʼa ngalitau kupepate ua
mawelaimo yaku.
24Ane papitu tau ndapepate da
mampesawaka pampepate i Kai,
papitu mpuyu papitu tau da ndapepate
ane yaku ndapepate.”
I Seti pai Enosi
4:25-26
25I Adama pai rongonya marata woʼu sambaʼa ana tuama. Natoʼo i Hawa, “I Pue Ala mawaika yaku sambaʼa ana tuama mewali sawani i Abeli, anu roo napepate i Kai.” Inceʼe painaka napapotoʼo i Hawa ananya setu i Seti. 26I Seti mampoana sambaʼa ana tuama anu napapotoʼoka i Enosi. Montepuʼu ungka ri tempo setu tau mampeboo toʼo i mPue ane mawianaka panyomba.
Voafantina amin'izao fotoana izao:
PALABURU 4: LAIPMF
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra